Manulondaong mga Mensahe Alang sa Atong Adlaw
“Ang Diyos . . . nagpadala sa iyang manulonda ug gipadayag kini diha sa mga ilhanan.”—PINADAYAG 1:1.
1. Unsang sayop nga pagsabot ang naglungtad bahin sa ngalang Apokalipsis, ug unsay gibutyag sa Pinadayag bahin sa umaabot?
APOKALIPSIS. Pagkasubsob nga madungog kanang ngalana niining ika-20ng siglo—apan pagkawala-hisabti! Sa Biblikanhong diwa, kini wala maghisgot sa pagkalaglag sa tanang katawhan diha sa nukleyar nga gubat. Hinunoa, kining Gregong pulong nagkahulogang “pagbutyag.” Pinaagi sa matagnaong mga larawan, ang basahon sa Bibliya nga Apokalipsis, kun Pinadayag, nagabutyag sa mga hitabo nga motapos diha sa banagbanag sa usa ka panahon sa walay kataposang kalipay alang sa katawhan. Busa, ang apostol ni Jesus nga si Juan mipailaila sa Pinadayag uban sa mga pulong:: “Malipayon ang tawo nga nagabasa sa makusog sa mga pulong sa propesiya, ug malipayon ang magapatalinghog ug magatuman sa nahisulat niini; kay ang tinudlong panahon haduol na.”—Pinadayag 1:3.
2, 3. Nganong usa kini ka dili-malipayong kalibotan, ug unsay katuyoan ni Jehova nga buhaton?
2 Ang kalibotan karong adlawa dili malipayon. Ang hinungdan sa pagkadili-malipayon niini gipahayag diha sa usa ka awit nga gikomposo ni Moises duloan sa 3,460 ka tuig kanhi: “Sila milihok nga malaglagon sa ilang kaugalingon; sila dili mga anak sa [Diyos], ilang sayop kana. Usa ka kaliwatan nga hiwi ug baliko!” (Deuteronomio 32:5) Pagkahaom niadtong mga pulonga sa kaliwatan karong adlawa, kansang mga prinsipyo baliko na kaayo ug hiwi! Pananglitan, ang pasiunang pulong sa World Military and Social Expenditures 1987-88 prangkang miingon: “Ang mga kinabuhi sa tanang nasod baliko tungod sa lumba sa armas. Ang Tinipong Bansa ug ang Sobyet Unyon nakagastog duolan sa $1.5 bilyones sa usa ka adlaw diha sa depensa sa militar. Apan ikanapulog-walo ang Tinipong Bansa taliwala sa tanang mga nasod nga dunay daghang mga batang nangamatay, ang USSR ikakuwarentay-sayis. Ang nagakaugmad nga mga nasod nagagugol halos upat ka pilo diha sa mga armas kay sa pag-atiman sa panglawas sa ilang katawhan. Apan ginatos ka minilyon niadtong mga nasora gigutom; 20 porsiento sa ilang mga kabataan mangamatay sa dili pa sila moabot ug lima ka tuig.”
3 Ubang mga butang nga nakadugang niining malaglagong dalan—ang pagkabungkag sa mga moral ug sa bugkos sa pamilya, ang krimen ug kalisang nga nagapahipi sa yuta, ang pagkawalay-gugma ug pagkadaotan sa presenteng kaliwatan. Pagkadako sa atong kalipay nga maoy katuyoan ni Jehova nga “laglagon ang mga manglalaglag sa yuta”! (Pinadayag 11:18) Diha sa kulbahinam nga detalye, ang basahon sa Bibliya nga Pinadayag, diha sa usa ka seryal sa 16 ka panan-awon, nagbatbat kon unsaon niya kini sa paghimo.
“Mga Manulonda” ug ang “Mga Ilhanan”
4. Sa unsang paagi nalangkit ang mga manulonda diha sa Pinadayag, ug sa unsang paagi gilarawan sa mga panan-awon ang labing prominenteng manulonda?
