Unsay kahulogan unya sa adlaw sa Ginoo alang kanimo?
“Magmando ka taliwala sa imong mga kaaway.”—SALMO 110:2.
1-3. (a) Nganong ang sinugdanan sa adlaw sa Ginoo maoy panahon sa panag-away, ug unsa ang pila ka mga kalamposan ni Jesus? (b) Sa unsang paagi si Jesus “magtapos sa iyang pagpanaog”?
BALIK sa 1914, gientrono si Jesus ingong Hari sa Gingharian sa Diyos, ug ang adlaw sa Ginoo nagsugod. Sa gilayon, giatubang sa bag-ong Hari ang mapintas nga pagbatok ni Satanas nga Yawa ug sa iyang mga ahente dinhi sa yuta. (Salmo 2:1-6) Busa kining unang mga tuig sa adlaw sa Ginoo maoy panahon sa kagubot nga diin si Jesus ‘mimando taliwala sa iyang mga kaaway.’—Salmo 110:2.
2 Ang pagpanaog sa bag-ong Hari tagsaon. Human sa 1914, naningkamot si Satanas sa “pagtukob” sa bag-ong natawong Gingharian apan, hinunoa, makauulawng gitambog gikan sa langit. (Pinadayag 12:1-12) Dayon siya ‘nakig-away’ sa mga nanghibilin sa dinihogan, apan wala siya makapugong sa ilang ‘pagtindog’ sa 1919 o sa ilang pagdawat sa “gamayng basahon” gikan sa kamot ni Jesu-Kristo. (Pinadayag 10:8-11; 11:11, 12; 12:17) Wala usab siyay gahom sa pagpugong sa pagtigom sa mga kataposan sa 144,000 ug sa pagtigom sa dakong panon (gikan sa tanang kanasoran), kinsa naghatag ug “balaan nga pag-alagad sa adlaw ug sa gabii sa templo” ni Jehova.—Pinadayag 7: 1-3, 9-15.
3 Sa pagkatinuod, sukad sa 1914 si Jesus ‘nagpanaog.’ Bisan pa niana, daghan pang butang buhaton. Kinahanglan si Jesus “magtapos sa iyang pagpanaog.” Kinahanglang molihok pa siya sa pagwala sa tanang lama sa kalibotanong sistema sa mga butang ni Satanas. (Pinadayag 6:1, 2; 19:11-21) Unsay kahulogan alang kanato niining hinungdanong lihok ingong mga indibiduwal?
Paghukas sa Babilonyang Bantogan Atubangan sa Publiko
4. Sa unsang paagi gihubit sa Pinadayag ang bakak nga relihiyon?
4 Ang kalaglagan sa kalibotan ni Satanas magsugod uban sa kataposan sa bakak nga relihiyon. Gihubit sa Pinadayag ang tibuok kalibotanong imperyo sa bakak nga relihiyon—lakip ang Kakristiyanohan—ingong babayeng bigaon, ang Babilonyang Bantogan, kinsa nakigrelasyon sa mga hari sa yuta ug gihubog ang katawhan sa iyang pakighilawas. Siya usab hubog—makapasuka—gikan sa pag-inom sa dugo, sa dugo sa mga alagad sa Diyos. (Pinadayag 17:1-6) Gibatbat usab sa Pinadayag ang kataposan niining dulumtanang tigulang nga bigaon, ug labi pa natong masabtan kon unsay kahulogan niini kon atong susihon ang nahitabo sa laing relihiyosong bigaon nga naglungtad balik sa ikapitong siglo sa wala pa ang atong Komung Panahon.
5, 6. Nganong ang matinumanong Jerusalem gitawag babayeng bigaon, ug unsang paghukom ang midangat kaniya gikan sa kamot ni Jehova?
5 Kadtong maong bigaon mao ang siyudad sa Jerusalem. Siya mao unta ang sentro sa pagsimba ni Jehova dinhi sa yuta, apan ang Diyos miingon kaniya: “Ikaw nakasala sa dugo nga gipaagas mo.” (Ezekiel 22:4) Ginaingon usab nga siya putli sa espirituwal, apan gihugawan niya ang iyang kaugalingon pinaagi sa pakig-uban sa mga nasod. “0 pagkadako sa akong kasuko batok kanimo,” miingon si Jehova kaniya, “sanglit gibuhat mo kining tanang mga butang, ang buhat sa usa ka babaye, usa ka harihariong bigaon!”—Ezekiel 16:30; 23:1-21; Santiago 4:4.
