Sa Dihang Mamemligro ang Kalinaw sa Kaminyoon
“Ang usa ka asawa angay dili mobulag sa iyang bana; . . . ug ang usa ka bana angay dili mobiya sa iyang asawa.”—1 CORINTO 7:10, 11.
1. Unsa ang katuyoan ni Jehova mahitungod sa kaminyoon?
SI Jehova nga Diyos nag-usa sa unang tawhanon nga parisan diha sa kaminyoon ug nagtuyo nga magmalungtaron kining usa-ka-unod nga talikala. Kadto mahimong bulahan nga panag-usa nga mosangpot sa ilang kalipay ug sa pagpatunghag matarong nga mga anak, nga ang tanan sa himaya sa Diyos.—Genesis 1:27, 28; 2:24.
2. Unsa ang usa ka hinungdan nga mosangpot sa pagkabugto sa talikala sa kaminyoon?
2 Kadtong mithianon nga kahikayan sa kaminyoon gibungkag sa independenteng kaisipan ug sa sala. (Genesis 3:1-19; Roma 5:12) Ngani, ang espiritu sa independensiya usa sa mga hinungdan nga mosangpot sa pagkabugto sa talikala sa kaminyoon karong adlawa. Busa, sa Tinipong Bansa sulod sa 1985, dihay 5 ka diborsiyo—kon itandi sa 10.2 ka kaminyoon—sa matag 1,000 ka tawo. Sa 1986 ang usa ka taho gikan sa Moscow nagpaila nga 37 porsiento nabungkag sa napulo ka tuig.
3. (a) Unsay makapahinabog away sa magtiayon? (b) Bahin sa kaminyoon, kinsa ang pangunang magbubungkag sa kalinaw?
3 Ang espiritu sa independensiya makapahinabog panagbangi sa magtiayon. Kini makasumpo usab sa espirituwal nga pagtubo, kay “ang bunga sa pagkamatarong nagpugas sa binhi niini ubos sa malinawong mga kahimtang.” (Santiago 3:18) Apan kinsa ba ang pangunang magbubungkag sa kalinaw? Si Satanas. Ug makapasubo kaayo kon may mga alagad sa Diyos nga “mohatag dapit sa Yawa” ug niana dili makapahimulos sa mga panimalay nga may pahulay ug kalinaw!—Efeso 4:26, 27.
4. Kon ang Kristohanong magtiayon may seryosong mga suliran sa kaminyoon, unsay angay nilang maamgohan ug unsay ilang pagabuhaton?
4 Kon hunahunaon sa Kristohanong magtiayon nga ang panagbulag maoy bugtong solusyon sa ilang mga suliran sa kaminyoon, mameligro nga dag-on sila sa mga paagi ni Satanas, ug may grabeng kadaotan sa espirituwal nga paagi. (2 Corinto 2:11) Ang mga prinsipyo sa Diyos wala ipadapat sa bug-os sa usa o nilang duha. (Proverbio 3:1-6) Busa angay himoon dayon nila ang mainampoong paningkamot sa pagsulbad sa ilang mga kabingkilan. Kon kana maorag dili mahusay, mahimong konsultahon ang mga ansiano sa kongregasyon. (Mateo 18:15-17) Bisan pag kining mga tawhana wala tagaig gahom nga sultihan sa eksakto ang isigkamagtutuo kon unsay buhaton sa ilang mga suliran sa kaminyoon, ikapunting nila ang pagtagad nganha sa ginaingon sa Kasulatan.—Galacia 6:5.
5. Sa unsang pasikaranan dalawaton sa Kasulatanhon ang diborsiyo uban ang posibilidad nga maminyo pag-usab sa lain?
5 Kon daotan kaayo ang kahimtang sa kaminyoon nga ang Kristohanong magtiayon nagahunahuna gani sa diborsiyo, ang mga ansiano makapunting nga ang diborsiyo ug pagminyo pag-usab ikatugot lamang sa Kasulatan kon ang usa ka kapikas nakahimog “pakighilawas.” Kining pulonga nagasakop sa panapaw ug ubang matang sa imoral nga mga relasyon ug mga kahiwian sa sekso. (Mateo 19:9; Roma 7:2, 3; tan-awa ang Ang Bantayanang Torre, Septiyembre 15, 1983, panid 31.) Bisan pa niana, unsa man kon ang “pakighilawas” wala mahimo apan grabeng nameligro ang kalinaw sa kaminyoon? Unsay ginaingon sa Kasulatan bahin sa legal o de facto nga panagbulag?
