Unsang Ubang mga Kaayohan nga Nagatubod Gikan sa Diyos?

GUSTO ka bag matahom nga mga bulak, sa alimyon sa mga rosas, sa awit sa mga langgam? Nalipay ka ba sa unang pahiyom sa imong anak? Dili ba giapresyar nimo ang makapaganang kahumot sa pagkaon? Kinsay dili nindotan sa balangaw, sa matahom nga pagsalop sa adlaw, o sa mga bitoon sa matin-awng kagabhion? Ang katingalahang mga tagana sa Diyos walay kataposan, dili ba?

Apan adunay daghan kaayong kagul-anan. Bisan pa sa katakos sa yuta sa pagpatunghag pagkaon alang sa tanan, milyonmilyon ang kulang sa pagkaon. Milyonmilyon pa ang nahiloan sa polusyon. Ug bilyonbilyon karon naapektohan sa krimen, kadalo, kahakog, ug kahadlok sa ibunga unya sa umaabot.

Sanglit abundang magtatagana man ang Maglalalang, nganong daghan kaayo ang kasub-anan? Kining planetaha matahom kaayo nga dapit, nga gihimo alang kanato nga pahimuslan. Apan ang kalibotan​—ang katawhan​—anaa sa makaloluoyng kahimtang. Kay alang sa kinabag-an sa molupyo sa yuta, madulom ang umaabot, makalilisang. Ngano? Unsay nahitabo? Gihimo ba sa Diyos ang tawo ug dayon gitalikdan siya? May kahayag ba niining makalibog nga kahimtang? May paglaom ba kita alang sa umaabot?

Ang Tuboran sa Kahayag ug Paglaom

Duolan sa 2,000 ka tuig kanhi usa ka tagsaong batang lalaki ang natawo​—tagsaon tungod kay ang iyang inahan, si Maria, maoy usa ka tawo, ug ang iyang amahan mao ang Diyos mismo! ‘Imposible!’ miingon ba ang uban? Dili, dili alang sa Magmumugna sa pagsamkon, ang Magbubuhat sa tanang komplikadong mga porma sa kinabuhi. Kanang maong batang lalaki mitubo nga nahimong hingpit nga “tawo, si Kristo Jesus.”​—1 Timoteo 2:5; Mateo 1:18-25.

Kadto maoy tagsaon sa kasaysayan nga pagkatawo. Sa pagkatinuod, gidawat kini sa daghang mga nasod pinaagi sa pagpetsa sa makasaysayanhong mga hitabo sa wala pa siya ingong B.C.​—before Christ o wala pa si Kristo. Apan ang iyang unang mga tuig malinawong gigugol ingong kaubang panday sa balay sa iyang ama-ama sa Nazareth. Milabay ang katloan ka tuig. Dayon, diha sa Suba sa Jordan, gitanyag ni Jesus ang iyang kaugalingon sa pagbuhat sa kabubut-on sa Diyos ug gibawtismohan, ug mikunsad ang balaang espiritu sa Diyos diha kaniya. (Mateo 3:13-17) Dayon misugod si Jesus ug dinamikong kampaniya sa pagwali ug sa pagpanudlo. Sumala sa gitagna ni Isaias, “ang mga tawo nga nanaglingkod sa kangitngit nakakita ug dakong kahayag.”​—Mateo 4:14-17; Isaias 9:2.

Si Jesus nahimong labing bantogan ug kaylap nga tinahod nga Magtutudlo sa tanang panahon. Walay tawhanong magtutudlo ang nakahatag ingon ka gamhanong impluwensiya sa katawhan o nakataganag daghan kaayong espirituwal nga kahayag ug paglaom. Unsa ang iyang libro? Ang Bibliya, nga niadto​—ang Hebreohanong Kasulatan, o “Daang Pakigtugon.” Gibuhi sila ni Jesus. Daghang karaang mga tagna natuman diha kaniya. (Itandi sa Miqueas 5:2 sa Mateo 2:3-6.) Iyang gipamatud-an ang asoy sa Genesis bahin sa sinugdanan sa tawo. (Genesis 2:24; Mateo 19:3-6) Gikutlo, gipadako, ug gisibya ni Jesus sa halayo ug sa duol ang pangunang tema Bibliya​—sa pagbindikar sa ngalan ni Jehova ug pinaagi sa Gingharian sa Diyos. (Mateo 4:23; 6:10) Dugang pa, ang mga asoy sa kinabuhi ni Jesu-Kristo ug mga buhat maoy nangibabawng bahin sa Kristohanon Gregong Kasulatan, o “Bag-ong Pakigtugon.” Oo, ang Bibliya maoy katingalahang gasa nga gikan sa Diyos, usa ka masidlak nga kahayag diha sa mangiob, masulob-ong kalibotan.​—Salmo 119:105.

Nganong Nagkagubot ang Katawhan?

Gitubag ba sa Bibliya kanang pangutanaha? Oo. Kini nagpakita nga dili kini usa ka kaso sa pagtalikod sa Diyos sa tawo kondili, sa pagtalikod sa tawo sa Diyos. Lain pa, ang pangunang prinsipyo sa kagawasan sa pagpili ang nalangkit. Wala lalanga ang tawo nga samag mga robot, nga giprograma sa pagsunod. Kita makapili sa pagsunod ug sa pagsupak.

