Mga Magmamantala sa Gingharian Nagtaho

‘Pagpangani’ sa Venezuela

Sa usa ka higayon gipanig-ingon ni Jesus ang buluhatong pagwali sa tinuig nga pag-ani. (Mateo 9:36-38) Ang Agalon sa alanihon mao si Jehova nga Diyos, ug ang anihonon tinuod nga dako sa tibuok globo. Kini nagalakip sa panagsa rang matrabaho nga teritoryo sa Venezuela.

Ang sangang buhatan sa Sosyedad sa Watch Tower sa Venezuela nagtaho kon unsay nahitabo sa dihang usa ka grupo sa mga Saksi nagtrabaho sa teritoryo sa Sabana Grande, Estado sa Guárico. Ang mga Saksi nag-asoy: “Ang balay nga among gisak-an maoy usa ka maayong dapit nga tigoman, busa dihadiha dayon nagsugod kamig pangimbitag mga tawo alang sa mga tigom didto. Ang katawhan wala mahibalo mahitungod sa mga Saksi ni Jehova. Bisag dunay upat ka grupo sa mga evangelical diha sa lungsod, ang mga tawo ikag kaayo nga makakat-on gikan sa Bibliya.

“Kami nagbuhat sulod sa tulo ka oras sa buntag ug tulo ka oras pagkahapon, nga nagduaw gikan sa balay ngadto sa balay ug nag-imbita sa katawhan alang sa tigom sa sunod gabii. Kami walay mga lingkoranan, busa amo silang giawhag sa pagdala sa ilang kaugalingong mga lingkoranan. Sa dihang ang takna nagsingabot na alang sa pagsugod sa tigom, ang mga tawo nagsugod pagpangabot, ang matag usa nagdala ug lingkoranan. Sa dihang natapos ang tigom, amo silang giingnan nga buot namong isulat ang mga ngalan niadtong kinsa gustog libreng pagtuon sa Bibliya sa balay. Tanan sa 29 nga mitambong buot magpalista sa ilang ngalan.

“Samtang among gisarado ang pultahan sa pagbiya sa kataposang bisita, among namatikdan ang tulo ka mga lalaki nga nanagbarog duol sa kanto sa balay. Sa mga alas nuwebe, andam na kami sa pagpanlingkod aron mokaon sa dihang sila nanuktok sa pultahan. Sila nagsuknag mga pangutana sama sa: ‘Unsay inyong ginawali dinhing lungsora? Alang sa unsang katarongan nga kamo nagtigom dinhi karong gabhiona?’

“Kami nangutana kon kami ba nakasupak ug bisag unsang balaod. Sila mingtubag wala ug nag-ingon nga sila ang mga pastor sa tulo ka mga evangelical nga simbahan sa lungsod. Sila naglagot tungod kay ang ilang mga simbahan walay unod nianang gabhiona. Among giabiabi sila pasulod ug gisaysay ang among bulohaton. Kami nakapahimutang sab ug pila ka mga literatura kanila ug naghangyo kanila sa pagbalik sa sunod nga Huwebes.

“Sa sunod nga Huwebes ang mga pastor namalik ug uban kanila ang 22 laing mga tawo kinsa buot maminaw kon unsay among ikasulti. Ang mga pastor naghunahuna nga, sanglit mga babaye, kami dili makasugakod kanila sa pakighisgot. Bisan pa niana, ang tigom nagmalamposon gikan sa among panlantaw. Sa kataposan among gipahayag nga kami nagahimog lista kanila kinsa buot masayod ug dugang gikan sa Bibliya. Ubay-ubay sa mga kauban sa mga pastor buot nga ang ilang mga ngalan idugang sa lista, ug gani pila nagsulti nga buot nilang mouban kanamo sa buluhatong pagwali!

“Among gisaysay nga sila kinahanglan pag dugang kahibalo sa Bibliya ug pagbansay una sila makauban namo sa buluhatong pagwali. Matag adlaw ang mga tawo moadto sa balay, mohangyo kanamo sa pagsaysay sa Bibliya ngadto kanila. Usahay, sa dihang kami makahisgot hangtod sa halalom nga kagabhion, kinahanglan namo silang hangyoon sa pagpauli. Sa dihang sa kataposan mobiya na kami sa teritoryo, sila nasubo pag-ayo ug miingon kanamo nga sa among pagbalik, sila mouban kanamo sa buluhatong pagwali. Sila nagsaad nga nianang panahona sila nakahimo na sa gikinahanglang pag-uswag.”

Sa dihang ang mga Saksi mipahawa sa teritoryo, dihay mga 40 ka tawo nga buot motuon sa Bibliya. Ang mga ngalan niining mga interesadong tawo gihatag ngadto sa duol nga kongregasyon, nga mga 50 kilometros ang gilay-on. Busa, pila ka mga Saksi gikan sa laing siyudad milalin didtong lungsora, ug usa ka grupo sa masibotong mga magwawali sa maayong balita ang naporma.