Napuliki Pag-ayo sa Maayong Balita
SI APOSTOL Pablo diha sa usa ka kahimtang nga nasayran sa mga Saksi ni Jehova nga bug-os-panahong mga ministro—siya kulang sa panalapi. Busa sa Corinto siya mitrabaho sa pinobreng pangita sa pagpamuhat ug tolda nga iyang nakat-onan sa batan-on pa. Ang trabaho maoy malisod, ug usahay ang iyang kamot masamad gikan sa paggunit sa hait nga panapton sa tolda. Ang kinitaan igo lang nakatagana sa iyang pagkaon ug biste, apan siya matagbawon, kay sa diha nga ang iyang sekular nga buluhaton mahuman sa matag adlaw, iyang ibutang ang mga himan sa iyang pangita ug iyang himoon ang iyang tuyo sa Corinto sa unang bahin—siya magsangyaw sa maayong balita!—Filipos 4:11, 12.
Sa mga adlawng Igpapahulay, si Pablo moadto sa sinagoga. Tinuod, si Pablo sa sinugdan miatubang sa iyang Corintohanong mamiminaw “sa kahuyang ug sa kahadlok ug uban ang mga pagkurog.” (1 Corinto 2:1, 3) Apan kay naaghat sa pagsanong sa pipila sa iyang mensahe, si Pablo mipadayon sa “paghatag ug pakigpulong sa sinagoga sa matag adlawng igpapahulay ug nakadani sa mga Hudiyo ug mga Grego.”—Buhat 18:1-4.
Hinuon, sa makadiyut si Pablo nakahimo lamang sa pagsangyaw nga dili bug-os. Dayon miabot si Silas ug Timoteo gikan sa Macedonia uban ang daghang amot nga ‘bug-os nga nakatagana sa iyang panginahanglan.’ (2 Corinto 11:9; Filipos 4:15) Makapalipay, usab, mao ang balita nga ang mga igsoon sa Tesalonica nagbarog nga malig-on bisan pa sa paglutos.—1 Tesalonica 3:6.
Ang epekto niini kang Pablo? “Si Pablo napuliki pag-ayo sa pulong [“naggahin sa tanan niyang panahon sa pagsangyaw,” The Jerusalem Bible; Today’s English Version], nga nagsangyaw ngadto sa mga Hudiyo sa pagpamatuod nga si Jesus mao ang Kristo.” (Buhat 18:5) Kay wala nay pinansiyal nga kapit-os sa makadiyut, si Pablo wala makapuyo hangtod nga siya nakabalik sa bug-os panahon nga pagsangyaw. Siya mibalik sa iyang buluhaton uban ang kadasig, dili lamang sa pagsangyaw ngadto sa mga Hudiyo apan bisan sa paggahin ug panahon sa pagsulat sa una sa iyang inspiradong mga sulat—ang sulat ngadto sa mga taga-Tesalonica!
Usa ka Sumbanan Kanato Karong Adlawa
Ang talaan sa madasigong buluhaton ni Pablo sa Corinto gitipigan aron sa pagdasig sa tanang mga Kristohanon nga mahimong puliki pag-ayo sa maayong balita. Si Pablo nakaamgo nga ang Ginoong Jesus mismo ang nagpasa ngadto sa iyang mga tinun-an sa dakong dungog nga mahimong “kahayag sa kalibotan.” Dili nila tagoan kining maong kahayag. Si Jesus miingon kanila: “Ipasidlak ninyo ang inyong kahayag atubangan sa mga tawo, aron ilang makita ang inyong maayong mga binuhatan ug makahatag ug himaya sa inyong Amahan nga anaa sa mga langit.” (Mateo 5:14-16) Kini nagkahulogan sa pagbaton ug bug-os nga pakig-ambit sa pagsangyawng buluhaton nga gitagna ni Jesus. (Mateo 24:14; 28:19, 20; Buhat 1:6-8) Ang pagsangyaw sa maayong balita niining Ginghariana mao ang pangunang katarongan sa paglungtad sa Kristohanong kongregasyon.
Ang sayong mga Kristohanon, sama kang Pablo, nagtuman niining pagsangyaw nga buluhaton nga tininuod. Busa, sa dihang ang mga kaaway sa Diyos naghunahuna nga sila nakapalong sa matuod nga kahayag pinaagi sa mabangisong pagpatay “sa Pangulong Ahente sa kinabuhi,” ang iyang mga sumusunod nagpadayon sa pagkahimong kahayag sa kalibotan, nga nagsangyaw nga madasigon. (Buhat 3:15) Bisan ang paglutos wala makapugong sa ilang mga paningkamot. Ang talaan sa Bibliya nag-ingon: “Sa matag adlaw sa templo ug sa balay ug balay sila nagpadayon nga walay hunong sa pagtudlo ug pagmantala sa maayong balita mahitungod kang Kristo, si Jesus.” (Buhat 5:42) Walay makapugong kanila!
