Sila Kombinsido sa Gugma ni Jehova

GIDAKDAKAN sa dagkong mga balod ang barko nga hisakpan sa kusog kaayong bagyo sa dagat. Tungod sa 14-adlawng pakigbisog batok sa masuk-anong dagat ang mga pasahero ug tripulante nawad-ag paglaom, gawas sa usa. Siya masaligon nga si Jehova manalipod kaniya, kay ang makahupayng mga pulong, “Ayaw kahadlok, Pablo” milanog sa iyang kaisipan. Sa sunod mahukmanong mga oras, ang barko nasangyad, nga ang tanan nakaabot nga luwas sa mamala. Sa makausa pa si apostol Pablo may katarongang makombinsir sa gugma ni Jehova.—Buhat 27:20-44.

Ikaw ba samang kombinsido sa gugma sa Diyos? Ang makanunayong pagtuon sa Pulong sa Diyos ug paggamit sa imong nakat-onan sa paglig-on sa uban hinungdanon. Apan, aron makombinsir gayod sa gugma ni Jehova, kinahanglang ikaw aktuwal magkinabuhi sumala sa mga pulong ni Jehova pinaagi sa pagkasinati sa iyang paglihok alang kanimo. Ang usa nga lig-ong nakombinsir niini mao ang usa ka nagapanawng magtatan-aw nga nag-alagad sa habog nga kabukiran sa Bolivia si kinsa, sama sa daghan pang uban, nakasinati sa pag-amoma ni Jehova.

“Sa pagkatapos sa pag-alagad sa Oruro,” siya misugid, “ako magaduaw sa usa ka kongregasyon sa Kami, usa ka lungsod minahan nga 100 kilometros ang kalayo. Ang habog, nag-ikis-ikis nga karsada moabot ug 4,600 ka metros sa gihabogon ug maluibon kaayo, ilabina kon mag-ulan. Ang mga temperatura kadaghanan moubos ngadto sa -10° C. o ubos pa.

“Ang laing igsoong lalaki, si Anibal, magdala kanako nga sakay sa iyang motorsiklo, ug kami migikan sa alas 6:00 s.b., nga andam alang sa lima-ka-oras nga biyahe. Sukad sa sinugdan kadto nag-ulan, ug ang lapok nanapot sa ligid ug sa tapaludo, nga nakapaungot namo. Tapos lamang sa hagong pagtangtang sa lapok nga kami nakapadayon. Sa pag-angkas sa luyo ni Anibal, gipaningkamotan ko ang pagpanalipod sa akong sapatos ug karsones apan misurender sa dihang sila bug-os nahumod.

Ebidensiya sa Gugma ni Jehova

“Unom ka oras ang milabay sa dihang ang makina naaberiya sa usa ka titip nga bungtod, ug misugod kami sa pag-atras. Kami, nga nanglukso misulay sa tanang paagi sa pagpugong sa bug-at nga makina sa danlog nga lapok. Ugaling, kini nakawang ug ang among mga kasingkasing nahisagmuyo samtang ang motorsiklo nahulog sa pangpang nga 90 ka metros ang giladmon! Mabalak-on kaming midungaw. Dili katuohan, ang makina mihunong sa tungatunga. Bisan pa niana, kami dili gayod makaalsa kon walay tabang.

“Miaginod ang mga oras, apan kami diyutayg paglaom nga may moagi niadtong awaaw nga karsada. Dayon ang usa ka lalaking may usa ka asno ug pila ka llama mitungha. Sa pagkakita sa among kahimtang, siya misulti sa pinulongang Quechua: ‘Oo, ako dunay bugkot.’ Gibugkot niya ang panit nga mga yupis sa asno ug sa motorsiklo. Dayon, kami nag-alsa gikan sa ubos samtang gidasig ang asno sa pagbira. Sa kataposan, tapos sa dakong pag-awhag sa asno, kami nahibalik sa karsada, nga ang among mga agtang nabasa sa singot. Unsay among ibalos kaniya? Gitanyagan namo siya sa librong Mga Estorya sa Bibliya, ug siya nakaangay kaayo sa libro nga buot niyang baslan ang pabor pinaagi sa mga patatas gikan sa iyang karga!

“Ang makina miandar, ug kami mapasalamaton kaayo kang Jehova. Sa unahan, kami naghunahuna sa paghunong, sanglit ang makina misugod sa pagkaaberiya. Kami nakaabot sa usa ka nag-inusarang painitan. ‘Asa ba kamo padulong?’ nangutana ang tag-iya. Gisultihan namo siya ug gisaysay ang among problema. ‘Duna koy spark plug ug pila ka himan nga akong ipahulam kaninyo,’ matud niya. Halos dili kami makatuo sa among nadungog—kadto usa ka dapit diin ang mga higala, ilabina ang mga bug-os nga mga estranghero, kadaghanan dili saligan. Pinaagi sa bag-ong spark plug ang makina maayog dagan.

“Ngitngit na niadto, ug ako nabalaka, kay ang akong mga batiis naminhod tungod sa katugnaw. Dayon, samtang nagtungas sa titip nga tungason, ang makina mihunong na usab. Ang pagtindak sa starter ug pagtulod sa motorsiklo sa tulo ka kilometros wala molampos. Kami, nga bug-os gikapoy, nanglingkod sa daplin sa karsada. Labing menos ang akong mga batiis wala na maminhod! Apan kaming duha napikal ug wala masayod kon unsay buhaton. Kami mipahulay ug kadiyut ug dayon misulay sa pagpaandar na usab sa makina. Molampos ba kaha kini?