4 Ang Pinadayag naghatag kadan-agan bahin sa unang tagna sa Bibliya, diha sa Genesis 3:15, nga nagpakita kon sa unsang paagi masulbad ang panag-away kang Satanas ug sa samag-babayeng organisasyon sa Diyos, ug tali sa ilang duha ka ‘mga binhi.’ Gibutyag niini ang paghukom ni Jehova sa iyang mga kaaway ug niadtong nahigugma kaniya ug nagalaban sa iyang pagkasoberano. Ang Pinadayag gipasa kang Juan “diha sa mga ilhanan” pinaagi sa usa ka manulonda. Ang ubang mga manulonda, p mga mensahero, nakigbahin sa pagmantala ug sa paglihok niadtong maong mga ilhanan. Ang labing iladong manulonda gipailaila diha sa Pinadayag 1:5 nga mao si “Jesu-Kristo, ‘ang Matinumaong Saksi,’ ‘Ang panganay gikan sa mga patay,’ ug ‘Ang Magmamando sa mga hari sa yuta.’” Ang “mga ilhanan,” kun mga panan-awon, naglarawan usab kaniya ingong usa ka “Leyon,” ingong usa ka “Kordero,” ingong “Miguel,” ug sa daghang higayon ingong gamhanang manulonda.—Pinadayag 5:5, 13; 9:1, 11; 10:1; 12:7; 18:1.
5. Unsa ang gipakita diha sa unang panan-awon sa Pinadayag, ug sa unsang paagi nalangkit kita niini?
5 Ang unang panan-awon, diha sa Pinadayag 1:10–3:22, nagapakitag makapukawng mga mensage nga gipasa sa gihimayang Jesus ngadto sa “mga manulonda,” o mga magtatan-aw, sa pito ka kongregasyon sa Asia nga naglarawan sa tibuok-yutang kongregasyon sa mga Saksi ni Jehova diha sa “adlaw sa Ginoo.” Busa ang mga mensahe maoy alang kanato karong adlawa! Kinahanglan magkugi kita sa “pagpamati sa ipamulong sa espiritu ngadto sa mga kongregasyon,” kay kining mga pasidaana ug mga tambaga maoy sa pagdasig kanato, aron kita magmatinumanon—inuyonan tungod sa atong mga binuhatan ug sa atong “gugma ug pagtuo ug ministeryo ug pag-antos.”—Pinadayag 1:10; 2:7, 10, 19.
6. Sa unsang paagi makapahimulos kita gikan sa matag usa sa mg amensahe nga gipadala ngadto sa pito ka kongregasyon sa Asia?
6 Sama sa kongregasyon sa Efeso, hinaot nga kita nagahago nga maunongon ug nagadumot sa mga buhat sa sektaryanhong mga apostata, apan kon miawop ang atong gugma sa bisan unsang paagi, mobalik kitang mahinulsolon sa atong unang gugma, uban sa tanang kalayo sa kadasig niini! Sama sa adunahan sa espirituwal nga mga igsoon sa Esmirna, maningkamot gayod kita nga walay kahadlok alang sa ganti, pamatud-an ang atong kaugalingon nga “matinumanon hangtod sa kamatayon,” kon kana gikinahanglan. Sama niadtong gisulayan ni Satanas diha sa Pergamo, hinulsolan nato ang bisan unsang nangagung idolatriya, imoralidad, o sektaryanismo. Ang mga taga Tiatira gipabantay batok sa samang mga pangdaldal, ilabina sa samag-Jezebel nga mga impluwensiya. Kita angay usab nga magbantay! Ang bisan kinsa nga namatay sa espirituwal, sama sa mga Kristohanon sa Sardis, kinahanglang momata na sa dili pa ulahi ang tanan. Ang bukas nga pultahan sa pag-alagad anaa sa atong atubangan, sama kaniadto sa mga taga Piladelpia; hinaot nga makabaton kitag gahom sa pagdaog sa takna sa pagsulay, sama kanila! Kon adunay usa kanato nga nahimong dagaang sama sa mga taga Laodicia, kinahanglang momata na kita sa atong espirituwal nga pagkahubo ug maghinulsol. Si Jesus nagabarog nga nagapanuktok sa pultahan. Hinaot abiabihon natong tanan siya ug pahimuslan ang nagapadayong espirituwal nga kombira uban kaniya diha sa atong 55,000 ka kongregasyon sa tibuok globo!—Pinadayag 1:11; 2:7, 10, 11, 17, 29; 3:6, 13, 22.
