Sierra Leone—Pagkalot sa Iyang Labing Hamiling “mga Brilyante”

NIADTONG tuig 1462, usa ka grupo sa maisog nga Portuges nga mga sakayanon milawig paingon sa baybayon sa Kasadpang Aprika ngadto sa 890 ka kilometro sa amihanan sa equator. Sila wala mahadlok sa mga sugilanon bahin sa dagtom nga dagat nga puno sa mga mangtas nga ginaingon nga nagpuyo sa habagatan sa Morocco. Dugang pa, sila wala motuo sa kaylap nga patuotuo nga init kaayo ang silak sa adlaw duol sa equator nga tungod niana ang dagat nagbukal.

Sama sa gidahom niadtong mga sakayanon, ang ilang kahoy nga mga barko wala masunog, ug wala usab sila makakitag walay-ulo nga mga mangtas sumala pa sa sugilanon. Hinunoa, sila nakakitag matahom puti-ug-balas nga mga isla nga saylo niana nagbantaaw ang lunhaw kaayong mga bukid, nga may lanubong mga lasang. Ug sa dihang gibahaan sa tropikal nga mga ulan ang yuta ug gisiak sa kilat ang panganod, midahunog ang dalogdog ug midaguok niadtong mga bukira sama sa pagngulob sa usa ka dakong hayop. Makaiikag, kadtong mga sakayanon nagngalan sa lugar nga Sierra Leone—“Mga Bukid sa Liyon”!

Sa midagan ang mga katuigan, ang mga tawo nakahibalo nga ang katugob sa Sierra Leone dili lamang sa iyang katahom. Adunay mga minerales usab: iron, bauxite, rutile, kromo, platinum, ug bulawan. Apan hangtod sa 1930 na lamang nga nadiskobrehan nga maoy nakahimo sa komersiyal nga kalibotan sa pagmatikod niining gamay nga yuta. Ang mga brilyante nakit-an! Ang suplay niining mahal nga mga bato nakita nga abunda kaayo, nagdani sa mga tigpangita niini sa linibo.

Ang uban sa literal nakapunit ug mga brilyante sa ibabaw sa yuta. Ang usa ka babaye nakakitag dako kaayong brilyante samtang nanglaba sa iyang senina diha sa sapa. Usa ka tawo nakakalot ug 153-kilatis nga mahalong bato samtang nagtanom ug kamote diha sa usa ka uma. Alang sa dakong bahin, hinunoa, ang pagpangita niining mahalong mga bato nagkinahanglag dakong paghago. Pananglitan, ang ubang mga brilyante nalubong sa ilalom kaayo nga yuta, nasuksok diha sa kimberlite, usa ka matang sa bato. Ang pagkuha niini nagkinahanglag pagkalot, pagpabuto, pagbuak, ug pagklase-klase. Kini nagkinahanglan usab ug katakos, kahibalo, ug pailob.

Samtang ang masiksikon nga mga palakaw sa pagminag-brilyante nagpadayon hangtod karong adlawa, ang pagpangitag mahalon nga bato nga lahi nga matang—espirituwal nga brilyante nga mas mahal—dugay nang ginahimo sa Sierra Leone sukad sa 1915. Niadtong tuiga, usa ka tawo nga ginganlag Alfred Joseph migikan sa Barbados ug mipanaw ngadto niining yutaa sakay sa barko. Dinhi siya misugod sa buluhaton sa “pagpangita,” dili sa mga brilyante, kondili sa mga tawo nga gustong moalagad sa matuod nga Diyos “uban sa espiritu ug sa kamatuoran.” (Juan 4:26) Kini nga pagpangita gidumala sa samang paagi nga gihimo sa unang-siglong mga Kristohanon—“sa publiko ug gikan sa balay ug balay.” (Buhat 20:20) Pito ka tuig sa ulahi, giubanan si Alfred Joseph niining buluhatona ni William R. Brown, nga gikan usab sa West Indies.

Sa kataposan sa 1923, usa ka gamay nga kongregasyon ang natukod sa kaulohan, sa Freetown. Giapilan kadtong kongregasyona sa 14 ka bag-ong mga bawtismado. Karong adlawa, 632 ka indibiduwal diha sa 30 ka kongregasyon ang aktibong nakigbahin sa buluhaton sa publikong pagsangyaw ingong mga Saksi ni Jehova. Ang ilang mga paningkamot sa pagpangita ug sa pagkalot nianang gitawag sa Sierra Leone nga hamiling espirituwal nga mga brilyante nagpadayon sa pagkakitag dakong kalamposan.

