Pahimut-i si Jehova Pinaagi sa Pagpakitag Kalulot
“Unsa ba ang gipangayo ni Jehova kanimo kondili ang pagbuhat sa matarong ug ang paghigugma sa kalulot ug ang paglakaw nga makasaranganon uban sa imong Diyos?”—MIQUEAS 6:8.
1. Nganong dili kita mahibulong nga nagapaabot si Jehova sa iyang katawhan nga magpakitag kalulot?
SI Jehova nagapaabot nga magpakitag kalulot ang iyang katawhan. Kini dili angay makapahibulong kanato. Ang Diyos mismo maluloton sa tanan, bisan sa dili-mapasalamaton daotang mga tawo. Niining bahina gisultihan ni Jesu-Kristo ang iyang mga disipulo: “Padayon kamo sa paghigugma sa inyong mga kaaway ug buhati silag maayo ug pahulama sila nga walay tubo, nga dili magapaabot ug bisan unsa gikan kanila; ug dako unya ang inyong balos, ug kamo mahimong mga anak sa Labing Hataas, tungod kay siya maluloton bisan sa mga tawong dili-mapasalamaton ug daotan. Padayon sa pagkamaluloton, maingon nga maluloton ang inyong Amahan.”—Lucas 6:35, 36.
2. Unsang mga pangutana mahitungod sa kalulot ang atong hatagag pagtagad?
2 Sama sa gipahayag sa Miqueas 6:8, kadtong nagalakaw uban sa Diyos kinahanglang ‘mahigugma sa kalulot.’ Tataw, mahimuot si Jehova kon ang iyang mga alagad mahigugma sa kalulot ug magpasundayag niana sa kinasingkasing nga paagi. Apan unsa ang kalulot? Unsay mga kaayohang mosangpot sa pagpasundayag niana? Ug sa unsang paagi kining hiyasa mapasundayag?
Kon Unsa ang Kalulot
3. Sa unsang paagi imong mahubit ang kalulot?
3 Ang kalulot mao ang hiyas sa pagkuhag aktibong kaikag sa uban. Kini mapasundayag pinaagi sa matinabangong mga buhat ug mahunahunaong mga pulong. Ang pagkahimong maluloton nagkahulogan sa paghimog maayo inay maghimog daotan. Ang usa ka tawong maluloton mahigalaon, malumo, mabination, ug mapuanguron. Siya may mahinatagon, mahunahunaong tinamdan sa uban. Ug ang kalulot maoy bahin sa gambalay sa tanang matuod mahulagwayong besti sa Kristohanon, kay si Pablo nag-awhag: “Isul-ob ninyo ang malumong pagbati sa kahangawa, kalulot, pagpaubos sa hunahuna, kalumo, ug hataas-nga-pailob.”—Colosas 3:12.
4. Sa unsang paagi nanguna si Jehova sa pagpakitag kalulot sa katawhan?
4 Si Jehova nanguna sa pagpakitag kalulot. Sama sa gipamulong ni apostol Pablo, nga “sa dihang gipadayag sa Diyos, nga atong Manluluwas, ang kalulot ug ang gugma alang sa tawo,” nga “tungod sa iyang kaluoy kita iyang giluwas pinaagi sa kaligo nga nagadala kanato ngadto sa kinabuhi ug sa pagbag-o kanato pinaagi sa balaang espiritu.” (Tito 3:4, 5) Ang Diyos naghugas, o ‘nagdigo,’ sa dinihogang mga Kristohanon pinaagi sa dugo ni Jesus, nga nagpadapat sa bili sa halad lukat ni Kristo alang kanila. Sila gibag-o usab pinaagi sa balaang espiritu, nahimong “usa ka bag-ong binuhat” ingong gianak-sa-espiritu nga mga anak sa Diyos. (2 Corinto 5:17) Siyempre, ang kalulot sa Diyos ug ang gugma alang sa tawo ginapaabot usab ngadto sa internasyonal nga “dakong panon,” kinsa “nagalaba ug nagapaputi sa ilang mga besti pinaagi sa dugo sa Kordero.” (Pinadayag 7:9, 14; 1 Juan 2:1, 2) Dugang pa, ang mga dinihogan ug ang dakong panon, nga adunay yutan-ong paglaom, ngatanan ilalom sa “malulot” nga yugo ni Jesus.—Mateo 11:30.
