SATRAPA

Usa ka gobernador sa usa ka lalawigan sa mga imperyo sa Babilonya ug Persia nga gitudlo sa hari ingong pangulong magmamando sa usa ka sakop nga distrito. Si Daniel naghisgot ug mga satrapa nga nag-alagad ubos kang Nabucodonosor diha sa Imperyo sa Babilonya. (Dan 3:1-3) Human sakopa sa mga Medianhon ug mga Persianhon ang Babilonya, si Dario nga Medianhon nagtudlog 120 ka satrapa ibabaw sa iyang tibuok nga gingharian. (Dan 6:1) Si Esdras nakiglabot sa mga satrapa sa panahon ni Haring Artajerjes sa Persia. (Esd 8:36) Sa mga adlaw ni Ester ug Mardokeo, gidumala sa mga satrapa ang 127 ka sakop nga mga distrito ubos sa Persianhong hari nga si Ahasuero. (Est 1:1) Ingong opisyal nga mga hawas sa hari, sila manubag kaniya ug libreng makaduol kaniya. Busa, sila adunay dakong impluwensiya ug gahom ingong sibil ug politikanhon nga mga pangulo. Sila mangolekta ug mga buhis ug maghatod sa gipangayong tributo ngadto sa palasyo sa hari.

Ingong usa sa tulo ka hataas nga mga opisyal ubos ni Dario nga gitudlo ibabaw sa 120 ka satrapa, si Daniel milabaw kanilang tanan, gani buot sa hari nga ituboy siya ibabaw sa tanan diha sa gingharian. Tungod kay sila nasina, ang mga opisyal ug ang mga satrapa naglaraw ug daotan aron ikatambog si Daniel ngadto sa usa ka gahong sa mga leyon. Ang Bibliya wala mag-asoy kon pila ka satrapa ang personal nga miakusar atubangan sa hari. Apan si Jehova nag-uban kang Daniel ug nagpadala sa iyang manulonda aron sa pagtak-op sa mga baba sa mga leyon. Dayon kini nga mga opisyal nga nagbutangbutang kang Daniel, uban sa ilang mga asawa ug mga anak, gipatambog ni Dario ngadto sa gahong aron patyon sa mga leyon.​—Dan 6:1-24.

Bahin sa pag-organisar ug mga satrapa ubos ni Ciro nga Persianhon, ang librong History of the Persian Empire nag-ingon: “Ang matag usa [ka lalawigan] gimandoan sa usa ka satrapa kansang titulo sa literal nagkahulogang ‘tigpanalipod sa Gingharian.’ Ingong manununod sa usa ka kanhing hari, nga nagmando sa dako kaayong teritoryo, siya sa pagkatinuod maoy usa ka monarko nga may gamay nga harianong palasyo. Dili lang kay gihuptan niya ang sibil nga administrasyon kondili siya mao usab ang komandante sa mga sundalo sa satrapa. Kon adunay manununod sa iyang katungdanan, dili mahimong pasagdan lang ang hulga ngadto sa sentral nga awtoridad. Aron mapugngan kini nga hulga, ang pipila ka pagkontrolar gipatuman; ang iyang sekretaryo, ang iyang pangulong opisyal sa panalapi, ug ang heneral nga tinugyanan sa garison nga nahimutang sa kuta sa matag kaulohan nga gipangulohan sa mga satrapa gipailalom sa direktang pagmando sa dakong hari mismo ug personal nga moatubang kaniya. Dugang pang epektibong pagkontrolar ang gipatuman pinaagi sa ‘mata sa hari’ (o ‘dalunggan sa hari’ o ‘mensahero sa hari’), [usa ka opisyal] kinsa sa matag tuig mohimog maampingong pagsusi sa matag lalawigan.”​—Sinulat ni A. T. Olmstead, 1948, p. 59.