Ang Imong Kaugmaon Gitino ba sa Kapalaran?

KON nakalingkawas ka sa makamatayng aksidente, isipon ba nimo nga gipaboran ka sa kapalaran? O mapasalamaton ka ba hinoon nga ikaw sa yano anaa sa hustong dapit diha sa hustong panahon?

Ang maalamong tawo nga si Solomon miingon: “Ako mibalik ug nakakita ilalom sa adlaw nga ang lumba dili alang sa matulin, ni ang gubat alang sa mga mabaskog, ni ang tinapay alang sa maalam, ni ang mga bahandi alang sa tawo sa kahibalo, ni ang kaluoy alang sa mga tawo nga batid; tungod kay ang panahon ug wala-damhang panghitabo mahinabo kanilang tanan.” (Ecclesiastes 9:11) Pagkadaghang higayon nga ang wala dahoma mahitabo! Usa ka dumadaog nga magdudula nasamdan, ug ang bala maoy nakadaog. Ang kalit nga aksidente nakahapay sa usa ka matinud-anong negosyante, nga maoy nakapadato sa iyang limbongang kakompetensiya. Apan gipasangil ba ni Solomon kini nga kadaotan diha sa kapalaran? Wala gayod. Kini maoy mga epekto lamang sa “panahon ug wala-damhang panghitabo.”

Si Jesu-Kristo mihimo sa susamang obserbasyon. Nagpunting sa usa ka hitabo nga dayag komung nahibaloan sa iyang mga mamiminaw, si Jesus misukna: “Kadtong napulog walo ka tawo nga natumpagan sa torre sa Siloam ug nangamatay tungod niini, gipakaingon ba ninyo nga kadto sila mas daotan pa kay sa tanang molupyo sa Jerusalem?” (Lucas 13:4) Wala ipasangil ni Jesus kining mga kamatayona sa pila ka misteryosong kapalaran o sa kabubut-on sa Diyos, ni siya nagtuo nga ang mga biktima mas sad-an kay sa uban. Ang makasubong aksidente maoy laing panig-ingnan lamang sa pag-obra sa panahon ug wala-damhang panghitabo.

Ang Bibliya walay gipasiugdang ideya nga gitino sa Diyos ang panahon sa atong kamatayon. Matuod nga ang Ecclesiastes 3:1, 2 nag-ingon: “Adunay panahon alang sa tanang butang, ug panahon alang sa tagsatagsa ka kalihokan ilalom sa langit: may panahon sa pagkatawo ug panahon sa pagkamatay; may panahon sa pagtanom ug panahon sa pag-ibot niadtong natanom na.” Apan si Solomon naghisgot lamang sa padayong siklo sa kinabuhi ug kamatayon nga nagasakit sa di-hingpit nga katawhan. Kita nangatawo, ug sa pag-abot sa panahon, dihang ang kinaiyanhong gitas-on sa kinabuhi moabot na—​sagad human sa 70 o 80 ka tuig o kapin pa​—kita mamatay. Sa gihapon, ang eksaktong panahon sa kamatayon wala tinoang-daan sa Diyos sama usab sa panahon nga mohukom ang usa ka mag-uuma sa “pagtanom” o “sa pag-ibot niadtong natanom na.”

Ngani, gipakita ni Solomon sa ulahi nga ang usa ka tawo basin mamatay nga ahat, nga nag-ingon: “Dili ka magpalabi sa pagkadaotan, ni magbinuang ikaw. Nganong magpakamatay ka man sa dili pa ang imong panahon?” (Ecclesiastes 7:17) Unsay kahulogan niining tambaga kon ang panahon sa kamatayon sa usa gitino na nga dili na gayod mausab? Ang Bibliya sa ingon nagasalikway sa ideya sa kapalaran. Ang apostatang mga Israelinhon nga misagop niining paganong hunahuna grabe nga gihukman sa Diyos. Ang Isaias 65:11 miingon: “Apan kamo nga mibiya kang Jehova, kamo nga nalimot sa akong balaang bukid, kamong nanag-andam ug usa ka lamesa alang sa diyos sa Maayong Suwerte, ug nagpaawas sa bino nga sinambogan alang sa diyos sa Kapalaran.”

Nan, pagkabinuang ang pagpasangil sa mga aksidente ug mga disgrasya diha sa kapalaran o, grabe pa, sa Diyos mismo! “Ang Diyos gugma,” nag-ingon ang Bibliya, ug ang pag-akusar kaniya nga mao ang tinubdan sa kalisod sa tawo direktang nagkasumpaki niining sukaranang kamatuoran.​—1 Juan 4:8.

