Gihimong Manggialamon Pinaagi sa “Pagpahamtang sa Usa ka Multa”

ANG Proverbio 21:11 nagaingon: “Pinaagi sa pagpahamtang sa usa ka multa diha sa mayubiton ang walay-kasinatian mahimong manggialamon; ug pinaagi sa paghatag ug salabotan sa usa ka tawong manggialamon siya makabaton ug kahibalo.”

Ang usa ka ”walay-kasinatian” kadaghanan maglisod sa pagpabili nganong daotan ang usa ka kagawian. Hinuon, sa nahaigong panahon siya tingali makapaniid sa usa ka “mayubiton”—usa nga motamay sa mga prinsipyo sa Pulong sa Diyos—nga hisakpan sa iyang pagkadaotan ug makaagom sa “kaguol ug lisod nga panahon.” (Proverbio 1:27) Ubos sa Moisesnong Kasugoan, ang nahiangay nga ’silot’ (King James Version), o mas literal “usa ka multa,” ikapahamtang sa mamumuhat ug daotan.—Itandi ang Exodo 21:22; Deuteronomio 22:19.

Ang epekto diha sa usang walay-kasinatian? Kay nakakita sa kataposan sa balos sa buhat nga daotan, siya ’mahimong manggialamon’ ug mohukom sa dili pagsunod sa maong dalan mismo. (Itandi ang Proverbio 19:25.) Ingong kasukwahi, ang “usa ka tawong manggialamon“ nahibalo na gikan sa nangaging kasinatian, pagpaniid, ug kahibalo sa mga prinsipyo sa Bibliya nga ang usa ka gawi dili maayo o malaglagon. Dili kinahangiang siya makapaniid kanunay sa daotang sangpotanan sa usa ka buhat aron makombinsir sa pagkadaotan niana. Sa ingon siya makabatog bag-ong ’mga salabotan’ pinaagi sa instruksiyon lamang, inay sa mapait nga kasinatian.