6 Busa, palandonga ang paghukom ni Jehova niining babayeng bigaon: “Ania karon tigomon ko ang tanan [mga nasod] mong mga hinigugma uban kang kinsa ikaw nagakalipay ug silang tanan nga imong gihigugma . . . , ug hukasan ka nila sa imong mga besti ug kuhaan ka sa imong matahom nga mga hiyas ug ikaw biyaan nila nga hubo ug walay tabon. Ug sunogon nila ang imong balay sa kalayo.” (Ezekiel 16:37, 39, 41; 23:25-30) Girekord sa kasaysayan kon unsa ang nahitabo. Ang mga Babilonyanhon miabot sa 607 W.K.P. ug gihuboan ang Jerusalem. Ang iyang katawhan ug ang iyang bahandi gidala sa Babilonya. Nalumpag ang siyudad, nasunog ang templo, ug biyaan ang yuta diha sa kalumpagan.—2 Cronicas 36: 17-21.
7. Unsay kataposan sa Babilonyang Bantogan?
7 Susamang butang ang mahitabo sa Babilonyang Bantogan. Ang Pinadayag nagpasidaan: “Kini [modernong “mga hari”, o mga magmamando nga kaniya nakighilawas sa espirituwal ang Babilonyang Bantogan] managdumot sa babayeng bigaon ug siya ilang pagalaglagon ug pagahuboan, ug ang iyang unod ilang pagakan-on ug siya ilang pagasunogon pinaagig kalayo.” (Pinadayag 17:2, 16) Gikan sa pananglitan sa karaang Jerusalem, nahibalo kita kon unsay kahulogan niini. Ang bakak nga relihiyon laglagon sa nasodnong mga kagamhanan nga ‘nahigugma’ niya niadto. Kuhaon gikan kaniya ang iyang bahandi, ug siya pagasunogon, bug-os nga laglagon. Ang haom nga kataposan sa dulumtanang organisasyon!
Ang mga Langit Mingiob
8. Unsang matanga sa panahon ang dakong kasakitan alang sa katawhan?
8 Uban sa kalaglagan sa Babilonyang Bantogan, kita mosulod sa “dakong kasakitan” nga gitagna ni Jesus. (Mateo 24:21; Pinadayag 7:14) Naghisgot bahin nianang panahona, ang Pinadayag nag-ingon: “Miabot ang usa ka dakong linog; ug ang adlaw nahimong maitom ingog panapton nga hinimog maitom nga balhibo, ug ang tibuok bulan nahimong dugo, ug ang mga bitoon sa langit nahulog sa yuta.” (Pinadayag 6:12, 13) Kining dakong linog mao ang “dakong pag-uyog” sa “yuta sa Israel” nga gitagna ni Ezekiel. (Ezekiel 38:18, 19; Joel 3: 14-16) Kini mao ang kataposang kalaglagan niining daotang sistema sa mga butang. Duna bay mahitabo sa literal nga adlaw, bulan, ug mga bitoon niadtong panahona?
9, 10. Unsay gitagna ni Ezekiel bahin sa Ehipto, ug sa unsang paagi natuman kini?
9 Si Ezekiel, nga nagpasidaan sa umaabot nga pagkapukan sa dakong silingan sa Israel sa habagatan, ang Ehipto, miingon: “‘Ug sa dihang palungon ko na ikaw [Parson] tabonan ko ang langit ug pangiubon ko ang bitoon niana. Ang adlaw tabonan ko sa usa ka panganod, ug ang bulan dili mohatag sa iyang kahayag. Ang tanang mga suga nga masiga sa langit—pangiobon ko sa ibabaw kanimo, ug ang kangitngit ibutang ko diha sa imong yuta,’ nagaingon ang Soberano Ginoong Jehova.”—Ezekiel 32:7, 8.
