Kinabuhi ug Ministeryo ni Jesus

Mga Paglimod Diha sa Hawanan sa Tugkaran

HUMAN nga gitalikdan si Jesus diha sa tanaman sa Getsemane ug mikalagiw sa kahadlok uban sa nahibiling mga apostoles, si Pedro ug Juan mihunong sa pagdagan. Tingali nakaapas sila kang Jesus sa dihang gidala siya sa balay ni Anas. Sa dihang gipadala siya ni Anas ngadto sa Labawng Saserdote nga si Caipas, si Pedro ug Juan minunot sa igoigong gilay-on, tingali natunga sa kahadlok alang sa ilang kaugalingong mga kinabuhi ug sa ilang lalom nga kabalaka sa mahitabo unya sa ilang Agalon.

Sa pag-abot sa dakong balay ni Caipas, nakasulod si Juan sa pultahan sa hawanan sa tugkaran, kay nakaila man kaniya ang labawng saserdote. Si Pedro, hinunoa, nagtindog didto sa gawas sa pultahan. Apan mibalik si Juan ug nakigsulti sa nagbantay sa pultahan, usa ka babayeng sulogoon, ug gipasulod si Pedro.

Sa pagkakaron tugnaw na kaayo, ug ang mga ulipon ug ang mga polis nanaghaling ug kalayo sa uling. Si Pedro miduyog kanila nga nagpadangdang sa kalayo samtang naghulat sa sangpotanan sa husay ni Jesus. Didto, nahayagan sa kalayo, ang nagbantay sa pultahan nga nagpasulod kang Pedro mitutok kaniya. “Ikaw, usab, kauban ni Jesus nga taga Galilea!” siya miingon.

Nahadlok nga mailhan, si Pedro milimod atubangan kanilang tanan nga wala gayod makaila kang Jesus. “Wala ako makaila kaniya ni nakasabot nianang imong giingon,” matud pa niya.

Niana, siya migawas duol sa agianan. Didto, laing babaye nakamatikod kaniya ug miingon usab ngadto sa nanagtindog didto: “Kining tawhana kauban ni Jesus nga Nazaretnon.” Sa makausa pa, gilimod kini ni Pedro, nanumpa nga nag-ingon: “Wala lagi ako makaila nianang tawhana!”

Si Pedro nagpabilin sa hawanan sa tugkaran, naningkamot nga dili-mailhan. Tingali niining yugtoa nakurat siya sa pagtugaok sa manok sa pagbanagbanag sa kabuntagon. Kasamtangan, nagpadayon ang husay ni Jesus, dayag gidumala diha sa bahin sa balay sa itaas sa hawanan sa tugkaran. Tingali si Pedro ug ang uban naghulat sa ubos sa pag-abot ug sa paggawas sa nagkalainlaing mga saksi nga gidala aron sa pagtestigo.

Usa na ka oras ang milabay sukad nga nailhan si Pedro nga kauban ni Jesus. Karon ang pipila niadtong nanagtindog miduol kaniya ug miingon: “Sa tinuoray ikaw kauban gayod nila, kay ang imong sinultihan nagapaila kanimo.” Ang usa sa maong pundok maoy paryente ni Malco, nga gipalongan ni Pedro ug dalunggan. “Dili ba ikaw kadto ang akong nakita didto sa tanaman uban kaniya?” siya miingon.

“Wala gayod ako makaila nianang tawhana!” kusganong miingon si Pedro. Gani, naningkamot siya sa pagpatuo kanila nga silang tanan nasayop pinaagi sa pagpamalikas ug sa pagpanumpa, nga sa ingon, nagpanghimaraot sa iyang kaugalingon kon siya wala magtug-an sa matuod.

Samtang gibungat pa ni Pedro ang iyang ikatulong paglimod, mitugaok ang manok. Sa maong gutlo, si Jesus, kinsa migula diha sa balkonahe sa itaas sa hawanan sa tugkaran, milingi ug gitan-aw siya. Dihadiha, nahinumdom si Pedro sa gisulti ni Jesus sa pila lang ka takna nga milabay diha sa itaas nga lawak: “Sa dili pa motugaok ang manok sa makaduha, igalimod mo ako sa makatulo.” Nadugmok tungod sa kabug-at sa iyang sala, migula si Pedro ug mihilak sa hilabihang kasakit.

Nganong nahitabo kini? Human nga masaligon kaayo sa iyang espirituwal nga kalig-on, nganong gilimod ni Pedro ang iyang Agalon tulo ka higayon nga sunodsunod? Si Pedro sa walay duhaduha wala makabantay sa mga kahimtang. Ang kamatuoran gituis, ug si Jesus gilarawan nga usa ka mabangis nga kriminal. Ang matarong gipatim-aw nga daotan, ang walay-sala gipatim-aw nga sad-an. Busa tungod sa pagpiit sa higayon, si Pedro nawad-an sa panimbang. Sa kalit ang iyang hustong pagbati sa pagkamaunongon natugaw. Sa iyang kaguol siya nahaugnok tungod sa kahadlok sa tawo. Hinaot nga dili kana mahitabo kanato! Mateo 26:57, 58, 69-75; Marcos 14:30, 53, 54, 66-72; Lucas 22:54-62; Juan 18:15-18, 25-27.

▪ Sa unsang paagi si Pedro ug Juan nakasulod sa pultahan sa hawanan sa tugkaran sa labawng saserdote?

▪ Samtang didto pa si Pedro ug Juan sa hawanan sa tugkaran, unsay nagakahitabo diha sa sulod sa balay?

▪ Pila ka higayon nga mitugaok ang manok, ug pila ka higayon nga gilimod ni Pedro nga nakaila kang Kristo?

▪ Unsay kahulogan nga si Pedro namalikas ug nanumpa?

▪ Unsay nagpahinabo kang Pedro sa paglimod nga siya nakaila kang Jesus?