Nagapuyo ba Kita sa “Panahon sa Kataposan”?

“Bahin kanimo, Oh Daniel, himoang tinago ang mga pulong ug tak-opi ang basahon hangtod sa panahon sa kataposan.”​—Daniel 12:4.

ANG nagkaon nalibog. Samtang milantaw siya sa gawas sa bentana sa usa ka restawran sa tunga sa Manhattan nga nagdungaw sa Times Square, New York City, ang iyang mga mata mibalhinbalhin paglantaw sa tulo ka separadong orasang digital, nga ang tanan nagpakidlap sa oras diha sa dagko kaayong mga letra. Ang usa ka orasan mabasang 11:28. Ang lain, nga daw maduhaduhaon sa pagkagabii na kaayo, naulahi nga maoy 11:26, samtang ang ikatulo nag-unang dimapailobon sa 11:29.

‘Ang usa o duha ka minutos dili kaayo hinungdanon,’ tingali moingon ka. Apan, sulayi pagkombinsir niana ang usa ka tawo nga bag-o pang wala makaapas sa iyang bus, tren, o ayroplano, dili pinaagig mga minutos kondili pinaagig mga segundo lamang! Hinungdanon ang pagkahibalo sa hustong oras. Ang pagkahibalo kon diin na kita sa eskedyul sa panahon sa Diyos labi pang hinungdanon.

Ang Posibilidad sa Adlaw sa Kalaglagan

Hinuon, sumala sa imo tingaling nahibaloan, giestoryahan sa mga tawo ang bahin sa “panahon sa kataposan”​—ang uban moingong ‘kataposan sa kalibotan’ o ‘adlaw sa kalaglagan’​—sulod sa daghang siglo. Gihisgotan kana sa manalagnang Daniel sa 25 ka siglo kanhi. (Daniel 12:4) Apan karong adlawa, sumala sa independenteng magsusulat si James David Besser, “dili na kinahanglan ang relihiyoso o labaw-kinaiyanhong pagtuo sa pagdawat sa posibilidad sa adlaw sa kalaglagan; kinahanglan lamang ang pagtan-aw sa balita sa telebisyon.” Dili ka ba mouyon niana?

Walay duhaduha, pinaagi sa telebisyon ang balita sa kalibotan labawng mahibaloan pinaagi sa pagdala sa aksiyon nganha sa mga sala sa atong balay. Kini mohimo sa mga suliran nga labi pang duol ug personal. Kini nagapahinumdom kanato nga ang siyudad o lungsod nga magun-ob tungod sa posibleng nukleyar nga katalagman, ang anak lalaki o babaye mapintasong atakehon sa posibleng kriminal nga mga hitabo, ang inahan o amahang bihagon sa posibleng pag-atake sa terorista​—kanang tanang suliran lagmit mahitabo kanato. Bisan pa, kining mga posibilidara sa kaugalingon dili magpamatuod nga ang adlaw sa kalaglagan duol nang mahitabo kanato. Apan kana sila nagahimo nianang mas posible, nga nagahimo sa pangutana, Nagapuyo ba kita sa “panahon sa kataposan?” nga labi pang bililhon.

Si Jesus, si Daniel, ug ang Kataposan sa Kalibotan

Kapin sa 19 ka siglo kanhi, ang mga tinun-an ni Jesus nangutana kaniya: “Unsa unya ang ilhanan sa imong presensiya ug sa kataposan sa sistema sa mga butang [“ang kataposan sa kalibotan,” King James Version]?” (Mateo 24:3) Sa paghatag kanilag usa ka ilhanan, si Jesus naghisgot sa daghang ebidensiya, ngatanan niana sa tingob magpailang kita nahidangat sa “kataposan sa sistema sa mga butang.” Paklia ang imong Bibliya sa Mateo kapitulo 24 ug 25, Marcos kapitulo 13, ug Lucas kapitulo 21, ug basaha kana sa imong kaugalingon.

Tingali matingala ka sa pagdiskobreng ang imong mabasa halos sama sa sumaryo sa balita sa telebisyon karong adlawa. Imong mabasa ang bahin sa mga gubat, dagkong mga linog, mga kamatay, ug mga kanihit sa pagkaon​—ang tanan mahitabo sa tibuok-kalibotang gilapdon. Imong mabasa usab ang bahin sa “kagul-anan sa kanasoran, nga wala mahibalo sa lutsanan,” ug mahitungod sa mga tawong mahimong “panguyapan tungod sa kahadlok ug pagpaabot sa mga butang mahitabo sa gipuy-ang yuta.” Makakaplag ka bag labi pang angayng mga pulong sa pagbatbat sa kahimtang sa kalibotan, nga daghan kaayog ginasulti kanato ang mga programa sa telebisyon karong adlawa?​—Lucas 21:10, 11, 25, 26.

Kining lig-ong sirkumstansiyal nga ebidensiya nga kita nagapuyo sa “panahon sa kataposan” dili mao lamang ang atong nabatonan. Sumala sa among gipahayag sa ibabaw, atong makaplagan ang nagapaluyong ebidensiya pinaagi sa pagbalik sa laing 500 ka tuig ngadto sa mga adlaw sa Hudiyong manalagna si Daniel. Si Jesus mihisgot kaniya sa ngalan, ug mipunting sa pagkatuman sa iyang tagna. (Itandi ang Mateo 24:3, 15, 21 sa Daniel 11:31; 12:1, 4.) Sa pagbuhat niini, gipakita ni Jesus nga wala niya isipa ang mga pulong ni Daniel sa “Daang Tugon” nga hupas sa panahon o dili makahuloganon. Angay usab nga kita ingon.

Matikdi ang pagkaamgid sa mga pulong ni Daniel ug ang iya ni Jesus sumala sa gipahayag sa ibabaw. Unya suknaa ang imong kaugalingon, ‘Wala ba sila maghisgot sa samang butang?’

Dayag nga si Daniel ug si Jesus nagtagna sa samang butang, “ang panahon sa kataposan,” nga sa maong panahon si Kristo mapresente nga may harianong gahom. Sa pagkatapos sa maong yugto sa panahon, iyang pagalaglagon ang tanan niyang kaaway dinhi sa yuta sa usa ka dakong kasakitan. Apan ang katawhan sa Diyos magpadayong buhi.

Buot ba nimong mahiapil sa maong mga magpadayong buhi? Nan palandonga ang ebidensiya nga ginahatag ni Daniel mahitungod sa “panahon sa kataposan.” Kini motabang kanato sa pagkahibalo kon hain na kita sa eksakto sa eskedyul sa panahon sa Diyos.

[Kahon sa panid 4]

DANIEL

“Sa panahon sa kataposan . . . si Miguel [Jesu-Kristo] motindog . . . ug mahitabo ang usa ka panahon sa kasakitan nga wala pa sukad mahitabo sukad may usa ka nasod. . . . Ug nianang panahona ang imong katawhan makaikyas.”​—Daniel 11:40; 12:1.

JESUS

“Unsa unya ang ilhanan sa imong presensiya ug sa kataposan sa sistema sa mga butang? . . .

“Aduna unyay dakong kasakitan nga wala pa sukad mahitabo sukad sa sinugdanan sa kalibotan . . .

“Gawas kanang mga adlawa pamub-on walay unod nga mamaluwas; apan . . . kanang mga adlawa pamub-on.”​—Mateo 24:3, 21, 22.