Aktibong mga Tigpangita sa Kamatuoran

Ang pipila sa bag-ong mga disipulo ni Jesu-Kristo napamatud-ang samag mga brilyante nga daling makuha gikan sa ibabaw sa yuta. Sila aktibong nangita sa mga Saksi ni Jehova. Ang usa kanila mao ang tigkulong sa buhok nga ginganlag Joan. Iyang giteleponohan ang lokal nga hedkuwarter sa mga Saksi sa Freetown ug mihangyo ug pagtuon sa Bibliya.

Unsay nakapukaw kang Joan sa pagtawag sa telepono? “Wala akoy nahinumdomang yugto sa panahon sa akong kinabuhi nga ako wala magpangita ug Diyos,” siya miingon. “Sukad pa sa pagkabata, nakaanib ako sa daghang mga simbahan ug relihiyosong mga grupo apan wala gayod makabaton ug espirituwal nga katagbawan.

“Sa mga napulo ka tuig sa miagi, nakamatikod ako sa mga Saksi ni Jehova, apan sa wala lamay katarongan, may kaugalingon akong opinyon nga kining mga tawhana kinahanglang likayan bisan unsa pay modangat. Sa dihang ang usa ka higala sa pamilya nahimong Saksi, misuskriber ako sa Watchtower ug Awake! nga mga magasin. Gihimo ko kadto aron lamang malipay siya; wala ako magtagad sa pagbasa niadto. Sa pagkamatuod, gigamit ko kadto sa paglimpiyo sa akong mga bentana! Dayon miabot ang Awake! nga nakakuha sa akong pagtagad. Ang artikulo sa hapin maoy mahitungod sa atong panginahanglan ug gugma. [Septiyembre 22, 1986] Gibasa ko kadto ug naikag kaayo. Kadto mao ang magasin nga nakatukmod kanako sa paghangyo ug pagtuon sa Bibliya.” Si Joan tulin nga miuswag ug sa ulahi nahimong bawtismadong Saksi ni Jehova.

Laing tawo nga nangita sa kamatuoran mao ang usa ka batan-ong lalaki nga ginganlag Manso. Gusto siya nga mahimong pari ug miadto sa seminaryo. Apan sa dihang iyang namatikdan ang pagkamaut sa iyang mga magtutudlo, siya naluya ug miundang. Sunod, misugod si Manso sa pagtambong sa ubang relihiyosong mga miting. Usa ka adlaw samtang nagpaingon sa pagduaw sa iyang uyoan, nakakita siyag libro nga gipatik sa Watch Tower Society—Tinuod ba nga Pulong sa Diyos ang Bibliya? Didto kadto sa lapokon nga lim-aw nga tubig. Sanglit ang ulohan nakaikag kang Manso, iyang gikuha ang libro, gipauga kini, ug gibasa. Ania ang kamatuoran nga iyang gipangita! Ang libro nagdasig sa mga magbabasa sa pagtambong sa mga miting sa lokal nga Kingdom Hall. Busa miadto si Manso, misugod sa pagtuon sa Bibliya uban sa mga Saksi, ug sa ulahi gibawtismohan. Siya karon nag-alagad isip usa ka bug-os panahong payunir nga ebanghelisador!

Misanong sa Mapailobong Pagtabang

Ang ubang bag-ong mga disipulo, hinunoa, nakit-ang sama sa mga brilyante nga nasuksok sa ilalom sa bato. Dakong paningkamot ang gikinahanglan aron “makalot” kini. Si Donald, usa ka Kristohanong ansiano, nakahinumdom sa pailob nga gikinahanglan sa pagtabang sa usa ka babayeng ginganlag Martha. Siya miingon: “Bisan pa nga siya miuyon sa pagtuon, pahulaton niya kami ug dugay sa dili pa makasugod. Usahay tuyoon niya nga ilangan ang mga buluhaton nga mahimo untang trabahoon nga sayo pa. Unya hangyoon niya kami sa paghulat hangtod nga iyang matapos kini. Usahay maghulat kami sobra sa usa ka oras. Siya nagtuo nga maluya kami ug molakaw, apan kada semana naningkamot kami sa paghisgot labing menos ug gamay makahuloganong materyal. Ang resulta? Ang iyang apresasyon sa ulahi mitubo.

