Pagkamatarong Diha sa Pag-alagad sa Diyos sa Kamatuoran

“Tudloi ako, O Jehova, sa imong dalan. Ako magalakaw sa imong kamatuoran.”—SALMO 86:11.

HANDURAWANG ikaw nagalakaw sa umawng desyerto, nga bug-os walay buhing butang. Sa kalit ikaw mahiabot sa usa ka nindot nga balay. Kini may air condition ug kasangkapan sa pagpainit, panubo sa tubig ug kasilyas, ug koryente. Ang repriherador niini ug mga aparador punog pagkaon. Ang lawak sa silong dunay sugnod ug daghang ubang suplay. Makaingon ka bang kanang tanan nakaabot didto nga sulagma? Dili ka ba magmapasalamaton kon hangyoon ka sa tag-iya sa pagpuyo nianang balaya ug pahimuslan kana?

1, 2. (a) Sa unsang paagi ang tagana sa Diyos alang sa katawhan ikailustrar? (b) Sa unsang paagi ang Kasulatan nagabatbat sa binuhatan sa Diyos ug sa pagkamasupilon sa mga tawo?

² Aw, kining anindot nga yutang atong ginapuy-an sama gayod nianang balaya. Dugay na una lalanga ang tawo, giandam sa atong mahigugmaong Diyos kining yutaa aron mahimong atong pinuy-anan ug iyang gitagana ang tanang atong kinahanglanon sa paglipay kanato. (Isaias 45:12, 18) Dili ba angay kita magmapasalamaton niining manggihatagong Magtatagana? Siya mao ang nagdasig sa pagsulat sa mga pulong sa Bibliya sa Hebreohanon 3:4: “Hinuon, ang matag balay may nagtukod, apan ang nagtukod sa tanang butang mao ang Diyos.” Makauulaw nga gihugawhugawan ug ginalaglag sa mga tawong hakog ang binuhatan sa Diyos sa yuta.​—Deuteronomio 32:3-5.

3. Unsay ginaingon sa Bibliya bahin sa pagkamanggihatagon ni Jehova, karon ug sa umaabot?

³ Bisan sa mga kaaway sa kamatuoran, si apostol Pablo nakaingon mahitungod sa Diyos: “Wala niya pasagding siya walay pamatuod nga siya nagbuhat ug maayo, nga nagahatag kaninyo sa ulan gikan sa langit ug sa mabungahong mga panahon, nga sa katugob nagapuno sa inyong mga kasingkasing sa pagkaon ug kasadya.” (Buhat 14:17) Labaw pa gayod nga panalanginan ni Jehova kadtong nagaalagad kaniya diha sa pagkamatarong! Bisan pag kita idun-ok sa mga kalisod ug kabug-at niining “kataposang mga adlaw,” anaa ang mahimayaong paglaom nga sa duol na ang Soberano Ginoong Jehova motagana gayod sa tinuod nga kombira sa lamiang mga butang alang niadtong nahigugma kaniya, nga magapahid sa mga luha gikan sa tanang nawong.​—2 Timoteo 3:1; Isaias 25:6-8.

Ang Kahibulongang Pangutok sa Tawo

4. (a) Unsang suliran ang giatubang sa pila ka kompiyutir-siyentipiko? (b) Unsay ginaingon sa Jeremias 33:2, 3 mahitungod sa Magbubuhat sa utok sa tawo?

⁴ Sulod sa daghang katuigan, ang mga siyentipiko naningkamot sa paggamag mga kompiyutir nga tinuod mohunahuna. Apan sila karon nagaangkong sila gibabagan sa unang tikang mismo. Ngano man? Aw, sila nagaadmitar nga gipildi sila sa gambalay sa mata sa tawo. Kon dili sila makasuhid sa mata, sa unsang paagi sila makasugod sa pagsuhid sa utok, ug unsaon nila pagkopya ang katakos sa hunahuna? Kahibulongan kaayo ang utok sa tawo! Sa matag segundo, ang usa ka gatos ka milyong tipik sa impormasyon ibubo nganha niining organoha aron pagaag-agon, pagabahigbahigon, ug ipadapat diha sa intelihenteng pagkinabuhi. Ang labing maartihong kompiyutir dili gani ikatandi niana. Pagkamaayong pamatuod sa labaw nga kaalam sa mahigugmaong Diyos nga maoy nagbuhat kanato! Kita mahimong magkalipay nga ang atong Magbubuhat ug Mag-uumol, si Jehova nga Diyos, naghatag kanatog intelihensiya ug kita makagamit sa atong mga utok sa pagkahibalo sa “dagko ug dili-matugkad nga mga butang” nga iyang ginapadayag kanato diha sa iyang nahaigong panahon ug paagi.​—Jeremias 33:2, 3.