Sa modernong panahon, ang mga Kristohanon sa susama napuliki pag-ayo sa pagsangyawng kalihokan. Sa hinapos sa ika-19ng siglo, ang mga makugihong estudyante sa Pulong sa Diyos misugod sa pagkasabot sa panginahanglan sa pagpaambit sa mga kamatuoran sa Bibliya sa uban. Ang Zion’s Watch Tower Tract Society—usa ka organisasyon nga nahimong internasyonal sa gilapdon—nahimong legal nga korporasyon sa 1884. Kining mga Estudyante sa Bibliya, nga nailhan nga mga Saksi ni Jehova sukad sa 1931, sa literal nagpuno sa yuta sa kahibalo sa Pulong sa Diyos. Ang ilang bug-os nga kalihokan miresulta sa usa ka dakong panon nga kapin sa upat ka milyon nga mga lig-on! Ug walay duhaduha ang ilang gidaghanon magapadayon sa pag-uswag ilalom sa pagtultol ni Jehova.—Isaias 60:22.
Ikaw ba Nagabuhat sa Imong Bahin?
Si Jesus miingon: “Ang alanihon dako, apan diyutay ra ang mga mamumuo.” (Mateo 9:37, 38) Sa 1990 halos napulo ka milyong mga tawo ang mitambong sa Memoryal sa kamatayon ni Kristo. Pagkakatingalahan ang purohan sa pag-uswag sa alanihon sa tibuok nga kalibotan! Apan samtang nagakalipay niining nagapadayong pag-uswag, ang matag usa kinahanglan mangutana sa iyang kaugalingon, ‘Ngadto sa unsang gidak-on nga ako nakig-ambit niining dakong buluhaton? Gihimo ko ba kini nga regular kaayo—kon mahimo matag semana?’
Ang mga ansiano kinahanglan manguna niining buluhatona ingon nga “mga panig-ingnan sa panon.” (1 Pedro 5:3) Tinuod, kadaghanan sa mga ansiano adunay sekular nga mga trabaho. Mao usab si apostol Pablo samtang didto sa Corinto. Bisan pa niana, siya naggahin ug panahon alang sa regular nga pagsangyaw nga kalihokan. Daghang mga ansiano karong adlawa sa susama napuliki pag-ayo sa espirituwal nga mga kalihokan sa hinapos sa mga semana. Kini adunay gamhanan ug makadasig nga epekto sa tanan diha sa kongregasyon. Sa pipila ka mga bulan sa dihang himoon ang espesyal nga panlimbasog, sa daghang kongregasyon ang kadaghanan sa ilang mga magmamantala anaa sa payunir nga pag-alagad. Ang sekreto? Ang mga ansiano nanguna sa pagsangyaw ug sa pag-organisar sa mga kahikayan sa pag-alagad sa kanataran.
Ang mga ministeryal nga alagad sa susama mahimong maayong impluwensiya sa kongregasyon kon sila regular nga nakig-ambit sa pag-alagad sa kanataran. Hinumdomi, ang Kasulatan nagsugo nga sila “mahimong ugdang, . . . mga lalaki nga mag-alagad sa maayong paagi.” (1 Timoteo 3:8, 13) Ang pagkamatinumanon sa pag-alagad sa kanataran maoy kinahanglanon aron ang usa ka igsoong lalaki mahimong takos nga ansiano o ministeryal nga alagad.—Tito 1:8, 9.
Sama kang Pablo, ang pipila makaarang sa pagkunhod sa ilang sekular nga trabaho ug busa makapayunir. Ang gidaghanon sa mga regular, katabang, ug espesyal nga mga payunir miuswag gikan sa 137,861 sa napulo ka tuig nga miagi ngadto sa 536,508 sa 1990. Sa pagkamatuod, ang panalangin lamang ug pag-uyon ni Jehova ang makapatungha niini. Hinuon, ang mga payunir kinahanglan mogamit sa panahon nga maalamon, dili lang mosangyaw sa daghang oras aron may ikataho. Mga payunir, kamo ba maayong pagkaandam ug epektibo sa ministeryo? Kamo ba nanlimbasog sa paghimo ug mapadayonong kauswagan aron ang inyong ministeryo sa pagkatinuod mabungahon?