“Laing kalisdanan mao ang pagpatambong kang Martha sa mga miting. Magdala ako ug laing mga Saksi sa pagtuon sa Bibliya kaniya aron maharuhay ang iyang bation inig-abot niya sa Kingdom Hall. Apan iyang gipalangan kini sa hilabihan nga sa dihang mitambong siya sa ulahi, halos nakaila na siya sa tibuok kongregasyon!” Ang pailob nabayran. Si Martha bawtismado na karon ug adunay maayong baroganan sa kongregasyon.

Si Pius sa sinugdan misupak sa kamatuoran. Sa gisugdan siya sa misyonerong magtiayon sa pagtuon sa Bibliya, anaa na si Pius sa iyang edad 70, nga usa ka malig-ong membro sa usa ka politikal nga partido, ug mao ang tresurero sa iyang simbahan. “Siya kusganong makiglalis halos sa tanang punto nga among hisgotan,” miingon ang mga misyonero. “Kada semana magsugod siya nga kalmado, apan sa hinay-hinay siya moinit. Kadto maoy tinuod nga pakigbisog kada semana, ug kasagaran mobati kami nga kasurenderon sa kaluya ug talikdan siya. Ang pangunang butang nga nakahimo kanamo sa pagbalik kanunay kaniya mao nga siya mangandam gayod kanunay sa leksiyon.

“Human sa mga usa ka tuig niini, mipahayag si Pius nga siya nakadesider sa paghimog kinaugalingong pagtuki. Sanglit usa man siya ka retiradong maestro, siya nahibalo kon unsaon sa pagdukiduki. Kada adlaw sulod sa duha ka semana, katkaton niya ang bukid ngadto sa librariya sa unibersidad, diin didto gituhop niya ang iyang kaugalingon sa mga komentaryo sa Bibliya ug sa reperensiyang mga libro. Human niadto siya miingon: ‘Kombinsido na ako karon nga ang tanan ninyong gisulti kanako matuod. Ang Diyos dili Trinidad, walay impiyernong-kalayo, ug ang kalag mamatay. Bisan ang ubang mga tawo sa akong simbahan miadmiter nga tinuod kini.’ Tapos niadto, tulin nga miuswag si Pius, miluwat gikan sa politika ug sa simbahan. Human nga gibawtismohan, siya nag-alagad isip auxiliary payunir, nagagugol ug 60 ka oras sa usa ka bulan diha sa buluhatong pagsangyaw, sa makadaghan kutob sa iyang maarangan hangtod nga namatay siya sa 1987.

“Usa ka butang nga wala namo mahibaloi sa dugay nga panahon,” nahinumdom ang mga misyonero nga nagtudlo kang Pius, “mao nga ang iyang inahan nakig-uban sa mga Saksi ni Jehova. Siya nakahinumdom nga nakatambong ug mga miting uban kaniya sa bata pa siya. Human nga namatay ang iyang inahan, siya milakaw. Human sa iyang bawtismo, si Pius miingon: ‘Ang gimahayan ko lang mao nga dili na makakita ang akong inahan kanako karon.’ Unya misanag ang iyang nawong, ug siya midugang: ‘Apan siya makakita unya nako diha sa bag-ong kalibotan!’”

Hangtod karong adlawa, ang pagpangitag mga brilyante ug ang pagpangita sa mga disipulo nagpadayon. Ang masilakong mga paanunsiyo nagpasigarbo nga ang “mga brilyante maoy sa walay kataposan.” Bisan pa niana, ang tag-iya niining matahom nga mahalong batong dili makapahimulos niini sa walay kataposan tungod kay gawas sa tagana sa Diyos alang sa kaluwasan, ang kamatayon mao ang dulnganan sa tanang makasasalang mga tawo. (Juan 3:16, 17) Busa ang buluhaton sa mga Saksi ni Jehova sa Sierra Leone nagaani ug bahandi nga mas bililhon kay sa yanong mga brilyante: mga alagad sa Diyos ug mga disipulo ni Jesu-Kristo! Ug ang Pulong ni Jehova nagasaad: “Siya nga nagatuman sa kabubut-on sa Diyos magapabilin sa walay kataposan.”—1 Juan 2:17.

[Mapa/Mga hulagway sa pahina 22, 23]

(Alang sa aktuwal nga pagkahan-ay, tan-awa ang publikasyon)

[Mga hulagway]

Taliwala sa mga talan-awong sama niini, ang mga magwawali sa Gingharian nakakaplag espirituwal nga mga brilyante sa Sierra Leone