10 Sa dihang napukan si Paraon ug ang iyang mga sundalo, ang literal nga mga langit wala mongiob. Apan ang palaabuton sa Ehipto madulom kaayo. Sumala sa gipamulong sa usa ka eskolar sa Bibliya nga si G. F. Keil, “ang kangitngit nga resulta [sa pagkapukan ni Paraon] maoy mahulagwayong representasyon sa bug-os walay paglaom nga mga kahimtang.” Bug-os nga natapos ingong independenteng gahom sa kalibotan, gimandoan ang Ehipto sa nagkalainlaing gahom sa kalibotan! Karong adlawa, ang kadaghanan sa teritoryo sa karaang Paraonikong gahom sa kalibotan gimandoan sa nasod sa Arabia.
11. (a) Unsay gihulagwayan sa nahitabo sa Ehipto? (b) Sa unsang paagi ang palaabuton madulom kaayo alang sa kalibotan ni Satanas sa dakong kasakitan?
11 Apan nakakita si Keil ug laing kahulogan sa tagna ni Ezekiel. Siya misulat: “Ang pagkalumpag niining gahom sa kalibotan [Ehipto] maoy tilimad-on ug pasiuna sa pagkapukan sa tanang dili-diyosnong gahom sa kalibotan sa adlaw sa kataposang paghukom.” Kini, sa diwa, tinuod. Sumala sa gipakita sa Pinadayag, diha sa dakong kasakitan ang mga palaabuton sa dili-diyosnong katawhan diha dakong kasakitan sama ka dulom sa Ehipto. Ingon nga daw ang adlaw wala mohatag ug kahayag sa adlaw ug ang panganod sa gabii walay bisan unsang mainit nga kahayag gikan sa bulan ug walay bisan unsang mahigalaon, nagapangidlap nga mga bitoon. Kadtong modumili sa pagpasidungog sa Hari ni Jehova mahanaw nga walay dungganong paglubong samtang taposon sa Magkakabayo sa puting mga kabayo ang iyang pagpanaog. (Pinadayag 19:11, 17-21; Ezekiel 39:4, 17-19) Dili ikatingala nga ang dili-diyosnong mga tawo mosinggit “sa mga bukid ug sa mga pangpang: ‘Tumpagi kami ug taboni kami gikan sa nawong sa Usa nga nagalingkod sa trono ug gikan sa kapungot sa Kordero, kay miabot na ang dakong adlaw sa ilang kapungot, ug kinsa bay arang makabangbang niini?’”—Pinadayag 6:16, 17; Mateo 24:30.
Ginasangkang Gubat!
12. Sa unsang paagi gipakita ni Satanas ang iyang pagdumot kang Jesu-Kristo sa panahon sa adlaw sa Ginoo?
12 Nan, komusta ang mga Kristohanon karong mga adlawa? Buweno, naapektohan kaayo sila sa walay hunong nga gubat tali kang Satanas ug sa Magkakabayo sa puting kabayo. Sanglit wala man molampos si Satanas sa pagpukan kang Jesus mismo, iyang gibuhian sa bug-os ang puwersa sa iyang kasuko diha sa mga nanghibilin sa dinihogan ug—dili pa dugay—sa dakong panon sa ubang mga karnero nga nagatigom libot kanila. Sumala sa gipasidaan ni Jesus kini sila “pagadumtan sa tanang kanasoran tungod sa [iyang] ngalan.” (Mateo 24:9) Gigamit ni Satanas ang tanang hinagiban nga iyang magamit, lakip ang pagpanagmal, pagbilanggo, pagsakit, ug pagbuno, sa pagpakig-away batok kanila.—2 Timoteo 3:12.
13. Sa unsang paagi gigamit ni Satanas ang lipat diha sa iyang pakig-away batok sa katawhan sa Diyos?
13 Maabtikong gigamit usab ni Satanas ang lipat. (Efeso 6:11) Gigamit “ang malimbongong gahom sa mga babandi,” iyang natintal ang pipila sa pagluya o sa paghunong sa ilang balaang pag-alagad. (Mateo 13:22; 1 Timoteo 6: 9, 10) Ang uban iyang nabitik sa kahugawan ug sa imoralidad. ( 1 Corinto 5:1, 2) Daghan ang nalisdan kaayo tungod sa “mga kabalaka sa kinabuhi,” ug gipahimuslan ni Satanas kini aron ‘sila mabug-atan.’ (Lucas 21:34) Sa ubang mga kaso, iyang gigamit ang mga panag-away sa personalidad o rebelyosong mga kiling aron mabalda sila gikan sa “labi pang bililhong mga butang.”—Filipos 1:10; 1 Corinto 1:11, 12; Santiago 4:1-3.