Dinasig nga Tambag ni Pablo
6. (a) Unsa ang diwa sa tambag ni Pablo sa 1 Corinto 7:10, 11? (b) Sa unsang paagi pagasulbaron sa Kristohanong magtiayon ang mga suliran sa kaminyoon?
6 Sa paningkamot nga tabangan ang usa ka Kristohanong magtiayon kang kansang kaminyoon nameligrong mabungkag, ang mga ansiano makatumong sa pagtagad ngadto sa mga pulong ni apostol Pablo: “Alang sa mga minyo ako nagahatag ug mga pahimangno, apan dili ako kondili ang Ginoo, nga ang usa ka asawa angay dili mobulag sa iyang bana; apan kon siya mobulag gayod, magpabilin siya nga dili minyo o kaha makig-uli pag-usab sa iyang bana; ug ang usa ka bana angay dili mobiya sa iyang asawa.” (1 Corinto 7:10, 11) Ang Kristohanong magtiayon angay makahusay sa ilang mga suliran, nga magmatinugoton sa tawhanong pagkadili-hingpit. Walay suliran ang dako kaayo nga kana dili masulbad pinaagi sa mainitong pag-ampo, pagpadapat sa mga prinsipyo sa Bibliya, ug pagpakita sa gugma nga maoy usa ka bunga sa espiritu sa Diyos.—Galacia 5:22; 1 Corinto 13:4-8.
7. (a) Kon magbulag ang Kristohanong magtiayon, unsa ang ilang Kasulatanhong kahimtang? (b) Unsa kaha ang mahimong epekto sa panagbulag sa duha ka minyong Kristohanon diha sa mga pribilehiyo sa pag-alagad?
7 Apan unsa man kon magbulag gayod ang Kristohanong magtiayon? Kinahanglang sila “magpabiling dili minyo o kaha mag-uli pag-usab.” Gawas kon kini usa ka suliran sa diborsiyo nga nakuha pinasukad sa hinungdan sa “pakighilawas,” si bisan kinsa kanila sa Kasulatanhon walay kagawasan sa pagminyo pag-usab. Tungod niini ug sa “pagkaylap sa pakighilawas,” maayo nga sila “mag-uli pag-usab” sa walay langan. (1 Corinto 7:1, 2) Dili katungdanan sa mga ansiano nga ibaod nga taposon sa bana ug asawa ang ilang panagbulag, apan sila dili makakuwalipikar alang sa pila ka pribilehiyo sa pag-alagad tungod sa ilang mga suliran sa kaminyoon. Pananglitan, kon ang usa ka lalaki “dili mahibalong magdumala sa iyang kaugalingong panimalay,” lagmit kulang siyag katakos sa “pag-atiman sa kongregasyon sa Diyos” ingon nga magtatan-aw.—1 Timoteo 3:1-5, 12.
8. Unsa ang unod sa tambag ni Pablo sa 1 Corinto 7:12-16?
8 Gihatag ang pasiugdan sa pagtipig sa usa ka kaminyoon bisan pag usa ra ka kapikas ang magtutuo. Si Pablo misulat: “Kon adunay igsoong lalaki nga may asawang dili magtutuo, apan siya buot ra nga makigpuyo kaniya, ayaw siya pabulaga kaniya; ug ang usa ka babaye nga may banang dili magtutuo, apan siya buot rang makigpuyo kaniya, ayaw siya pabiyaa sa iyang bana. . . . Apan kon mobulag ang dili magtutuo, pabulaga siya; ang usa ka igsoong lalaki o usa ka igsoong babaye wala maulipon sa maong mga kahimtang, apan ang Diyos nagtawag kaninyo ngadto sa panagdaitay. Kay, asawa, unsaong nimo pagkahibalo nga maluwas mo ang imong bana? O, bana, unsaon nimo pagkahibalo nga maluwas mo ang imong asawa?” (1 Corinto 7:12-16) Kon ang dili magtutuo mopalabi sa pagbulag, ang Kristohanon magtugot kaniya sa paglakaw. Apan ang magtutuo, kay naglaom nga basin makabig ang dili magtutuo sa Kristiyanidad, dili manguna sa pagbulag. Ang inahan ni Timoteo, si Eunice, lagmit nagpabilin uban sa iyang banang dili magtutuo apan naghatag ug espirituwal nga pagtulon-an sa iyang anak.—2 Timoteo 1:5; 3:14, 15.