Ang Tronos sa Diyos, Usa ka Linukot, ug Usa ka Pangutana
7. Unsang mga pagdayeg ang giawit diha sa ikaduhang panan-awon, ug unsay imong pagsanong?
7 Diha sa ikaduhang panan-awon nakita ni Juan ang mahimayaon langitnong trono ni Jehova. Ang atong halangdong Diyos mitungha diha sa tunga sa tagsaong katahom, nga gialagaran sa upat ka kerubin, sa mga panon sa mga manulonda, ug sa gibanhawng mga magdadaog nga Kristohanon. Unsa ka makapukaw sa kalag ang ilang awit sa pagdayeg: “Takos ikaw, Oh Jehova, nga among Diyos, sa pagdawat sa himaya ug dungog ug gahon, kay ikaw mao man ang nagbuhat sa tanang butang, ug pinaagi sa imong pagbulot-an milungtad ug nangahimo sila”! Mitunol si Jehova ug linukot nga basahon sa Usa nga takos nga mobukas niini—ang Leon sa banay ni Juda, ang gipatay nga Kordero kinsa nahimong atong Manunubos. Ang tanang kalalangan nagadayeg kang Jehova ug sa Kordero.—Pinadayag 4:11; 5:2-5, 11-14.
8. Unsay atong nakita sa ikatulong panan-awon sa Pinadayag, ug sa unsang paagi nalangkit kini sa atong adlaw?
8 Karon ang ikatulong panan-awon! Ang Kordero mipadayon sa pagbukas sa pito ka timri sa linukot nga basahon. Unsay atong nakita? Una, ang bag-ong gipurongpurongang Jesus nga nagkabayo sa kalangitan diha sa usa ka puting kabayo, naglarawan sa matarong nga gubat. Sunod, gilukop sa magkakabayo sa pulang kabayo ang yuta diha sa bug-os nga gubat. Dayon miabot ang itom nga kabayo sa kagut-manan, ug sunod niana mao ang luspad nga kabayo sa kamatay, kansang magkakabayo niini ginganlag Kamatayon! Nagsunod ang Hades, sa paglamoy sa milyonmilyong mga biktima. Kining tanan nagsugod uban sa “mga kasakit” nga mihampak sa katawhan sa 1914-18 ug kana nahinumdoman pa sa nangaluwas nga mga tigulang nianang maong kaliwatan. (Mateo 24:3-8) Kadtong maong mga magkakabayo nagpadayon sa pagkabayo! Ug sa gibuksan ang ikalima ug sa ikaunom nga timri, ang mga hitabo mipadayon sa unahan sa ‘dakong adlaw sa kasuko ni Jehova ug sa Kordero.’ Ang pangutanang gibangon nato: “Kinsa ang arang makabarog niini?”—Pinadayag 6:1-17.
Kadtong “Arang Makabarog”