14, 15. Sa unsang paagi magmadaogon kita sa atong pakig-away batok kang Satanas?
14 Busa, kinahanglan nga ugmaron sa mga Kristohanon ang pagkamainantoson sa panahon sa adlaw sa Ginoo. Ang uban nangapakyas, ug ang matag kapakyasan maoy usa ka gamayng kadaogan alang kang Satanas. (1 Pedro 5:8) Apan ang kadaghanan nagpatalinghog sa saad ni Jesus: “Ang molahutay hangtod sa kataposan mamaluwas.” (Mateo 24:13) Uban sa tabang ni Jehova, sila nakadaog ug nakahatag kalipay sa iyang kasingkasing.—Proverbio 27:11: 1 Juan 2:13, 14.
15 Sa pagkatinuod, walay usa kanato nga buot mohatag kang Satanas sa katagbawan sa pagtan-aw kanatong mohunong! Busa, atong sundon ang tambag ni Pablo ug isul-ob nato ang kamatuoran, pagkamatarong, ug pagtuo—magwali sa maayong balita uban sa kadasig ug magtuon aron padayong malig-on ang atong pagtuo. Mag-ampo usab kita kanunay ug magmaigmat. Sa maong paagi, kita “dili ikasumbong sa adlaw sa atong Ginoong Jesu-Kristo.” (1 Corinto 1:8; Efeso 6:10-18; 1 Tesalonica 5:17; 1 Pedro 4:7) Hinunoa, ang adlaw sa Ginoo mahimong tuboran sa dagayang mga panalangin alang kanato.
Katingalahang mga Pribilehiyo sa Pag-alagad
16. Nganong gisultihan si Juan sa dili pagsulat sa gipamulong sa pito ka dalogdog, ug unsay kahulogan niini alang sa dinihogang mga Kristohanon sa 1919?
16 Diha sa Pinadayag 10:3, 4, si Juan miingon nga siya nakadungog sa “pito ka dalogdog” nga mitingog. Buot niyang isulat ang iyang nadungog, apan siya mitaho: “Nakadungog ako sa tingog gikan sa langit nga nag-ingon: ‘Ililong ang gisulti sa pito ka dalogdog, ug ayaw kini isulat.’” Sa matin-aw, dili kadto panahon nga ibutyag ang maong impormasyon. Hinunoa, gisultihan si Juan sa pagkuha sa gamayng basahon ug kaonon kana. Ang pito ka dalogdog mopatim-aw nga naghawas sa bug-os nga ekspresyon sa mga katuyoan ni Jehova. (Salmo 29:3; Juan 12:28, 29; Pinadayag 4:5) Balik sa 1919, dihang gikaon sa dinihogang mga Kristohanon sa mahulagwayong paagi ang gamayng basahon, dili pa nila kadto panahon sa pagbaton sa bug-os nga pagsabot sa mga katuyoan ni Jehova. (Itandi ang Daniel 12:8, 9.) Apan maisogong nagpadayon sila sa pagsabot nga ilang nabatonan ug gipamatud-an nila ang ilang kaugalingon nga takos sa dugang kadan-agan.
17. Unsa ang pila ka bag-ong mga pagsabot nga gihatag ni Jehova sa iyang katawhan sa mga katuigan sukad sa 1919?
17 Unya, sa milabay ang mga tuig, sila gihatagan ug mauswagon mas tin-awng pagsabot sa kabubut-on ni Jehova. Pananglitan, ilang nasabtan nga ang mga karnero sa sambingay ni Jesus, bisan wala pa ang Armageddon, ginalain gikan sa mga kanding. (Mateo 25:31-46) Ilang nakita nga ang pagkatawo sa Gingharian sa 1914 mao ang katumanan sa Pinadayag kapitulo 12. Ilang naabot ang mas lalom nga pagsabot sa kahinungdanon sa ngalan ni Jehova, ug ilang nakat-onan kon kinsa gayod ang dakong panon diha sa Pinadayag kapitulo 7. Pagkadako nga pagsalig ang nahatag niining mauswagong mga pinadayag alang sa katawhan sa Diyos!—Proverbio 4:18; 2 Pedro 1:19.
