Pagtukaw Kamo sa “Panahon sa Kataposan”

“Pagbantay, pagtukaw kamo, kay wala kamo mahibalo kon kanus-a ang tinudlong panahon.”​—MARCOS 13:33.

 1. Unsay angay nga pagsanong nato samtang madayag ang makapaukyab nga mga panghitabo ning “panahon sa kataposan”?

SAMTANG mapadayag ang makapaukyab nga mga panghitabo ning “panahon sa kataposan,” angay unsay pagsanong sa mga Kristohanon? (Daniel 12:4) Sila wala pasagdi nga magduhaduha. Si Jesu-Kristo nagpahayag sa tagna nga naundan sa daghan-ug-bahin nga ilhanan nga nagakatuman ning ika-20ng siglo. Siya nagtagna sa daghang bahin nga magatimaan sa maong yugto sukad sa 1914 ingon nga linain. Kay nasayod sa tagna ni Daniel bahin sa “panahon sa kataposan,” gisundan ni Jesus ang iyang dakong tagna sa pag-awhag sa iyang mga tinun-an sa “pagtukaw.”​—Lucas 21:36.

 2. Nganong may dakong panginahanglan sa pagtukaw sa espirituwal nga paagi?

² Ngano nga magtukaw man? Kay kini ang labing makuyawng panahon sa kasaysayan sa tawo. Ang pagpadaog sa mga Kristohanon sa espirituwal nga pagduka ning panahona makapalaglag. Kon kita mahimong matagbawon sa kaugalingon o magtugot nga mabug-atan ang atong mga kasingkasing sa mga kabalaka sa kinabuhi, mameligro kita. Sa Lucas 21:34, 35, kita gipasidan-an ni Jesu-Kristo: “Magbantay kamo sa inyong kaugalingon aron ang inyong mga kasingkasing dili mabug-atan sa pagpatuyang sa pagkaon ug sa pagkahubog ug sa mga kabalaka sa kinabuhi, ug kanang adlawa moabot kaninyo nga wala dahoma ingon sa lit-ag. Kay kini moabot sa tanan nga nagapuyo sa nawong sa tibuok yuta.”

 3, 4. (a) Unsay gipasabot ni Jesus sa pag-ingon nga ang adlaw sa kapungot sa Diyos moabot nga wala dahoma sa katawhan “ingong lit-ag”? (b) Sanglit ang Diyos dili mobutang ug lit-ag, nganong ang katawhan sa katibuk-an hisakpan sa kalit nianang adlawa?

³ Uban sa maayong katarongan nga si Jesus miingon nga ang adlaw ni Jehova ‘moabot kanato nga wala dahoma ingon sa lit-ag.’ Ang lit-ag sagad gisangkapan ug laang, ug kini gamiton sa pagdakop sa mga langgam ug mga hayop nga susohan. Ang lit-ag adunay kablitan, ug si bisan kinsa nga makatunob sa kablitan makapalos sa kablitan. Unya motak-op ang lit-ag, ug masikop ang biktima. Kining tanan mahitabo nga kalit kaayo. Sa samang paagi, matud ni Jesus, ang mga dili-aktibo sa espirituwal matingala ug hisakpan sa “adlaw sa kapungot” sa Diyos.​—Proverbio 11:4.

⁴ Si Jehova nga Diyos ba ang nagbutang ug lit-ag alang sa katawhan? Dili, siya dili maghulat sa pagsikop sa katawhan nga dili makabantay aron sila pagalaglagon. Apan hisakpan ang katawhan sa katibuk-an nianang adlawa kay wala sila maghatag ug unang pagtagad sa Gingharian sa Diyos. Sila nagasubay sa kaugalingong dalan sa pangagpas sa kinabuhi, nga wala manumbaling sa mga hitabo alirong nila. Hinuon, dili kini mag-usab sa eskedyul sa Diyos. Siya may iyang kaugalingong panahon sa paghusay. Ug, sa kamaluluy-on, dili niya pasagdan nga ang katawhan mawalay alamag bahin sa iyang umaabot nga paghukom.​—Marcos 13:10.