Mga Hinungdan sa Panagbulag
9, 10. (a) Tungod sa 1 Timoteo 5:8, unsa ang usa ka pasikaranan sa panagbulag sa mga kapikas sa kaminyoon? (b) Unsay pagabuhaton sa tinudlong mga ansiano kon ang usa ka Kristohanong lalaki gisumbong sa dili pagsuportar sa iyang asawa ug mga anak?
9 Ang mga pulong ni Pablo sa 1 Corinto 7:10-16 nagadasig sa mga kapikas sa kaminyoon sa pag-ipon. Apan, ang pipila, tapos sa dakong paningkamot nga magpadayon ang ilang kaminyoon, sa kataposan nakahukom nga, sumala sa konsensiya, sila walay kapaingnan gawas ang pagbulag. Unsa kaha ang mga hinungdan sa maong lakang?
10 Ang tinuyong dili pagsuportar maoy usa ka pasikaranan sa pagbulag. Sa pagsulod sa kaminyoon, abagahon sa bana ang kaakohan sa pagbuhi sa iyang asawa ug sa mga anak nga tingali ilang mabatanona. Ang lalaki nga dili motagana alang sa mga sakop sa iyang panimalay “nanghimakak sa pagtuo ug daotan pa kay sa tawong walay pagtuo.” (1 Timoteo 5:8) Busa posible ang panagbulag kon adunay tinuyong dili pagsuportar. Hinuon, ang tinudlong mga ansiano angay maghatag ug maayong pagtagad nga ang usa ka Kristohanon nagadumili sa pagsuportar sa iyang asawa ug pamilya. Ang magtig-a nga pagdumili sa pagsuportar sa pamilya mahimong mosangpot sa pagpalagpot.
11. Unsa ang laing pasikaranan sa panagbulag, apan unsa kaha ang makahimo sa kahimtang nga maantos?
11 Ang sobrang lawasnong pagdagmal maoy laing pasikaranan sa panagbulag. Pananglit, ang kapikas nga dili magtutuo mahubog, masuko, ug makapahinabog lawasnong kadaot sa magtutuo. (Proverbio 23:29-35) Pinaagi sa pag-ampo ug pinaagi sa pagpasundayag sa mga bunga sa espiritu ni Jehova, ang magtutuo tingali makapugong sa maong mga pagsilaob ug mohimo sa kahimtang nga maantos. Apan kon ang punto maabot diin ang kahimsog ug kinabuhi sa gidagmalan nga kapikas sa aktuwal nameligro, ang panagbulag ikatugot sa Kasulatanhong paagi. Sa makausa pa, ang mga ansiano sa kongregasyon angay magsusi sa mga sumbong sa lawasnong pagdagmal sa dihang ang duka ka Kristohanon nalangkit sa nagubot nga kaminyoon, ug ang pagpalagpot basin kinahanglang himoon.—Itandi ang Galacia 5:19-21; Tito 1:7.
12. (a) Unsay kalabotan sa espirituwalidad sa magtutuo diha sa suliran sa panagbulag? (b) Unsay gisugyot kon ang dili-maayong espirituwal nga kahimtang nagalungtad sa usa ka Kristohanong panimalay?
12 Ang absolutong kapeligrohan espirituwalidad nagahatag usab sa pasikaranan sa panagbulag. Ang magtutuo diha sa nabahin sa relihiyon nga panimalay angay mohimo sa tanang mahimo aron pahimuslan ang espirituwal nga mga tagana sa Diyos. Apan ang panagbulag ikatugot kon ang pagsupak sa kapikas nga dili magtutuo (tingali apil ang lawasnong pagpugong) maghimo nga tinuod imposible ang pagpadayon sa matuod nga pagsimba ug makadaot gayod sa espirituwalidad sa magtutuo. Bisan pa niana, unsa na man kon nagalungtad ang dili-maayong espirituwal sa magtutuo. Angay motabang ang mga ansiano, apan ang bawtismadong bana maningkamot pag-ayo sa pagsulbad sa kahimtang. Hinuon, kon ang usa ka bawtismadong kapikas sa kaminyoon nagalihok sama sa usa ka apostata ug nagasulay sa pagpugong sa iyang kapikas sa pag-alagad kang Jehova, ang mga ansiano angay magdumala sa mga butang sumala sa Kasulatan. Kon mahitabo ang pagpalagpot sa usa ka kaso nga naglangkit ug absolutong kapeligrohan sa espirituwalidad, ang tinuyong dili-pagsuportar, o sobrang lawasnong pagdagmal, ang matinumanong Kristohanon nga nagatinguhag legal nga panagbulag dili magasupak sa tambag ni Pablo bahin sa pagdala sa korte sa usa ka magtutuo.—1 Corinto 6:1-8.
