Isul-ob ang Kalumo!

“Ingon nga sa Diyos kamo mga pinili, balaan ug hinigugma, nan isul-ob ninyo ang malumong pagbati sa kahangawa, kalulot, pagpaubos sa hunahuna, kalumo, ug hataas nga pailob.”—COLOSAS 3:12.

 1-3. Diha sa Colosas 3:12-14, unsay giingon ni apostol Pablo bahin sa kalumo ug ubang diyosnong mga hiyas?

SI Jehova naghatag sa iyang katawhan ug labing maayo mahulagwayong besti. Sa pagkamatuod, ang tanang nagtinguha sa iyang pag-uyon kinahanglang magsul-ob sa usa ka besti nga dunay lig-on nga mga lanot sa kalumo. Kining hiyasa makapalipay tungod kay gipakunhod niini ang tensiyon diha sa malisod nga mga situwasyon. Kini panalipod usab, kay kini makasanta sa panag-away.

² Giagda ni apostol Pablo sa isigka-dinihogang mga Kristohanon: “Ingong mga pinili sa Diyos, balaan ug hinigugma, nan isul-ob ninyo ang malumong pagbati sa kahangawa, kalulot, pagpaubos sa hunahuna, kalumo, ug hataas nga pailob.” (Colosas 3:12) Ang panahon sa berbo sa Gregong pulong gihubad “isul-ob ninyo” nagpasabot ug aksiyon nga pagahimoon uban ang pagkadinalian. Ang mga dinihogan, kinsa pinili, balaan, ug gihigugma sa Diyos, kinahanglang dili maglangaylangay sa pagsul-ob sa maong mga hiyas sama sa kalumo.

³ Si Pablo midugang: “Padayong mag-inantosay ang usag usa kaninyo ug magpinasayloay ang usag usa kon aduna may pagmahay ang usa batok sa usa. Ingon nga si Jehova nagapasaylo kaninyo, kamo usab magapasaylo. Apan, labaw niining tanan, isul-ob ninyo ang gugma, kay kini ang hingpit nga bugkos sa panaghiusa.” (Colosas 3:13, 14) Ang gugma, kalumo, ug ubang diyosnong mga hiyas nagpaposible sa mga Saksi ni Jehova sa “pagpuyo nga may panaghiusa.”​—Salmo 133:1-3.

Ang Malumog-Kinaiya nga mga Magbalantay Gikinahanglan

 4. Ang matuod nga mga Kristohanon nagasul-ob ug mahulagwayong besti nga tinagik sa unsang mga hiyas?

⁴ Ang matuod nga mga Kristohanon nagapaningkamot sa ‘pagpatay sa ilang mga sangkap sa lawas maylabot sa pakighilawas, kahugaw, pangibog nga unodnon, daotang tinguha, ug ang kadalo,’ ug sila naningkamot sa pagtangtang sa bisan unsang daang sapot nga tinagik sa kasilag, kasuko, pagkadaotan, pamalikas ug mahilas nga sinultihan. (Colosas 3:5-11) Gihukas nila “ang daang pagkatawo” (sa literal, “ang daan nga tawo”) ug gisul-ob “ang bag-ong pagkatawo” (o, “ang bag-ong tawo”), usa ka nahiangay nga besti. (Efeso 4:22-24, Kingdom Interlinear) Ang ilang bag-ong besti, nga tinagik sa kahangawa, kalulot, pagkamapaubsanon sa hunahuna, kalumo, ug hataas nga pailob, motabang kanila sa pagsulbad sa mga suliran ug sa pagkinabuhi sa diyosnong mga kinabuhi.​—Mateo 5:9; 18:33; Lucas 6:36; Filipos 4:2, 3.

 5. Unsay ikasulti bahin sa pag-obra sa Kristohanong kongregasyon nga nagahimo niini nga usa ka dakong kalipay nga mahimong bahin niini?