Mga Ganti sa Balanseng Ministeryo
Ikaw ba nagpabili sa nagahatag-kinabuhi nga impormasyon nga gipresentar matag bulan diha sa Ang Bantayanang Torre ug sa iyang kauban, ang Pagmata!? Sa walay duhaduha ikaw nagahimo niana. Ang imo bang pagpabili nagatukmod kanimo sa pagpakig-ambit sa pagpanagtag niining mga magasina? Usa ka igsoong babaye sa Botswana naghimo niini. Kanhi siya nagsupak sa kamatuoran, apan ang iyang bana nagbasa kaniya gikan sa mga magasin. Sa wala madugay siya adunay kausaban sa kasingkasing ug nahimong usa ka Saksi. Bisan pa dili makabasa, siya malamposon kaayo sa pagpahaluna ug mga magasin, nga magaingon, “Ako dili mahibalong mobasa, apan ang akong bana magbasa niining mga magasin kanako. Ako nalingaw kanila, ug ako segurado nga ikaw usab malingaw.”
Nganong dili makig-ambit nga senemana niining makaluwas-ug-kinabuhi nga buluhaton? Sa dihang ikaw aduna nay espirituwal nga kuwalipikasyon, ang Kristohanong kongregasyon malipay sa pagtabang kanimo sa pagsugod. Hinuon, ang pagpahaluna ug mga magasin usa lang ka bahin sa pag-alagad. Si bisan kinsa nga napuliki pag-ayo sa maayong balita manlimbasog sa pagbaton ug balanseng ministeryo. Pananglitan, ang Watch Tower Society nagpatik ug mga libro sa mga minilyon, ug kini gitanyag sa publiko ingon nga mas permanenteng tinubdan sa maayong espirituwal nga pagkaon. Ikaw ba hanas na sa imong ministeryo sa pagpahaluna ug mga libro, sama sa Ikaw Mabuhing Walay Kataposan sa Paraiso sa Yuta?
Apan unsa na man sa mga tawo nga nagpakita ug interes? Ikaw ba naghupot ug maayong mga rekord aron sa paghimo ug mga balik-duaw kanila? Kanang mga duaw mahimong motultol sa bahin sa pag-alagad nga mohatag ug labing dakong kalipay—ang pagtuon sa Bibliya sa balay nga buluhaton. Hinumdomi, si Jesus nagsugo kanato sa Mateo 28:19, 20 sa ‘paghimo ug tinun-an, nga magbawtismo kanila.’ Kana nagkahulogan sa pagtuon sa Bibliya uban kanila. Tinuod, ang pagsugod ug usa ka pagtuon nagkinahanglan ug pagkamalahutayon. Usa ka Saksi nakahibalag ug usa ka tigulangon na nga magtiayon nga kinasingkasing miuyon sa usa ka pagtuon sa Bibliya sa balay. Apan ilang gioktaba ang pagtuon sagunson sa tulo ka semana. Sa kadugayan ang pagtuon nasugdan. Unya, sa makadiyut, ang magtiayon nagkanselar sa pagtuon halos sa matag laing semana. Apan, sa kataposan, ang asawa miuswag hangtod sa punto sa bawtismo. “Human mabawtismohi,” ang igsoon nahinumdom, “ang iyang mga mata napuno sa mga luha sa kalipay, nga nagpatungha ug mga luha sa kalipay sa akong asawa ug kanako.” Oo, ang pagkapuliki pag-ayo sa maayong balita magpatungha ug dili-ikahubit nga kalipay!
Himoa ang Imong Kaugalingon nga Andam!
Si Jesu-Kristo ug si apostol Pablo nagbutang ug maayong mga sumbanan sa debosyon aron atong pagasundogon. Ug kita adunay daghang talagsaong mga panig-ingnan taliwala sa mga Saksi ni Jehova sa modernong panahon. Ang panahon angay na nga ang tanan nga nahibalo sa maayong balita mahimong bug-os aktibo sa pagpahibalo niini sa uban. Ang Bibliya nagpasalig kanato nga ang tanan nianang mga paghago “dili makawang.”—1 Corinto 15:58.
Sama kang Pablo, ang kadaghanan adunay pinansiyal nga obligasyon nga sagubangon. Tungod niini, daghan dili makaarang sa pagpayunir. Apan uban sa tabang ni Jehova, ang tanan makasunod sa maayong tambag nga gihatag sa Roma 12:11: “Ayaw kamo paglangaylangay sa inyong buluhaton. Magmainiton kamo sa espiritu. Alagara ninyo si Jehova.” Ug kon ang sirkumstansiya mausab nga motugot ug daghan pang panahon nga magugol sa pag-alagad kang Jehova, si bisan kinsa nga tinuod nahigugma kang Jehova, sama kang Pablo, mopahimulos sa kahigayonan. Magmapuliki pag-ayo sa maayong balita! Ang pagbuhat sa ingon dili lamang magpatungha ug mga panalangin karon apan sa umaabot moresulta sa walay-kataposang kinabuhi uban ang walay-kataposang kasadya ug kalipay!—Mateo 19:28, 29.