Pagkaplag sa Rasanhong Panag-uyon sa Gubot nga Habagatang Aprika

Sumala sa giasoy ni Merlyn Mehl

AKO taga Habagatang Aprika, o, ingong talagsaong paghubit diha nianang nasora, usa ka taga Habagatang Aprika nga itom. Ako usab usa ka propesor sa University of Western Cape, ang kinadak-ang unibersidad sa nasod nga naglabi ang mga itom. Ako may silid nga doctorate in physics education. Sa milabayng 20 ka tuig, ako usab usa sa mga Saksi ni Jehova. Busa hain nianang duha ka kahimtang ang mitabang nako nga masinati sa rasanhong panag-uyon niining yuta sa kasungian ug kabingkilan?

Ang Pagdako sa Habagatang Aprika

Ang Cape Town, sa habagatang tumoy sa Aprika, gibatbat nga ‘labing maanindot nga Lawis sa tibuok nga yuta.’ Ang pagsud-ong sa mga bituon sa tin-aw nga gabii sa Cape Town maoy makapatandog-sa-balatiang kasinatian. Kas-a samtang gihimo ko kini, ako nahinumdom nga miingon ngadto sa usa ka higala: “Unsay katuyoan niining tanan? Walay duhaduha kini gayod adunay katuyoan; apan, dinhi ang mga butang walay katuyoan. Sa unsang paagi mopakitag sobrang pagpihig ang mga tawo batok sa lain? Nganong adunay labihang pagdapigdapig?”

Kon ikaw nahimugso sa Habagatang Aprika imong mamatikdan ang pagkamapihigon sa linghod nga panuigon. Ang rasanhong mga problema mopatim-aw nga bisan diin. Sukad pa sa pagkabata, ang mga tawo gibulag ug gipinig na pinaagi sa rasa. Ang among pamilya giklasipikar ingong mga “itom” sa balaod sa Habagatang Aprika. Ingong mga bata, kami gitudloan nga ang mga puti madaugdaogon samtang kami kauban sa mga dinaugdaog. Ug busa, samtang kami nagdako, walay rasanhong panag-uban sa tunghaan o sa sosyal man, busa masabtan nga ang mga tawo sa laing rasa pagalantawon nga may pagduda. Alang kanamo daw anaa sa mga puti ang kinamaayohan sa tanan​—apil ang mga balay, mga pasilidad, ug mga eskuylahan. Ang “apartheid,” ang legal nga panagbulag sa mga rasa, nahimong labing dinumtang pulong sa among bokabularyo.

Sa wala pa ako matapos sa pagtungha sa primarya, napugos ang among pamilya sa pagbiya sa balay diha sa kasilinganan nga managsagol ang rasa diin ako ug ang akong igsoon nga babaye natawo. Ngano? Tungod sa Group Areas Act, diin nagtugot nga ang usa ka partikular nga luna sa yuta panag-iyahon lamang sa usa ka grupo nga managsama ang rasa. Kami mibalhin sa laing lugar, diin kami nagpuyo sa daghang katuigan hangtod nga kini gibutyag na usab ingong “lugar sa mga puti.” Unya, kami mibalhin na usab.

Tungod sa dayag nga kawalay-panag-angay, ang akong mga ginikanan ingon man usab sa among mga magtutudlo nag-agda kanamo nga magkugi sa pagtuon sa eskuylahan. “Imong ipakita sa tawo nga puti nga ikaw labing maayo kay kaniya,” mao ang pahimangno. Kini nakaapektar sa akong panghunahuna sa pag-eskuyla. Bisan tuod ako maulawon, gusto ko nga makakat-on. Ang pagbasa sa bisan unsa ug sa tanan miokupar sa labing daghan kong panahon. Busa ako nakatapos sa pagtungha nga usa sa hawod nga mga estudyante sa nasod. Busa angay lamang nga ako motungha sa unibersidad. Tungod kay nagustohan ko ang siyensiya ug matematika, sayon alang nako nga mopili ug silid sa siyensiya, uban sa pisika ug matematika ingong medyor kong mga subject.