5. Nganong atong madahom nga kadtong gitultolan sa espiritu sa Diyos magpakitag kalulot sa uban?
5 Ang kalulot maoy bahin usab sa bunga sa espiritu sa Diyos, o aktibong gahom. Si Pablo miingon: “Ang bunga sa espiritu mao ang gugma, kalipay, kalinaw, hataas-nga-pailob, kalulot, pagkamaayo, pagtuo, kaaghop, pagpugong sa kaugalingon. Sa maong mga butang walay kasugoan nga kabatok.” (Galacia 5:22, 23) Busa, unsay atong malaoman niadtong gitultolan sa espiritu sa Diyos? Siyempre, sila magpakitag kalulot sa uban.
6. Ang kalulot mopahinabo sa mga ansiano ug sa ubang mga Kristohanon sa paglihok sa unsang paagi?
6 Ang kalulot mapasundayag sa daghang paagi. Atong mapasundayag ang kalulot kon kita maluloy-on. Pananglitan, ang Kristohanong mga ansiano maluloton kon magpakita silag kalulot sa usa ka mahinulsolong mamumuhat ug daotan ug nagapaningkamot sa pagtabang kaniya sa espirituwal. Ang hinatag-sa-Diyos nga hiyas sa kalulot mopahimo sa mga magtatan-aw nga mapailobon, mahunahunaon, mahangawaon, ug malumo. Kini mopalihok kanila sa “pagtagad sa panon uban ang kalumo.” (Buhat 20:28, 29) Sa pagkamatuod, ang bunga sa espiritu nga kalulot angay mopahimo sa tanang mga Kristohanon nga maluloy-on, mapailobon, mahunahunaon, mahangawaon, mahigalaon, ug maabiabihon.
Likayi ang Sayop nga Kalulot
7. Nganong imong ikaingon nga ang sayop nga kalulot maoy usa ka kahuyangon?
7 Lantawon sa ubang tawo ang kalulot ingong kahuyangon. Sila nagtuo nga ang usa ka tawo kinahanglang magmatig-a, walay batasan usahay, aron dayegon sa uban ang iyang kusog. Apan ginaingon nga ang “pagkawalay batasan maoy usa ka mahuyang nga pagsundog sa tawo sa kusog.” Gani, nagkinahanglag tinuod nga kusog ang pagkahimong tinuod nga maluloton ug ang paglikay sa sayop nga kalulot. Ang kalulot nga bunga sa espiritu sa Diyos dili maoy usa ka mahuyang, mapalingpaling nga tinamdan sa daotang buhat. Hinunoa, ang sayop nga kalulot maoy usa ka kahuyangon nga mopahimo sa tawo sa pagpalabay sa daotang buhat.
8. (a) Maylabot sa iyang mga anak, sa unsang paagi si Eli dili-higpit sa pagdisiplina? (b) Nganong angay magbantay ang mga ansiano aron sila dili madaog sa sayop nga kalulot?
8 Ang hataas nga saserdote sa Israel nga si Eli dili-higpit sa pagdisiplina sa iyang mga anak nga lalaki, si Hopni ug si Pinehas, nga nangatungdanan ingong mga saserdote diha sa tabernakulo. Wala matagbaw sa bahin sa usa ka halad nga maoy ilang pahat sumala sa Kasugoan sa Diyos, nagpasugo silag ulipon nga mangayog karne gikan sa usa ka tighalad sa dili pa sunogon ang tambok diha sa halaran. Ang mga anak nga lalaki ni Eli nakighilawas usab sa mga babaye nga nag-alagad sa ganghaan sa tabernakulo. Inay palagpoton si Hopni ug Pinehas gikan sa katungdanan, gibadlong lamag diyutay sila ni Eli, labaw nga gipasidunggan hinoon niya ang iyang mga anak kay sa Diyos. (1 Samuel 2:12-29) Dili ikahibulong nga ang “pulong ni Jehova kulang niadtong mga adlawa”! (1 Samuel 3:1) Busa ang Kristohanong mga ansiano angay nga dili magpadaog sa bakak nga pangatarongan o sa pagpakitag sayop nga kalulot nga makadaot sa espirituwalidad sa kongregasyon. Ang tinuod nga kalulot dili buta sa daotang mga pulong ug buhat nga nagalapas sa mga sukdanan sa Diyos.