5. (a) Unsang milagro sa pagtubo ang mahitabo lamang diha sa mga tawo? (b) Sa unsang paagi nahiangay ang mga pulong ni Eliu?

⁵ Ang milagro sa utok sa tawo mosugod sa tagoangkan, nga ang mga selula sa utok mosugod pagkaporma sa tulo ra ka semana tapos sa pagsamkon. Kini kalit modaghan, nga usahay moabot sa un-kuwarto sa milyong selula sa usa ka minuto. Sa pagkatawo, ang utok sa masuso motulo ka pilo sa gidak-on sa unang tuig, nga nagapakitang kini lahi kaayo sa utok sa bisan unsang hayop, apil ang aliwas. Sa dili madugay ang tawhanong bata makakat-on sa mga pinulongan, makapangatarongan sa mga butang, makapabili sa moral nga mga isyu ug sa espirituwal nga mga prinsipyo. Nahiangay nga si Eliu miingon mahitungod sa atong Diyos ug Dakong Magbubuhat: “Siya mao ang nagatudlo kanato ug labaw kay sa mga mananap sa yuta, ug siya nagahimo kanatong labi pang maalamon kay sa nagalupad nga mga linalang sa mga langit.”​—Job 35:10, 11.

6. (a) Sumala sa Kasulatan unsay hinungdan sa kahibulongang lawas sa tawo? (b) Sa unsang paagi kita mahigugmaong makagamit sa atong hinatag-sa-Diyos nga mga gahom?

⁶ Kining kahibulongang butang, ang pangutok sa tawo, nahiuyon sa Genesis 1:27, nga nagaingon: “Gibuhat sa Diyos ang tawo sa iyang dagway, sa dagway sa Diyos iyang gibuhat siya; lalaki ug babaye iyang gibuhat sila.” Dili ba angay kita magmapasalamaton sa paagi sa pagbuhat kanato sa Diyos? Si David mapasalamaton. Iyang gidayeg si Jehova, nga miingon: “Pagadayegon ko ikaw tungod kay sa makalilisang nga paagi ako kahibulongang pagkabuhat. Ang imong mga buhat kahibulongan.” (Salmo 139:14) Dili ba nato dayegon ang atong Diyos tungod sa samang katarongan? Dugang pa, hinaot atong gamiton ang atong hinatag-sa-Diyos nga mga utok ug mga lawas sa pag-atubang sa hagit nga gibuno ni Satanas sa nawong sa atong Diyos. Kita mahimong mag-alagad kang Jehova ingong mga maghuhupot sa pagkamatarong o integridad.​—Proverbio 27:11.

Lig-ong Manghawid sa Kamatuoran

7, 8. (a) Unsang mga kalainan ang mamatikdan tali sa kamatuoran ug sa teoriya? (b) Bahin sa ebolusyon, unsa karon ang ginasulti sa mga tawong mahibaloon? (c) Nganong ang ebolusyon ilangkit sa pagkamatuohon inay sa relihiyosong pagtuo?

⁷ Ang kamatuoran kinahanglang modaog! Kitang mga nahigugma kang Jehova kinahanglang lig-ong manghawid sa kamatuoran samtang atong gamiton ang atong mga gahom sa panghunahuna sa pagpili sa dalan sa pagkamatarong. Tino na ang kamatuoran bahin sa paglalang. Kini malig-on. Kini nakabarog sa pagsulay sa mga milenyo. Sa kapin ug diyutay sa siglo, kanang dakong kabakakan, ang teoriya sa ebolusyon, andam nang ihiklin. Kini dili amoa lamang nga opinyon. Kini mao ang pagtuo sa daghang liberal-ug-kaisipang mga siyentipiko, abogado, imbestigador, ug ubang maalam nga tawo. Sa paghisgot sa hagit ngadto sa “mga prinsipyo sa ebolusyon, sumala sa gipahayag ni Darwin ug sa uban,” ang The New York Times nagsuma sa kahimtang pinaagi sa pag-ingon: “Nagubot ang nataran.” Ang usa ka mahibaloon kaayong siyentipiko misulat: “Adunay dagko kaayong mga lungag sa ebidensiya sa ebolusyon. . . . Oo, ang ebolusyon maoy teoriya lamang. Nan, ang pagtuo sa ebolusyon maoy usa ka buhat sa tinoohan.”