18. Unsang tagsaong mga pribilehiyo sa pag-alagad ang gipakig-ambitan sa katawhan ni Jehova sa panahon sa adlaw sa Ginoo, ug nakatukod kinig unsang kamaalingaton diha sa atong mga kasingkasing?
18 Sa samang higayon, gipiyalan ni Jehova ang iyang yutan-ong mga alagad sa tagsaong mga pribilehiyo sa pag-alagad. Diha sa hataas nga panan-awon, nakita ni Juan ang mga manulonda nga nagwali sa walay kataposang maayong balita alang sa katawhan, nagsangyaw sa pagkapukan sa Babilonyang Bantogan, ug nagpasidaan batok sa pagdawat sa timaan sa mananap. (Pinadayag 14:6-10) Samtang ang mga manulonda sa walay duhaduha mao ang nagadumala niining mga pribilehiyo sa pag-alagad sa Diyos, ang mga tawo, ang mga Saksi ni Jehova sa yuta, mao gayod ang nagapahayag niining mga mensahe sa katawhan. Nakita usab ni Juan si Jesus nga nagaani “sa alanihon sa yuta.” (Pinadayag 14:14-16) Apan pinaagi sa pagwali sa Gingharian ug sa paghimog disipulo nga buluhaton sa ginsakopan ni Jesus sa yuta nga siya nakaani niining maong alanihon. (Mateo 24:14; 28:19, 20) Pagkadakong pribilehiyo nga makabahin uban sa mga manulonda ug kang Jesu-Kristo mismo diha sa mga pribilehiyo sa pag-alagad nga hinungdanon kaayo! Sa pagbuhat niini, atong mabati nga kita tinuod gayod nga nahiusa uban sa dako, dili-makita langitnong organisasyon ni Jehova sa matinumanon espirituhanong mga linalang.
Panalipod sa Diyos
19. (a) Unsa ang kinatayoktokan sa pagdumot ni Satanas sa katawhan sa Diyos? (b) Kinsa ang makadaog diha sa kataposan, sa kinatayoktokan sa panag-away?
19 Sa nagasingabot ang kataposan sa iyang kalibotan, si Satanas mohatag dugang ug dugang kalisod sa mga Kristohanon. Ang kinatayoktokan sa iyang kapungot gihubit diha sa Ezekiel sa mga kapitulo 38 ug 39, nga diin siya sa matagnaon ginganlag Gog sa Magog. Sumala niining dinasig nga tagna, bug-os nga moatake si Satanas aron sa paglaglag sa katawhan sa Diyos. Molampos ba siya? Ang Pinadayag nagatubag: “Ang napulo ka sungay [modernong-adlawng “mga hari,” o mga magmamando] . . . makiggubat batok sa Kordero, kay kini siya mao man ang Ginoo sa mga ginoo ug Hari sa mga hari, sila pagadag-on sa Kordero. Ug maingon man kadtong tinawag ug pinili ug matinumanon kaniya.” (Pinadayag 17:12, 14) Ang matinumanong mga Kristohanon makapiho nga makadaog kon sila magpabiling matinumanon sa ilang dako, madaogong Hari. Ang panon ni Gog bug-os nga malaglag.—Ezekiel 39:3, 4, 17-19; Pinadayag 19:17-21.
20. Unsang mga panalangin ang ipatungha sa adlaw sa Ginoo ngadto sa matinumanong mga Kristohanon diha sa dakong kasakitan?
20 Busa, ang adlaw sa Ginoo magkahulogang kaluwasan alang sa katawhan sa Diyos. Ang mga dinihogan nga buhi gihapon ingong tawo sa panahon sa dakong kasakitan makabaton ug seguradong posisyon sa langit, ug sila sa dili matarog determinado sa pagtapos sa ilang kurso sa kinabuhi sa pagkamatinumanon. (Pinadayag 7:1-3; 2 Timoteo 4:6-8) Ang dakong panon maluwas usab, ug si Jesus maoy “motultol kanila sa mga tuboran sa tubig sa kinabuhi. Ug pagapahiran sa Diyos ang tanang luha sa ilang mga mata.” (Pinadayag 7:14, 17) Pagkamaayong ganti alang sa matinumanong pag-antos!