Sanglit niadtong 1960 (ang tuig nga ako misugod sa pagtungha sa unibersidad) ang Akta sa Separadong mga Unibersidad misugod sa paglihok, ako napugos sa pagtungha sa unibersidad alang sa akong rasa. Adunay dakong publisidad nga nahasentro sa mga estudyante nianang separadong mga unibersidad. Matag tuig ako makagraduwar nga adunay kadungganan ug sa kataposan nakab-ot ko ang silid nga Master sa siyensiya sa nukleyar nga pisika, ug kana nakadanig dakong pagtagad, ilabina ako niadto gitudlong usa ka magtutudlo sa unibersidad sa Western Cape​—ang unang itom nga estudyanteng natudlo.

Apan niining tungora mibati akog dakong kapakyasan. Walay tubag sa akong hinungdanong pangutana sa kinabuhi: Unsay katuyoan niining tanan? Ang komento ngadto sa akong higala, nga gihisgotan nga sayosayo, nahimo niining panahona.

Akong mga Pangutana Gitubag

Hangtod niining puntoha, ang relihiyon diyutayg bahin lamang sa akong kinabuhi. Ingong usa ka bata, ako tigtambongan sa Anglikanong Simbahan ug nakompirmahan sa panuigong 16. Apan wala gayod ing mga tubag sa akong mga pangutana. Busa samtang ako nagkaedad, mius-os ang panahon sa akong pagtambongan sa simbahan ug sa kataposan nahunong.

Unya usa ka adlaw ako miduaw sa akong kauban kanhi sa unibersidad diha sa ilang balay. Ang iyang asawa, si Julia, migamit sa Bibliya aron ipakita nga adunay tubag sa politikanhon ug rasanhong mga suliran dili lamang sa Habagatang Aprika apan usab sa tibuok nga yuta. Ako natingala ug nagduhaduha. Apan akong gidawat ang bokletang Basis for Belief in a New World, mipauli sa balay, ug misugod sa pagbasa uban ang kamaukit-ukiton.

Mga alas dos sa sunod nga buntag, ako nagbasa pa gihapon! Dinha ang mga pangatarongan sa mga argumentong kon nganong ang Bibliya tinuod, nganong ang iyang mga panagna kasaligan, nganong ang katawhan anaa sa hilabihang pagkadaotan, nganong ang 1914 usa ka talagsaong petsa, ug kon nganong kita makalaom sa usa ka matarong bag-ong sistema dinhi sa yuta. Kini mao gayod ang kamatuoran!

Sa sunod nga adlaw ako mibalik sa balay sa akong kanhi kauban sa unibersidad. “Aduna pa ba kamoy dugang literatura nga sama niini?” Ako nangutana sa iyang asawa. Ako mipahawa sa ilang balay uban ang usa ka tumpi sa mga basahon nga naghisgot sa pangunang mga doktrina sa Bibliya, ang mga katin-awan sa mga panagna sa mga basahong Daniel ug Pinadayag, ang kinaiyahan sa unom ka adlaw sa paglalang, ug daghan, daghan pang uban. Labaw sa tanan, ilang gipakita nga walay gihisgotan ang Bibliya nga nagpakamatarong sa rasanhong pagpihigpihig, sanglit ang “Diyos walay pinalabi.” (Buhat 10:34) Akong gihurot pagbasa ang tanang literatura. Ania ang mga tubag sa akong mga pangutana nga kanunayng nagsamok kanako. Human sa halos usa ka tuig nga puno sa nahikayng mga pagtuon sa Bibliya, ako nabawtismohan ingong usa sa mga Saksi ni Jehova. Kadto niadtong Nobyembre 21, 1967.

Ingong usa ka organisasyon, ang mga Saksi ni Jehova tinuod gayod nga dili rasanhon ug politikanhon. Sila nagamaunongon sa usa ka kagamhanan, ang Gingharian sa Diyos. Alang kanila ang sosyal nga kahimtang bug-os gayod nga dili hinungdanon. Apan sa Habagatang Aprika, kanunay adunay mga suliran maylabot sa rasanhong mga isyu. Tungod sa Group Areas Act, ang mga kongregasyon nagabanaag sa komposisyon sa rasa sa mga dapit nga ilang ginapuy-an. Busa sa Kongregasyon sa Claremont diin ako nagtambongan, ang kadaghanan maoy itom. Ang pipila sa mga puti nga nagtambongan maoy mga misyonaryo o kaha mga tawong may katungdanan ingong magtatan-aw.

