Mga Linaing Hitabo sa Bibliya Salmo 107 hangtod sa 150

Malipayong Diyos, Malipayong Katawhan!

Ang kalipay mao ang tumong nga dili gayod makab-ot sa mga tawo. Apan, alang sa gamayng grupo, ang kalipay mao ang paagi sa kinabuhi. Unsa ang ilang sekreto? Ang tinuod nga pagsimba! Nakabig kita sa Salmo nga malipayong Diyos si Jehova, ug busa kita mahimong malipayon pinaagi sa pagsimba kaniya. Sa pagpamatuod niini, atong tan-awon ang Ikalimang Basahon sa mga Salmo, nga mao, ang Salmo 107 ngadto sa 150.

Si Jehova ang Manluluwas

Palihog basaha ang Salmo 107 ngadto sa 119. Ang pag-ampo sa mga Hudiyo ug kaluwasan gikan sa pagkabihag sa Babilonya gitubag, ug gisaulog “sa mga tinubos ni Jehova” ang pagbalik pinaagi sa pag-awit. (Salmo 107) Dihang giluwas, si David ‘miawit’ sa Diyos ug gipahayag ang Iyang pagkamaayo ug gugma. (Salmo 108, 109) Pinaagi sa kusog gikan kang Jehova, ang Ginoo ni David, nga mao si Jesu-Kristo, “magadaog sa taliwala sa iyang mga kaaway.” (Salmo 110) Dugang pa sa pagluwas sa Iyang katawhan, gipanalanginan ni Jehova ang matarong nga tawo nga may kahadlok Kaniya. (Salmo 111, 112) Tapos nga giluwas sila gikan sa Babilonya, giawit sa mga Hudiyo ang Hallel nga mga Salmo, o mga awit sa pagdayeg, sa dagkong tuig-tuig nga piyesta. (Salmo 113-118) Ang ika-19ng Salmo mao ang kinatas-an, ug ang tanan gawas sa 2 tali sa 176 ka bersikulo niini nagpunting sa pulong o balaod sa Diyos.

◆ 107:27—Sa unsang paagi ‘nahubsan sila sa ilang kaalam’?

Sama sa mga sakayanon nga naabtan sa dakong unos, ang kaalam sa mga Hudiyo nakitang wala magpulos sa panahon sa ilang pagkabihag sa Babilonya; ang tanang tawhanong mga paagi sa pagluwas kanila napakyas. Apan pinaagi sa pagdangop kang Jehova diha niining unosong kahimtang, miabot ang kaluwasan. Iyang gipalurang ang simbolikong unos ug giluwas sila sa luwas nga “langit”​—ang yuta sa Juda.​—Salmo 107:30.

◆ 110:3—Unsay kahulogan sa pagkaadunay “mga batan-on nga samag mga yamog”?

Nalangkit ang yamog sa panalangin, pagkamabungahon, ug pagkadagaya. (Genesis 27:28) Ang mga yamog malumo, makapapresko, makahatag-kinabuhi, ug daghan. Sa adlaw sa militaryong gahom sa Mesiyanikong Hari, ang iyang mga sakop sa maandamon, malipayong nagatanyag sa ilang kaugalingon sa hilabihan ka daghan nga ilang ikatandi sa makapapreskong mga yamog. Sama sa makapapreskong mga yamog, diha sa bug-os nga organisasyon ni Jehova karon adunay daghang mga batan-ong lalaki ug mga babaye nga nagtanyag ug pag-alagad sa Diyos ug sa ilang kaubang mga magsisimba.

◆ 116:3​—Unsa “ang mga pisi sa kamatayon”?

Daw ang kamatayon hugot kaayong pagkabugkos diha sa salmista pinaagi sa mga pisi nga imposible ang pag-ikyas. Ang mga pisi nga hugot kaayong pagkahigot diha sa mga tiil mohatag ug kangutngot, o kasakit, ug gihubad sa Greek Septuagint bersiyon ang Hebreohanong pulong “mga pisi” ingong “mga kasakit.” Busa, dihang namatay si Jesu-Kristo, Iyang “nalangkat ang mga kasakit sa kamatayon.”​—Buhat 2:24.