⁸ Apan ang pagtuo ba sa ebolusyon tinuod nga usa ka buhat sa tinoohan (faith)? Hinuon, kami moingong kini usa ka buhat sa pagkadaling-motuo. Ang tinoohan (faith) dunay malig-ong patukoranan. Ang Hebreohanon 11:1 nagasulti kanatong kini mao “ang dayag nga pasundayag sa tinuod nga mga hitabo.” Ang ebidensiya nga ang rekord sa Bibliya gipasukad sa tinuod nga mga hitabo ug maoy kamatuoran daghan kaayo. (2 Timoteo 3:16, 17; Roma 15:4) Sa laing bahin, sa dugang magsusi ang mga ebolusyonista sa mga butang, sa dugang ilang madiskobrehan ang mga panagsumpaki nga ilang gipaningkamotan sa pagpakamatarong alang sa daling motuo.

Naglungtad ba ang mga Aliwas-Tawo?

9. Unsa ka daghan ang mga fossil sa aliwas-tawo, ug angay kana sa unsang dapit?

⁹ Sa 130 ka tuig nga pagpangitag mga fossil sa nawalang dugtong tali sa aliwas ug sa tawo, ang mga ebolusyonista nakapatunghag diyutay ra intawong mga bukog. Sumala sa magasing Science Digest, “ang tanang pisikal nga ebidensiyang atong nabatonan dapig sa tawhanong ebolusyon ikabutang gihapon, nga may lugar pa, sulod sa usa ra ka lungon!” Sa walay duhaduha, kana ang dapit sa giingong ebidensiya nga dinukdok pag-ayo ang mga lansang sa tabon sa lungon!

10. Unsa ka matinud-anon ang mga dibuho sa mga dibuhista sa “mga aliwas-tawo”?

¹⁰ Kadtong mga larawan sa magasin sa mga aliwas-tawo nga gigamit sa pagpaluyo sa teoriya sa ebolusyon mao lamay hinanduraw, nga gidibuho pinasukad sa pila ra ka gagmayng tipik sa bagulbagol o bukog sa apapangig. Pananglitan, sa panid 1 sa The New York Times sa Agosto 16, 1985, mipatim-aw ang “paghulad sa dibuhista sa Amphipithecus, ang labing unang nailhang mas taas nga aliwas . . . nga gikan niana mitungha ang mga tawo,” nga nagpakita sa buhokan nga ulo ug mga kamot. Gikan sa unsa nga kadto gidibuho? Matud sa nag-ubang artikulo: “Ang likod nga bahin sa ubos nga apapangig . . . uban sa tipik sa atubang nga apapangig nga nakaplagan katunga sa siglo nga miagi.” Apan ang kompletong ulo, buhok ug tanan, madibuho ba pinasukad sa duha ka tipik sa bukog? Ang artikulo mikutlo sa usa ka antropologo sa Harvard University ingong mitawag sa maong mga fossil nga “lanaw sa kahayag sa mga akreng kangitngitan.” Apan mahimo ba gayod kanang itumbas sa kahayag?

11. Sa unsang paagi ang Isaias 59:15 ikapadapat maylabot sa gitawag mga aliwas-tawo?

¹¹ Ang tawgon tingali sa pipila nga laing ingong “lanaw sa kahayag” mao ang bagulbagol sa Piltdown man. Kana miokupar sa sentro sa entablado sa ebolusyon sulod sa mga 40 ka tuig apan nayagyag sa 1953 ingong gitapo nga mga tipik sa bukog, nga ang pila iya sa hayop ug ang uban sa tawo, nga malimbongong gitapo ingong usa ka panglingla! Sa mga pulong ni propeta Isaias, kini ikaingon bahin sa maong teoritikanhong mga aliwas-tawo: “Ang kamatuoran napamatud-ang nawala.”​—Isaias 59:15.

