LINUGDANG

Ang naglutawlutaw nga mga partikulo nga mounlod ug molugdang sa ilalom sa sudlanan kon ang bino pasagdan nga dili matugaw. Sa Kasulatan kini nga termino makita sa lima ka higayon, nga kanunayng plural (Heb., shema·rimʹ). Kini sagad nga gihubad ingong “lalog” sa mga maghuhubad sa Bibliya. Ang maayong bino nga ‘gipalugdang’ sa dugayng panahon mahimong tin-aw, isog, ug tanglas. (Isa 25:6) Sa laing bahin, kon ang bino nga dili maayo sa sinugdan pa tungod kay dili maayog kalidad ang gigamit nga ubas pasagdan nga molugdang, ang lami o ang baho niini dili moarang-arang, mga kamatuoran nga gitumong sa mga manalagna diha sa ilang mga ilustrasyon. (Jer 48:11; Sof 1:12) Dugang pa, diha sa mahulagwayong pagkasulti ang salmista nag-ingon nga ang “tanang daotan sa yuta” pugson sa pagpainom sa kopa sa kasuko ni Jehova, sa pagtiti sa mga linugdang hangtod sa kataposang mapait nga tinulo niini.​—Sal 75:8; itandi ang Eze 23:32-34; tan-awa ang BINO UG ILIMNONG MAISOG.