9. (a) Unsang tinamdan ang makatabang kanato aron dili madaog sa sayop nga kalulot? (b) Sa unsang paagi si Jesus nagpakitag kusog sa pag-atiman sa apostatang mga relihiyonista?
9 Aron atong malikayan ang pagpakitag sayop nga kalulot, angay nga moampo kita sa tabang sa Diyos nga kita hatagan ug kusog sama sa makita diha sa mga pulong sa salmista: “Pahilayo kamo gikan kanako, kamong mga mamumuhat ug daotan, aron nga magabantay ako sa mga sugo sa akong Diyos.” (Salmo 119:115) Kita usab kinahanglang mosunod sa panig-ingnan ni Jesu-Kristo, si kinsa dili sad-an sa pagpakitag sayop nga kalulot. Sa pagkamatuod, si Jesus mao ang sulondan mismo sa tinuod nga kalulot. Pananglitan, ‘naluoy siya sa mga tawo tungod kay sila gipanitan ug nagkatibulaag sama sa mga karnero nga walay magbalantay.’ Busa, ang mga tawong matinud-anon ug kasingkasing wala magpanuko sa pagduol kang Jesus, gidala pa gani nila ang ilang mga anak ngadto kaniya. Ug handurawa lang ang kalulot ug kaluoy nga iyang gipakita sa dihang “iyang gikugos ang mga bata ug gipanalanginan sila”! (Mateo 9:36; Marcos 10:13-16) Bisag malulot si Jesus, siya malig-on alang sa matarong diha sa panan-aw sa iyang langitnong Amahan. Dili gayod ipalabay ni Jesus ang daotan; iyang nabatonan ang hinatag sa Diyos nga kusog sa pagsaway sa maot nga mga pangulo sa relihiyon. Diha sa Mateo 23:13-26, daghang higayong iyang gisobli ang pahayag: “Alaot kamong mga eskriba ug mga Pariseo, mga maot!” Sa matag higayon, naghatag si Jesus ug katarongan sa paghukom sa Diyos.
Kalulot Gilangkit sa Gugma
10. Sa unsang paagi ang mga disipulo ni Jesus nagpakitag kalulot ug gugma sa isigkamagtutuo?
10 Mahitungod sa iyang mga sumusunod, si Jesus miingon: “Pinaagi niini ang tanan makaila nga kamo akong mga tinun-an, kon kamo adunay gugma sa usa ug usa.” (Juan 13:35) Ug unsa ang usa ka bahin sa gugma nga nagpaila sa tinuod nga mga disipulo ni Jesus? Si Pablo miingon: “Ang gugma hataas-ug-pailob ug maluloton.” (1 Corinto 13:4) Ang pagbatog hataas-nga-pailob ug kalulot nagkahulogan nga atong antoson ang mga pagkadili-hingpit ug mga kapakyasan sa uban, sama sa malulotong ginahimo ni Jehova. (Salmo 103:10-14; Roma 2:4; 2 Pedro 3:9, 15) Ang Kristohanong gugma ug kalulot mapadayag kon mahimutang sa kalisod ang kaubang mga magtutuo sa ubang bahin sa yuta. Nagasanong labaw kay sa “tawhanong kalulot,” ang mga Kristohanon sa ubang dapit mopakitag inigsoong gugma pinaagi sa paghatag ug materyal nga mga butang sa pagtabang sa maong mga magsisimba ni Jehova.—Buhat 28:2.
