Ang Espiritu sa Payonir Nagpakusog sa Pagpangani sa Pilipinas
KON didto pa ikaw sa Manila balik sa 1935 ug buot makigkita sa mga Saksi ni Jehova, pangitaon nimo ang gamayng apartment sa 1134 Rizal Avenue. Didto, mga 20 ka tawo ang regular nga nakigtigom sa pagtuon sa Bibliya. Kanang maong apartment mao ang unang sangang opisina sa Watch Tower Society sa Pilipinas.
Karon, sa dapit sa Manila, adunay 103 ka kongregasyon sa mga Saksi ni Jehova uban sa kapin sa 9,000 ka magmamantala sa Gingharian! Maingon man, sa miaging 50 ka tuig walay mga Saksi sa siyudad sa Davao, sa halayong habagatan sa Pilipinas. Karon didto adunay kapin sa 2,800 kanila diha sa 41 ka kongregasyon nianang siyudara.
Ang pag-uswag niining duha ka dagkong siyudad maoy bahin sa pamatuod nga kadtong unang mga Saksi nagkinabuhi sa ilang ngalan. (Isaias 43:10-12) Ilang gipaabot ang ilang buluhaton sa pagsangyaw ug pagpanudlo sa tanang bahin sa Pilipinas. Pinaagi sa pagtan-aw sa nagaubang tsart, imong makita ang bunga sa Kristohanong paghimog tinun-an sa yugto sa miaging tunga sa siglo. Unsay nakapakusog sa pagtubo sa kanataran sa Pilipinas?
Ang Espiritu sa Payonir Nakatabang sa Pagtubo
Kon dili pa sa madasigong espiritu sa pagpayonir sa unang Pilipinong mga Saksi, imposible unta ang pag-abot sa gatosgatos ka molupyo sa may nagpuyong mga isla pinaagi sa maayong balita. Kanang espirituha buhi gihapon kaayo. Pananglitan, ang taho sa Pebrero 1986 nagpakita nga, dugang pa sa 758 ka espesyal nga mga payonir, dihay 9,090 ka regular nga payonir nga mga ministro nga nag-alagad sa tibuok Pilipinas. Doble pa kini sa gidaghanon nga nagataho sa miaging duha pa lamang ka tuig! Sa Abril 1985, 26,630—ikatulong bahin sa tanang Saksi sa nasod—nakigbahin sa usa ka porma sa bug-os panahong buluhaton sa pagsangyaw.
Oo, gibati sa katawhan ni Jehova sa Pilipinas ang pagkadinalian sa panahon. Kini ang nagpapukaw kanila sa paggugol ug daghang panahon nga maarangan sa pagsangyaw ug sa pagpanudlo sa Pulong sa Diyos sa ilang mga silingan. Sa walay duhaduha, maikag kamong mahibalo kon giunsa sa pipila kanila sa paghikay sa ilang mga kalihokan aron makasulod sa bug-os panahong pag-alagad ug buot mahibalo sa maayong mga eksperyensiya nga ilang gitagamtam.
Naghimog mga Pagpasibo Aron Makapayonir
Si Felipe Ventura sa Binalonan, Pangasinan, nakagugol ug 13 ka tuig sa iyang pagkabatan-on sa bug-os panahong pag-alagad sa wala pay pamilya. Sa midako ang iyang pamilya, mihukom siya sa pagbalik sa buluhatong payonir, apan nabuta ang usa niya ka mata tungod sa dayabitis. Dayon mga upat ka tuig sa miagi nabuta siya sa bug-os. Bisan pa niini, nakahimo si Felipe sa pagpalakaw ug gamayng negosyo sa pagsustento sa iyang pamilya ug, pinaagi sa tabang sa iyang asawa ug mga anak, nakapaangay siya sa iyang panahon aron mahimong payonir pag-usab sa Abril 1, 1985. Bisan pa sa iyang pagkabaldado, nakigbahin siya sa ministeryo sa balay ug balay pinaagi sa tabang sa iyang anak nga lalaki, nga maoy mobasa sa mga teksto sa Bibliya alang kaniya. Si Igsoong Ventura nagadumala usab ug daghang pagtuon sa Bibliya sa balay ug usa ka tinudlong ansiano sa kongregasyon. Ang usa sa iyang mga anak nga lalaki nag-alagad ingong regular payonir uban kaniya, ug ang iyang anak nga babaye nag-alagad ingong auxiliary payonir matag karon ug unya.