 5, 6. (a) Tungod sa umaabot nga paghukom, unsang mahigugmaong tagana ang gihimo sa Maglalalang alang sa tawhanong mga linalang, apan uban sa unsang malangkobong sangpotanan? (b) Unsay pagatagdon sa pagtabang nato sa pagtukaw?

⁵ Kini nga pasidaan maoy mahigugmaong tagana sa bahin sa dakong Maglalalang, si kinsa interesado sa kaayohan sa tawhanong mga linalang dinhi sa iyang simbolikong tumbanan sa tiil. (Isaias 66:1) Siya nagamahal sa mga lumolupyo sa dapit diin ang iyang mga tiil giingong nahiluna. Busa pinaagi sa iyang yutan-ong mga embahador ug mga pinadala, siya nagapasidaan kanila mahitungod sa mga hitabo sa ilang unahan. (2 Corinto 5:20) Apan, bisan pa sa tanang pasidaan nga nahatag, kanang mga hitaboa modangat sa tawhanong pamilya nga wala dahoma nga samag sila nakatunob ug lit-ag. Ngano? Tungod kay ang kadaghanang tawo nahikatulog sa espirituwal. (1 Tesalonica 5:6) Diyutay lamang ang nagapamati sa pasidaan ug makalabang-buhi ngadto sa bag-ong kalibotan sa Diyos.​—Mateo 7:13, 14.

⁶ Nan, sa unsang paagi kita makaarang sa pagtukaw ning panahon sa kataposan aron maapil niadtong pagaluwason? Si Jehova nagatagana sa gikinahanglang tabang. Atong matikdan ang pito ka butang nga atong mahimo.

Pakigbisog sa Pagkalinga

 7. Unsang pasidaan mahitungod sa pagkalinga ang gihatag ni Jesus?

⁷ Una, kinahanglan nga kita makigbisog sa pagkalinga. Sa Mateo 24:42, 44, si Jesus miingon: “Busa, padayon sa pagbantay tungod kay wala kamo mahibalo kon unsang adlawa moabot ang inyong Ginoo. Tungod niini kamo usab mahimong andam, tungod kay sa takna nga wala kamo maghunahuna nga mao kini, ang Anak sa tawo moabot.” Ang pinulongan nga gigamit ni Jesus dinhi nagpaila nga ning lisod nga panahon, daghan ang makapalinga, ug ang pagkalinga mahimong motultol sa pagkalaglag. Sa adlaw ni Noe napuliki ang katawhan sa daghang butang. Ingong sangpotanan, ang nalinga nga katawhan “wala magtagad” kon unsay nagkahitabo, ug silang tanan gianod sa Baha. Uyon niana, si Jesus nagpasidaan: “Mao usab unya sa presensiya sa Anak sa tawo.”​—Mateo 24:37-39.

 8, 9. (a) Sa unsang paagi ang kasagarang mga kalihokan sa kinabuhi makapalinga kanato? (b) Unsang pasidaan ang gihatag kanato ni Pablo ug ni Jesus?

⁸ Ibutang sa hunahuna, usab, nga sa iyang pasidaan sa Lucas 21:34, 35, si Jesus naghisgot sa kasagarang mga kalihokan sa kinabuhi, sama sa pagkaon, pag-inom, ug mga kabalaka sa pangabuhi. Sila maoy mga butang kasagaran sa tanang tawo, apil sa mga tinun-an ni Ginoong Jesus. (Itandi ang Marcos 6:31.) Kining mga butanga sa kaugalingon tingali dili makadaot, apan kon itugot, sila makapalinga kanato, makapapuliki kanato, ug sa ingon makadasig sa makuyaw espirituwal nga pagduka diha kanato.