9. Unsang kulbahinam nga pagbutyag ang gihimo sa ikaupat nga panan-awon?
9 Ang ikaupat nga panan-awon gibutyag, nga nagapakita kon kinsay maluwas sa adlaw sa kasuko sa Diyos, ug ngano. Gihawiran sa mga manulonda ang upat ka hangin sa kalaglagan gikan sa yuta aron ang pagtimri sa espirituwal nga Israel—ang 144,000—matapos. “Human niining mga butanga,” ang panan-awon milapad ngadto sa usa ka makalilisang nga talan-awon: “Tan-awa! usa ka dakong panon, nga walay bisan kinsa ang makaihap, gikan sa tanang kanasoran ug gikan sa tanang kabanayan ug katawhan, nga nagbarog sa atubangan sa trono [sa Diyos] ug sa atubangan sa Kordero, nga nagsul-ob sa puti nga besti; ug nagdalag mga palwa sa palmera diha sa ilang mga kamot. Ug nagsinggit sa makusog nga tingog, nga nag-ingon: ‘Ang kaluwasan nautang namo gikan sa Diyos, nga nagalingkod sa trono, ug gikan sa Kordero.’” (Pinadayag 7:1-10) Nakita ba nimo ang imong kaugalingon diha niini nga larawan?
10. (a) Unsay gipakita sa pagtandi sa mga report sa Memoryal sa 1935 ug 1987 bahin sa katumanan sa ikaupat nga panan-awon? (b) Unsang pangutana karong adlawa ang nalangkit sa matag usa kanato, ug ngano?
10 Niadtong 1935 ang tumatambong sa tibuok-kalibotan sa pagsaulog sa Memoryal sa kamatayon ni Jesus maoy 32,795. Taliwala kanila, 27,006 ang nakig-ambit sa mga emblema ingong mga nahibilin sa yuta sa 144,000, kansang paglaom maoy langitnon. Ulahi nianang mao gihapong tuig, ang pag-ila sa dakong panon dayag nga mikidlap sa talan-awon. Kining mga maaghop, kinsa nagapaabot sa kinabuhing dayon diha sa usa ka paraiso sa yuta, may pagtuo usab sa naulang dugo ni Jesus; sila miduol kang Jehova diha sa dedikasyon, nagpabawtismo, ug nagaalagad kang Jehova nga madasigon uban sa malipayong palaabuton nga makalabang buhi latas sa “dakong kasakita.” Diha sa Memoryal sa 1987, ang tumatambong maoy 8,965,221, ug 8,808 ang nakig-ambit. Kini nagpakita nga ang milyonmilyon karong adlawa maoy sakop sa dakong panon o interesado nga malakip nianang numeroha. Ikaw ba “makaarang sa pagbarog” ingong usa kanila sa panahon sa ‘dakong adlaw sa kasuko ni Jehova ug sa Kordero’? Kini nagkahulogan sa imong kaluwasan aron sa paghimog mga lakang alang nianang tumonga..—Pinadayag 6:15-17; 7:14-17.
Nagapalanog sa mga Paghukom sa Diyos
11. Unsang mga paghukom ang gipalanog diha sa ikalimang panan-awon, ug sa unsang paagi may kalabotan kini sa atong adlaw?
11 Ang ikapitong timri gibuksan! Diha sa talan-awon mikidlap ang ikalimang panan-awon sa Pinadayag. Pito ka manulonda nagtindog atubangan sa Diyos. Sila gihatagan ug pito ka trompeta, ug pinaagi niini ilang gibudyong ang mga proklamasyon nga gipalanog sa tibuok yuta pinaagi sa mga katawhan ni Jehova sukad sa 1922. Gipahayag sa unang upat ang mga paghukom diha sa “ikatulong bahin” sa katawhan, dayag nga kadtong nakinabuhi diha sa Kakristiyanohan. Kining maong “mga trompeta” nagpaila nga ang bahin sa Kakristiyanohan “sa yuta” (ang daw walay kataposang sistema sa mga butang ni Satanas) ug sa “sa dagat” (ang dili makapuyo nga mga masa sa katawhan), maingon man sa iyang ‘mga suba ug mga tuboran sa tubig’ (ang mga doktrina ug mga pilosopiya sa Kakristiyanohan) ug sa iyang mangiob nga mga butang sa kalangitan (ang klero, nga walay espirituwal nga kahayag), ang tanan maoy target sa kasuko sa Diyos. Usa ka nagalupad nga “agila,” naglarawan sa usa ka manulonda, sunod mitungha sa kinataliwad-an sa langit, nga nag-ingon nga kining tulo ka pagbudyong sa trompeta nga moabot nagkahulogang “kaalautan, kaalautan, kaalautan alang sa mga nanagpuyo sa yuta.”—Pinadayag 8:1-13.