13. Ubos sa unsang mga sirkumstansiya angayan tingali ang panagbulag sa magtiayon?
13 Kon hinobra ang mga kahimtang, nan, ang panagbulag tingali angay. Apan ang huyang nga mga pasumangil dayag dili angay gamiton aron magbulag. Ang mga Kristohanon nga magbulag kinahanglang mopas-an sa personal nga tulubagon nianang aksiyona ug angay makaamgo nga kitang tanan manubag kang Jehova.—Hebreohanon 4:13.
Usa ka Maalamong Lakang?
14. (a) Sama sa unsa ang suliran sa panagbulag? (b) Sa unsang paagi maapektahan ang mga anak sa panagbulag?
14 Ang mainampoong pamalandong angay ihatag sa mga suliran nga lagmit mamugna sa panagbulag. Pananglitan, talagsaon rang itagana sa usag-ginikanan nga pamilya kon unsay ikatagana sa duhag-ginikanan nga mga pamilya sa katimbang ug disiplina. Ug ang panagbulag mahimong may epekto diha sa mga anak nga susama sa iya sa diborsiyo, nga mahitungod niana ang magasing India Today mitaho: “Si Sheena, nga dagkog mga mata nga daw masakop ang tibuok yuta, maoy sayes anyos. Ang iyang mga ginikanan nagdiborsiyo duha ka tuig nga miagi tapos sa maot nga away sa korte. Sa wala madugay, naminyog laing babaye ang iyang amahan. Sulod sa usa ka tuig siya may grabeng mga atake sa hubak ug sigeng magtamoy sa iyang kumagko. Siya nagapuyo ipon sa iyang inahan sa South Delhi. Ang inahan: ‘Ang kaguol ko nahiadto kang Sheena. . . . Gimingaw siya sa iyang amahan. . . . Siya mas hamtong kay sa kadaghanang mga batang pareho niyag edad. Apan siya may di-kapugngang mga pagbakho, nga maorag may buot niya ihaw-as gikan sa iyang kahiladman. Ang pag-eskuyla usa ka suliran. Ang mga bata mahimong pintas kaayo. Kadaghanan, mouk-ok siya sa kalibotan sa handurawan: mohimo siyag estorya nga kaming tulo mag-uban sa panglakaw alang sa iyang mga higala.’”
15. Unsa kaha ang epekto sa panagbulag diha sa Kristohanong bana o asawa?
15 Kasagaran, ang panagbulag dili mosangpot sa kaayohan alang sa Kristohanong bana ug asawa kaha. Ilang masayran sa dili madugay nga kon walay kapikas o mga anak adunay nagangutngot nga kahaw-ang. Ang mga kalisod nga sangpotanan sa panagbulag dili mahimong panumbalingon. Posible ba ang pag-atiman sa mga butang gikan sa pinansiyal nga panglantaw o sa laing paagi? Ug komosta kon ang kalisod sa panagbulag mosangpot sa pagkahulog sa imoralidad? Si Jesus miingon: “Ang kaalam mapamatud-an nga matarong pinaagi sa mga buhat niini.” (Mateo 11:19) Ilabina kon mga Kristohanon ang magtiayon, ang butang gisulbad pinaagi sa panagbulag may panahong namatug-ang dili gayod maalamon.
Pagsingkamot nga Sulbaron ang mga Suliran
16. Unsay pagabuhaton sa Kristohanong magtiayon nga makakaplag nga nameligro ang kalinaw sa ilang kaminyoon?
16 Ang Kristohanong magtiayon nga nakadiskobre nga seryosong nameligro ang kalinaw sa ilang kaminyoon angay maghisgot sa ilang mga kabingkilan sa paaging haom niadtong nagaalagad sa Diyos. Ug angay gayod nga motugot silag mga pagkadili-hingpit. (Filipos 2:1-4) Ug unsa pay mahimo?