⁹ Busa, dili nato pasagdan ang butang labing hinungdanon​—ang pagbaton sa balaang pag-uyon. Inay mapuliki sa kasagarang mga butang sa kinabuhi, atong gamiton sila sa limitadong sukod nga gikinahanglan aron kita mabuhi. (Filipos 3:8) Sila dili angay magpalagpot sa intereses sa Gingharian. Sumala sa ginaingon sa Roma 14:17, “ang gingharian sa Diyos wala magkahulogan sa pagkaon ug sa pag-inom, kondili nagkahulogan sa pagkamatarong ug kalinaw ug kalipay uban sa balaang espiritu.” Hinumdomi ang mga pulong ni Jesus sa miingon siya: “Busa, padayon kamo sa pagpangita pag-una sa gingharian ug sa iyang pagkamatarong, ug kining tanan nga ubang butang igadugang ra kaninyo.” (Mateo 6:33) Dugang pa, sa Lucas 9:62, si Jesus mipahayag: “Walay tawo ang nagbutang sa iyang kamot sa usa ka daro ug molingi sa mga butang sa luyo ang takos sa gingharian sa Diyos.”

10. Unsang kapeligrohan ang nagalungtad kon dili nato itutok sa unahan ngadto sa tumong ang atong mga mata?

¹⁰ Inigsugod nato sa pagdaro, sa masambingayong pagkasulti, kinahanglang mopadayon kita sa tul-id nga linya. Ang magdadaro nga molingi dili makadaro ug tul-id nga tudling. Siya malinga ug daling mabalda o mapahunong sa usa ka kabaldahan. Dili kita manig-ingon sa asawa ni Lot, si kinsa milingi ug wala gayod makaabot sa luwas nga dapit. Kinahanglang itutok nato ang atong mga mata sa unahan ngadto sa tumong. Sa pagbuhat niana kinahanglang makigbisog kita sa pagkalinga.​—Genesis 19:17, 26; Lucas 17:32.

Pag-ampo sa Bug-os nga Katim-os

11. Unsay gipasiugda ni Jesus tapos sa pagpasidaan kanato mahitungod sa kapeligrohan sa pagkalinga?

¹¹ Hinuon, adunay labaw pa nga atong mahimo sa pagpabiling nagmata. Ang hinungdanon ikaduhang butang mao: Pag-ampo sa bug-os nga katim-os. Tapos sa pagpasidaan kanato batok sa pagkalinga sa kasagarang mga pangagpas sa kinabuhi, si Jesus mihatag niining tambaga: “Nan, pagtukaw kamo sa tanang panahon nga mangaliyupo aron kamo molampos unta sa pag-ikyas niining tanan nga butang nga mahitabo, ug sa pagbarog atubangan sa Anak sa tawo.”​—Lucas 21:36.

12. Unsang matang sa pag-ampo gikinahanglan, ug uban sa unsang sangpotanan?

¹² Busa, kinahanglang kita kanunay nga mangaliyupo mahitungod sa kapeligrohan sa atong kahimtang ug sa panginahanglan nga kita magmaigmat. Busa moduol kita sa Diyos nga mainampoon uban sa tim-os nga mga hangyo. Si Pablo nag-ingon sa Roma 12:12: “Lumahutay kamo sa pag-ampo.” Ug sa Efeso 6:18, atong mabasa: “Uban sa tanang matang sa pag-ampo ug pangaliya . . . , himoa ang pag-ampo sa tanang higayon diha sa espiritu. Ug sa maong tumong magtukaw kamo nga makanunayon gayod.” Kini dili lamang kaso sa pagtanyag ug pag-ampo nga morag kini wala-tuyoang butang nga dili kaayo hinungdanon. Ang atong paglungtad mismo nameligro. Busa kinahanglang mohangyo kita sa katim-os alang sa balaang panabang. (Itandi ang Hebreohanon 5:7.) Nianang paagiha kita magpabilin sa kiliran ni Jehova. Walay labaw nga mapuslanon nga magtabang nato sa paghimo niini kay sa nga kita ‘sa tanang panahon mangaliyupo.’ Unya si Jehova maghupot kanato sa kahimtang nga mabinantayon kanunay. Nan, pagkahinungdanon ang paglahutay sa pag-ampo!