12. Kinsa ang nag-abli sa bung-aw sa kahiladman, ug sa unsang paagi diha sa modernong panahon nga ang paghugpa sa “mga dulon” mipaak sa klero?
12 Busa gihuyop sa ikalimang manulonda ang iyang trompeta. Tan-awa! “Usa ka bitoon”—ang Ginoong Jesus—nga nag-abli sa nag-asong bung-aw sa kahiladman, ug nanggula ang mga dulon. Makaiikag, kini naglarawan sa pagpagawas ni Jesus sa dinihogang mga saksi sa Diyos gikan sa pagkawaly-kalihokan sa 1919. Uban sa awtoridad sa Diyos, gilaglag niini ang mga sibsibanan sa klero, giyagyag ang ilang bakak nga mga pagtulon-an ug pagkamaut sulod sa “lima ka bulan”—ang normal nga gitas-on sa kinabuhi sa usa ka dulon. Kini nagpamatuod nga ang kaliwatan sa modernong-adlawng mga dulon “dili mahanaw” hangtod nga matapos ni Jehova ug ni Kristo ang paghukom sa kanasoran. Nahimo na, ang panon sa dulon nagbilin sa mga tawo ug linibo ka milyong binase sa Bibliya nga mga publikasyon, uban sa nagakalayong mga mensahe sa paghukom nga nagapaak samag ikog sa tanga. Si Juan mikomento: “Ang unang kaalautan milabay na. Tan-awa! Duha ka kaalautan umaabot pa.”—Pinadayag 9:1-12; Mateo 24:34; 25:31-33.
13. (a)Kinsa ang gilarawanan sa upat ka manulonda nga gibuhian gikan sa Suba sa Euprates? (b)Kinsa ang mga panon sa kasundalohan, ug sa unsang paagi nga ang ilang gahom “anaa sa ilang mga baba ug sa ilang mga ikog”?
13 Gihuyop ang ikaunom nga trompeta, gipailaila ang ikaduhang “kaalautan.” Upat ka manulonda gibuhian gikan sa Suba sa Euprates, nga tukmang naglarawan sa pagbuhi sa 1919 sa dinihogang mga saksi sa Diyos gikan sa pagkabihag sa Babilonya. Sila giandam sa “pagpamatay sa ikatulong bahin sa mga tawo,” nagpahibalo nga ang klero sa Kakristiyanohan patay gikan sa tinamdan ni Jehova. Apan gikinahanglan ang tabang aron sa pagpadaki niining buluhatong pagpamatuod, ug si Jehova nagtagana niini pinaagi sa pagpasulod sa dakong panon sa kaubang mga mamumuo. Ang dinihogang mga saksi ug kining mga katabang dungan nga nagaasdang ingong dili-maisip nga kasundalohang nanagkabayo, “kaduha piloa ang napulo ka libo ka napulo ka libo.” Ang ilang gahom anaa “sa ilang mga baba” sa pagkaagi nga ilang ginapahayag ang mga mensahe ni Jehova sa paghukom diha sa mga balay sa mga tawo, ug kini anaa diha sa “ilang mga ikog” sa pagkaagi nga ilang gibinlan sila ug literatura sa Bibliya nga nagawali sa duol nang nagsingabot nga adlaw sa panimalos.—Pinadayag 9:13-21; Buhat 20:20, 21.
14. (a)Kinsa ang “kusgang manulonda” diha sa ikaunom nga panan-awon, ug unsay iyang gihimo ug gipamulong? (b)Unsa ang ipasabot sa lami sa gamayng linukot nga basahon nga “matam-is sama sa dugos” apan ‘mapait sa tiyan’?