Usa ka Matagnaong Kasamahan

12. Unsang dulumtanang mga butang ang nakita ni Ezekiel?

¹² Ang dili-diyosnong Kakristiyanohan karong adlawa gilandongan sa dili-matinumanong Jerusalem sa karaang panahon. Maoy sa tuig 612 W.K.P. nga gihatag sa Soberano Ginoong Jehova kang Ezekiel ang usa ka panan-awon nga niana Iyang gidala ang Iyang propeta sa Jerusalem gikan sa Babilonya. Didto, sa sawang sa templo, nakita ni Ezekiel ang dulumtanang simbolo sa idolatriya. Sunod gipalungagan kaniya ni Jehova ug gipadak-an ang usa ka lungag sa paril. Dayon siya miingon kang Ezekiel: “Sulod ug tan-awa ang daotan ug dulumtanang mga butang nga ilang ginabuhat dinhi.” Unsay iyang nakita? Aw, sa sulod nga mga lawak sa balay ni Jehova sa pagsimba, “diha ang tanang hulagway sa nagakamang nga mga butang ug makaluod nga mga mananap, ug ang tanang dulumtanang diyosdiyos sa balay sa Israel, nga ang kinulit diha sa bungbong sa palibot.”​—Ezekiel 8:1, 7-10.

13. (a) Unsang samang kahimtang ang nagalungtad sa Kakristiyanohan karong adlawa? (b) Unsay pag-isip ni Jesus sa talaan sa paglalang sa Bibliya?

¹³ May kasamahan niining panan-awona, atong makita ang makalilisang nga kahimtang taliwala sa klero sa Kakristiyanohan karong adlawa. Sa kinadak-ang bahin, kining “tawo sa kalapasan” nagsalikway sa asoy sa Bibliya sa paglalang. (2 Tesalonica 2:3) O, sama sa mga apostata sa adlaw ni Ezekiel, ang klero naningkamot sa pagsagol sa ebolusyon ug sa Bibliya, nga nag-ingong ang unang mga kapitulo sa Genesis nalangkoban sa kasugiran o pasumbingay. Nga wala magtagad sa siyentipikanhong panultihon nga ang labing yanong katin-awan kadaghanan mao ang matuod, sila nagaingong ang asoy sa Bibliya inosentehon kaayo alang kanila. Tungod sa ilang mapaburotong mga pangutok kinahanglan nila ang labi pang maartihon ug komplikado. Ginapataas nila ang ilang kaugalingon labaw kang Jesu-Kristo, kinsa nagtawag sa literal nga asoy sa Genesis ingong “kamatuoran.”​—Juan 17:17; Mateo 19:4-6.

14. Sa unsang paagi ang “mga ansiano” karon napakyas sa pagpanguna sa ilang mga panon, ug unsa unyay sangpotanan?

¹⁴ Sa iyang panan-awon, nakita ni Ezekiel ang “kapitoan ka lalaki sa mga ansiano sa balay sa Israel” nga nagsimba atubangan sa maong mga hulagway sa “nagakamang nga mga butang ug sa makaluod nga mga mananap.” (Ezekiel 8:10, 11) Kini ikatandi sa modernong-adlawng mga klerigo nga dayag nagaangkong ang tawo naggikan nianang mga mananapa! Kining “mga anisano” angay magapanguna sa ilang mga panon sa dalan sa kamatuoran. Apan dili ba ang kabatbatan ni Jesus sa Mateo 15:14 mapadapat kanila? Si Jesus miingon: “Sila mga magtutultol nga buta. Nan, kon ang usa ka tawong buta magatultol sa usa ka tawong buta, silang duha mahulog sa gahong.” Ilang makaplagan ang maong gahong diha sa “mga akre sa kangitngitan” diin ang mga ebolusyonista nagakarapkarap.