Pabiling Suod sa Organisasyon sa Diyos ug sa Buluhaton Niini

13. Unsang matang sa pakig-uban ang gikinahanglan sa pagpabiling nagmata?

¹³ Buot natong moikyas niining tanang butang nga moabot sa kalibotan. Buot natong mobarog atubangan sa Anak sa tawo, nga magbaton sa iyang pag-uyon. Sa maong tumong adunay ikatulong butang nga atong mahimo: Tapot nga dili mabulag sa teokratikanhong organisasyon ni Jehova. Kinahanglang kita makig-uban nga walay pagpanuko sa maong organisasyon ug makig-ambit sa mga kalihokan niini. Niining paagiha kita magpaila sa tino nga kita mga Kristohanon nga nagmabinantayon.

14, 15. (a) Ang pagpakig-ambit sa unsang buluhaton ang motabang nato sa pagtukaw? (b) Kinsa ang magahukom kon kanus-a matapos ang buluhatong pagwali, ug angay unsa ang atong pagbati bahin niana? (c) Tapos sa dakong kasakitan, unsay atong masabtan sa dihang atong lingion ang buluhatong pagwali nga nahimo?

¹⁴ Suod nalangkit mao ang ikaupat nga butang nga makatabang nato sa pagtukaw. Kinahanglang kita maapil niadtong nagapasidaan sa katawhan mahitungod sa umaabot nga kataposan niining sistema sa mga butang. Ang bug-os nga kataposan niining daang sistema sa mga butang dili mahitabo hangtod nga “kining maayong balita sa gingharian” gikawali na sa gidak-on nga gituyo sa Diyos nga Makagagahom sa Tanan. (Mateo 24:14) Ang mga Saksi ni Jehova dili maoy maghukom kon kanus-a tapos na ang buluhatong pagwali. Gireserba ni Jehova sa iyang kaugalingon ang maong katungod. (Marcos 13:32, 33) Kita, hinuon, determinado nga manlimbasog kutob sa mahimo ug samtang gikinahanglan pa sa pagsangyaw bahin sa kinamaayohang kagamhanan nga mabatonan sa katawhan, ang Gingharian sa Diyos. Mosugod ang “dakong kasakitan” samtang ginabuhat pa nato kining buluhatona. (Mateo 24:21) Sulod nianang tibuok nga panahon sa umaabot, ang mga linuwas makahinumdom ug sa kinasingkasing makapamatuod nga si Jesu-Kristo dili bakakon nga propeta. (Pinadayag 19:11) Ang buluhatong pagwali unya mahimo na sa labaw pang gidak-on kay sa gidahom sa mga nakig-ambit niana.

¹⁵ Uyon niana, sa halandumong panahon sa dihang matapos na kining buluhatona sa kaugalingong katagbawan sa Diyos, daghan pang katawhan lagmit magapakig-ambit niana kay sa bisan unsang yugto sa panahon sa nangagi. Pagkamapasalamaton nato unya nga nakigbahin ning dakong buluhaton! Si apostol Pedro nagpasalig kanato nga si Jehova “dili buot nga may malaglag kondili buot nga ang tanan mahidangat sa paghinulsol.” (2 Pedro 3:9) Sa ingon, ang aktibong gahom sa Diyos nga Makagagahom sa Tanan nagalihok karong adlawa nga labing kusganon sukad, ug ang mga Saksi ni Jehova buot mopadayon niining tinukmod-sa-espiritung buluhaton. Busa pabiling suod sa organisasyon ni Jehova, ug magmapuliki sa publikong ministeryo niini. Kini mahimong usa ka tabang sa imong pagpabiling nagmata.