17. Sa unsang paagi ang pagpasundayag sa kaalam maylabot sa materyal nga mga butang makaamot sa kalinaw sa kaminyoon?
17 Ang pagpasundayag sa kaalam maylabot sa materyal nga mga butang makaamot sa kalinaw sa kaminyoon. Sa pag-ilustrar: Tapos sa pagpalandong sa negatibong punto de vista sa iyang asawa, ang usa ka lalaki, bisan pa niana, basin mohukom nga maalamon nga mobalhin ang iyang pamilya sa laing dapit. Basin maayo kana tungod sa mga hinungdang maylabot sa pangabuhi, apan basin kini makapaarang usab sa pamilya sa pagpauswag sa intereses sa Gingharian pinaagi sa pag-alagad diin mas dako ang panginahanglan. (Mateo 6:33) Basin dili mouyon ang iyang Kritohanong asawa nga mobalhin tungod kay iyang mabiyaan ang iyang mga ginikanan o ang sinating palibot. Apan maalamong bug-os siyang mokooperar sa iyang bana, nga mao ang ulo sa panimalay ug may responsabilidad sa paghukom kon asa mopuyo ang iyang pamilya. Dugang pa, ang iyang pagkamapasakopon ug mahigugmaong kooperasyon makaamot sa kalinaw sa panimalay.—Efeso 5:21-24.
18. Unsa ang kahigayonan sa Kristohanong magtiayon sa pag-uban sa pagbuhat?
18 Ang kalinaw sa pamilya mousbaw ug mopatim-aw nga dili grabe ang mga suliran kon ang mga magtiayon mag-uban sa pagbuhat. Pananglitan, ang Kristohanong magtiayon may maayo kaayong kahigayonan nga mag-uban sa pagsangyaw sa kanataran. Kon himoon nilang regular kini ug ikuyog nila ang ilang mga anak, ang tibuok pamilya makabatog kaayohan. Mahimong may lainlain usab nga kahigayonan sa paglig-on sa talikala sa kaminyoon pinaagi sa pagpakig-ambit sa ubang mapuslanong mga kalihokan nga magustohan ilabina sa usa o sa lain nga kapikas.
19. Ang pagkaulo sa unsang matang ang mopausbaw sa kalinaw sa pamilya?
19 Ang tukmang pagpatuman sa pagkaulo molig-on sa bugkos sa kaminyoon. Siyempre, ang hamtong Kristohanong bana dili mahimong diktador. Hinunoa, ‘padayon niyang higugmaon ang iyang asawa ug dili sa mapait masuko kaniya.’ Si Jehova nagadahom nga iyang ipatuman ang mahigugmaong pagkaulo. (Colosas 3:18, 19) Sa baylo, ang maong pagkaulo mopausbaw sa kalinaw sa pamilya.
Diha sa Nabahin nga mga Panimalay
20, 21. Sa unsang paagi ang pagkamakataronganon mapuslanong kon ang kalinaw mameligro diha sa panimalay nga nabahin sa relihiyon?
20 Ang pagkamakataronganon nagatabang sa pagsulbad sa mga suliran sa kaminyoon tali sa mga kapikas sa kaminyoon. (Filipos 4:5) Apan ang pagkamakataronganon hinungdanon usab kon mameligro ang kalinaw sa usa ka panimalay nga nabahin sa relihiyon. Kon mosulay sa pagpugong ang usa ka banang dili magtutuo sa iyang Kristohanong asawa sa pag-alagad kang Jehova, siya makapaningkamot nga mangatarongan kaniya, nga mataktikanhong ipunting nga siya nagahatag kaniyag relihiyosong kagawasan ug makataronganon nga siya angay tratahon sa sama. (Mateo 7:12) Bisan tuod siya magpasakop nga relatibo sa iyang bana nga dili magtutuo, ang kabubut-on sa Diyos kinahanglang tumanon kon adunay panagbangi. (1 Corinto 11:3; Buhat 5:29) Tino, ang pagtambong sa Kristohanong mga tigom katulo sa usa ka semana dili hinobra. Apan ang asawang magtutuo makakaplag nga maalamong anaa siya sa balay sa ubang mga gabii ug mag-eskedyul sa iyang semana dili hinobra. Apan ang asawang magtutuo makakaplag nga maalamong anaa siya sa balay sa ubang mga gabii ug mag-eskedyul sa iyang pagsangyaw sa kanataran sa mga oras nga ang iyang bana nagatrabaho ug ang mga bata tua sa eskuylahan. Pinaagi sa pagkamakataronganon ug maayong pagplano, dili kinahanglang iyang “ihunong ang pagbuhat kon unsay maayo.”—Galacia 6:9.