11. Sa espirituwal nga pagkasulti, unsa ang mahigugmaong-kalulot?
11 Ang kalulot gilangkit sa gugma diha sa pulong “mahigugmaong-kalulot,” nga kasagarang gigamit diha sa Kasulatan. Kini nga kalulot nagagikan sa maunongong gugma. Ang Hebreohanong nombre nga gihubad “mahigugmaong-kalulot” (cheʹsedh) nag-apil ug labaw pa kay sa malumong pagtamod. Kini maoy kalulot nga mahigugmaong motapot sa usa ka butang hangtod nga ang katuyoan maylabot niana matuman. Ang mahigugmaong-kalulot ni Jehova, o maunongong gugma, ginapasundayag sa nagkalainlaing paagi. Pananglitan, kini ginapakita diha sa iyang mga buhat sa pagluwas ug pagpanalipod.—Salmo 6:4; 40:11; 143:12.
12. Kon ang mga alagad ni Jehova mag-ampo ug panabang o kaluwasan, sa
12 Dili ikatingala nga ang mahigugmaong-kalulot ni Jehova nakapadani sa mga tawo ngadto kaniya! (Jeremias 31:3) Sa dihang ang matinumanong mga alagad sa Diyos nagkinahanglag kaluwasan o tabang, sila nahibalo nga ang iyang mahigugmaong-kalulot sa pagkamatuod maoy maunongong gugma, nga dili gayod mopakyas kanila. Busa, sila makaampo diha sa pagtuo, sama sa gihimo sa salmista si kinsa miingon: “Sa imong mahigugmaong-kalulot misalig ako; ang akong kasingkasing magakalipay sa imong kaluwasan.” (Salmo 13:5) Sanglit ang gugma sa Diyos maunongon, ang iyang mga alagad dili mosalig sa iyang mahigugmaong kalulot sa kakawangan. Kon sila moampo aron sa pagpangayog tabang o kaluwasan, sila aduna niini nga pasalig: “Dili isalikway ni Jehova ang iyang katawhan, ni biyaan niya ang iyang panulondon.”—Salmo 94:14.
Mga Ganti sa Kalulot
13, 14. Nganong ang usa ka tawong maluloton adunay maunongong mga higala?
13 Sa pagsundog kang Jehova, ang iyang mga alagad “magpakitag mahigugmaong-kalulot ug kaluoy sa usa ug usa.” (Zacarias 7:9; Efeso 5:1) “Ang hiligugmaon diha sa usa ka tawo mao ang iyang mahigugmaong-kalulot,” ug ang usa ka tawo nga nagapakita niini nga hiyas magaani ug tugob nga mga balos. (Proverbio 19:22) Unsa ang pila niini?
14 Ang kalulot mopahimo kanatong mataktikanhon ug busa motabang kanato sa paghupot ug maayong relasyon sa uban. Ang usa ka tawong mataktikanhon mosulti ug mobuhat ug mga butang o magadumala sa malisod nga mga kahimtang diha sa mahunahunaon ug sa dili-makasilo nga mga paagi. Samtang ang “tawong mapintas” mag-antos sa pagkahimong inayran, ang “tawong may mahigugmaong-kalulot nagabuhat ug maayo sa iyang kaugalingong kalag.” (Proverbio 11:17) Likayan sa mga tawo ang tawong mapintas apan madani sila sa usa ka tawo nga nagapakita kanilag mahigugmaong-kalulot. Busa, ang usa ka malulot nga indibiduwal adunay mga higalang maunongon.—Proverbio 18:24.
15. Unsang epekto sa kalulot ang mosangpot diha sa usa ka panimalay nga nabahin sa relihiyon?
15 Ang usa ka Kristohanong asawa nga adunay dili-magtutuong bana makadani kaniya sa kamatuoran sa Diyos pinaagi sa mga hiyas sama sa kalulot. Sa wala pa siya makakat-on sa kamatuoran ug nagasul-ob sa “bag-ong pagkatawo nga sa tinuod nga pagkamatarong ug pagkamaunongon gibuhat sumala sa kabubut-on sa Diyos,” siya tingali niadto dili-maluloton, o kaha palaaway. (Efeso 4:24) Kon ang iyang bana may nahibaloang mga sanglitanan, hayan mouyon siya nga “ang pakiglalis sa usa ka asawa sama sa usa ka atop nga nagtulo nga makabugaw sa bana” ug “mas maayo pang magpuyo sa kamingawan kay sa makig-ipon sa usa ka palaaway ug masuk-anon nga asawa.” (Proverbio 19:13; 21:19) Apan karon ang putling batasan ug halalom nga pagtahod sa usa ka Kristohanong asawa, uban sa mga hiyas sama sa kalulot, hayan makatabang kaniya sa pagdani sa iyang kapikas ngadto sa matuod nga pagtuo. (1 Pedro 3:1, 2) Oo, kini mahimong usa ka balos sa iyang kalulot.