14 Karon ang ikaunom nga panan-awon mibuklad. Atong nakita ang usa ka “kusgang manulonda,” dayag nga si Ginoong Jesus diha sa linain nga papel. Siya dunay gamayng basahong linukot diha sa iyang kamot. Mga tingog ug mga dalugdog ang madunggan, ug ang manulonda nanumpa sa atong Dakong Maglalalang: “Wala na gayoy paglangan pa; apan sa mga adlaw sa tingog sa trompeta inighuyop niini sa ikapitong manulonda, ang tinago sa Diyos . . . pagatumanon na.” Gisugo si Juan sa pagkuha sa gamayng basahong linukot ug kaonon kini. Diha sa iyang baba kini “matam-is sama sa dugos,” sama nga ang mensage sa Gingharian, uban sa saad niining mga panalangin sa “usa ka bag-ong langit ug usa ka bag-ong yuta,” lamian alang sa dinihogang Juan nga matang ug sa iyang mga kauban karon. Apan, sa kasukwahi, ang sugo sa pagwali sa adlaw sa panimalos “maylabot sa mga katawhan ug sa mga kanasoran ug mga pinulongan ug mga hari” malisod alang sa uban nga tunlon. Hinunoa, magmaisogon! Magmalig-on sa pagtuo nga motagana si Jehova sa gikinahanglang kusog samtang imong ginawali ang iyang adlaw sa panimalos.—Pinadayag 10:1-11; 21:1, 4; 1 Juan 5:4; Isaias 40:29-31; 61:1, 2.
Ang Ikapitong Trompeta ug ang Ikatulong Kaalautan
15. (a)Unsay nahitabo sa dihang ang ikatulong kaalautan gipahayag ug gihuyop sa ikapulong manulonda ang iyang trompeta? (b)Sa unsang paagi nga usa ka kaalautan ang pagwali sa Gingharian?
15 Human sa pagtagna sa pagsulay sa kaaway sa 1918 sa “pagpatay” sa mga saksi sa Diyos, ug human sa paghubit sa pagkatagsaon nga gibanhaw sila sa “espiritu sa kinabuhi gikan sa Diyos” sa 1919 sa paghatag tibuok yutang pagpamatuod, si Juan misulat: “Ang ikaduhang kaalautan milabay na. Tan-awa! Ang ikatulong kaalautan moabot na.” Sa unsang paagi? Ang rekord nagpadayon: “Ug ang ikapitong manulonda mihuyop sa iyang trompeta.” Busa ang ikatulong kaalautan gilangkit sa paglanog nianang kataposang trompeta. Ug pamati! “Sa langit dihay makusog nga mga tingog, nga nanag-ingon: ‘Ang gingharian sa kalibotan nahimong gingharian sa atong Ginoo [Jehova] ug sa iyang Kristo, ug siya magahari hangtod sa kahangtoran.’” Kini mao ang Gingharian sa Diyos pinaagi ni Kristo Jesus, kinsa uban sa iyang 144,000 nga kaubang mga manununod motapos sa balaang tinago sa Diyos, magabayaw sa walay kataposang pagkasoberano ni Jehova nga Diyos, ang Labing Gamhanan. Kaalautan ba kining pagmantala sa Gingharian? Alang sa daotan, oo! Kay gipakita niini kon unsaon sa Diyos sa “paglaglag sa mga manglalaglag sa yuta.”—Pinadayag 11:1-19.
16. Unsang dramatikanhong mga padayag ang gihimo sa ikapitong panan-awon?
16 Ang ikapitong panan-awon karon mikidlap sa talan-awon! Tan-awa, didto, ang mapasakopong langitnong organisasyon sa Diyos, ang iyang “babaye.” Siya mabdos ug nag-antos sa kasakit sa pagbati sa dugay nang gipaabot nga anak. Sa unang higayon—apan dili ang kataposan—diha sa Pinadayag, ang mapulang dragon, “ang orihinal nga sirpinte, ang ginganlag Yawa ug Satanas, ang maglilimbong sa tibuok ginapuy-ang yuta,” mitungha, nanukad aron lamyon ang bata inigkahimugso. Ang gitagnang “panag-away sa [bitin] ug sa babaye” nagapaingon sa usa ka pagpakigtakos! Ang babaye nanganak sa “usa ka anak nga lalaki,” nga gisakgaw dayon ngadto sa trono sa Diyos.—Pinadayag 12:1-6, 9; Genesis 3:15; Daniel 2:44; 7:13, 14.