⁵ Ang mga tawong giisip nga malamposon niining kalibotana kasagaran walay pagbati, o kaha mabangis. (Proverbio 29:22) Pagkamakapahupay nga kini lahi kaayo taliwala sa katawhan ni Jehova! Ang Kristohanong kongregasyon wala magaobra sama sa pagpalakaw sa ubang mga tawo ug negosyo​—diha sa mahusay apan mapintas nga paagi nga nagahimo sa mga tawo nga dili malipayon. Hinunoa, usa ka kalipay nga mahimong bahin sa kongregasyon. Ang usa ka katarongan mao nga ang pagkamalumog-kinaiya maoy usa ka bahin sa kaalam nga gipasundayag sa mga Kristohanon sa katibuk-an ug ilabina sa mga tawong takos sa pagtudlo sa mga isigkamagtutuo. Oo, ang kalipay moresulta gikan sa pagtudlo ug tambag nga ginahatag sa tinudlong mga ansiano nga nagatudlo “uban ang kalumo nga iya sa kaalam.”​—Santiago 3:13.

 6. Nganong kinahanglan nga ang Kristohanong mga ansiano magmalumog-kinaiya?

⁶ Ang espiritu, o nangibabaw nga tinamdan, sa katawhan sa Diyos nagkinahanglan nga ang mga tawo nga gisaligan sa pagpanguna sa kongregasyon maoy malumog-kinaiya, makataronganon, ug masinabtanon. (1 Timoteo 3:1-3) Ang mga alagad ni Jehova maoy sama sa maaghop nga mga karnero, dili mga gahig-ulong mga kanding, sukihang mga asno, o matukobong mga lobo. (Salmo 32:9; Lucas 10:3) Kay samag-karnero, sila kinahanglang tratahon uban ang kalumo ug kalulot. (Buhat 20:28, 29) Oo, gilaoman sa Diyos nga ang mga ansiano magmaaghop, maluluton, mahigugmaon, ug mapailobon sa iyang mga karnero.​—Ezekiel 34:17-24.

 7. Sa unsang paagi angay magtudlo ang mga ansiano sa uban o magtabang sa masakiton sa espirituwal?

⁷ Ingon nga “ulipon sa Ginoo,” ang usa ka ansiano “kinahanglang maaghop sa tanan, may katakos sa pagtudlo, nagapugong sa iyang kaugalingon bisan sa kadaotan, malumong nagatudlo nga mga nagasupak; kay basin ug hatagan sila sa Diyos ug higayon sa paghinulsol nga mosangko sa tukmang pagkahibalo sa kamatuoran.” (2 Timoteo 2:24, 25) Ang Kristohanong mga magbalantay angay magpakitag malumong konsiderasyon kon mosulay sa pagtabang sa masakiton sa espirituwal, kay ang karnero iya sa Diyos. Dili sila tratahon sa mga ansiano nga samag ilang sinuholan apan kinahanglang magbatog malumog-kinaiya, sama sa Maayong Magbalantay, si Jesu-Kristo.​—Juan 10:11-13.

 8. Unsay nahitabo sa malumog-kinaiya nga si Moises, ug ngano?

⁸ May mga panahong ang ansiano malisdan sa paghupot sa maaghop nga espiritu. “Si Moises mao ang labing mapaubsanong tawo sa ibabaw sa yuta.” (Numeros 12:3) Apan, sa dihang ang mga Israelinhon nakabsan ug tubig sa Kadesh, sila nakig-away kang Moises ug gibasol siya sa pagdala kanila gikan sa Ehipto ngadto sa umaw nga kamingawan. Bisan pa sa tanang naantos ni Moises sa pagkamapaubsanon, siya misulting madalidalion, mapintason. Siya ug si Aaron mibarog atubangan sa katawhan ug gitumong ang pagtagad ngadto kanila, si Moises miingon: “Patalinghog, kamo karon mga masupilon! Hatagan ba kamo namog tubig gikan niining batoha?” Unya gibunalan ni Moises ang bato sa iyang sungkod sa makaduha, ug ang Diyos nagpaagay ug “daghang tubig” alang sa katawhan ug sa ilang kahayopan. Si Jehova wala mahimuot tungod kay si Moises ug Aaron wala magbalaan Kaniya, busa si Moises wala hatagig pribilehiyo nga manguna sa mga Israelinhon ngadto sa Yutang Saad.​—Numeros 20:1-13; Deuteronomio 32:50-52; Salmo 106:32, 33.