16. Sa unsang paagi makabaton kitag kaayohan sa kalulot nga gipakita kanato?
16 Ang kalulot nga ipakita kanato tingali mohatag kaayohan pinaagi sa paghimo kanato nga labi pang maluloy-on ug mapinasayloon. Pananglitan, kon nagkinahanglan kita ug espirituwal nga tabang ug gitagad kita sa malulot ug malumong paagi, dili ba mopahimo kana kanato sa pakiglabot sa uban sa samang paagi? Aw, ang malulot ug malumong pagtagad maoy malaoman gikan sa may katakos sa espirituwal nga mga lalaki kay si Pablo misulat: “Mga igsoon, kon ang usa ka tawo mahiligas ngadto sa kalapasan nga wala makaamgo niana, kamong may espirituwal nga mga katakos maoy magpahiuli kaniya uban sa espiritu sa kalumo, samtang inyong pagabantayan ang inyong kaugalingon, kay basin kamo matintal usab.” (Galacia 6:1) Ang tinudlong mga ansiano mosulti nga malumo ug maluloton kon sila nagatinguha sa pagtabang sa nakasala nga kaubang mga magtutuo. Apan, kon nakadawat man kita o wala sa maong tabang, unsay gipaabot sa Diyos sa tanan nga nagaalagad kaniya? Ang tanang mga Kristohanon angay magpakitag kalulot sa uban ug angay mamati sa tambag ni Pablo: “Magmaluloton kamo sa usa ug usa, magmangahawaon, dagayang magpinasayloay sa usa ug usa, maingon nga kamo gipasaylo sa Diyos pinaagi kang Kristo.” (Efeso 4:32) Siyempre, kon kita gipasaylo sa usa ka tawo o natabangan kita gikan sa espirituwal nga suliran sa usa ka paagi, kini angay mopauswag sa atong katakos sa pagpasaylo, sa pagkamahangawaon, ug kalulot.
Pabilhi ang Dili-Takos nga Kalulot sa Diyos
17. Sanglit mga makasasala man kita sukad sa pagkatawo, unsa nga kalulot nga kita angay magmapasalamaton?
17 Sanglit kitang tanan nangatawo man nga mga makasasala nga hinukman sa kamatayon, adunay kalulot nga ilabinang angay kitang magmapasalamaton. Kini mao ang dili-takos nga kalulot ni Jehova. Aron ang mga makasasala makagawas gikan sa pagkahinukman sa kamatayon ug aron mapahayag nga matarong maoy usa na ka kalulot nga bug-os dili-takos. Si Pablo, si kinsa naghisgot sa dili-takos nga kalulot sa Diyos nga 90 ka higayon diha sa iyang 14 ka dinasig nga mga sulat, miingon sa mga Kristohanon sa karaang Roma: “Ang tanan nakasala ug nakabsan sa himaya sa Diyos, ug ingon nga gasa sila gipahayag nga matarong pinasikad sa iyang dili-takos nga kalulot pinaagi sa lukat nga gibayad ni Jesu-Kristo.” (Roma 3:23, 24) Angay gayod nga atong pabilhan ang dili-takos nga kalulot nga gipakita ni Jehova nga Diyos!
18, 19. Sa unsang paagi atong malikayan nga makawang ang katuyoan sa dili-takos nga kalulot sa Diyos?
