DAKONG LINALANG SA DAGAT

Kini mao ang kasagarang hubad sa Hebreohanong pulong nga tan·ninʹ (tan·nimʹ, ‘dakong linalang sa dagat’ sa Eze 29:3 ug “dakong linalang sa kadagatan” sa Eze 32:2). Kini nga termino gihubad nga “dakong bitin” kon wala hisgoti nga anaa sa dagat o sa tubig (Jer 51:34) o sa dihang tino nga gipakita sa konteksto nga kini nagtumong sa mga bitin. (Ex 7:​9, 12; itandi ang Ex 4:​2, 3.) Sa walay duhaduha ang tan·ninʹ naglakip sa nagkalainlaing matang sa dagkong mga hayop sa dagat (Gen 1:21; Sal 148:7), apan kini nga termino kasagarang gigamit diha sa mahulagwayong diwa. Ang pagkalaglag ni Paraon ug sa iyang kasundalohan lagmit mao ang gitumong sa prase nga: “Gidugmok mo [Jehova] ang mga ulo sa dagkong mga linalang sa dagat diha sa katubigan.” (Sal 74:13) Sa Isaias 51:​9, ang “dakong linalang sa dagat” gihisgotan uban kang Rahab (ang Ehipto; itandi ang Isa 30:7) ug busa lagmit nagtumong sa Ehipto, o kaha ang gihisgotan lagmit mao si Paraon, sama sa Ezequiel 29:3 ug 32:2. Ang matinumanong si Job nangutana kon siya ba mismo maoy “usa ka dakong linalang sa dagat” nga kinahanglang butangan ug bantay.​—Job 7:12; tan-awa ang LEVIATAN.