Usa ka Malipayong Katawhan—Ngano?
ANG tinuod nga mga Kristohanon karon maoy malipayong katawhan. Ilabina kay nag-alagad kita sa “malipayong Diyos,” si Jehova. (1 Timoteo 1:11) Kita iyang gihatagan ug iyang espiritu, ug ang bunga nianang espirituha mao ang kalipay.—Galacia 5:22.
Kining dulot nga kalipay mapasiboon ug makabarog sa kapig-otan. Pananglitan, si Jesu-Kristo nahiagom sa kasakit sa paglansang ug sa kaulawan nga gisilotan ingong mapasipalahon. Apan, “tungod sa kalipay nga gibutang sa iyang atubangan iyang giantos ang kahoy sa pagsakit.” (Hebreohanon 12:2) Nahibalo si Jesus nga naghulat sa unahan ang dakong mga higayon ug mga pribilehiyo maylabot sa iyang pag-alagad kang Jehova. Ang pagpalandong niining umaabot nga mga pribilehiyo maoy nakatabang kaniya sa paghupot sa iyang kalipay sa tunga sa pag-antos.
Maoy tinguha ni Jesus nga magmalipayon usab ang iyang mga disipulo. Siya miingon: “Kining mga butanga gisulti ko kaninyo, aron ang akong kalipay magapabilin diha kaninyo ug ang inyong kalipay mamahingpit.” (Juan 15:11) Tinuod kini diha sa mga Saksi ni Jehova karon. Daghan ang mga katarongan nga kita maoy malipayong katawhan. Kita nahibalo sa kamatuoran, nga nakapagawas kanato gikan sa paghawid sa patuotuo ug bakak nga mga pagtulon-an sa relihiyon. (Juan 8:32) Dugang pa, kita nahibalo kon hain na kita sa yugto sa panahon ug masadyaon sa hapit nang makab-ot nga paglaom sa kaluwasan. (Lucas 21:28) Kita napanalipdan usab gikan sa daghang mga problema—lakip kanila mao ang napasa sa sekso nga mga sakit—nga giatubang sa mga tawo nga wala magsunod sa binase sa Bibliya nga moralidad. Atong gitagamtam ang labing maayong pagsandurotay uban sa mga tawo nga maikagon sa pagbuhat sa kabubut-on ni Jehova. Ug, oo, kita adunay dakong pribilehiyo sa pakigbahin sa pagsangyaw sa maayong balita sa Gingharian ug sa paghimog mga tinun-an sa samag karnerong mga katawhan.—Mateo 24:14; 28:19, 20.
Samtang tinuod kini sa mga Saksi ni Jehova sa kinatibuk-an, komusta ikaw ingong usa ka indibiduwal? Nganong ikaingon nga ikaw adunay katarongang malipay uban sa nanghibiling katawhan ni Jehova?
Pagkaplag Kalipay sa Buluhatong Pag-ebanghelyo
Nalisdan ang uban sa pakigbahin sa buluhatong pagsangyaw sa balay ug balay. Tingali lainan sila sa pagduol sa mga estranghero ug sa pagsugod ug kolokabildo. O tingali bation nila nga dili-kuwalipikado dihang manudlo sa uban. Mao ba usab kanay imong bation usahay? Kon mao, sa unsang paagi makakaplag kag kalipay sa buluhatog pag-ebanghelyo?
Una sa tanan, pagbaton ug positibong kaisipan. Malipay ang daghang tawo nga makatrabaho sa mga tawong inila o bantogang mga politiko. Apan unsa ka dakong kalipay ang atong makaplagan nga gamiton sa “Hari sa walay kataposan,” si Jehova nga Diyos mismo!—1 Timoteo 1:17.
Hinumdomi, usab, nga usa kini ka buluhaton nga dili na masobli pa. Hunahunaa lang! Ang mga manulonda mismo mao ang nagatultol ug nagadumala sa mga Kristohanon dinhi sa yuta sa ilang mga paningkamot sa pagpangita sa samag mga karnero. (Pinadayag 14:6) Dili ba makahatag kinig kalipay sa imong kasingkasing?
Pagkaplag Kalipay sa Pag-uswag sa Gingharian
Laing rason sa paghupot ug positibong kaisipan sa buluhatong pagsangyaw mao ang maayong epekto niini. Ang Bibliya nagtagna: “Ang usa nga diyutay mahimo nga usa ka libo, ug ang usa nga gamay mahimo nga usa ka kusganong nasod. Ako si Jehova, magapadali niini sa iyang panahon.” (Isaias 60:22) Kining saad ni Jehova natuman na karong panahona. Pananglitan, sa panahon sa 1986 nga tuig sa pag-alagad, 225,868 ang gibawtismohan sa pagsimbolo sa ilang bug-os kalag nga pahinungod kang Jehova nga Diyos. Adunay pag-uswag nga 6.9 porsiento sa aberids nga gidaghanon sa nakigbahin sa pagpakaylap sa mga kamatuoran sa Bibliya ngadto sa uban.