18 Pinaagi sa pagkadili-mapabilhon, mahimo nga atong makawang ang dili-takos nga kalulot sa Diyos. Niining bahina, si Pablo miingon: “Busa kita maoy mga tinugyanan nga kapuli ni Kristo, ug sama ra nga ang Diyos gayod ang nangaliyopo kaninyo pinaagi kanamo. Ingong mga kapuli ni Kristo kami nangamuyo kaninyo: ‘Magpasig-uli kamo sa Diyos.’ Ang usa nga wala makasinati ug sala gihimo niya nga makasala alang kanato, aron kita mahimong pagkamatarong sa Diyos pinaagi kaniya. Nagabuhat uban kaniya, kami mangamuyo kaninyo sa dili pagdawat sa dili-takos nga kalulot sa Diyos ug makawang ang katuyoan niini. Kay siya nagaingon [diha sa Isaias 49:8, Septuagint]: ‘Sa panahon nga gikahimut-an ako nakadungog kanimo, ug sa adlaw sa kaluwasan ikaw akong gitabangan.’ Tan-awa! Karon mao na ang adlaw nga gikahimut-an. Tan-awa! Karon mao na ang adlaw sa kaluwasan. Kami wala gayod maghimog kapangdolan, aron dili pagsawayon ang among pagpang-alagad; hinunoa sa tanang paagi among girekomendar ang among kaugalingon ingon nga mga ministro sa Diyos.” (2 Corinto 5:20–6:4) Unsay anaa sa hunahuna ni Pablo?
19 Ang dinihogang mga Kristohanon maoy mga tinugyanan nga kapuli ni Kristo, ug ang dakong panon maoy iyang mga sinugo. Nagdungan ilang giawhag ang mga tawo nga makig-uli sa Diyos aron makabaton ug kaluwasan. Wala magtinguha si Pablo nga may makadawat sa dili-takos nga kalulot ni Jehova nga Diyos pinaagi ni Jesu-Kristo ug makawang ang katuyoan niini. Mahitabo kana kanato kon mapakyas kita sa pagbuhat sa buluhaton nga pinaagi sa dili-takos nga kalulot naghimo kanatong takos. Ang pagbaton ug maayong relasyon sa Diyos sama niadtong napasig-uli kaniya, dili kita makadawat sa iyang dili-takos nga kalulot sa walay kapuslanan kon atong tumanon “ang ministeryo sa pagpasig-uli, nga mao kini, nga ang Diyos pinaagi kang Kristo nagpasig-uli sa usa ka kalibotan ngadto kaniya.” (2 Corinto 5:18, 19) Atong mahimo usab ngadto sa uban ang labing dakong kalulot pinaagi sa pagtabang kanila nga mapasig-uli sa Diyos.
20. Unsa ang atong sunod tukion?
20 Gigamit sa mga alagad ni Jehova ang ilang panahon ug kahinguhaan diha sa mga buhat sa kalulot kon sila maninguha sa pagtabang sa mga tawo sa espirituwal pinaagi sa Kristohanong ministeryo. Apan unsay atong makat-onan gikan sa mga pananglitan sa Kasulatan bahin sa kalulot nga nagalihok? Atong sunod nga susihon ang pipila niini ug tagdon ang ubang mga paagi sa pagpahimuot kang Jehova pinaagi sa pagpakitag kalulot.
Unsaon Nimo Pagtubag?
◻ Unsa ang kalulot?
◻ Sa unsang paagi kita makalikay nga dili madaog sa sayop nga kalulot?
◻ Nganong ang katawhan ni Jehova makasalig sa iyang mahigugmaong-kalulot?
◻ Unsa ang pila ka balos sa kalulot
◻ Pinaagi sa paghimog unsa nga dili nato mapakawang ang katuyoan sa dili-takos nga kalulot sa Diyos?
unsa nga sila makatino?
[Hulagway sa panid 13]
Ang kalulot mopahimo sa Kristohanong mga ansiano nga mapailobon, mahunahunaon, ug mahangawaon
[Hulagway sa panid 15]
Ang kalulot sa Kristohanong asawa mahimong makatabang sa pagdani sa iyang bana sa matuod nga pagtuo
[Hulagway sa panid 17]
Atong mabuhatan ang uban ug labing dakong kalulot pinaagi sa pagtabang kaniya nga mapasig-uli sa Diyos