Mga Katuyoan sa Diyos Alang sa Umaabot

Apan, komosta ang atong mga palaaboton alang sa kaluwasan? Ang kamatuoran ba nga walay di-kapugngang kapalaran ang nagakontrolar sa atong mga kinabuhi nagkahulogan nga kita magpaanod-anod nga way-tumong? Dili gayod, kay gitino sa Diyos ang umaabot sa katawhan sa katibuk-an. Ang Bibliya naghisgot bahin sa paglalang ug “usa ka bag-ong yuta” nga niini “magapuyo ang pagkamatarong.”​—2 Pedro 3:13.

Aron matuman kini, ang Diyos mismo mangilabot sa tawhanong mga palakaw. Wala lamang mahibalo, ikaw tingali nakaampo niini nga matuman pinaagi sa paglitok sa pag-ampo nga nagaingon: “Paanhia ang imong gingharian. Matuman ang imong kabubut-on, sa langit, maingon man usab sa yuta.” (Mateo 6:10) Kini nga Gingharian maoy usa ka tinuod nga kagamhanang gitukod na sa mga langit. Pinaagi sa pag-ampo niini nga moabot, ikaw miampo niana nga Gingharian nga maoy mopuli sa pagmando sa yuta gikan sa presenteng-adlaw nga mga kagamhanan.​—Daniel 2:44.

Palig-ona ang Imong Kaugalingong Kaugmaon

Kon sa unsang paagi kining madulaong mga hitabo makaapektar sa imong umaabot nagadepende, dili sa kapalaran o bisan diha sa panahon ug wala-damhang panghitabo, kondili sa dalan nga imong gipiling sundon. Hinumdomi ang trahedya sa torre sa Siloam. Si Jesus migamit sa maong makasubong hitabo sa pagtudlog usa ka bililhong pagtulon-an. Ang mga biktima sa natumpag nga torre wala makalingkawas sa nahinabo kanila. Sa pagtandi, ang mga mamiminaw ni Jesus makalikay unta sa kalaglagan nga misangpot tungod sa kasuko sa Diyos. Si Jesus nagpasidaan kanila: “Gawas kon kamo maghinulsol, kamo malaglag sa samang paagi.” (Lucas 13:4, 5) Sa matin-aw, sila makapili sa ilang kaugalingong kaugmaon.

Ang mao gihapong kahigayonan gipaabot kanato karong adlawa​—aron paningkamotan ang atong kaugalingong kaluwasan. (Filipos 2:12) Gitinguha sa Diyos nga ang “tanang matang sa katawhan . . . makabaton sa tukmang kahibalo sa kamatuoran.” (1 Timoteo 2:4) Ug bisag ang matag usa kanato naapektohan sa igong gilapdon tungod sa kaliwat ug kagikan, ang Diyos naghatag kanatog kagawasan sa pagpili​—ang katakos sa pagtino kon unsaon nato paggamit ang atong kinabuhi. (Mateo 7:13, 14) Kita makabuhat kon unsay matarong o di-matarong. Kita makabatog maayong baroganan uban kang Jehova nga Diyos ug makabatog kinabuhi, o kaha kita makatalikod kaniya ug mamatay.

Daghan ang mipili nga mabuhing bulag gikan sa Diyos. Ilang gigamit ang ilang mga kinabuhi sa pagpangitag materyal nga mga butang, kalingawan, o kabantog. Apan si Jesus mipasidaan: “Magmatngon kamo ug likayi ninyo ang tanang dagway sa kadalo, kay ang kinabuhi sa tawo wala diha sa iyang mga katigayonan.” (Lucas 12:15) Nan, diha sa unsa nagadepende ang atong mga kinabuhi? Diha sa 1 Juan 2:15-17, ang Bibliya nag-ingon: “Ayaw higugmaa ang kalibotan o ang mga butang sa kalibotan. . . . Ang tanan nga anaa sa kalibotan​—ang pangibog sa unod ug ang pangibog sa mga mata ug ang mapagawalong pasundayag sa pangabuhian sa usa​—dili gikan sa Amahan kondili gikan sa kalibotan. Dugang pa, ang kalibotan mahanaw ug ang pangibog niini, apan ang nagabuhat sa kabubut-on sa Diyos magpabilin sa walay kataposan.”