 9. Sa unsang paagi masulayan ang pagkamalumo sa usa ka ansiano?

⁹ Ang kalumo sa Kristohanong ansiano masulayan usab sa nagkalainlaing mga paagi. Pananglitan, gipasidan-an ni Pablo si Timoteo nga dunay tawong motungha nga “magapaburot” ug “maoy kabuangan ang pakiglantugi ug pakiglalis mahitungod sa mga pulong.” Si Pablo midugang: “Gikan niining mga butanga motungha ang kasina, pagbahinbahin, mapanghimaraotong mga pulong, daotang mga katahap, mapintas nga paglalisay labot sa gagmayng mga butang sa mga tawong may dunot ug panghunahuna ug nakabsan sa kamatuoran.” Ang magtatan-aw nga si Timoteo gisugo sa dili paglihok sa mabangisong paagi kondili “magpahilayo niining mga butanga,” ug kinahanglang iyang “paningkamotan ang pagkamatarong, diyosnong debosyon, pagtuo, gugma, pagkamainantoson, malumo nga kinaiya.”​—1 Timoteo 6:4, 5, 11.

10. Unsay gipahinumdom ni Tito sa mga kongregasyon?

¹⁰ Bisan pa nga angay magmalumo ang ansiano, sila kinahanglang malig-on alang sa matarong. Si Tito ingon niana, nagpahinumdom niadtong nakig-uban sa mga kongregasyon sa Creta sa “dili pagsultig daotan kang bisan kinsa, dili makiglalison, hinunoa makataronganon, magapakita sa hingpit nga kalumo ngadto sa tanan.” (Tito 3:1, 2) Nagpakita kon nganong ang mga Kristohanon kinahanglang magmalumog-kinaiya ngadto sa tanan, gihatagag pagtagad ni Tito kon unsa ka maayo ug kamahigugmaon si Jehova. Wala luwasa sa Diyos ang mga magtutuo tungod sa bisan unsang mga buhat sa pagkamatarong nga ilang nahimo kondili sumala sa iyang kaluoy pinaagi kang Jesu-Kristo. Ang kalumo ug pagkamapailobon ni Jehova nagkahulogan ug kaluwasan usab alang kanato. Busa, sama kang Tito, ang mga ansiano karong-adlawa kinahanglang magpahinumdom sa mga kongregasyon nga magpasakop sa Diyos, mosundog Kaniya pinaagi sa pagtagad sa uban sa malumong paagi.​—Tito 3:3-7; 2 Pedro 3:9, 15.

Kalumo Mogiya sa Maalamong Magtatambag

11. Sumala sa Galacia 6:1, 2, sa unsang paagi ihatag ang tambag?

¹¹ Komosta kon ang mahulagwayong karnero nakasala? Si Pablo miingon: “Mga igsoon, kon ang usa ka tawo mahiligas ngadto sa kalapasan sa dili pa siya makaamgo niana, kamong may espirituwal nga katakos mao ang magpahiuli kaniya uban sa espiritu sa kalumo, samtang magbantay kamo sa inyong kaugalingon, kay basin kamo matintal usab. Magtinabangay kamo sa pagpas-an sa mga lulan sa usag usa, ug sa ingon niana matuman ang kasugoan ni Kristo.” (Galacia 6:1, 2) Ang tambag mas epektibo kon kini ihatag diha sa espiritu sa kalumo. Bisan kon ang ansiano maningkamot sa pagtambag sa usa nga nasuko, sila kinahanglang magpasundayag ug pagpugong sa kaugalingon, amgohon nga ang “usa ka malumong dila makadugmok sa bukog.” (Proverbio 25:15) Ang usa ka tawo nga ingon ka gahig bukog mapahumok pinaagi sa usa ka malumong sinultihan, ug ang iyang kagahi madugmok.