Sa walay duhaduha kining maong pag-uswag makita diha sa imong kongregasyon o sirkito. Nanambong ang mga bag-ohan sa mga tigom ug nagahimog gikinahanglang mga kausaban sa ilang mga kinabuhi aron makaalagad sa Diyos. Wala ba kini magpunting sa kamatuoran nga ang buluhatong pagsangyaw may panalangin ni Jehova? Ang pagkahimong bahin niini nga pag-uswag maoy tuboran sa dakong kalipay kanimo. Tinuod, tingali wala kay natun-ang indibiduwal hangtod sa pagkadangat sa punto nga siya nagpabawtismo. Apan dili kita makapasigarbo sa atong kaugalingon nga nakaagak ug tawo ngadto sa kamatuoran. ‘Ang Diyos ang nagapatubo niini,’ miingon si Pablo. (1 Corinto 3:6-9) Ang tanang sakop sa kongregasyon may bahin sa pagtabang sa mga bag-ohan. Sa unsang paagi? Pinaagi sa pagkahimong presente sa mga tigom, sa pagkomento, sa maabiabihong pagpangomosta sa mga bag-ohan, ug sa paggawi sa paagi nga makahimo sa kamatuoran nga madanihon.
Apan, mabatonan ang mas dako pang kalipay kon ikaw mismo dugang nga nagapakigbahin sa buluhatong pagsangyaw sa balay ug balay ug sa pagtuon sa Bibliya diha sa balay. Sa miaging tuig, sa aberids, 2,726,252 ang gidumalang mga pagtuon sa Bibliya kada semana. Nganong dili maningkamot nga makabahin niining malipayong buluhaton? Pagtanyag ug pagtuon sa Bibliya nga imong kaila, o kaha sa silingan o sa indibiduwal nga imong napahimutangan ug basahon. Pangayo ug tabang kang Jehova sa pagpangita sa samag karnerong mga tawo.
Pagbuntog sa Kababagan sa Kalipay
Siyempre, kon bation sa tawo nga dili-kuwalipikadong manudlo sa uban, kini mahimong tinuod nga kababagan sa iyang pagkaplag kalipay sa pag-alagad sa kanataran. Apan, hinumdomi, nga ang “atong pagkahimong kuwalipikado nagagikan sa Diyos.” (2 Corinto 3:5) Ug pinaagi sa iyang organisasyon nagatagana si Jehova ug daghang maayong mga giya sa pagtabang kanato nga mahimong kuwalipikado ingong epektibong mga ministro.
Una sa tanan, adunay daghan sa atong taliwala nga nagaalagad sa Diyos sa dugay nang panahon ug daghag kasinatian sa pag-alagad sa kanataran. Mahimong makig-uban kita niining eksperyensiyadong mga ministro sa ilang kalihokan ug sa pagkakat-on gikan kanila. Dugang pa, sa matag bulan ang maayong mga sugyot makita diha sa Atong Pag-alagad sa Gingharian. Unya anaa ang publikasyong Reasoning From the Scriptures, nga nasudlan ug bahandi sa impormasyon aron mapahait ang atong mga katakos sa pagsangyaw. Gamita kining mga kasangkapana ug pangandam pa alang sa pag-alagad sa kanataran. Palandonga ang bag-o ug makaikag nga mga paagi sa pagpailaila sa imong kaugalingon diha sa pultahan. O palandonga ang nagkalainlaing mga paagi sa pagdani sa mga tagbalay nga makig-estorya. Dihang magkaepektibo ka sa kanataran, ang imong kadasig ug kalipay sa pagsangyaw sa walay duhaduha mouswag.
Ang ministeryo mas makapalipay dihang makahimo kita sa pagpakigsulti sa mga tawo. Diha sa ubang mga teritoryo kini sa tinuod maoy usa ka problema. Makahikay ka ba sa pakigbahin sa pag-alagad sa kanataran sa panahon dihang mas daghan ang mga tawo diha sa balay, sama sa sayo nga gabii? Nakita sa kadaghanan nga epektibo kini. Ikaw ang mangitag paagi sa pagsultig una sa mga tawo bisag asa sila makita—diha sa mga dalan, kon naglingkod ba sa mga lingkoranan sa parke, naghugas sa ilang mga sakyanan. Hinumdomi nga nagkinahanglan ang mga tawo sa kamatuoran ug ang ilang mga kinabuhi ang nalangkit. Makatabang kini sa pagpalihok kanimo sa pagdaog sa mga kiling sa pagkaulaw. Samtang tinuod nga ang kadaghanan sa mga tawo dili maayo ug pagsanong, kadtong may maayong pagsanong mohatag kanato ug dakong kalipay.