Si Clodualdo Quiohilag, usa ka ansiano sa Biñan, Laguna, payonir ug nagapanawng magtatan-aw sa katuigan sa 1960 hangtod nga siya ug ang iyang asawa nanganak. Apan, siya miingon, “Sa matilawan nimo ang kalipay sa bug-os panahong pag-alagad, kanunay gayod nga mangandoy ka niana.” Busa bisag malamposon siya sa negosyo ug gitagamtam ang haruhayng kinabuhi uban sa iyang asawa ug anak nga babaye, wala niya kini isipa nga mao ang iyang tinuod nga tumong sa kinabuhi. Siya miingon: “Ang tanang butang nga akong nabatonan walay kapuslanan kon ang dugay na nakong damgo sa pagbalik sa bug-os panahong pag-alagad dili makab-ot.” Aron makapayonir, iyang gipagamay ang iyang kalihokan sa negosyo sa tunga sa adlaw, gigamit ang buntag alang sa pag-alagad sa kanataran. Ang iyang damgo nakab-ot sa Oktubre 1, 1984, sa misugod siya sa pag-alagad ingong regular payonir. Bisag ang iyang kinitaan nga mga katunga na lamang kay sa miagi, ang iyang mga gastos namenosan usab. Karon miduyog kaniya ang iyang asawa sa buluhaton sa regular payonir, ug ang iyang anak nga babaye nag-alagad ingong auxiliary payonir matag karon ug unya.
Nag-alagad sa Bug-os Panahon Bisag Buta
Tungod sa sakit nga German measles (usa ka matang sa tipdas), nabuta si Pantaleon Tatoy sukad sa tres anyos pa siya. Sa 1972 siya nakadungog sa kamatuoran sa unang higayon ug misugod sa pagtuon sa librong Ang Kamatuoran nga Motultol sa Kinabuhing Dayon. Nakatabang kini kaniya sa ulahi sa pagbuntog sa iyang pagkagiyan sa tabako ug sa maisog nga ilimnon, ug iyang gipasimbolohan ang iyang pagpahinungod kang Jehova pinaagi sa bawtismo sa Hulyo 29, 1973.
Sa misugod sa pagsangyaw si Pantaleon sa iyang mga silingan, gikomedyahan siya sa iyang magulang nga babaye: “Unsaon nimo sa pagkahimong ministro nga buta ka man ug usa lamang ang imong karsones?” Apan wala siya maluya niini. Sanglit suheto siya sa palibot sa iyang balay, milakaw siya nga nag-inusara sa pagsangyaw sa kamatuoran sa iyang mga silingan. Sa 1984 nalipay siya nga nakatabang sa iyang ig-agaw ug pag-umangkong lalaki sa pagkakat-on sa kamatuoran, ug gibawtismohan sila sa Septiyembre niadtong tuiga.
Nakadumala usab si Pantaleon ug pagtuon sa Bibliya uban sa iyang duha ka pag-umangkong babaye, si Lorna ug Luz, nga mga amang ug bungol. Unsaon sa buta nga payonir sa pagtuon ning mga babayehana? Pinaagi sa tabang sa usa ka katimbang, migamit siya ug mga ilustrasyon diha sa mga publikasyon. Sa nagpatin-aw sa kamatuoran, ang iyang ig-agawng si Roquina ang naghubad sa iyang ipamulong pinaagi sa sinyas alang sa kaluha. Si Lorna ug Luz gibawtismohan sa Abril 20, 1985, bisan pa sa ilang dakong kakulian. Bahin kang Pantaleon, tapos nakaalagad ingong auxiliary payonir sa usa ka tuig, gitudlo siya ingong regular nga payonir sa Marso 1, 1985.
Bug-os Panahong Pag-alagad Ingong Karera
Diha sa graduwasyon sa hayskol, usa ka estudyante miingon sa kasaring nga Saksi: “Matag pangutana nako ninyo kon unsang kursoha ang ilang kuhaon tapos sa graduwasyon, silang tanan moingon, ‘Payonir.’ Unsang matanga sa kurso kana?” Gisaysay sa batan-ong Saksi kon unsay kahulogan sa payonir. Ang kaubang estudyante naikag ug midawat sa pagtuon sa Bibliya, ug siya, usab, may tumong nga magpayonir.
Nakita sa uban nga dili makatagbaw sa espirituwal nga mga panginahanglan ang mga kurso sa kolehiyo. Sa Bohol, usa ka batan-ong sister nga anaa sa kataposang tuig sa kolehiyo nakakita nga may panahon siya sa pagpayonir samtang taposon ang iyang mga pagtuon. Sa ulahi, mitambong siya sa Tunghaan sa Pag-alagad sa Payonir ug miingon nga ang kolehiyo dili ikatandi sa tunghaan ug sa kalipay nga iyang gibati sa bug-os panahong pag-alagad kang Jehova. Nag-alagad siya karon ingong payonir sa dapit nga dako ang panginahanglan sa mga magwawali.