12. Sa unsang paagi ang malumo nga espiritu makatabang sa usa ka magtatambag?

¹² Si Jehova maoy usa malumog-kinaiya nga Instruktor, ug ang iyang malumong paagi sa pagtudlo epektibo diha sa kongregasyon. Kini matuod ilabina kon makita sa mga ansiano ang panginahanglan sa pagtambag niadtong nagkinahanglag tabang sa espirituwal. Ang tinun-ang si Santiago misulat: “Kinsa ang maalamon ug masinabtanon taliwala kaninyo? Pasagdi nga iyang ipakita ang iyang maayong batasan pinaagi sa iyang binuhatan inubanan sa kalumo nga iya sa kaalam.” Ang kalumo motungha gikan sa pagtahod ug pasalamat alang sa “kaalam gikan sa itaas,” inubanan sa mapaubsanong pag-ila sa imong mga limitasyon. Ang usa ka malumo ug mapaubsanong espiritu mopanalipod sa magtatambag sa paghimog makadaot nga mga komento ug mga sayop ug maghimo sa iyang tambag nga mas sayong dawaton.​—Santiago 3:13, 17.

13. Sa unsang paagi ang “kalumo nga iya sa kaalam” makaapektar sa paagi sa paghatag sa tambag?

¹³ “Ang kalumo nga iya sa kaalam” mopugong sa usa ka magtatambag sa pagsulti nga prangka ug mahait. Apan, ang kabalaka nga magpabilin ang panaghigalaay o pagbaton sa pag-uyon sa tawo kinahanglang dili mopalihok sa usa ka ansiano sa pagsulti sa mga butang nga gilaraw sa pagpahimuot kaniya inay kay sa malumong pagpahayag sa prangkang tambag nga gipasukad sa Pulong sa Diyos. (Proverbio 24:24-26; 28:23) Ang tambag nga nadawat ni Amnon gikan sa iyang ig-agaw nakatagbaw sa iyang tinguha, apan kini nakapildi sa iyang kinabuhi. (2 Samuel 13:1-19, 28, 29) Busa, dili angay dugangan o kuhaan sa mga ansiano karong-adlawa ang mga prinsipyo sa Bibliya sa paghupay sa konsensiya sa usa ka tawo, kay ang pagbuhat niini makapameligro sa iyang kinabuhi. Sama kang Pablo, ang mga ansiano dili magpanuko gikan sa pagsulti sa uban sa “tanang tambag sa Diyos.” (Buhat 20:26, 27; 2 Timoteo 4:1-4) Ang usa ka hamtong nga Kristohanong magtatambag magpakitag diyosnong kahadlok ug mohatag matarong nga tambag nga may kalumo nga iya sa kaalam.

14. Nganong ang ansiano mag-amping sa dili paghimog mga desisyon nga angay himoon sa uban mismo?

¹⁴ Ang kalumo inubanan sa langitnong kaalam mopugong sa usa ka ansiano sa paghimog malupigong mga hangyo. Angay usab niyang amgohon nga dili maalamon ug dili-tukma nga mohimo siyag desisyon nga ang laing tawo ang angay mohimo niana. Ang ansiano maoy responsabli sa mga resulta kon siya ang mohimog mga desisyon alang sa uban ug manubag sa bisan unsang daotang sangpotanan. Ang usa ka ansiano makaawhag sa pagtagad sa gipamulong sa Bibliya, apan kon walay Kasulatanhong kasugoan bahin sa usa ka butang, ang kaugalingong panghukom sa indibiduwal ug ang iyang tanlag ang motino kon unsay iyang himoon o dili himoon. Sama sa giingon ni Pablo: “Kay ang matag usa ka tawo ang magapas-an sa iyang kaugalingong lulan.” (Galacia 6:5; Roma 14:12) Apan, ang nangutana matabangan sa paghimog hustong desisyon pinaagi sa mga pangutanang ibangon sa usa ka ansiano sa pagtabang sa tawo nga mangatarongan diha sa kasulatan may kalabotan sa kapiliang mga paagi nga tingalig bukas alang kaniya.