Himoa ang Pagsusi-sa-Kaugalingon

16. Nganong angay nga himoon nato ang pagsusi-sa-kaugalingon sa atong espirituwal nga kahimtang karon?

¹⁶ Adunay ikalimang butang nga atong mahimo aron magpabiling nagmata. Sa tinagsatagsa, angay nga himoon nato ang pagsusi-sa-kaugalingon sa atong kahimtang karon. Kini tukma karon kay sukad masukad. Kinahanglang pamatud-an nato kon kang kansang kiliran kita lig-ong nagbarog. Sa Galacia 6:4, si Pablo miingon: “Ang matag usa magsusi kon unsa ang iyang kaugalingong buhat.” Himoa ang pagsusi-sa-kaugalingon nga nahiuyon sa mga pulong ni Pablo sa 1 Tesalonica 5:6-8: “Dili kita mangatulog sama sa ginabuhat sa uban, apan magpabilin kitang nagtukaw ug magmabinantayon. Kay kadtong nangatulog naanad sa pagkatulog sa magabii, ug kadtong mangahubog kasagarang mangahubog sa magabii. Apan alang kanato nga iya sa adlaw, magmabinantayon kita ug magsul-ob sa kalasag sa pagtuo ug sa gugma ug ingong salukot ang paglaom sa kaluwasan.”

17. Sa dihang magahimo sa pagsusi-sa-kaugalingon, unsang mga pangutana ang atong isukna sa atong kaugalingon?

¹⁷ Komosta man kita? Sa dihang atong susihon ang atong kaugalingon sumala sa Kasulatan, makita ba nato nga kita nagapabiling nagtukaw, nga nagsul-ob ingong salukot sa paglaom sa kaluwasan? Kita ba mga tawo nga tinong nagbulag sa atong kaugalingon gikan sa daang sistema sa mga butang ug wala na maghambin sa mga ideya niini? Tinuod bang nabatonan nato ang espiritu sa bag-ong kalibotan sa Diyos? Bug-os ba kitang maigmat kon diin nagapadulong kining sistemaha? Kon mao, dili kita hisakpan sa adlaw ni Jehova nga morag kita mga kawatan.​—1 Tesalonica 5:4.

18. Unsang dugang mga pangutana ang kinahanglang atong isukna sa atong kaugalingon, ug uban sa unsang sangpotanan?

¹⁸ Apan, unsa man kon ang atong pagsusi-sa-kaugalingon magpadayag nga kita nanlimbasog sa pagtukod ug nindot, hayahay, hamugaway, relaks nga pagkinabuhi? Unsa man kon madiskobrehan natong ang atong espirituwal nga mga mata bug-at na tungod sa pagkanagduka ug matulog? Kita ba anaa sa kahimtang nga samag nagdamgo, nga nagagukod sa usa ka kalibotanong handurawan? Kon mao, nan magmata na kita!​—1 Corinto 15:34.

Palandonga ang Nangatuman nga mga Tagna

19. Unsa ang pipila sa mga tagna nga atong nakita nga natuman?

¹⁹ Karon hisgotan nato ang ikaunom nga butang nga motabang nato sa pagtukaw: Palandonga ang daghang tagna nga nangatuman ning panahon sa kataposan. Lapas na kita sa ika-77ng tuig sukad sa pagkatapos sa tinudlong mga panahon sa kanasoran niadtong 1914. Samtang atong hinumdoman ang kapig tres-kuwarto sa siglo, makita nato nga nangatuman ang sunodsunod nga tagna​—ang pagpasig-uli sa matuod nga pagsimba; ang pagluwas sa dinihogang nahibilin, uban sa ilang mga kauban, nga gipasulod sa espirituwal nga paraiso; ang pagwali sa maayong balita sa Gingharian lukop sa tibuok yuta; ang pagtungha sa dakong panon. (Isaias 2:2, 3; kapitulo 35; Zacarias 8:23; Mateo 24:14; Pinadayag 7:9) Nahitabo na ang pagbayaw sa dakong ngalan ug unibersohanong pagkasoberano ni Jehova, ingon man pag-uswag sa usang gamay nga nahimong dakong nasod, tungod kay si Jehova nagpadali niini sa iyang panahon. (Isaias 60:22; Ezekiel 38:23) Ug ang mga panan-awon ni apostol Juan diha sa asoy sa Pinadayag karon nagkaduol na sa ilang tayuktok.

