Ang Hunahuna sa Bibliya

Ang Diyos ba Nagabadlong sa Pag-inom ug Alkoholikong Ilimnon?

‘KALIMTI ang cocaine, heroin, LSD, ug marijuana​—ang alkoholikong ilimnon mao gihapon ang dakong demonyo nga bugnoonon sa sosyedad. Ang alkoholikong ilimnon nakapahinabo ug mas daghang kamatayon ug sosyal nga kagun-oban labaw kaysa tanang ubang mga droga.’ Mao kini ang mga sentimento nga gipahayag diha sa ika-31 matag-tulo ka tuig nga kombensiyon sa World’s Woman’s Christian Temperance Union sa Canada duha ka tuig nga milabay.

Nakita sa mga delegado diha sa nagatubo nga pag-inom ug alkoholikong ilimnon sa tibuok-kalibotan ang ngilngig nga kapildihan sa tawhanong panglawas ug kinabuhi, ingon sab ang minilyong dolyares nga mahimong gugolon matag-tuig sa nasodnong kagamhanan sa pagpukgo sa alkoholismo. Kay kombinsido nga ang Diyos nagabadlong sa nabatasang pag-inom niana, daghang maayog-tuyo nga mga tawo nangatarongan pabor sa pagbando sa tanang makahubog nga ilimnon. Apan ang Bibliya ba nagapaluyo niining panlantawa?

Gamit sa Bino Diha sa Bibliya

Sa karaang panahon ang Diyos nagsaad sa iyang matinumanon nga katawhan: “Ang inyong mga kamalig sa abiyo mapuno sa kadagaya; ug uban sa bag-ong bino ang inyong kaugalingon nga mga pigsanan magaawas.” (Proverbio 3:10) Oo, siya ang Usa nga nagahatag kanato sa nagapamungang parras, nga nagatagana pag mga organismo sa igpapatubo nga moputos sa ubas samtang magakaduol ang panahon sa pagbuhat ug bino.

Ang proseso sa pagbuhat ug usa ka maayong bino sa bahin gipahayag sa propeta sa Diyos nga si Isaias. Sa pasiunang paglantaw sa mga panalangin sa umaabot nga bag-ong kalibotan sa pagkamatarong, si Isaias nagsulat: “Si Jehova sa mga panon sa tino magahimo alang sa tanang katawhan . . . usa ka kombira sa bino nga hinuptan diha sa mga palugdangan . . . sa bino nga tinago diha sa mga palugdangan, nga initos.” (Isaias 25:6) Ang mga sinati nga magbubuhat sa bino nahibalo nga ang binong “tinago sa mga palugdangan,” nga wala matugaw sa taas nga yugto sa panahon samtang nagabahal, sa inanay matin-aw sa iyang kaugalingon, nga magapauswag sa kahumot ug kalami.

Kalipay ug Benepisyo sa Panglawas?

Ang Diyos naglaraw sa kalipay ug sa kaayohan sa panglawas nga mabatonan gikan sa bino. Ang iyang propeta nga si Jotham nagsulti bahin sa “bag-ong bino nga makapahimo sa Diyos ug sa mga tawo nga masadya.” (Maghuhukom 9:13) Si Haring Solomon nagsulat bahin sa ‘kalingawan sa iyang unod pinaagi sa bino.’ (Ecclesiastes 2:3) Ug didto sa iladong asoy sa kombira sa kasal sa Cana, si Jesus, sa iyang unang milagro, naghimo sa daghang tubig ngadto sa “ang pinakamaayong bino,” sa kalipay sa mga bisita sa kasal.​—Juan 2:6, 7, 10, The New English Bible.

Ang pag-ila ni Jesus sa medikal nga gamit sa bino dayag diha sa iyang ilustrasyon bahin sa matinagdanon nga Samaritanhon. Nga gibendahan ang mga samad sa naangol nga tawo, ang matinagdanon nga Samaritanhon nagbubo ug “lana ug bino” sa mga samad. (Lucas 10:30-34) Ang sugyot ni apostol Pablo sa batan-ong Timoteo sa ‘paggamit ug diyutay nga bino alang sa iyang kutokuto ug sa iyang kanunay bationg sakit’ maayong pagkaharmonya sa modernong kahibalo sa diyeta ug medikal nga kaayohan sa bino​—1 Timoteo 5:23.