◆ 119:83—Sa unsang paagi ang salmista “sama sa panit nga sudlanan”?

Samtang naghulat kang Jehova sa paglipay kaniya, ang salmista nahisama sa usa ka panit nga sudlanan nga ibitay kon dili gamiton. Tungod sa aso diha sa balongbalong o sa balay nga walay panghaw, kining matanga sa sudlanan kun botelya sa anam-anam mangitom, mouga, ug mangunot. Busa, mao kini ang nahitabo sa salmista diha sa mga kamot sa mga maglulutos. (Bersikulo 84) Ang iyang makasubong kahimtang tingali nakita sa iyang masulob-ong panagway ug nangunot ang nawong, ug ang tibuok lawas tingali naapektohan kaayo nga tungod niana nawad-an sa iyang kaumog. (Itandi sa Salmo 32:4.) Busa tingali mibati siya nga walay kapuslanan sama sa mikuyos nga panit nga sudlanan nga ipadaplin sa uban nga dili na mahimong kabutangan ug mga likido. Apan siya ‘wala makalimot sa mga sugo sa Diyos.’

◆ 119:119—Sa unsang paagi taposon sa Diyos ang daotan “samag yamokyamok”?

Ang yamokyamok nga moporma diha sa tinunawng metal o diha sa tunawan maoy mga biya, hugaw nga kinahanglang ilabay. Busa bulagon sa tunawan ang maong metal sama sa bulawan o salapi gikan sa “yamokyamok.” Sa susama, gilantaw ni Jehova ang mga daotan nga angay lamang nga ipadaplin ingong linugdang ug taposon sila, gilain sila gikan sa mga bililhon nga iyang gikahimut-an.​—Itandi sa Ezekiel 22:17-22.

Pagtulon-an Alang Kanato: Sama sa mga Hudiyo sa karaan, ang mga Saksi ni Jehova karon naghulat ug kaluwasan​—niining panahona latas sa unos sa Armageddon. (Pinadayag 16:14, 16) Sa tinudlong panahon sa Diyos, kining sistema sa mga butang silhigon pinaagi niining dakong gubat. Sila nga dili modangop kang Jehova alang sa kaluwasan sa bug-os walay mahimo dihang ibanlas-banlas sila sa mga balod niining dakong kalaglagan. Apan, ang mga mangaluwas, “mopasalamat kang Jehova alang sa iyang mahigugmaong kalulot.” Busa, niining kataposang mga adlaw, ang dinihogang mga sumusunod ni Jesus ug ang “dakong panon” bug-os nga makasalig kang Jehova.​—Salmo 107:31; Pinadayag 7:9.

‘Mga Alawiton sa Pagtungas’

Basaha ang Salmo 120 ngadto sa 134. Gitawag kining 15 ka Salmo nga mga alawiton ‘sa pagtungas.’ Wala magkauyon ang mga eskolar sa tukmang kahulogan sa “ascents,” (gihubad dinhi nga pagtungas) apan tingali kining mga salmoha giawit sa mga Israelitas dihang mitungas, o misaka sila sa hataas nga siyudad sa Jerusalem alang sa ilang tulo ka tinuig nga mga piyesta.​—Salmo 122:1.

◆ 120:4​—Unsa kining “mahait nga mga udyong” ug “baga sa karbon”?

Ang dila nga mabutangbutangon makalaglag sama sa hinagiban o kalayo. (Proverbio 12:18; Santiago 3:6) Ingong balos, tinoon ni Jehova nga ang dila nga mabutangbutangon mapahilom pinaagi sa mga udyong sa manggugubat. Makaikag, ang mga uling gikan sa samag silhig nga kahoy kusog kaayong mosiga, nga nagpunting sa mabug-at nga silot sa Diyos sa “ngabil nga limbongan.”​—Salmo 120:2, 3.

◆ 131:2​—Sa unsang paagi ang kalag sama sa “masuso nga gilutas”?