Dihang gilalang sa Diyos ang unang tawhanong paris diha sa matahom nga Paraiso sa Eden, hayan pagkamalipayon ug pagkawalay problema sila! Walay sakit, walay kahadlok, walay mga kabalaka. Anaa ang matahom nga mga langgam ug mga mananap, ug abunda ang lamiang mga kalan-on. (Genesis 1:26; 2:7-9) Apan, sa ulahi, usa ka dili-makitang kaaway miabot sa talan-awon. Usa ka gamhanang espiritu nga linalang nahimong ambisyoso, nga nagtinguha sa pagmando sa umaabot nga tawhanong panimalay. Pinaagi sa pagsulti sa unang bakak, iyang gidani si Eva, ug si Adan nahaylo sa pagsupak sa sugo sa Diyos sa dili pagkaon sa gidiling bunga. (Genesis 3:1-7) Sama sa kadaghanan karon, ang unang mga tawo nagtuo nga sila ‘makahimo sa pagbuhat sa ilang kaugalingon butang.’ Apan sila sa aktuwal nagbutang sa ilang kaugalingon nga ilalom sa pagkontrolar ni Satanas, ang diyos sa presenteng daotang sistema sa mga butang.​—2 Corinto 4:4.

Kini nakabangon ug dako ug hinungdanong isyu: Ang tawo ba malamposong makamando sa iyang kaugalingon nga walay Diyos? Kini nagkinahanglan ug dakong panahon sa pagsulbad niining isyuha sa matagbawong paagi. Kasamtangan, si Adan ug Eva mibayad sa silot sa Diyos nga gipakanaog​—kamatayon. Ug sanglit sila misamot pa nga nahimong mga makasasala, sila ug ang ilang mga anak walay bisan unsang palaabutong kinabuhing walay kataposan nga bulag sa Diyos.​—Roma 5:12; 1 Corinto 15:21, 22.

Usa ka Mahimayaong Umaabot

Sukad sa panahon ni Adan daghang mga kaliwatan ang miabot ug miagi. Ug ang walay puas nga pagbag-o sa mga kalihokan sa tawo, nasulayan ang daghang matang sa tawhanong mga kagamhanan​—awtokrasya, demokrasya, sosyalismo, komunismo, ug uban pa. Apan ang tanan nangapakyas. Ang politikal, sosyal, ug internasyonal nga mga problema nagakadaghan, maingon man ang makalilisang nga mga hinagiban alang sa kalaglagan sa masa nga nagahulga sa paghikog sa kalibotan. Sa panahon sa Gubat sa Kalibotan II, ang mga politiko sa Kasadpan misaad nga ang kadaogan mohatag ug kagawasan gikan sa kawalad-on ug kahadlok, apan ang duha nagakadaghan.

Unsa ang sulbad? Ang dakong problema nagkinahanglan ug dakong kasulbaran​—walay lain kondili globonhong paghinlo ug sa pagpasulod ug usa ka bag-ong kalibotan. Kinsay makahimo niana? Sa tinuod dili ang Hiniusang Kanasoran o bisan unsang kombinasyon sa politikanhong mga gahom nga sagad nagalapas sa mga kasabotan sa kalinaw wala pa gani makauga ang pirma sa ilang mga ngalan! Sila sama sa walay mahimong mga paon diha sa paghawid sa gahom ni Satanas. (1 Juan 5:19) Si Jehova lamang, ang Labing Makagagahom, ang makawala kang Satanas ug sa iyang mga demonyo, ug motapos sa presente daotang kalibotan, ug maoy mopatunghag mahimayaon bag-ong kalibotan ilalom sa langitnong Gingharian sa iyang Anak, si Jesu-Kristo, ingong Hari sa mga hari.​—Mateo 6:9, 10; Daniel 2:44; Pinadayag 20:1-3.

Unsay buhaton niini nga Gingharian? Kinsay maluwas sa makalilisang nga paghinlo sa globo, o sa Armageddon? Usa ka makaikag kaayong kamatuoran nga dugang ug dugang mga tawo nakaamgo nga kining langitnong gingharian nagalihok na ug nagapangandam sa mga tawo nga maluwas sa Armageddon! (Pinadayag 16:14-16) Kinahanglang mahimo silang unsang matanga sa katawhan? Si Jesu-Kristo miingon: “Malipayon ang mga malulot [ang maaghop], kay sila makapanunod sa yuta.” (Mateo 5:5) Busa iyang gilig-on kining karaang tagna: “Sa dili pa moabot diha kaninyo ang adlaw sa kasuko ni Jehova, pangitaa si Jehova, kamong tanang mga maaghop sa yuta, nga nanagtuman sa Iyang tulomanon. Pangitaa ang pagkamatarong, pangitaa ang pagkamaaghop. Kay tingali kamo pagatagoan sa adlaw sa kasuko ni Jehova.”​—Sofonias 2:2, 3.