20. Unsang pagtuo ang nahuptan sa mga Saksi ni Jehova, ug napamatud-an silang unsa?

²⁰ Busa, labaw pa kay sukad masukad, ang mga Saksi ni Jehova lig-on nga kombinsido sa katukma sa ilang pagsabot sa kahulogan sa mga kahikayan sa kalibotan sukad sa 1914. Kay nagbaton sa maong hugot nga pagtuo, sila nahimong mga instrumento diha sa mga kamot sa Labing Hataas nga Diyos. Sila mao ang gitugyanan sa pagpahayag sa balaang mensahe niining halandumong panahon. (Roma 10:15, 18) Oo, ang mga pulong ni Jehova alang sa panahon sa kataposan nangatuman. (Isaias 55:11) Kini, sa baylo, angay nga magdasig kanato nga mopadayon hangtod ato nang makita ang bug-os nga katumanan sa tanang saad sa Diyos pinaagi ni Jesu-Kristo.

Kaluwasan Mas Duol Kay sa Dihang Nahimo Kitang mga Magtutuo

21. Unsang ikapitong tabang sa pagpabiling nagmata sa espirituwal ang atong nabatonan?

²¹ Sa kataposan, ang ikapitong tabang sa atong pagpabiling nagmata: Ibutang kanunay sa hunahuna nga ang atong kaluwasan mas duol kay sa dihang nahimo kitang mga magtutuo. Labawng hinungdanon, ang pagbayaw sa unibersohanong pagkasoberano ni Jehova ug pagbalaan sa iyang ngalan haduol na kaayo. Busa ang panginahanglan sa pagtukaw labawng bililhon kay sukad masukad. Si apostol Pablo nagsulat: “Kamo nahibalo sa panahon, nga karon takna na nga kamo magmata gikan sa pagkatulog, kay karon ang atong kaluwasan labi pang haduol kay sa panahon nga kita nahimong mga magtutuo. Ang kagabhion talitapos na; ang adlaw nagsingabot na.”​—Roma 13:11, 12.

22. Sa unsang paagi angay kitang maapektahan sa pagkaduol sa atong kaluwasan?

²² Tungod kay duol na kaayo ang atong kaluwasan, kinahanglang magtukaw kita! Dili nato tugotan nga ang bisan unsang personal o kalibotanong intereses modun-ok sa atong apresasyon sa kon unsay ginabuhat ni Jehova alang sa iyang katawhan ning panahon sa kataposan. (Daniel 12:3) Kinahanglang ipakita nato ang dugang pagkamalahutayon kay sukad masukad aron dili kita mahisimang sa dalan nga tin-awng ginasugyot sa Pulong sa Diyos alang kanato. (Mateo 13:22) Ang ebidensiya sa tin-aw nagpakita nga kining kalibotana anaa na sa kataposang mga adlaw niini. Sa dili madugay kini pagapaphaon sa walay kataposan aron hatagag lugar ang usa ka bag-ong kalibotan sa pagkamatarong.​—2 Pedro 3:13.

23. Sa unsang paagi si Jehova motabang kanato, ug uban sa unsang bulahang sangpotanan?

²³ Nan, magtukaw gayod kita. Labaw pa kay sukad masukad, magmaigmat kon diin na kita sa agos sa panahon. Hinumdomi, dili gayod matulog si Jehova maylabot ning butanga. Hinunoa, kanunay niya kitang tabangan sa pagpabiling nagmata ning panahon sa kataposan. Ang gabii halalom na. Ang adlaw nagsingabot na. Busa magtukaw! Sa dili madugay atong masinati na ang labing matahom sa tanang mga adlaw, samtang tumanon sa Mesiyanikong Gingharian ang katuyoan ni Jehova alang sa yuta!​—Pinadayag 21:4, 5.

Unsa ang Imong mga Tubag?

◻ Unsay gipasabot ni Jesus sa miingon siya nga ang adlaw sa kapungot sa Diyos modangat sa katawhan “ingong lit-ag”?

◻ Nganong kinahanglang atong pakigbisogan ang pagkalinga, ug sa unsang paagi atong mahimo kana?

◻ Unsang matang sa pag-ampo ang gikinahanglan aron magpabiling nagmata?

◻ Unsang matang sa pakig-uban ang hinungdanon?

◻ Nganong himoon ang pagsusi-sa-kaugalingon sa atong espirituwal nga kahimtang?

◻ Unsa ang bahin sa tagna diha sa atong pagtukaw?