Si Dr. Salvatore P. Lucia, kanhi propesor sa University of California School of Medicine, nagpahayag diha sa iyang librong Wine and Your Well-Being nga ang “bino [maoy] dili lang ang kinakaraanang pandiyeta alkoholikong ilimnon kondili ang labing importanteng gamit sa panambal nga makanunayong gigamit sa tibuok kasaysayan sa tawo.” Ug ang tigdukiduki sa nutrisyon nga si Janet McDonald miingon nga ang bino nga imnon sa kasarangang gidaghanon morag epektibo ingong usa ka pangpakalma, pangpagana sa kaon, ug motabang sa paghilis ug sa pagpatuhop sa mga minerales sa gikaong pagkaon.

Pagkakasarangan ug Pagpugong-sa-Kaugalingon Kinahanglan

Ugaling, bisan pa sa maong paborable nga mga reperensiya sa bino ug makahubog nga ilimnon diha sa Bibliya ug sekular nga medisina, ang pag-abuso sa alkohol nakapahinabo ug teribleng kaalaotan sa daghang katawhan. Kana ba nagpahimo sa Diyos nga maoy responsable alang sa tanang kaalaotan nga misangpot sa di-eksaktong paggamit sa alkohol? Sa kasukwahi, diha sa iyang Pulong, ang Bibliya, siya naghatag ug kompletong giya nga magadumala sa paggamit ug sa pag-abuso sa bino.

Hunahunaa, pananglitan, ang mosunod kusganon nga pasidaan batok sa pag-abuso ning gasaha: “Ayaw pagtipon taliwala sa mga palainom sa bino, taliwala kanila kinsa mapatuyangong-mokaon ug unod.” Tinuod wala kini magkahulogan nga ang mga palakaon lamang ug utanon ang kahimut-anan sa Diyos, ni ang teksto nagasaway kanila nga nagagamit ug diyutay nga bino o nagakaon ug karne sa kasarangan. Hinuon, ang Bibliya nagapasidaan batok sa hinobrang pagpatuyang pareho sa pagkaon ug pag-inom. Kini dayag samtang ang laing proverbio nagaingon: “Kinsa man ang may kaalaotan? Kinsa man ang dili mahimutang? Kinsa man ang may panagbingkil? Kinsa ang may kabalaka? Kinsa ang may samad sa walay hinungdan? Kinsa ang may kalubog sa mga mata? Sila nga nanagpabilin ug taas nga panahon uban sa bino.”​—Proverbio 23:20, 29, 30.

Ang mga magsusulat sa Bibliya nga sila Pedro ug Pablo nagpahimangno ug pagkasarangan pinaagig pagtambag sa sayong mga Kristohanon sa paglikay sa “hinobrang bino” ug dili “pagkahubog sa bino.” Kining pahinumdom kinahanglang dawaton nga ugdang, kay nagpasidaan ang apostol: ‘Ang mga palahubog dili makapanunod sa gingharian sa Diyos.’ Sa laing pagkasulti, ang nagabatasan sa pag-abuso sa alkoholikong ilimnon walay pag-uyon sa Diyos ug mapakyas sa pagkabaton sa kinabuhing dayon.​—1 Pedro 4:3; Efeso 5:18; 1 Corinto 6:9, 10.

Busa, kon ang usa kulang sa pagpugong-sa-kaugalingon diha sa pag-inom ug maisog nga ilimnon, sila angay nga molikay niana sa bug-os. (Itandi ang Mateo 5:29, 30.) Gawas pa sa kadaot sa panglawas, ang nagadugang nga kagiyan sa alkoholikong ilimnon makapahinabog seryosong espirituwal nga kadaot. Mao nga, ang Diyos sa maalamon nagpasidaan kanato batok sa hinobrang pagpatuyang sa alkoholikong ilimnon.

Kasukwahi sa punto de vista sa mga nagadumili, ang Bibliya wala magbaod, o bisan magatudlo, sa bug-os nga pagdumili sa bino o alkoholikong ilimnon alang sa tanang tawo. (Deuteronomio 14:26) Ang salmista nagsulti bahin kang Jehova: “Siya nagapatubo ug balili alang sa kahayopan, ug sa bunglayon alang sa pag-alagad sa tawo, aron siya makahimo sa pagkuha ug makaon gikan sa yuta, ug sa bino nga makalipay sa kasingkasing sa himalatyon nga tawo.” Tinuod, ang Diyos nakatudlo sa bino alang sa maayo ug halangdon nga katuyoan, sa dihang imnon sa kasarangan.​—Salmo 104:14, 15.

[Picture Credit Line sa panid 26]

L’ Absinthe by Edgar Degas, 1877​—E.R.L./​Sipa Icono