Sa dili pa lutason, magpangita ang masuso sa iyang inahan aron siya mabusog. Ug ang gilutas nga masuso nga gikugos sa inahan makakaplag katagbawan, kasegurohan, ug kahupayan. Kontento sa pagpadayon sa mapaubsanong dalan (bersikulo 1), mibati ang salmista nga “nahupayan ug napahilom,” sama sa usa ka gilutas nga masuso nga gikugos sa iyang inahan. Ang mapainubsanong paghulat kang Jehova ug sa pagbuhat sa iyang kabubut-on mopatunghag kasegurohan ug dagayang mga panalangin.

Pagtulon-an Alang Kanato: Bisag makaluwas si Jehova sa iyang katawhan gikan sa katalagman, siya dili magpanalipod kanila gikan sa tanang mga kaaway. Sa tinuod, tungod sa mga kaaway napukaw ang mga kompositor sa pagpahayag niining mga salmoha. Apan, ang Diyos “dili magasulay kanimo nga dili nimo arang nga maantos” kondili “magatana ug lutsanan sa paglikay.” (1 Corinto 10:13) Tinuod nga mopanalipod si Jehova kanato gikan sa espirituwal nga kadaot. Siya makahimo sa pagmaniobra sa mga hitabo aron mawala ang kalamidad o mopalig-on kanato aron kita makabarog sa mga pag-ipit. Alang niana, ang labing makahupay ug mapuslanon mao ang panaghiusa nga atong ginatagamtam diha sa atong Kristohanong mga tigom.​—Salmo 133:1-3.

Ang Dalayegong Diyos

Basaha ang Salmo 135 ngadto sa 145. Lahi sa mga diyosdiyos kansang mga magbubuhat sama ra kanila, si Jehova mao ang dalayegong Diyos ug Manluluwas. (Salmo 135, 136) Dihang mga bihag pa ang iyang katawhan sa Babilonya, sila wala makalimot sa “mga awit sa Sion.” (Salmo 137) Si David miingon nga ang “mga hari magahimaya kang Jehova” ug nagakalipay sa pagkakahibulongan sa iyang pagkabuhat. (Salmo 138, 139) Nag-ampo siya sa panalipod sa Diyos ug nagabayaw sa Iyang pagkamaayo, kay nahibalo nga ang maayong relasyon lamang uban kang Jehova ang makahatag tinuod nga kalipay.​—Salmo 140-145.

◆ 138:2—Sa unsang paagi gipadako sa Diyos ang iyang mga pahayag labaw sa iyang ngalan?

Dihang mopahayag si Jehova ug usa ka butang pinaagi sa iyang ngalan, bug-os kitang makalaom sa paagi sa katumanan. Apan, kanunayng molabaw siya sa atong mga ginapaabot, nga nagahimo sa katumanan nga molabaw sa atong ginapaabot. Ginapadako sa Diyos ang iyang “mga pahayag” pinaagi sa paghimo sa katumanan niini nga dako kay sa atong gilaoman.

◆ 139:9—Unsay kahulogan sa “mga pako sa kaadlawon”?

Kining mga pulonga naglarawan sa kahayag sa kaadlawon, nga daw may mga pako, nga kalit nga mokuyanap sa ibabaw sa panganod gikan sa sidlakan ngadto sa kasadpan. Kon si David “may mga pako pa sa kaadlawon” ug makaabot sa halayong bahin sa kasadpan, siya ilalom gihapon sa pag-alima ug pagmando ni Jehova.​—Salmo 139:10; itandi sa Amos 9:2, 3.

◆ 141:3—Nganong gusto si David nga ‘bantayan ang pultahan sa iyang mga ngabil’?

Nasayod si David sa kadaot nga mahimo sa dila ug kon sa unsang paagi ang dili-hingpit nga mga tawo matintal sa pagdalidali sa pagsulti, ilabina kon masuko. Si Moises mao ang labing mapaubsanong tawo sa yuta, apan nakasala ang iyang dila maylabot sa mga tubig sa Meriba. (Numeros 12:3; 20:9-13) Nan, gikinahanglan ang pagpugong sa dila aron malikayan ang makadaot nga pulong ug matipigan ang maayong kasingkasing.​—Santiago 3:5-12.

n◆ 142:7—Nganong naghunahuna si David nga ang iyang kalag anaa sa “bilanggoan”?

