Mag-uswag Ngadto sa Tumong!
Mga Pangunang Punto Gikan sa Filipos
MAOY tinguha ni apostol Pablo nga ang mga Kristohanon sa Filipos magpadayon sa pag-uswag ngadto sa tumong alang sa ganti sa kinabuhing dayon. Busa, siya misulat ngadto kanila sa mga 60 o 61 K.P., sa panahon sa iyang unang pagkabilanggo sa Roma. Ang iyang sulat gipadala ngadto sa usa ka kongregasyon nga iyang gitukod sa mga napulo ka tuig nga miagi sa Filipos, usa ka siyudad nga gitukod ni Filipe nga taga Macedonia (amahan ni Alejandro nga Bantogan). Sa sinugdanan sa unang siglo K.P., kini nahimong “pangunang siyudad sa distrito sa Macedonia,” nga karon bahin na sa amihanang Gresya ug habagatang Yugoslavia.—Buhat 16:11, 12.
Ang mga magtutuo nga taga Filipos mga kabos apan mahinatagon. Labaw sa makausa, sila nakapadalag mga hinabang sa mga panginahanglan ni Pablo. (Filipos 4:14-17) Apan ang iyang sulat labaw pa kay sa usa ka sulat lamang sa pagpasalamat. Kini usab naghatag ug pagdasig, nagpahayag ug gugma, ug nagtaganag tambag.
Dayag ang Kristohanong mga Hiyas
Gibuksan ang sulat ni Pablo uban ang ebidensiya sa iyang gugma alang sa mga magtutuo sa Filipos. (1:1-30) Iyang gipasalamatan si Jehova sa ilang amot sa pagpauswag sa maayong balita ug nag-ampo nga ang ilang gugma mouswag. Si Pablo nalipay nga ang iyang pagkabilanggo nagpahinabo kanila sa pagpakitag ‘dugang kadasig sa pagsulti sa pulong sa Diyos nga walay kahadlok.’ Maoy iyang tinguha nga mahiuban kang Kristo apan mibati nga siya makaalagad pa ngadto kanila. Buot usab ni Pablo nga sila magpadayon sa “dungang pagpaningkamot alang sa pagtuo sa maayong balita.”
Misunod ang tambag mahitungod sa tinamdan ug kagawian. (2:1-30) Ang mga taga Filipos gidasig nga magpakitag personal nga interes sa uban ug ipasundayag ang pagkamapainubsanon sama niana kang Kristo. Sila “nagasidlak ingon nga mga kahayag sa kalibotan” ug giagda nga huptang “hugot ang pulong sa kinabuhi.” Si Pablo nagtinguha sa pagpadala kang Timoteo ngadto kanila ug masaligon nga siya moabot sa dili madugay. Aron mapasaligan sila pag-usab bahin kang Epaprodito, nga grabe ug sakit, gipadala ni Pablo diha kanila kining maunongong alagad.
Padayon sa Pag-uswag Ngadto sa Tumong
Sunod gipakita sa apostol sa mga taga Filipos kon asa ibutang ang ilang pagsalig samtang sila manag-uswag ngadto sa tumong. (3:1-21) Kinahanglang ilang isalig kini diha kang Jesu-Kristo, dili diha sa unod o sa sirkunsisyon ingon sa gibuhat sa uban. Giisip ni Pablo ang iyang unodnong mga kalig-onan ingon nga biya tungod sa “labawng kabililhon sa kahibalo ni Kristo.” Ang apostol “nangagpas sa pagkab-ot sa tumong alang sa ganti nga mao ang langitnong pagkatinawag sa Diyos pinaagi ni Kristo Jesus” ug nagdasig sa mga taga Filipos nga magbaton ug samang tinamdan sa panghunahuna.
Ang pagpadapat sa panapos nga tambag ni Pablo makatabang sa mga taga Filipos sa paghupot sa tumong ug sa ganti diha sa unahan. (4:1-23) Iyang giagda sila sa pagtugyan sa ilang mga kabalaka ngadto sa Diyos diha sa pag-ampo ug pun-on ang ilang mga kaisipan sa maayong mga hunahuna. Gidayeg pag-usab sila ni Pablo tungod sa ilang pagkamahinatagon ug gitapos uban ang mga pangomosta ug ang panghinaot nga ang dili takos nga kalulot sa Ginoong Jesu-Kristo maanaa sa espiritu nga ilang gipakita.
Ang sulat ni Pablo ngadto sa mga taga Filipos nagapalambo sa pagkamahinatagon, gugma, ug pagkamapainubsanon. Kini nagadasig ug pagsalig diha kang Kristo ug kinasingkasing nga pag-ampo ngadto sa Diyos. Ug ang mga pulong ni Pablo tino nga makatabang sa mga Saksi ni Jehova nga magpadayon sa pag-uswag ngadto sa tumong alang sa ganti sa kinabuhing dayon.
[Kahon/Hulagway sa panid 25]
Ngadto sa Tumong: “Gikalimtan ang mga butang nga nangagi ug nagadasdas paingon sa anaa sa unahan,” misulat si Pablo, “ako nagapadayon sa pagkab-ot sa tumong alang sa ganti sa langitnong pagkatinawag sa Diyos pinaagi ni Kristo Jesus.” (Filipos 3:13, 14) Ang apostol nangusog sama sa usa ka tawo nga apil sa usa ka lumba. Siya wala mag-usik ug panahon ug kusog sa paglingi sa likod apan nagpadayon ngadto sa iyang tumong—sama sa usa ka magdadagan nga nangusog nga makaabot sa dag-anan. Alang kang Pablo ug sa ubang dinihogang mga Kristohanon, ang ganti mao ang langitnong kinabuhi pinaagi sa pagkabanhaw human matapos ang yutan-ong kurso sa pagkamatinumanon ngadto sa Diyos. Kon ang atong paglaom langitnon man o yutan-on, atong huptan ang atong pagkamaunongon kang Jehova ug magpadayon ngadto sa tumong ingong iyang mga Saksi.—2 Timoteo 4:7.