Human sa daghang katuigan, akong mahinumdoman pa gihapon, ang duha ka hitabo nga nagapaila kon unsa ka lisod ang paghanaw sa rasanhong mga tinamdan. Sa mga asembliya, ang mga puti nga nagtambong niadto moadto sa atubangan sa mga linya sa kapeteriya, mokuha sa ilang pagkaon, ug dayon mopahawa nga mokaong separado, samtang ang uban kanamo magtindog nga maghulat. Kana nakapikal kanako. Ang puti nga mga Saksi usab adunay tendensiya nga mopailaila sa ilang mga asawa nga sama niini: “Day, himamata si Merlyn. Siya nagatuon sa Bibliya.” “Merlyn, kini ang akong asawa, si Sister Tanpulana.” Ako gitawag nila sa akong ngalan, apan ako kinahanglang mogamit sa “Sister” o “Brader.” Ako naglagot pag-ayo!

Apan unya ako misugod sa pagpamalandong. Ang suliran mao nga ikaw kanunay nga mobati nga ang laing tawo maoy mapihigon. Apan ang katilingbang nagpundokpundok ang rasa sama sa Habagatang Aprika nagaapektar gayod sa tanan nga nagapuyo dinhi. Tinuod, ang mga puting Saksi angay magpauswag sa ilang pakigrelasyon sa mga tawong lahig rasa. Apan unya, mao usab ako. Niining bahina ang Bibliya nagahatag ug maayong tambag: “Ayaw pagdalidali sa pagkayugot; kay ang pagkayugot gihambin sa mga buangbuang.” (Ecclesiastes 7:9, The New English Bible) Oo, kinahanglang akong paningkamotan nga dili mahimong sensitibo kaayo ug dili daling masilo sa mapihigong mga pulong.

Akong mahisgotan usab nga ang kahimtang karon sa nasod nausab na sukad niadto. Sa unang katuigan, limitadong gidaghanon lamang sa mga puti ang tugotan nga motambong sa relihiyosong panagkatigom sa laing mga rasa, ug sila mokaon nga separado. Dili na kini mao ang kahimtang.

Bisan pa niana, labing hinungdanon nga ania ang usa ka organisasyon sa mga tawo nga libreng makigbuylog, nga giabiabi sa kabalayan sa usag usa, ug nagtawag sa usag usa nga brader ug sister ug nag-isip gayong ugdang niana! Kining mga pagtuoha lig-on nga gituohan ug gipasukad sa mga prinsipyo sa Bibliya. Busa kon motungha ang rasanhong mga hitabo​—ug sa Habagatang Aprika sila halos dili kalikayan—​ang pagpalandong sa maong mga kamatuoran kanunay makapakalma sa akong mga pagbati. Sa paglabay sa katuigan, nakakat-on ako sa pagpadapat sa mga prinsipyo sa Bibliya nga mas maayo ug sa ingon nakabatog labaw nga kalinaw sa akong kahiladman bahin sa rasanhong mga butang. Apan ang usa kinahanglang maningkamot niana!

Ang Bug-os-Panahong Ministeryo

Pagkatapos dayon sa akong bawtismo, ako mibati sa panginahanglan nga pauswagon ang akong ministeryo. Ako wala pay asawa ug diyutay lamang ang mga responsabilidad, busa niadtong Oktubre 1, 1968, ako misugod sa regular payunir nga buluhaton. Kini nakapahinabog dakong kakisaw, sanglit kadto nagkahulogan nga ako mogawas sa unibersidad ug mobiya sa butang giisip sa daghan nga masidlakong karera. Ang usa ka artikulo sa mantalaan bahin sa akong lakang may ulohan: “Hawod nga Siyentipiko Nanukmag Pinaagi sa Bibliya.” Sa wala madugay ako nagdumalag napulo o labaw pang pagtuon sa Bibliya uban sa lainlaing tawo o pamilya. Sa usa ka asembliya duha sa maong mga tawo nabawtismohan, sa sunod, upat; dayon pito, ug padayon.

Niadtong Septiyembre 17, 1969, ako nakigminyo kang Julia, ang Saksi nga nagpailaila kanako sa kamatuoran. Iyang nabatonan ang diborsiyo pinasukad sa legal ug Kasulatanhong mga pasikaranan sa taastaas nga panahon sa wala pa kami maminyo. Kini nagpasabot nga ako nakabaton ug dihadihang pamilya, kay siya adunay duha ka anak lalaki, si John ug Leon. Gihukom namo nga ipadayon ang payunir nga pag-alagad kutob sa mahimo, nga napamatud-ang maayong pagbansay alang sa mga batang lalaki ug nakatabang nako sa pagpalampos sa among pamilyang may hinablos.