Ang mga maaghop dili lamang maluwas sa Armageddon kondili, pinaagi sa pagpabiling matinumanon sa Diyos, makapanunod usab sa kinabuhing walay kataposan. Sa unsang paagi? Sumala sa gihisgotan na, ang dakong pamilya sa mga kaliwat ni Adan nawad-an sa palaabutong kinabuhing walay kataposan pinaagi sa iyang makasasalang pagkadili-masinundanon. Ang kamatayon midangat sa tanang tawo pinaagi ni Adan. Sanglit usa man siya ka tawong hingpit, laing hingpit nga tawo ang gikinahanglan aron sa paglukat, o sa pagpalit ug balik, sa giwala ni Adan. Si Jesu-Kristo ang mitagana nianang maong panginahanglan ug mihatag sa iyang kinabuhi “aron ang tanan nga motuo kaniya dili malaglag kondili makabaton ug kinabuhing dayon.”​—Juan 3:16.

Kining tagana sa lukat mao ang labing dakong gasa sa Diyos sa tawo. Kini ikapadapat dili lamang niadtong maluwas sa pagsulod sa bag-ong kalibotan kondili niadtong mobalik usab gikan sa kamatayon. Katingalahan ra ba kaayo kanang pamation? Si Jesus miingon: “Ayaw kamo kahibulong niini, kay ang takna nagsingabot na nga ang tanan nga anaa sa handumanang mga lubnganan managpakabati sa iyang tingog, ug ang nanagbuhat ug maayo managpanggula nga binanhaw ngadto sa kinabuhi, ug ang mga nanagbuhat ug daotan managpanggula nga binanhaw ngadto sa pagkahinukman sa silot.” Pagkamakapaukyab! Pagkadako sa kalipay sa maluwas sa Armageddon, nga mosugat sa ilang mga minahal nga mabanhaw gikan sa mga patay!​—Juan 5:28, 29.

Pagkamahimayaong palaabuton ug paglaom! Ug kining tanan gitagana pinaagi sa usa ka mahigugmaong Maglalalang, si Jehova, pinaagi sa iyang pinalanggang Anak, si Jesus. Bisag madulom kaayo ug makahahadlok karon ang umaabot, ang umaabot puno sa kahayag ug paglaom alang niadtong nagatuon sa Bibliya ug nagalihok sa makalipayng balita niini. Kita nagpuyo na sa maukyabong panahon. Ang Gingharian sa Diyos haduol na. (Mateo 24:33, 34) Dayega si Jehova, ang Maghahatag sa “tanang maayong mga gasa ug sa tanang hingpit nga mga regalo”!​—Santiago 1:17.

Samtang ginapalandong mo ang daghang mga paagi nga kita nakapahimulos sa mga tagana ug sa mga katuyoan sa Diyos, hayan bation nimo ang dulot nga pagbati sa utang kabubut-on ug tinguha sa pagpakita niini sa usa ka paagi. Apan kon nagsugod ka pa lang sa pagsabot ug sa pagdawat sa tinuod nga paglaom sa umaabot, imong bation ang panginahanglan sa dugang nga pagsusi pa niana. Among gidasig kamo sa pagbuhat niana. Padayona ang pagtuon sa Pulong sa Diyos uban sa mga publikasyon sama niini nga makatabang kanimo sa pagpauswag sa imong kahibalo ug pagsabot sa mahimayaong mga katuyoan sa Diyos.

Kadtong aduna nay tin-awng pagtuo nga ang Gingharian sa Diyos mao lamang ang bugtong sulbad sa mga kalisdanan sa katawhan mobati ug sama sa gipahayag sa salmista kinsa miingon: “Unsa man ang akong igabayad kang Jehova tungod sa tanan niyang mga kaayohan kanako?” (Salmo 116:12) Makita niining mga tawhana nga ang pagsulti sa uban mahitungod sa nahimo sa Diyos kanato ug sa mahimayaong palaabuton nga iyang ihatag ngadto kanilang nahigugma ug nagaalagad kaniya mohatag ug lalom nga katagbawan ug tinuod nga kalipay. Ngano? Tungod kay, si Jesus miingon: “Adunay dakong kalipay ang paghatag kay sa pagdawat.”​—Buhat 20:35.

[Kahon sa panid 5]

JESU-KRISTO—

◆ Nakatuman sa daghang karaang mga tagna, pananglitan, Miqueas 5:2; Mateo 2:3-6

◆ Nakalig-on sa asoy sa Genesis bahin sa sinugdanan sa tawo​—Mateo 19:3-6

◆ Nakapadako ug nakasibya sa pangunang tema sa Bibliya, sa pagbindikar sa ngalan ni Jehova pinaagi sa Gingharian​—Mateo 4:23; 6:9, 10; Lucas 8:1

◆ Nakapalit ug balik sa giwala ni Adan, ang hingpit tawhanong kinabuhi, busa nakahimo niadtong may pagtuo Kaniya nga makabaton ug kinabuhing dayon​—Juan 3:16

[Hulagway sa panid 7]

‘Unsay imong igabayad kang Jehova alang sa tanan niyang mga kaayohan?’