Apan, ang usa sa labing dakong tabang sa atong paghupot ug kalipay mao ang pag-ampo. Pangayo kang Jehova sa iyang espiritu nga molig-on ug modasig kanimo. Si Pablo miingon: “Mahimo ko ang tanang butang pinaagi kaniya nga nagapalig-on kanako.” (Filipos 4:13) Atong mabati usab kana, dihang makakat-on kita sa dugang nga pagsalig kang Jehova.
Paglahutay Ingong Malipayong Katawhan
Walay pagpabili ang kadaghanang mga tawo sa atong buluhaton. Nahibalo si Jesus nga mao kini ang mahitabo. Busa dihang iyang gipadala ang iyang mga sumusunod sa pagsangyaw, iyang gitambagan sila: “Kon dili patalinghogan ang inyong mga pulong, itaktak ninyo ang mga abog gikan sa inyong mga tiil inigpahawa ninyo sa maong balay o lungsod. . . . Tan-awa! Paadtoon ko kamo nga daw karnero sa taliwala sa mga lobo; busa magmasinabuton kamo sama sa mga bitin ug magmalulot kamo ingon sa mga salampati.” Si Jesus miingon usab: “Bisan pa gani ang mga buhok sa inyong ulo naihap ang tanan. Busa ayaw kamo pagkahadlok.”—Mateo 10:11-16, 30, 31.
Kining mga pulonga makatabang kanato sa paglahutay nga malipayon. Kini makatabang kanato sa pagkaamgo nga dihang makahibalag kitag mga tawo nga dili magpabili sa atong mga paningkamot alang kanila, gipahibalo gihapon nato ang ngalan ni Jehova; kita nakadayeg gihapon kaniya. (Salmo 100:4, 5) Makaikag, usahay ang mga tagbalay nga midumili sa pagbukas sa pultahan nadunggang miingon sa uban: “Mga Saksi ni Jehova kadto.” Oo, bisag wala kitay gisulti, napadako ang ngalan ni Jehova, ug nakadawat ang mga tawo sa higayon sa pagdawat o sa pagsalikway sa kamatuoran. (Mateo 25:31, 32) Busa bisan ang dili-masanongong mga teritoryo maantos nga malipayon.
Gawas pa, walay mahibalo kon nabag-o na ang kaisipan sa mga tawo. Sa usa ka adlaw niana, ang usa ka babaye nga nakaabog sa makadaghang higayon sa Kristohanong igsoong babaye sa iyang pultahan nangutana sa igsoon kon may bag-o ba siyang literatura. Nahibulong ang igsoon ug miingon nga ang babaye wala pa gayod sukad midawat ug basahon sa Bibliya. Ang babaye misaysay nga ang iyang bana nagtrabaho sa usa ka tawo nga nagtuon sa Bibliya uban sa mga Saksi ni Jehova. Iyang gihatagan siya ug ang iyang bana ug usa sa mga publikasyon sa Watch Tower Society. Tungod sa pagkamausisaon, gibasa kini sa babaye ug miila sa balita ingong kamatuoran. Busa mihukom siya dihadiha nga sa sunod higayong moduaw ang Saksi iyang padayonon siya. Gisugdan ang pagtuon sa Bibliya, ug ang babaye sa ulahi nahimong dedikadong saksi ni Jehova!
Busa kita adunay dakong pribilehiyo—usa ka malipayong pribilehiyo—sa pagmantala sa bugtong balita sa paglaom sa kalibotan. Ug ang buluhatong pagsangyaw mao ang asaynment nga gihatag sa Diyos kanato sa panahon niining kataposang mga adlaw. Kinahanglang buhaton kini sa dili pa moabot ang kataposan. (Mateo 24:14) Unsa pa kadugaya sa dili pa moabot ang kataposan sa daotang sistema ni Satanas? Nasayod kita nga moabot sa dili madugay ang kataposan. (Itandi sa Habacuc 2:3.) Kasamtangan, duna pay panahon alang sa uban sa pagkakat-on sa kamatuoran. Atong pahimuslan kining nahibiling panahon ug madasigon sa atong buluhatong pagsangyaw. Ug maghupot kita ug positibong kaisipan, magkugi aron ‘maluwas nato ang atong kaugalingon ug ang mga magapatalinghog kanato.’ (1 Timoteo 4:16) Sa pagbuhat niini, magpabilin kitang malipayong katawhan nga nagapakigbahin sa pag-uswag sa Gingharian.
[Hulagway sa panid 23]
Tuboran sa kalipay ang atong buluhatong pag-ebanghelyo—bisag dili pa mosanong ang mga tawo sa balita sa Gingharian