Ang sinugdan sa katuigang 1970 maoy makapadasig kaayong panahon sa bug-os-panahong pag-alagad, sumala sa ginapakita sa mosunod nga mga kasinatian. Samtang nagsangyaw sa balay ug balay, among nahibalag ang usa ka babayeng ginganlag Annabel. Iyang gidawat dihadiha ang librong Ang Kamatuoran nga Motultol sa Kinabuhing Dayon ug usa ka Bibliya. (Among nahibaloan sa ulahi nga iyang gibayad sa basahon ang kataposan niyang kuwarta​—ang tinderog gatas napugos sa pagbalik sa sunod semana alang sa iyang kuwarta!) Sukad sa sinugdan, siya nangandam gayod alang sa senemanang pagtuon sa Bibliya bisan pa sa perhwisyong anak. Siya usab misugod sa pagpakigsulti sa iyang pamilya kon unsa ang iyang nakat-onan. Sa wala madugay ang iyang bana, si Billy, miuban kaniya sa pagtambong sa mga tigom. Ang mga ginikanan ni Annabel nagngalan sa ilang lima ka anak sumala sa alpabeto. Ang iyang igsoong babaye nga si Beattie misugod sa pagtuon sa Bibliya. Ingon man usab si Charlie ug ang iyang asawa. Si Daphne mipakita usab ug interes, ug mikuyog usab si Edna ug ang iyang bana. Karon ang tibuok nga pamilya nagaalagad nga matinumanon sa daghang katuigan. Ang mga lalaki mga ansiano o ministeryal nga mga alagad, ug daghan sa mga babaye nakaalagad nga mga payunir.

Ug dayon anaa si Stanley. Among nakaplagan siya sa balay-ug-balay nga buluhaton, ang kataposang giduaw sa bugnaw nga hapon sa Lunes. Unsa ka maayo ang pag-abiabi kanamo! Gipasulod kami sa iyang asawa, ug among natino nga kami nakig-atubang sa usa ka diyosnon nga tawo. Sa pagkamatuod, siya bag-o pang nag-ampo aron tabangan nga makasabot sa Bibliya. Ang among unang panaghisgot nasentro sa doktrina sa Trinidad. Human sa usa ka oras nga panaghisgot, siya mipatim-awng nakombinsir. Pagkasunod nga semana, kami iyang gitimbaya niining mga pulonga: “Kamo husto. Akong gibasa ang tibuok ‘Bag-ong Testamento,’ ug walay Trinidad. Ako nakigkita sa ministro sa pagsukna kon nganong siya naglimbong kanako. Siya wala makigkita kanako, busa akong gibalik ang mga sobre sa kolekta nga akong gigamit sa pagkolektag kuwarta gikan sa ubang membro sa simbahan.” Ug kanang tanan nahitabo nga walay nakuhang bisan usa ka basahon gikan kanamo! Buot niyang motambong sa mga tigom, ug kami misaad nga hapiton siya. Apan niadtong adlawng Dominggo kami naulahig lima ka minutos kay sa among gisaad. Among nasugatan siya nga nagsakay sa iyang bisikleta padulong sa tigomanan! “Nakaingon ko bag inyo na akong gikalimtan,” siya miingon. Kami nagtuon tulo ka beses sa usa ka semana, ug siya nabawtismohan human sa tulo ka bulan sukad sa among unang panagtagbo. Si Stanley nag-alagad sa daghang tuig uban ang samang kasibot nga iyang nabatonan sa sinugdan.

Si Julia ug ako nagbanabana nga sulod sa milabayng daghang tuig nakapribilehiyo kami sa pagtabang sa mga 50 ka tawo nga nahimong mga Saksi ni Jehova.

Pagbalik sa Sekular nga Trabaho

Tapos sa upat ka tuig sa payunir nga pag-alagad, ang among kuwarta halos nahurot na. Ang gastos sa pagkinabuhi misulbong, ug ang mga batang lalaki nagkadagko. Busa, nga subo ug nagpanuko, mihukom kami sa paghunong sa bug-os-panahong ministeryo. Kadto niadtong Septiyembre 1972. Unsay sunod? Kapin lang sa usa ka tuig sa ulahi, sa Enero 1, 1974, ako mibalik sa pagtudlo sa unibersidad sa dihang abli ang usa ka puwesto sa pisika. Kadto nagpasabot sa dakodakong pagpasibo na usab ug pagbantay usab batok sa pagkawala sa kadasig. Apan tungod sa lig-ong pagpaluyo gikan ni Julia, ako nakahimo sa pagpasibo. Napamatud-an nga nakatabang kaayo ang pagpabiling aktibo kaayo sa ministeryo ug sa kongregasyon​—nga magapadayon gayod sa ‘pagpangita pag-una sa gingharian.’​—Mateo 6:33.