15. Unsay angay himoon kon ang ansiano wala mahibalo sa tubag sa usa ka pangutana?

¹⁵ Kon ang usa ka ansiano wala mahibalo sa tubag sa usa ka pangutana, siya dili angay motubag aron lang dili-maulawan. Ang kalumo nga iya sa kaalam mopugong kaniya gikan sa pagpanaghap ug tingali sa paghatag ug sayop nga tubag nga sa ulahi mopahinabog kalisdanan. Adunay “panahon sa paghilom ug panahon sa pagsulti.” (Ecclesiastes 3:7; itandi ang Proverbio 21:23.) Ang ansiano “mosulti” lamang kon siya nahibalo sa tubag sa usa ka pangutana o nakahimog igong panukiduki sa paghatag ug tukmang tubag. Maalamong biyaang dili-matubag ang mapangagpasong mga pangutana.​—Proverbio 12:8; 17:27; 1 Timoteo 1:3-7; 2 Timoteo 2:14.

Ang Bili sa Daghang Magtatambag

16, 17. Nganong ang mga ansiano angay mokonsulta sa usag usa?

¹⁶ Ang pag-ampo ug pagtuon motabang sa mga ansiano sa pagtubag sa mga pangutana ug sa pag-atiman sa malisod nga mga suliran, apan angay hinumdoman nga “diha sa daghang magtatambag dunay kalamposan.” (Proverbio 15:22) Ang pagkonsulta sa ubang mga ansiano mosangpot ug bililhong pag-amotay sa kaalam. (Proverbio 13:20) Dili ang tanang mga ansiano dunay samang kasinatian o kahibalo sa Bibliya. Busa, ang kalumo nga iya sa kaalam angay motukmod sa kulag kasinatiang ansiano sa pagkonsulta sa ubang mga ansiano nga may mas dakong kahibalo ug mas dakong kasinatian, ilabina kon seryosong mga butang ang atimanon.

¹⁷ Kon mapili ang mga ansiano sa pag-atiman sa usa ka seryosong butang, sila sa pribado mahimong mangayog tabang. Aron may tabang siya sa paghukom sa mga Israelinhon, gipili ni Moises ang “may-katakos nga mga lalaki, mahadlokon sa Diyos, kasaligang mga lalaki, nga nagadumot sa ganansiya nga dili matarong.” Bisag sila mga ansiano, sila walay igong kahibalo ug kasinatian sama kang Moises. Busa, “ang malisod nga kaso ilang dalhon ngadto kang Moises, apan ang matag gagmayng kaso sila mismo ang mohusay ingong mga maghuhukom.” (Exodo 18:13-27) Nan, kon gikinahanglan, ang mga ansiano nga nagahusay ug malisod nga kaso karong adlawa sa husto makapangayog tabang sa may kasinatiang mga magtatan-aw, apan sila mismo ang mohatag ug kataposang desisyon.

18. Sa pag-atiman sa hudisyal nga mga butang, unsa ang mga basehanan nga nagatino nga husto ang mga desisyon?

¹⁸ Ang Hudiyong Mishnah nag-ingon nga sa Israel kadtong naglangkob sa mga hukmanan sa balangay dili-managsamag gidaghanon sumala sa gibug-aton sa kaso. Adunay tinuod nga bili diha sa daghang magtatambag, bisan tuod nga ang gidaghanon lamang dili garantiya sa kahusto, kay ang kadaghanan mahimong masayop. (Exodo 23:2) Ang basehanan nga nagatino nga husto ang mga desisyong mahimo mao ang Kasulatan ug ang espiritu sa Diyos. Ang kaalam ug kalumo mopalihok sa mga Kristohanon nga magpasakop niini.