15. Sa unsang paagi ang ebolusyonaryong mga klerigo nagahatag ug dugang pamatuod sa pagkabahin sa “tawo sa kalapasan”?

¹⁵ Sunod gipangutana ni Jehova si Ezekiel: “Nakita mo ba, Oh anak sa tawo, kon unsay ginabuhat sa mga ansiano sa balay sa Israel sa kangitngitan, ang matag usa diha sa sulod nga mga lawak sa iyang pasundayag? Kay sila nagaingon, ‘Si Jehova dili makakita kanato. Si Jehova mibiya sa yuta.’” (Ezekiel 8:12) Ang mga klerigo nga nagtuo sa tawhanong mga pilosopiya nagahatag ug susamang pamatuod nga sila bahin sa “tawo sa kalapasan.” Ilang gibiyaan ang kasugoan sa Diyos, nga nagaapil sa basahong Genesis. (Buhat 7:53) Gipangunahan nila ang ilang mga panon ngadto sa kangitngitan sa kalibotanong panghunahuna, sumala sa gihulagwayan sa wala-kapamatud-i ug dili-kapamatud-ang teoriya sa ebolusyon. Ilang “gihigugma ang kangitngitan inay ang kahayag” sa kamatuoran.​—Juan 3:19.

16. Unsang kasamahan ang mamatikdan tali sa “mga ansiano” sa adlaw ni Ezekiel ug sa daghang klerigo karong adlawa?

¹⁶ Maingong gidala niadtong Hudiyong mga ansiano ang ilang bakak nga pagsimba ngadto sa templo sa Jerusalem, ang bakak relihiyosong mga pangulo karong adlawa nagapaningkamot usab nga mohawid sa markang “Kristohanon.” Apan ang pagtuo sa ebolusyon dili Kristohanon. Tungod sa pagdawat niining teoriyaha daghan ang mitalikod sa Diyos. Kini nakaamot ug dako sa independensiya, kapintasan, ug terorismo sa atong ika-20ng siglo, nga ang kanasoran ug mga indibiduwal nagapaluyo sa ebolusyonaryong sanglitanang “paglahutay sa labing takos.” Ang ebolusyon nagtudlo nga ang tawo walay tulubagon ngadto sa Maglalalang. (Roma 9:28) Busa gibati sa katawhang libre sa ‘pagbuhat sa ilang gusto,’ nga walay paghunahuna sa Diyos.

17. Sa unsang mga bahin ang ebolusyonaryong mga klerigo nasayop ug dako?

¹⁷ Ang relihiyosong mga pangulo nga nagadawat sa ebolusyon nagaingon, sa pagkamatuod: “Si Jehova dili makakita kanato. Si Jehova mibiya sa yuta.” Tungod sa pagdawat sa maong pilosopiya, ilang gibating sila walay tulubagon kaniya. Sa pagkamatuod, ang ilang ideya bahin sa Diyos gilubog sa ilang pagtuo sa usa ka misteryoso, dili-ikasaysay nga Trinidad sa mga diyos. Nahiuyon niining punto de vista, buot nilang hanawon ang ngalan mismo sa usa ka matuod nga Diyos, si Jehova, nga wala gayod maghisgot sa ngalan ug mabinantayong nagahanaw niana gikan sa ilang mga hubad sa Bibliya. Nahadlok silang mosupak sa popular kalibotanong pagtulon-an sa ebolusyon.

18. Unsang panudya ang nagapaabot sa teoriya sa ebolusyon ug sa mga tigpaluyo niana?

¹⁸ Nga tukma, si Jehova nagaingon pinaagi sa laing propeta: “Tungod kay kining katawhan nagpaduol pinaagi sa ilang baba, ug sila naghimaya kanako pinaagi lamang sa ilang mga ngabil, ug sila nagpahilayo sa ilang kasingkasing mismo gikan kanako, ug ang ilang kahadlok kanako mahimong sugo sa mga tawo nga ginatudlo, busa ania ako, ang Usa, nga sa kahibulongan molihok pag-usab batok niining katawhan, sa kahibulongang paagi ug uban sa butang kahibulongan; ug ang kaalam sa ilang mga maalamon kinahanglang mahanaw, ug ang pagsabot mismo sa ilang maalamong mga tawo matinago.” (Isaias 29:13, 14) Sa kaulahian, ang nagapakaulaw-sa-Diyos nga teoriya sa ebolusyon ug kadtong nag-angkong mga Kristohanon nga nagtuo niini moatubang sa maong panudya sa adlaw sa mainit nga kasuko ni Jehova.​—Sofonias 3:8.

Pag-alagad Alang sa Kamatuoran

19. (a) Nganong daghan ang mituo sa ebolusyon? (b) Sa unsang pagsadya makaambit ang mga maaghop karon?

