Ang Ipasabot sa mga Balita

Gidid-an sa Pagminyo

Gihubit sa usa ka Luteranong obispo ingong “usa ka tinagong problema sa mga kaliwatan,” ang seksuwal daotang paggawi sa klero sa kataposan ‘nadayag na.’ Apan, ang Los Angeles Times mitaho nga uban niana ang “makauulaw nga pagbutyag sa publiko ug sa gastosong mga kaso nga nagpuwersa sa pila ka mga simbahan sa pagkapurdoy.” Ang Times miingon nga ang mga ahente sa seguro nagsulting anaa pa sa korte ang kapin sa 2,000 ka mga kaso sa seksuwal nga pag-abuso nga naglangkit sa mga klero.

Himatikdan usab nga ang pipila sa labing grabe nga mga tiglapas maoy mga Romano Katolikong kaparian. Si A. W. Richard Sipe, usa ka sikoterapista ug kanhi usa ka monghe ni St. Benedict, mihimog mga interbiyu uban sa 1,000 ka mga pari ug ubang 500 ka mga lalake ug babaye, daghan sa naulahi miangkon nga nakigsekso uban sa mga membro sa kaklerohan. Ang Time nga magasin nagtaho nga iyang gibanabanang mga katunga sa 53,000 ka Romano Katolikong mga pari sa Tinipong Bansa nagalapas sa ilang panumpa sa selibasiya o pagkadili-minyo. Sumala kang Sipe, duolan sa 28 porsiento sa tanang mga pari ang adunay pakigrelasyon sa mga babaye, samtang, dugang pa, gikan sa 10 ngadto sa 13 porsiento nalangkit sa sekso uban sa hamtong na nga mga lalake, ug 6 porsiento nagatinguha sa pagpakigsekso sa kabataan, kasagaran batang mga lalake. Sobra sa 100 ka mga bayranay tungod sa sayop nga paggawi sa mga klero sulod sa nangaging unom ka tuig ang migasto sa Katolikong mga awtoridad tali sa 100 ka milyon ug 300 ka milyong dolyares.

Daghang mga tawo mibati nga ang labing daghan niining mga problemaha mawala kon ang mga pari tugotan lamang sa pagminyo. Ang pipila siguro matingala sa pagkahibalo nga ang Bibliya wala magdili sa Kristohanong mga ministro sa Diyos gikan sa pagminyo. Ang Katolikong Simbahan, hinunoa, nagdili sa mga pari sa pagminyo sukad pa sa ika-12 nga siglo. Makaiikag, sa dihang nagtumong sa dakong apostasiya gikan sa matuod nga pagsimba nga makasulod human sa kamatayon sa mga apostol, si Pablo misulat nga ang “pipila managpamiya gikan sa pagtuo, nagatagad sa malimbongon inspiradong mga sugilanon ug mga pagtulon-an sa mga demonyo, pinaagi sa pagminaut sa mga tawo nga nagpanghimakak, . . . nagadili sa pagminyo.”—1 Timoteo 4:1-3.

Nganong Sobrang Kapintas?

Ang Canada nakurat ug nalisang sa pagkahibalo nga ang 25-anyos nga si Marc Lepine mihimog tiningob nga pagpatay sa palibot sa Unibersidad sa Montreal. Sa hustong panimuot mipatay siya sa 14 ka babayeng estudyante sa pagkainhinyero, nagbilin sa 13 ka ubang mga estudyanteng samdan, apil sa 4 ka lalaki, una pa miposil sa iyang kaugalingon. Kadto maoy pinakagrabeng pagpatay sa kasaysayan sa nasod. Ang primero ministro mihubit sa walay hunahunang pagpatay ingong “usa ka tawhanong trahedya sa kinadak-ang mga proporsiyon.”

Sumala sa The Toronto Star, sa Tinipong Bansa, “dihay kapin sa 100 ka samang pagpatay sukad sa Gubat sa Kalibotan II ug kasagaran kanila mitungha sa nangaging duha ka dekada.” Apan, ingon sa masulob-ong gisukna sa amahan sa usa sa mga biktima ni Lepine: “Nganong adunay sobrang kapintasan sa kalibotan? Nganong ang mga tawo nagabuhat sa ingon niini ngadto sa usag usa?”

Tin-aw ang pagbatbat sa Bibliya sa pag-uswag sa kapintasan sa atong panahon. Si apostol Juan misulat: “Ang tibuok kalibotan anaa sa gahom sa daotan.” (1 Juan 5:19) Itandi sa hangin nga atong ginahanggab, ang usa ka daotang espiritu nga nagagikan kang Satanas, “ang daotang usa,” nagamando sa hunahuna, mga tinguha, ang mismong mga lihok sa daghang mga tawo. Uban sa iyang espiritu sa pagsupak, kahakog, ug garbo, siya “nagalimbong sa tibuok gipuy-ang yuta.” (Pinadayag 12:9) Ang tinuod nga mga magsisimba sa Diyos nahupay, hinunoa, sa pagkahibalo nga “ang kalibotan umalagi lamang ug ang pangibog niini, apan siya nga nagabuhat sa kabubut-on sa Diyos magapabilin sa walay kataposan.”—1 Juan 2:17.

Hain “ang Siyudad ni David”?

Kon mobisita ka sa Jerusalem, ug mangutana ka sa usa aron sa pagtultol kanimo sa Bukid sa Sion, malagmit gayod nga ikaw ihatod sa usa ka tagaytay o bungtod, nga milugway sa habagatan sa Karaang Siyudad. Sa sidlakan mao ang utlanan nga Walog sa Tyropoeon ug sa kasadpan mao ang Walog sa Hinnom, kini nga bungtod hiilhan tungod sa presensiya sa Simbahan sa Dormition, uban sa linginong atop niini.

Apan, ang mga mapa ug mga ilustrasyon nga gipatik sa Watch Tower Society nagbutang sa Bukid sa Sion diha sa usa ka gamayng bungtod sa sidlakan sa gitawag karon nga Bukid sa Sion. Kini nga bungtod nabulag gikan sa kaamgid niini sa kasadpan nga Walog sa Tyropoeon ug sa sidlakan nga utlanang Walog sa Kidron.

Hain niining duha ka lokasyon ang nagtimaan sa dapit sa orihinal nga Bukid sa Sion? Ang magasing Biblical Archaelogy Review (Mayo/Hunyo 1990) miuyon nga “ang sidlakang tagaytay, o bungtod, mao ang orihinal nga Bukid sa Sion, . . . diin nasikop ni Haring David gikan sa mga Jebusehanon.” Human sa pagkapukan niini, kining Jebusehanong salipdanan, nailhan ingong “ang Siyudad ni David,” nga gitawag usab ug “Sion.” (2 Samuel 5:7) Ang Biblical Archaelogy Review miingon nga “ang mga arkeologo determinado, walay pagduhaduha, nga kining hiktin nga hanayhay,” nga kasagarang nagtumong ngadto sa sidlakang bungtod, mao ang Bukid sa Sion sa Bibliya diin giestablisar ni David ang administratibo ug relihiyosong hedkuwarter alang sa nasod sa Israel.—2 Samuel 6:11, 12, 17.