Mga Batan-on ug Tigulang Malipayong Nakigbahin
Ang basahon sa Salmo nagtagna nga sa mga adlaw sa gahom sa Gingharian ang katawhan sa Diyos “malipayong magatanyag sa ilang kaugalingon.” Miingon usab kini nga ang ‘mga batan-ong lalaki, mga ulay, mga tigulang nga lalaki ug kabataan’ managdayeg sa ngalan ni Jehova. (Salmo 110:3; 148:12, 13) Tinuod kini taliwala sa katawhan sa Diyos sa Pilipinas.
Sa kataposang ihap, 1,159, kun 13 porsiento, sa regular nga mga payonir nga nalista sa Pilipinas maoy ubos sa 20 anyos. Pagkadakong kalipay ang pagtan-aw sa mga batan-ong sama niini nga sa pagkadili-mahakugon ‘nagahinumdom sa ilang Maglalalang sa adlaw sa ilang pagkabatan-on’ imbes sa pag-usik niini sa hakog o kalibotanong mga pangagpas!—Ecclesiastes 12:1.
Ang uban nga misugod sa bug-os panahong pag-alagad sa ilang pagkabatan-on karon tigulang na apan nag-alagad gihapong matinumanon. Si Igsoong Leodegario Barlaan ug ang iyang asawang si Natividad misugod sa pagpayonir sa Abril 1, 1938. Nakaagi silag malisod nga mga tuig sa gubat ug nakaalagad sa daghang kapasidad, lakip sa nagapanawng buluhaton. Karon si Igsoong Barlaan 72 anyos na ug madasigon gihapong nag-alagad ingong espesyal payonir sa San Carlos, Pangasinan, uban sa iyang asawa.
Ang uban misugod sa pag-alagad sa bug-os panahon sa ulahing bahin sa kinabuhi ug nagpadayon hangtod sa ilang pagkatigulang. Pananglitan, si Leoncio Sabandal misugod sa pagpayonir sa panuigong 52 ug espesyal payonir gihapon sa panuigong 92. Siya ug ang iyang asawa nakatabang ug 118 ka tawo sa pagpahinungod sa ilang mga kinabuhi kang Jehova. Maingon man, si Cipriano Sepulveda, Sr., misugod sa pagpayonir sa 72 anyos ug regular payonir hangtod sa iyang kamatayon sa panuigong 88 sa 1985. Si Paula Mariano misugod sa pagpayonir sa panuigong 71 ug nag-alagad gihapon sa bug-os panahon bisan pa sa mga sakit sa panuigong 88. Pagkamaayong mga pananglitan sila sa pagtuo ug debosyon ug sa ubang mga edad-edaran!
Nagakalipay sa Nahimong Kausawagan
Kon balikon ang miaging katunga sa siglo, dayag kaayo ang panalangin ni Jehova sa madasigong mga paningkamot sa iyang mga Saksi. Gikan sa pipila lamang sa 1935, pagkadakong kalipay ang pagtan-aw sa 88,113 nga nakigbahin sa pag-alagad sa kanataran sa Pebrero 1986. Ang usa ka gamayng kongregasyon sa Rizal Avenue sa Manila karon mitubo na sa 2,454 ka kongregasyon sa tibuok nasod, nga giorganisar sa 120 ka sirkito.
Ug unsa pay mga palaabuton? Ang makapadasig nga timaan mao ang tagsaong tumatambong nga 268,526—kapin kay sa tulo ka pilo sa gidaghanon sa mga Saksi sa nasod—sa pagsaulog sa Memoryal sa Abril 4, 1985. Dugang pa, sa Pebrero 1986, 63,248 ka pagtuon sa Bibliya ang gihimo uban sa interesadong mga tawo. Ug sa walay duhaduha ang padayong pagtubo makita uban sa panalangin ug pag-uyon ni Jehova.
Malipayon kami nga gihimong mabungahon kaayo ni Jehova ang buluhaton nga gisugdan sa iyang unang dinihogang mga saksi niining mga islaha kapin sa 50 ka tuig nga miagi. Pinaagi sa iyang tabang ug pagtultol, maoy tumong sa iyang katawhan sa Pilipinas ang pagpadayon sa pagpadako sa ilang buluhaton sa pagsangyaw ug pagpanudlo sa umaabot nga mga adlaw.
[Chart sa panid 29]
Kalim-an ka tuig nga pag-uswag sa Pilipinas
1935 20
1940 222
1950 10,055
1960 31,608
1970 54,789
1980 61,164
1986 88,113
[Mapa sa panid 28]
(Alang sa bug-os nga pagkahan-ay sa teksto, tan-awa ang publikasyon)
The Philippines
San Carlos
Manila
Biñan
Zamboanga
Davao