21. Unsay mahitabo sa yuta sa panahon sa adlaw sa Ginoo human sa dakong kasakitan?
21 Karon ang adlaw sa Ginoo nagapaingon sa usa ka katingalahang yugto: ang Usa ka Libo ka Tuig nga Pagmando ni Kristo Jesus. (Pinadayag 20:6, 11-15) Ang suba sa tubig sa kinabuhi, nga gitagna diha sa Pinadayag ug sa Ezekiel, moagos gikan sa trono ni Jehova ngadto sa katawhan, ug kadtong moinom niana sa hinayhinay banhawon ngadto sa tawhanong kahingpitan. (Ezekiel 47:1-12; Pinadayag 22:1, 2) Ang Hades haw-asan, ug ang bilyonbilyong nangamatay may higayon usab sa pag-inom niining tubiga.—Juan 5:28, 29.
22. Unsang dagkong mga hitabo ang naghulat sa katawhan sa kataposan sa Usa ka Libo ka Tuig sa Pagmando ni Kristo?
22 Sa kataposan sa usa ka libo ka tuig, ang katawhan unya mabanhaw ngadto sa kahingpitan. Pagkamaayong panahon alang kang Satanas sa paggula sa eksena sa yuta! Mosulay na usab siya sa paglimbong sa katawhan, ug dunay mosunod kaniya, bisan unya nianang panahona. Kini sila sa makahuloganon paganganlag “Gog sa Magog” sanglit mopakita sila sa samang daotang espiritu nga gipakita sa ‘panon ni Gog’ diha sa tagna ni Ezekiel. Apan ang ilang maalsahong espiritu paphaon sa walay kataposan sa dihang sila, uban kang Satanas mismo ug ang iyang mga demonyo, itambog sa simbolikong linaw nga kalayo. (Pinadayag 20:7-10; Ezekiel 39:11) Pagkadakong panalangin ang naghulat alang niadtong magpabiling matinumanon pinaagi nianang kataposang pagsulay, ug dayon ang nahingpit nang tawhanong rasa mahimong usa uban sa matarong unibersohanong organisasyon ni Jehova. Si Jehova nga Diyos mismo mahimong “tanang butang alang sa tanan”!—1 Corinto 15:24, 28; Pinadayag 20:5.
23. Tungod sa panahon nga atong gikinabuhian karon, unsang tambag ni Pablo ang labing haom alang sa matag usa kanato nga patalinghogan?
23 Pagkadili-mahanduraw unya sa mga panalangin, ang nagahulat kanato kon kita mag-antos! Hinumdomi, dugay nang nagsugod ang adlaw sa Ginoo. Katingalahang mga butang misugod na sa pagkahitabo. Nan, haom, ang mga pulong ni Pablo: “Kinahanglan dili kita managkataka sa pagbuhat ug maayo, kay sa nahaigo nga panahon kita magaani kon kita dili magakaluya.” (Galacia 6:9) Nan “dili kita mohunong sa pagbuhat ug maayo” niining adlaw sa Ginoo. Kon kita molahutay, kining adlawa mohatag walay kataposang mga kaayohan sa matag usa kanato.
Makasaysay Ka Ba?
◻ Unsa ang unang ang-ang sa kalaglagan sa kalibotan ni Satanas?
◻ Sa unsang paagi si Jesus “magtapos sa iyang pagpanaog” sa iyang mga kaaway?
◻ Sa unsang paagi nakig-away si Satanas batok sa mga Saksi ni Jehova sa panahon sa adlaw sa Ginoo?
◻ Unsang tagsaon mga panalangin ang gitagamtam sa katawhan sa Diyos sukad sa 1919?
◻ Tungod sa atong nahimutangan sa pagdagan sa panahon, sa personal unsay imong determinadong buhaton?
[Hulagway sa panid 16]
Ang midangat sa karaang Jerusalem nagpakita sa mahitabo unya sa Babilonyang Bantogan