“Sa among katingala ang makina miandar. Hinunoa, misugod niadto sa pag-ulan, ug sa sunod nga subida kami naaberiya na usab. Sa makausa pa kami nanglingkod ubay sa dalan, nga sa maong panahon nagpaulan. Kami mipahulay na usab. Nga may pagduhaduha gisulayan na usab namo ang makina—ug kadto miandar! Sa taudtaod kami nagsubay na sa kinahabogong punto sa among biyahe. Nahuwasan ako, nga naghunahunang bisan pag ang makina maaberiya, kami hapit nang makaabot sa Kami. Apan sa usa ka titip nga pagtugbong ang kuptanan sa preno naputol diha sa kamot ni Anibal! Nga daling milukso samtang naghawid sa lawas sa motorsiklo sa luyo, akong gihawid ang duha ka tiil sa yuta ug nagpadalus-os sa bungtod. Sa maong paagi kami nakahunong. Kadto nahitabo sa duha pa ka subida.

Sa Kataposan—Nakaabot sa Kami

“Alas 3:00 s.b. na sa dihang sa kataposan nakaabot kami sa Kami. Kami nagbiyahe sulod sa 21 oras. Ang pagpangita sa mga igsoon usa ka suliran, sanglit kadto ang una kong pagduaw. Nanuktok kami sa mga pultahan apan gisultihan: ‘Pahawa kamo! Nangatulog pa kami!’ Human manuktok sa lainlaing mga pultahan, gibati ko nga ang labing maayong buhaton mao ang pagpahulay sa ilalom sa nagsiwil nga atop ug mangita sa mga igsoon sa buntag. Sa paglubog, ako nahinanok sa pagkatulog. Sa akong pagkamata, ako gilibotan na sa mga tawo. Ako mitindog, ug ang usa ka dakoong lalaki miduol ug migakos nakog hugot. Oo, sila mao ang among mga igsoon! Nakaplagan sila Anibal. Wala ako makatingog samtang ang akong mga emosyon misulbong sa akong kahiladman.

“Nga wala mag-usik ug panahon, ilang gidala ang akong mga butang, apil ang naputos sa lapok nga motorsiklo, nga literal gipas-an sa usa ka igsoong lalaki ngadto sa iyang tugkaran. Ang akong mga tagbalay maoy mapaubsanong magtiayon, nga ang asawa nagsul-ob sa naandang pollera, usa ka nagsapawsapaw nga sayal. ‘Gamita ang among higdaan,’ miingon sila. Dili ko gustong matulog sila sa salog, ilabina kay mabdos ang asawa. Apan namugos sila.

“Nga wala lang hialinggati nako, alas 8:00 s.b. na. May nanuktok sa pultahan. ‘Ang mga igsoon andam na sa pagsangyaw,’ ako gisultihan. Sa pagkakita sa ilang madahomong mga nawong nga sayag sa apresasyon, wala akoy kapaingnan gawas ang paglugos sa pagbakod sa akong namaol nga lawas ug gisugdan ang duaw. Ug pagkamalipayon kadto nga pagduaw! Samtang gikuyogan ko ang mga igsoon sa ilang pagsangyaw, yanong nag-awas ang ilang kalipay ug kadasig. Gipalandong ko unsa ka hinungdanon ang maong mga pagduaw, bisan pa sa tanan namong naagian—sama sa ‘mga sapa sa tubig sa mamala nga kapatagan.’—Isaias 32:2.

“Sa sunod adlaw giduaw namo ang usa ka balangay diin ang usa ka ebanghelista nga pastor nanghulga nga bungkagon ang among tigom sa akong pag-abot. Tapos sa diskurso, ang usa ka tawong dakoon mihatag kanakog Bolivianong haloga ug miingon: ‘Igsoon, naa nimo ang kamatuoran!’ Human niadto, ako nangutana kon kinsa kadto siya. ‘Ang pastor,’ miingon sila.

“Ang pagduaw sa Kami natapos dayon, ug kami talilakaw na. Giayo sa mga igsoon ang motorsiklo ug gilabhan ang tanan namong lapokong sinina. Sa gihisgotan namo ang tawong nagpahulam kanamo sa mga galamiton, sila nahibulong, sanglit siya nailhan ingon nga usa nga halos dili gayod motabang. Tapos sa daghang halog ug mga lamanohay, kami nanglakaw ug sa wala madugay kami nahibalik sa malulutong tag-iya sa painitan. Human iuli ang tanang butang, kami nangutana kaniya: ‘Pilay among bayranan?’ ‘Wala ra,’ mitubag siya, ‘Nalipay ra kong nakatabang!’

“Balik sa Oruro, lima ka oras sa ulahi, kami nakahunahuna unsa ka hinungdanon ang dili pagsurender ug pagkakahibulongan ang pag-atiman ni Jehova kanamo. Si Anibal dulot natandog sa kasinatian nga siya mipatugbaw: ‘Mobalik gayod ko!’ Kana gayod ang iyang gibuhat, nga nagpasakay sa mga nagapanawng magtatan-aw sa iyang motorsiklo paingon sa Kami ug sa ubang mga dapit. Oo, kami may lig-ong katarongan sa pagkakombinsir nga labaw pa sa gugma ni Jehova.”—Sumala sa giasoy sa magtatan-aw sa sirkitong si Ricardo Hernandez.

[Footnote]

[Mga hulagway sa panid 23]

Ang nag-ikis-ikis nga karsada sa bukid nga padulong sa lungsod nga minahan sa Kami

Karsada agi sa kabukiran paingon sa Kami

Ang mga asno mapuslanon kaayo sa usa ka emerhensiya!