Pagkatawo ni Jesus—Kasugiran Lamang?

ANG pagkatawo ni Kristo! Kini giangkon nga mao ang pasikaranan sa labing dakong tinuig nga saulog sa Kakristiyanohan. Ugaling, kataw-anan nga daghang klerigo nagasalikway sa nagkalainlaing bahin sa mga asoy sa Ibanghelyo sa pagkatawo ni Jesus nga kono kasugiran lamang. Pananglitan, ang The Interpreter’s Bible nagaingon bahin sa asoy ni Mateo sa pagduaw sa mga astrologo, o ’mga tawong makinaadmanon“: “Busa walay paagi sa pagtino kon kaha kadto gipunopunoan, sa pagkamatuod, kon kaha kadto nahitabo gayod ingong literal nga kamatuoran. Ang bili ug kahinungdanon sa asoy wala magdepende sa pagkatukma niini; ang estorya giisip hinuon nga usa ka buhat sa arte.“

Ang maong mga kritiko kadaghanan moergo nga ang mga asoy sa Ebanghelyo sa pagkatawo ni Kristo kulang kaayog detalye aron maisip nga makasaysayanhon. Apan sa iyang librong The Life and Times of Jesus the Messiah, si Alfred Edersheim nagsupak niini, nga nag-ingon: “Luwas nga ikapatuo, nga walay Apokripanhon o asoy sa ingong (kasugirang) hitabo ang gitiman-an sa maong kakulang, o pagkawalay mga detalye. Kay, ang duha ka hinungdanong hiyas, nga sama bahin sa kasugiran ug sa tradisyon, mao, nga sila kanunayng nagatinguha nga liyokan ang ilang mga bayani sa silaw sa kahimayaan, ug nga sila nagatinguhang itagana ang mga detalye, nga kulang unta.”

Bisan pa niana, nganong ang mga Ebanghelyo nagahatag ug diyutay kaayong detalye bahin sa pagkatawo ni Jesus? Tungod kay ang iyang pagkamatay, dili iyang pagkatawo, mao ang hinungdanon kaayo. (Mateo 20:28) Si Edersheim sa dugang nagapahinumdom kanato: ”Ang mga Ebanghelyo walay tuyo sa paghatag sa usa ka biyograpiya ni Jesus, ni sa mga materyales alang niana; kondili nagbaton lamang niining duhag-pilo nga tumong: nga kadtong nagabasa kanila ’makatuo nga Jesus mao ang Kristo, ang Anak sa Diyos,’ ug sa pagtuo nga sila ’makabaton ug kinabuhi tungod sa Iyang Ngalan.’”