¹⁹ Ang kalibotan karon tinuod nga dili diyosnon! Ang bakak nga relihiyon ug ang sayop-pagkatumong siyentipikanhong garbo nakaabag sa paghimo niini. Ang kataw-anang mga pagtulon-an sa “tawo sa kalapasan,” ang klero sa Kakristiyanohan, nagpahilayo sa daghan sa relihiyon. Ang pipila kanila nanghawid sa ebolusyon, sama sa nagkalumos nga tawo nga mohawid sa uhot. Gituohan sa uban ang kredo sa ebolusyon tungod kay ang pagkawalay-diyos niini daw maghupay kanila sa tulubagon ngadto sa Maglalalang​—ang Diyos. (Itandi ang Roma 1:21-23.) Apan ang mapaubsanon, maaghop nga mga tawo karon nagakalipay nga makaila sa Soberano Ginoong Jehova, sa nagamandong Hari si Jesu-Kristo, ug sa mga katuyoan sa Gingharian sa Diyos nga duol nang mahimong mahimayaong katumanan.​—Roma 16:20; 1 Corinto 15:25, 26.

20. (a) Unsang dakong saad ang karon ginatuman? (b) Sa unsang paagi kini gipamatud-an sulod sa 1985? (c) Sa unsang paagi imong ikapakita ang pagkamatarong diha sa pag-alagad sa Diyos sa kamatuoran?

²⁰ Pagkamalipayon nato, ingong mga Saksi ni Jehova, nga mahiusa sa tibuok yuta sa madasigong pagmantala sa kamatuoran! Ang espiritu sa Diyos kusog nagalihok uban sa iyang organisasyon, mao nga ato nang makita ang pagkatuman sa saad: “Ang yuta mapuno gayod sa kahibalo ni Jehova sama sa katubigan nga nagatabon sa dagat mismo.” (Isaias 11:9) Ang tibuok-kalibotang pamatuod nga gihatag sa katawhan ni Jehova sulod sa 1985 misangpot sa pagpanagtag sa kanataran sa 339,351,170 ka Bibliya ug basahong nagapatin-aw sa Bibliya, diha sa abot ug 200 ka pinulongan. Maoy pribilehiyo natong kapin ug tulo ka milyon sa pagpakig-ambit niining talagsaon tibuok-yutang buluhaton sa pagsangyaw, “sa dayag ug sa balay ngadto sa balay.” (Buhat 20:20) Hinaot magpadayon kita nga tugob panalanginan ni Jehova samtang maningkamot kita sa paghupot sa pagkamatarong diha sa pag-alagad sa Diyos sa kamatuoran.

Unsa ang Imong Komento?

◻ Unsa ang mga butang kahibulongan sa utok sa tawo nga nagapunting sa maalamon-sa-tanang Magbubuhat?

◻ Nganong sayop ang pag-ingong ang pagtuo sa ebolusyon maoy usa ka buhat sa tinoohan (faith)?

◻ Unsa ka daghan ang ebidensiya nga naglungtad gayod ang mga aliwas-tawo?

◻ Sa unsang paagi ikapadapat ang Ezekiel 8:7-12 ngadto sa pila ka relihiyosong pangulo karong adlawa?

◻ Ang pagkamatarong diha sa pag-alagad sa Diyos sa kamatuoran nagapatunghag unsang mga sangpotanan?

[Kahon sa panid 21]

Life—How Did It Get Here? By Evolution or by Creation?

Ang librong may titulo sa ibabaw giluwatan sa 1985 ug 1986 panahon sa daghang “Mga Maghuhupot sa Integridad” nga mga Kombensiyon sa mga Saksi ni Jehova sa tibuok yuta. Kini gipatik na karon sa mosunod nga mga pinulongan: Ininsek, Danes, Olandes, Ingles, Pinlandes, Pranses, Aleman, Italyano, Hapon, Portuges, ug Kinatsila.

[Hulagway sa panid 19]

Matinud-anon ba nga idibuho sa mga magdidibuho ang mga aliwas-tawo gikan sa pipila ra ka tipik nga bukog?

[Hulagway sa panid 20]

Ang mga Saksi ni Jehova ‘nagpuno sa yuta’ sa kahibalo ni Jehova