Unsay Nahitabo sa Tawhanong Kinaiya?

“Ngano mang kita may pagpamintas sa kabataan karong panahona? Ngano mang kita may pagpamintas sa kahayopan? Ngano mang kita may kabangisan? . . . Ngano mang ang mga tawo nagabatasan sa terorismo? Ngano mang ang mga tawo nagabatasan sa mga droga? . . . Ngano, sa dihang nabatonan nimo ang tanan, ang pila ka tawo moliso nganha nianang paninugdang mga butang nga magdaot sa tibuok nga sibilisasyon?”

KANANG mga pangutanaha gisuknang kusog sa primer ministro sa Britanya. Tingali ikaw nakasukna sa makadaghan sa susamang mga pangutana. Nakaplagan mo ba ang makapatagbawng mga tubag?

Sa pagbutang sa iyang mga pangutana sa tukmang kahimtang, ang primer ministro sa Britanya miingon: “Sa daghang katuigan sa bata pa ako ug diha sa politika uban sa tanan kong mga paglaom ug mga damgo ug mga ambisyon, mipatim-aw kanako ug sa daghan sa akong mga katalirongan nga kon mahidangat kita sa panahon diin kita may maayo nga kabalayan, maayo nga edukasyon, igoigong sukdanan sa pagpuyo, nan ang tanan mapahimutang ug kita magbaton sa makiangayaon ug labi pang haruhayng kaugmaon. Atong nasayran karon nga kana dili mao ang kahimtang. Atong giatubang ang tinuod nga mga problema sa tawhanong kinaiya.”—Italiko amoa.

Ang tawhanong kinaiya mabatbat ingong “ang sistema sa paninugdang mga gawi ug mga taras sa mga tawo.” Dayag, ang nagkasumpaking mga gawi ug mga taras makapahinabog mga problema sa personal, nasyonal, o bisan internasyonal nga lebel. Apan sa unsang gidak-on ang tawhanong kinaiya mapasanginlan gayod sa peligrosong mga uso karong adlawa sa kabangisan, terorismo, pagbaligyag droga, ug sa susama?

Ang tawhanong kinaiya mao ba lay kapasanginlan sa mga kahimtang nga peligrosong “magdaot sa tibuok nga sibilisasyon”? O may uban bang mga hinungdan nga angay natong tagdon nga mosaysay nganong ang mga tawo dali kaayong moliso ngadto sa daotan, mahakogong mga buhat sa dihang sila makatinguha man unta sa mas tag-as, mas hamiling mga pangagpas? Atong tan-awon.