21 Ang pagkamakataronganon makaabot usab sa ubang butang. Pananglitan, ang usa ka tawo may katungod sa pagtuman sa usa ka relihiyon. Apan makataronganon ug maalamon nga dili ibutang sa Kristohanong asawa ang iyang mga Bibliya ug mga tabang sa pagtuon sa Bibliya sa dapit nga basin motutol sa banang supak kaayo. Malikayan ang panagbangi kon ang maong mga basahon tipigan taliwala sa iyang personal nga mga butang ug tun-an niya kanang pribado. Hinuon, kinahanglang siya dili mokompromiso sa matarong nga mga prinsipyo.—Mateo 10:16.
22. What might be done if disruption of domestic peace centers on the religious instruction of the children?
22 Kon ang pagkadaot sa kalinaw sa panimalay nasentro sa relihiyosong pagtudlo sa mga anak, ang asawang magtutuo mataktikanhong makahikay nga pakuyogon sila sa mga tigom ug sa pagsangyaw sa kanataran. Apan kon kini pugngan sa dili-magtutuong bana ug amahan, makatudlo siya sa mga bata sa mga prinsipyo sa Bibliya mao nga inigkadagko ug inigbiya nila sa balay, lagmit ipadayon nila ang matuod nga pagsimba. Kon ang bana mao ang magtutuo, ingong ulo sa panimalay, siya may Kasulatanhong obligasyon sa pagmatuto sa iyang mga anak ingong mga Kristohanon. Busa angay tun-an niya ang Bibliya uban kanila, dad-on sila sa mga tigom, ug tudloan sila diha sa pagsangyaw sa kanataran. (Efeso 6:4) Natural lamang, siya angay mahimong maluluton, mahigugmaon, ug makataronganon sa pagpakiglabot sa iyang asawa nga dili magtutuo.
Hupti ang Kalinaw Ingong Nahiusa nga Pamilya
23. If marital peace is threatened, what may prove helpful?
23 Sanglit ang magtiayon maoy “usa ka unod,” sila angay mag-ipon nga may kalinaw sumala sa kahikayan sa Diyos alang sa mga tawong minyo, ilabina kon mga Kristohanon ang duruha ka kapikas. (Mateo 19:5; 1 Corinto 7:3-5) Apan kon nameligro ang kalinaw sa kaminyoon sa inyong kahimtang, sa mainampoon sublia ang nahaunang Kasulatanhong mga punto. Basin makatabang usab ninyo ang paghinumdom sa panahon sa inyong pagkatrato. Pagkalabihan ang inyong pagsingkamot nga himoon niya ang matarong ug ipahimutang ang pasikaranan alang sa malipayon nga kaminyoon! Himoon ba ninyo karon ang susamang pagsingkamot aron magmalungtaron ang inyong kaminyoon?
24. What attitude should Christians have toward wedlock?
24 Ang mga Kristohanon nga nahiusa sa kaminyoon may kahibulongang gasa gikan sa Diyos—ang ilang kaminyoon! Kon tumanon ninyo ang inyong mga panumpa sa kaminyoon ug huptan ang integridad kang Jehova, anaa sa inyong atubangan ang matarong nga bag-ong kalibotan diin ang makagun-ob-sa-kasingkasing nga panagbulag ug diborsiyo dili na mosakit sa mga tawo. Busa ipakita ang pasalamat alang sa kaminyoon ingong masambingayong “tulo ka bakokon nga pisi,” uban kang Jehova ingong bililhon nga bahin niana. (Ecclesiastes 4:12) Ug hinaot ang tanang sakop sa inyong nahiusang panimalay makapahimulos sa panalangin sa pamilyahanong kalipay diha sa panimalay nga may pahulay ug kalinaw.
Unsa ang Imong mga Tubag?
◻ Unsaon nimo pagsuma ang tambag ni Pablo sa 1 Corinto 7:10-16?
◻ Unsa ang angay nga mga hinungdan sa panagbulag sa magtiayon?
◻ Sa unsang paagi sulbaron sa mga Kristohanon ang mga suliran kon nameligro ang kalinaw sa kaminyoon?
◻ Sa mga panimalay nga nabahin sa relihiyon, sa unsang paagi ang pagkamakataronganon makaamot sa kalinaw?
[Hulagway sa panid 23]
Ang Kristhonaong mga magtiayon kansang kalinaw sa kaminyoon nameligro angay maghisgot sa ilang mga suliran sa paagi nga haom niadtong nagaalagad kang Jehova