Pagsangyaw nga May Kalumo

19. Sa unsang paagi ang kalumo makatabang sa katawhan ni Jehova sa pagsangyaw sa uban?

¹⁹ Ang kalumo motabang usab sa mga alagad ni Jehova sa pagsangyaw sa mga tawong nagkalainlain ug mga kinaiya. (1 Corinto 9:22, 23) Sanglit kay si Kristo nanudlo man nga may kalumo, ang mga mapaubsanon wala mahadlok kaniya, dili sama sa ilang pagkahadlok sa mapintas nga mga pangulo sa relihiyon. (Mateo 9:36) Siyempre, ang iyang malumo nga mga paagi nakadani sa “mga karnero,” dili sa daotang “mga kanding.” (Mateo 25:31-46; Juan 3:16-21) Bisag migamit si Jesus ug kusganong mga pulong sa pagpakiglabot uban sa samag-kanding nga mga salingkapaw, ang mga Saksi ni Jehova kinahanglang malumo sa dihang magmantala sa mga mensahe sa paghukom sa Diyos karong adlawa tungod kay sila walay samang pagsabot ug awtoridad nga nabatonan ni Jesus. (Mateo 23:13-36) Samtang ilang madunggan ang mensahe sa Gingharian nga ginasangyaw nga may kalumo, ‘kadtong sa pagkamatarong nahilig alang sa kinabuhing dayon mahimong mga magtutuo,’ sama sa gihimo sa mga karnerohon nga nakadungog kang Jesus.​—Buhat 13:48.

20. Sa unsang paagi makabenepisyo ang estudyante sa Bibliya kon siya gitudloan nga may kalumo?

²⁰ Maayong mga sangpotanan ang malampos sa pagsangyaw ug pagtudlo sa uban nga may kalumo ug pinaagi sa pagdani kanila pinasukad sa lohika, mga prinsipyo sa Bibliya, ug kamatuoran. “Balaana si Kristo ingong Ginoo diha sa inyong mga kasingkasing,” misulat si Pedro, “kinahanglan andam kamo kanunay sa pagtubag kang bisan kinsa nga mangutana sa hinungdan sa paglaom nga anaa kaninyo, apan buhata ninyo kini sa kalumo ug halalom nga pagtahod.” (1 Pedro 3:15) Ang usa ka estudyante nga ginatudloan sa malumo nga paagi makapamensar ug maayo sa materyal nga ginahisgotan inay mabalda o mapandol sa dili-mataktikanhon, malalisong paagi. Sama kang Pablo, ang mga ministro nga nagapanudlo nga may kalumo makaingon: “Kami wala maghimong kapangdolan, aron dili masaway ang among pagpang-alagad.” (2 Corinto 6:3) Bisan ang mga magsusupak usahay mosanong ug maayo sa mga tawong nagapanudlo nga may kalumo.

Ang Kalumo Gikinahanglan sa Tanan

21, 22. Sa unsang paagi ang kalumo makabenepisyo sa tanang katawhan ni Jehova?

²¹ Ang Kristohanong kalumo dili isul-ob lamang aron madayeg sa mga tawong anaa sa gawas sa organisasyon ni Jehova. Kining hiyasa usab hinungdanon sa relasyon taliwala sa katawhan ni Jehova. (Colosas 3:12-14; 1 Pedro 4:8) Ang mga kongregasyon mapalig-on sa espirituwal sa dihang ang malumog-kinaiya nga mga ansiano ug ministeryal nga mga alagad nagkahiusang nagabuhat. Ang pagpasundayag ug kalumo ug ubang diyosnong mga hiyas hinungdanon sa matag usa sa katawhan ni Jehova tungod kay adunay “usa ka kasugoan” lamang alang sa tanan.​—Exodo 12:49; Levitico 24:22.

²² Ang kalumo makadugang ug kalinaw ug kalipay sa katawhan sa Diyos. Busa, kini angay nga mahimong bahin sa tinagik nga mga hiyas nga mao ang sapot nga ginasul-ob sa tanang mga Kristohanon diha sa balay, sa kongregasyon, ug sa bisan diin. Oo, ang tanang mga alagad ni Jehova kinahanglang masul-oban sa kalumo.

Unsaon Nimo Pagtubag?

◻ Nganong kinahanglang magmalumog-kinaiya ang Kristohanong mga ansiano?

◻ Sa unsang paagi ang kalumo mogiya sa maalamong magtatambag?

◻ Unsa ang bili sa daghang magtatambag?

◻ Nganong mapuslanon ang pagsangyaw nga may kalumo?

[Hulagway sa panid 17]

Ang katawhan ni Jehova maoy samag-karnerong mga tawo ug kinahanglang tratahon nga may kalumo

[Kapsiyon]

Garo Nalbandian

[Hulagway sa panid 19]

Ang kalumo makahimo sa katawhan ni Jehova sa pagsangyaw ngadto sa mga tawo nga nagkalainlain ug mga kinaiya