Sanglit ang tanang instruktor sa unibersidad gilaomang mobuhat ug panukiduki, mitungha ang suliran sa pagbalik sa nukleyar nga pisika. Gilisdan ako pag-ayo sa paghunahuna nga buhaton kining matang sa panukiduki nga alang sa gamayng grupo lamang sa dihang ang akong panahon sa gawas sa unibersidad gigugol sa pagpaningkamot sa pagtudlo sa mga tawo sa kamatuoran gikan sa Bibliya. Ingon sa kawang kaayo ang paghimo sa panukiduki tungod lamang sa pagdukiduki. Ug, siyempre, ang pagdukiduki sa nukleyar nga pisika mahimong may militaryong mga pagpadapat, ug kini makadalag mga suliran maylabot sa Kristohanong neyutralidad.​—Isaias 2:2-4.

Sa Habagatang Aprika ang unibersidad nga sama nianang sa Western Cape may daghang estudyante nga ginganlang “mga naiwit.” Sila mitungha sa unibersidad nga dili andam tungod sa kakulang sa nakat-onan ug ubang sosyo-ekonomikanhong mga hinungdan. Sa daghang kaso sila dili kay walay natagong-katakos​—sila wala lamay kahigayonan. Sa milabayng 13 anyos ingong bahin sa akong trabaho sa unibersidad, akong gituki ang mga suliran sa pagkakat-on sa maong mga estudyante ug naghikay sa laing mga metodo sa pagtudlo. Kining maong pagtuki nakahatag nako sa silid nga doctorate in physics education ug misangpot sa akong promosyon ngadto sa pagkapropesor. Ang mga programa sa pagtinabangay nga panukiduki karon gihimo sa mga unibersidad sa Tinipong Bansa ug sa Israel. Makapainteres nga itandi ang mga napanid-an niining mga panukidukia uban sa mga metodo o paagi sa pagtudlo sa mga Saksi ni Jehova.

Ang usa ka teoriya nga giugmad ni Propesor Reuven Feuerstein ug sa iyang mga kauban sa Israel gitawag Mediated Learning Experience. Ang lintunganay sa maong teoriya mao nga ang mga bata makaugmad sa abilidad sa panghunahuna dili lamang gikan sa gawasnong mga pandasig nga moabot kanila pinaagi sa ilang mga sentido kondili gikan sa usa ka tawhanong tigpataliwala nga maoy mobadbad sa mga pandasig ngadto kanila. Kon kini dili buhaton, dili maugmad sa kabataan ang ilang abilidad sa panghunahuna sumala sa ilang maarangan.

Ang mga Saksi ni Jehova nagahatag ug dakong pasiugda sa papel sa ginikanan ingon nga pangunang magtutudlo sa bata. Ang ginikanang mga Saksi nagagugol ug daghang oras sa pagsusi sa ilustradong mga tabang sa pagtuon sa Bibliya uban sa ilang mga anak, nga mangutana kanila kon unsay ilang makita ug motabang kanila sa pagsabot sa kahulogan sa mga estorya sa Bibliya. Ilang gipasiugda ang panginahanglan dili lamang sa senemanang pagtuon sa Bibliya apan usab sa padayong pagtudlo, ilabina sa mga prinsipyo sa Bibliya. (Deuteronomio 6:6-8) Ang panukiduki nga gihisgotan sa itaas daw nagpakita nga kon buhaton kini, ginaugmad gayod sa mga ginikanan ang katakos sa panghunahuna sa ilang mga anak.

Ang constructivism o kamatukoron maoy laing teoriya nga gipatuo nga ang pagtudlo dili basta pagbalhin lamang sa impormasyon gikan sa panghunahuna sa magtutudlo ngadto sa pangisip o hunahuna sa iyang mga magtutuon. Hinuon, ang matag usa mag-ugmad sa iyang kaugalingong mga kontruksiyon o tinukod gikan sa mga butang nga iyang nakita o nadungog o nasinatian. Mao nga ang duha ka tawo makapamati sa samang impormasyon apan mohimog lainlaing panghinapos gikan sa mga butang nga ilang napamatian. Aron epektibong makakat-on ang maong mga tawo, angay nilang dumalahon ang mga impormasyon sa ilang kaugalingon.