17. (a)Kinsa si Miguel, ug sa unsang paagi gipamatud-an niya ang iyang ngalan sukas sa 1914? (b)Unsay kalainan sa ‘tulo ko kaalautan’ ug sa “kaalautan alang sa yuta” diha sa Pinadayag 12:12?
17 Kini mao ang lalaki-bata sa Gingharian, nga natukod sa kalangitan sa makasaysayanhong tuig sa 1914. Ang Hari niini, si Kristo Jesus, gitawag usab nga Miguel, nga nagkahulogang “Kinsay Sama sa Diyos?” Iyang gitubag dihadiha kanang pangutanaha pinaagi sa pakiggubat kang Satanas ug sa pagtambong nianang karaang dragon ug ang iyang mga demonyo dinhi sa yuta. Sukad sa 1914, nahimong “alaut ang yuta ug ang dagat, tungod kay ang Yawa mikunsad diha kaninyo, nga dunay dakong kapungot, kay nahibalo nga mubo na lamang ang iyang panahon.” Busa kining kaalautan, nga napabanaag diha sa makasubong kahimtang sa katawhan karong adlawa, dili saypon nga mao ang ‘tulo ka kaalautan’ nga ipakanaog ni Jehova sa daotan sa dihang hukman sila.—Pinadayag 12:7-12.
18. (a)Unsang kaalautan ang gipaningkamotan ni Satanas nga Yawa nga himoon alang sa maunongong mga ulipon ni Jehova sa wala pa ug sa panahon sa Gubat sa Kalibotan II? (b)Unsay gipaningkamotan sa Yawa nga buhaton, ug unsa pay gipadayag sa nahibilin sa mga panan-awon?
18 Ang Yawa naningkamot sa paghatag usab ug kaalautan sa maunongong mga ulipon ni Jehova sa yuta. Sa wala pa ug sa panahon sa Gubat sa Kalibotan II, siya nagpabuga ug baha sa paglutos sa pagpaningkamot sa paglumos sa buluhaton sa “mga nahibilin” sa samag-babayeng organisasyon sa Diyos—sa sakop sa 144,000 nga nagaalagad pa sa taliwala sa katawhan. Gitino ni Jehova nga ang yuta, ang kaugalingong sistema sa mga butang ni Satanas, mabanlas sa maong baha. Apan, ang nasuko pag-ayong Satanas may dako gihapong tinguha sa pakiggubat batok sa mga Saksi ni Jehova. (Pinadayag 12:13-17) Unsa unya ang kataposang sangpotan? Ang siyam ka panan-awon moabot pa, ug kini maoy mosugilon kanato!—Habaccuc 2:3.
MGA PANGUTANA AGIG REPASO
□ Sa unsang paagi gigamit ni Jehova ang mga manulonda may labot sa basahon sa Pinadayag?
□ Sa unsang paagi nagaapektar kanato ang mga mensahe ni Jesus ngadto sa pito ka kongregasyon?
□ Unsay miresulta gikan sa paghuyop sa pito ka trompeta?
□ Unsay gilarawan sa hugpa sa mga dulon ug sa dili-maisip nga kasundalohang nanagkabayo?
□ Nganong ang pagkatawo sa Gingharian sa Diyos gipakasama sa “ikatulong kaalautan”?