Pilia ang Kinabuhi

Sa unsang paagi ikaw makatino nga nagabuhat ka gayod sa kabubut-on sa Diyos? Si Jesus miingon: “Kini ang kinabuhing dayon, ang ilang pagkuhag kahibalo kanimo, ang bugtong matuod nga Diyos, ug sa usa nga imong gipadala, si Jesu-Kristo.” (Juan 17:3) Ang tukmang kahibalo gikan sa Bibliya nagataganag pasukaranan sa pagtuo. “Kon walay pagtuo dili gayod mahimo ang pagpahimuot kaniya, kay siya nga moduol sa Diyos kinahanglang magatuo sa iyang pagkaanaa ug nga siya magabalos ra niadtong tim-os nga nagapangita kaniya.” (Hebreohanon 11:6) Ang kahibalo nga imong gikinahanglan dali nga mabatonan. Ang mga Saksi ni Jehova nakatabang na sa minilyon nga makabaton niini pinaagi sa usa ka regular nga pagtuon sa Bibliya.a

Aron makapahimuot sa Diyos, kinahanglang maghimo ka ug mga kausaban. Hayan dunay pipila ka daotang mga batasan nga kinahanglang sumpoon o basig dunay mangil-ad nga mga buhat nga kinahanglang putlon. Ayawg surender, ingon nga daw imposible nga ikaw mausab. Ang ideya nga ang mga butang di-mausab maoy laing ideya nga gikuha gikan sa bakak nga doktrina sa kapalaran. Uban sa tabang ni Jehova, posible alang kang bisan kinsa ang ‘pagbag-o sa iyang hunahuna’ ug ugmaron “ang bag-ong pagkatawo.” (Roma 12:2; Efeso 4:22-24) Ang imong mga paningkamot sa pagpahimuot sa Diyos himatikdan. Siya andam nga mopanalangin niadtong nagabuhat sa iyang kabubut-on.

Sa tinuod, ang pagtuon sa Bibliya dili makasulbad sa tanan nimong mga suliran. Ang tinuod nga mga alagad sa Diyos makaagom gihapon sa mga aksidente ug daotang mga sirkumstansiya, sama sa uban. Apan, ang Diyos makahatag kanato ug kaalam aron makasagubang sa kalisod. (Santiago 1:5) Anaa usab ang kalipay sa pagkasayod nga ikaw adunay maayong relasyon uban sa Diyos. “Malipayon siyang nagasalig kang Jehova,” miingon ang Proverbio 16:20.

Diha sa napasig-uling Paraiso ubos sa Gingharian sa Diyos, dili na kita unya mobati nga ginahulga sa panahon ug sa wala-damhang panghitabo. Sa pagkamatuod, wagtangon unya sa Diyos ang tanang butang nga nagadaot sa kalipay sa tawo karon. “Iyang pagapahiran ang tanang luha gikan sa [atong] mga mata, ug ang kamatayon mawala na, ug wala na usab unyay pagminatay ni paghilak ni kasakit pa unya,” nagsaad ang Bibliya. (Pinadayag 21:4) Ang di-maisip nga mga biktima sa aksidente makaagi ug pagkabanhaw.​—Juan 5:28, 29.

Mapanunod ba nimo kining mahimayaong kaugmaon? Sa dihang talisulod na ang mga Israelinhon sa Yutang Saad, si Moises miingon kanila: “Gibutang ko sa imong atubangan ang kinabuhi ug ang kamatayon, ang panalangin ug ang tunglo; ug pilia ang kinabuhi aron ka mabuhi, ikaw ug ang imong kaliwatan, pinaagi sa paghigugma kang Jehova, sa pagpamati sa iyang tingog ug pinaagi sa pagpabilin diha kaniya; kay siya ang imong kinabuhi ug ang gitas-on sa imong mga adlaw.”​—Deuteronomio 30:19, 20.

Dili, dili kita mga piyon nga way-mahimo nga gikontrolar sa usa ka way-kaluoy nga kapalaran. Ang imong umaabot nga kalipay, sa pagkamatuod ang imong walay kataposang kaugmaon, anaa sa imong mga kamot. Giagda ka namo nga pilia ang kinabuhi.

[Footnote]

[Blurb sa panid 5]

Ang apostatang mga Israelinhon nga misagop niining paganong hunahuna sa kapalaran grabe nga gihukman sa Diyos