Ang mga tigom sa mga Saksi ni Jehova nagadasig sa tukma niini. Ang matag usa gilaoman nga mangandam daan sa mga impormasyong pagahisgotan gikan sa mga basahong gamiton. Sa panahon mismo sa tigom, ang mga komento giabiabi gikan sa mga tumatambong bahin sa giandam nga materyal. Niining paagiha dili lamang gidasig ang mga tumatambong nga mopahayag sa ilang nakat-onan kondili aron makabenepisyo usab gikan sa pagpangandam nga gihimo sa uban.

Ang pag-abot sa gibase-kompiyotir nga edukasyon gidayeg ingong paagi sa tinagsang pagtudlo. Apan ang panagtuon sa Bibliya nga gibuhat sa mga Saksi ni Jehova sa daghang katuigan diha sa mga balay sa mga tawo milabaw niana! Ang usa ka magtutudlo motabang sa usa, duha, o tulo ka tawo (talagsa rang labaw niana) aron mahisgotan ang punto sa Bibliya nga anaa sa pinatik nga materyal nga narepaso na sa estudyante sa iyang pagpangandam. Ang estudyante gidasig nga ipatin-aw kon unsay iyang nasabtan, parapo por parapo, ug dayon kini pagahisgotan​—usa gayod ka panagtuong personal sa Bibliya. Kay gihatagan sa tin-aw nga kapadapatan sa makatudlong maayong mga prinsipyo, dili ikatingalang ang mga Saksi ni Jehova nagamauswagon. Hinuon, dili kinahanglan nga tun-an nila kining mga prinsipyoha gikan sa usa ka unibersidad. Ilang nakuha kini gikan sa kinalabwang tinubdan​—ang Bibliya.​—Mateo 28:19, 20; Juan 6:45.

Rasanhong Kasamok Giilisan sa Rasanhong Panag-uyon

Kapin sa bayente anyos na ang milabay sukad ako nahimong usa sa mga Saksi ni Jehova. Si John ug Leon, ang hinablos kong mga anak lalaki, nga karon dagko na, pulos bawtismado ug nagaalagad nga matinumanon. Niadtong 1976 ang among anak lalaking si Graeme natawo. Among pribilehiyo usab nga padakoon siya sa kamatuoran. Ang among pamilya gipanalanginan tungod kay si Julia nakapayunir na usab, samtang ako makapayunir ingong katabang payunir dili mokubos sa tulo ka beses sa usa ka tuig. Alirong namo sa Habagatang Aprika, adunay kalit nga pag-usbaw sa rasanhong kagubot. Makita kini diha sa mga sulatsulat sa bungbong sa mga balay ug mamatikdan sa palibot. Apan, taliwala sa rasanhong mga pagpundokpundok, nagakahitabo ang usa ka modernong milagro. Tungod sa pagpalugak sa mga balaod sa Estado bahin sa asosasyon, ang mga Saksi ni Jehova aduna nay bug-os nga kagawasan sa pagtigom, ilabina sa dagkong mga asembliya. Ako nakabaton sa pribilehiyo sa pagpakig-ambit sa pag-organisar sa pipila niining mga asembliyaha sa tanang rasa. Dinhi among makita nga walay rasanhong pagpihigpihig, kay ang mga tawo naedukar sa hataas nga mga sukdanan sa Bibliya, aron dili makailag kolor! Ania ang mga tawo nga nagalantaw sa sulod nga pagkatawo sa uban, dili sa mga bulok sa ilang panit.

Ang mga Saksi ni Jehova karong adlawa mao ang bugtong matuod tibuok-yutang panag-igsoonay sa katawhan. Sa dili madugay, sa iyang bag-ong sistema sa mga butang, si Jehova “magapahid sa tanang luha gikan sa ilang mga mata, ug ang kamatayon mawala na, ug wala na usab unyay pagminatay, ni paghilak, ni kasakit pa.” Uban sa minilyong igsoong lalaki ug babaye sa tibuok nga yuta, ako nagapanan-aw sa unahan nianang malipayon, matarong, dili mapihigon sa rasa nga bag-ong kalibotan.​—Pinadayag

21:3-5.