[Kahon sa panid 14]
MGA KAPITULO UG MGA BERSIKULO SA MATAG PANAN-AWON:
□ 1NG PANAN-AWON 1:10–3:22
□ 2NG PANAN-AWON 4:1–5:14
□ 3NG PANAN-AWON 6:1-17
□ 4 NGA PANAN-AWON 7:1-17
□ 5NG PANAN-AWON 8:1–9:21
□ 6 NGA PANAN-AWON 10:1–11:19
□ 7NG PANAN-AWON 12:1-17
□ 8NG PANAN-AWON 13:1-18
□ 9 NGA PANAN-AWON 14:1-20
□ 10NG PANAN-AWON 15:1–16:21
□ 11NG PANAN-AWON 17:1-18
□ 12NG PANAN-AWON 18:1–19:10
□ 13NG PANAN-AWON 19:11-21
□ 14 NGA PANAN-AWON 20:1-10
□ 15NG PANAN-AWON 20:11–21:8
□ 16 NGA PANAN-AWON 21:9–22:5
[Kahon/Mga Larawan sa panid 15-18]
ANG 16 KA PANAN-AWON SA APOKALIPSIS—PILA KA PANGUNANG PUNTO
1 Si Jesus, diha sa tunga sa pito ka kongregasyonal nga kandelirio, nagpadalag mahigugmaong mga mensahe pinaagi sa pito ka bitoon, ang dinihogang mga magtatan-aw
2 Sa atubangan sa langitnong trono ni Jehova ang madaogong Kordero nakadawat sa mga mensahe sa paghukom diha sa basahong linukot
3 Nagkabayo si Jesu-Kristo aron sa pagpangdaog, samtang gihampak sa ubang mga magkakabayo ang katawhan ug nagkaduol ang adlaw sa kasuko sa Diyos
4 Samtang gihawiran sa mga manulonda ang dakong kasakitan, natapos ang pagtigom sa 144,000 ug sa dakong panon
5 Gipalanog sa mga manulonda ang mga mensahe sa paghukom, ug ang mga Saksi ni Jehova mihugpa samag mga dulon sa pagyagyag sa bakak nga relihiyon
6 Sa paghuyop as ikapitong trompeta, ang “mga saksi” sa Diyos nabanhaw sa pagmantala sa umaabot nga Gingharian ni Jehova ug sa iyang Kristo
7 Human nga natawo ang Gingharian sa 1914, gitambog ni kristo si Satanas ug ang iyang mga demonyo dinhi sa yuta
8 Duha ka mapintas nga mananap mitungha, ug gihuypan sa ikaduhang politikanhong mananap ug gininhawa sa kinabuhi ang larawan sa una, ang HK sa katibuk-an
9 Kadtong katawhan nga “nahadlok sa Diyos ug mohatag kaniya sa himaya” giani alang sa kinabuhing dayon, ang uban alang sa kalaglagan
10 Ang pagbubo sa pito ka panaksan sa kasuko sa Diyos taposon sa paglaglag xsa tanan nga napalihok sa hugawng “hangin” ni Satanas
11 Ang dakong bigaon, bakak nga relihiyon, gihukasan sa politikanhong “mananap,” nga molaglag kaniya tapos niini
12 Human sa kalaglagan sa Babilonyang Bantogan, taposon ang mga pagpangandam alang sa kaminyoon sa Kordero ug sa iyang pangasaw-onon, ang 144,000
13 Human nga malaglag ang dakong bigaon, manguna si Jesus sa langitnong kasundalohan sa paglaglag sa nahibilin sa yutan-ong sistema ni Satanas
14 Ang pagtambog kang Satanas sa bung-aw mobukas sa dalan alang sa Usa ka Libo ka Tuig nga Pagmando ni Kristo ug sa iyang pangasaw-onon, ang 144,000
15 Ilalom sa “bag-ong langit” ni Kristo Jesus ug sa iyang pangasaw-onon, ang “bag-ong yuta” nga katilingban sa katawhan makatagamtam sa dili-maasoy nga mga panalangin gikan kang Jehova
16 Ang mga tagana sa Diyos sa pag-ayo ug kinabuhi alang sa katawhan moagos gikan sa mahimayaong Bag-ong Jerusalem