Gibati niyang nag-inusara sa iyang suliran, ingon nga anaa sa madulom, peligrosong bilanggoan, wala-masabti ug nalain gikan sa tanang mga tawo. Kon bation nato ang sama nga pagbati ug naghunahuna nga ang atong “tuong kamot” bukas sa pag-atake, kita masaligong makapangayo ug tabang ni Jehova.​—Salmo 142:3-7.

Pagtulon-an Alang Kanato: Diha sa Salmo 139, gipahayag ni David ang kalipay sa katakos sa Diyos sa ‘pagsusi sa [iyang] hunahuna’ ug “nahibalo” kaniya ug sa iyang mga paagi. Imbes, mangitag kaikyasan, nagtinguha si David sa bug-os nga pagpasakop sa pagtultol ug pagmando ni Jehova. Siya nasayod nga kanunayng nagtan-aw kaniya ang Diyos. Ang maong kahibalo dili lamang makapugong sa tawo sa paghimog daotan kondili makahatag usab sa tawo ug dakong paglipay. Ang kamatuoran nga nakakita si Jehova sa atong mga binuhatan, nakasabot sa atong mga suliran, ug andam kanunay sa pagtabang kanato mohatag ug dulot nga pagbati sa kasegurohan ug kalinaw, nga hinungdanon sa atong kalipay.

Dayega si Jah!

Basaha ang 146 ngadto sa 150. Gipunting niining tulo ka salmo ang bug-os nga Basahon sa mga Salmo​—“Dayega si Jah, kamo nga katawhan!” Ang matag usa ka kanila gisugdan ug gitapos niadtong mahimayaong mga pulong. Kining tanan mipatugbaw ug dakong pagkusog sa tingog diha sa ika-150ng Salmo, nga nanawag sa tanang kalalangan nga “dayega si Jah!”

◆ Salmo 146:3—Nganong dili angay mosalig sa tawhanong mga pangulo?

Ang tawhanong mga pangulo mamatay. Sila dili makaluwas sa ilang kaugalingon ug sa nagasalig kanila. Busa, ang pagsalig diha sa tawhanong pagpangulo walay kapuslanan tungod sa kamatayon nga modangat sa ulahi. Apan “malipayon siya . . . kansang paglaom anaa kang Jehova nga iyang Diyos.” (Salmo 146:5, 6) Nakita sa salmista ang panginahanglag mas labawng pagtultol kay sa mahatag sa mga tawo.

◆ 148:4—Unsa kanang ‘mga tubig ibabaw sa mga langit’?

Tingali ang gipasabot sa salmista mao ang mga panganod nga nagadalag tubig ibabaw sa yuta nga mobubo sa ilang kaugalingon sa matag karon ug unya diha sa porma sa ulan, nga sa ulahi moagos ug balik ngadto sa kadagatan. Kining maong siklo hinungdanon sa kinabuhi, ug ang mismong paglungtad niini nakahatag kadayegan sa Maglalalang. Sanglit ang hawan sa atmospera taliwala sa yuta ug sa mga panganod mahimong matawag nga mga langit, gipunting sa salmista ang mga panganod ingong ‘mga tubig sa ibabaw sa mga langit.’

Gipamatud-an sa Salmo kining kamatuorana: Aron tinuod nga malipayon, nagkinahanglan kita ug maayong relasyon kang Jehova. Busa, ang bug-os nga tumong sa katawhan sa Diyos ug sa katuyoan sa atong paglungtad mahimong mausa diha sa pangataposang panawag sa salmista: “Ang tagsatagsa nga adunay gininhawa​—pasagdi nga managdayeg kang Jah. Dayega si Jah, kamo nga katawhan!”​—Salmo 150:6.