‘Pasagdi nga Madayag ang Imong Pag-uswag’

“Karon nga ako nahimo nang hamtong nga tawo, gihiklin ko na ang mga paaging binata.”​—1 CORINTO 13:11.

 1. Sa unsang paagi ang pagtubo usa ka pamatuod sa kahibulongang kalalangan?

GIKAN sa usa ka itlog nga labihang gamaya nga makita lang kini ilalom sa mikroskopyo, ang balyena mahimong motubo ngadto sa usa ka linalang nga kapin ug trayenta metros sa gitas-on ug may timbang nga kapin ug 80 toneladas. Sa susama, gikan sa usa sa kinagamyang mga liso, ang higanteng sequoia mahimong motubo ngadto sa kapin sa 90 metros nga gihabogon. Sa pagkatinuod, ang pagtubo usa sa mga katingalahan sa kinabuhi. Sumala sa pagpahayag niini ni apostol Pablo, kita mahimong magtanom ug magbisibis, apan “Diyos ang magapatubo.”​—1 Corinto 3:7.

 2. Unsang matang sa pagtubo ang gitagna diha sa Bibliya?

² Hinuon, adunay usa ka matang sa pagtubo nga sama ka katingalahan. Kini ang gitagna sa propetang si Isaias: “Ang usa nga diyutay mahimong usa ka libo, ug ang usa nga gamay mahimong usa ka kusganon nga nasod. Ako mismo, si Jehova, magapadali niini sa iyang kaugalingong panahon.” (Isaias 60:22) Kining tagnaa maoy kabahin sa pagtubo sa katawhan sa Diyos, ug kini may dakong katumanan sa atong adlaw.

 3. Sa unsang paagi ang taho sa 1991 nga tuig sa pag-alagad nagpakita nga si Jehova nagapadali sa buluhaton sa iyang katawhan?

³ Ang taho sa 1991 tuig-sa-pag-alagad sa tibuok-kalibotan nga buluhaton sa mga Saksi ni Jehova nagpakita nga ang gidaghanon sa mga magmamantala sa Gingharian miabot sa bag-ong kinatas-ang ihap nga 4,278,820, ug ang katibuk-ang gidaghanon sa 300,945 ka tawo nabawtismohan sulod sa tuig. Tungod sa pagsulod sa daghan kaayong mga bag-ohan, naporma ang 3,191 ka bag-ong kongregasyon, uban sa tumbas nga gidaghanon sa bag-ong mga sirkito ug distrito. Kana maoy kapin ug walo ka bag-ong kongregasyon sa usa ka adlaw, nga halos usa ka bag-ong sirkito sa matag duha ka adlaw. Kahibulongan gayong pag-uswag! Tin-aw, si Jehova nagapadali sa mga butang, ug ang iyang panalangin anaa sa paningkamot sa iyang katawhan.​—Salmo 127:1.

Panahon sa Pagsusi-sa-Kaugalingon

 4. Unsang mga pangutana ang atong pagahisgotan samtang kita molantaw sa umaabot?

⁴ Bisan pag makapadasig nga makita, kining panalangina nagdala usab ug tinong mga responsabilidad. Aduna kahay igong hamtong ug andam nga mga tawo aron sa pag-atiman sa espirituwal nga mga panginahanglan niining tanang bag-ohan? Samtang atong lantawon ang umaabot, makalilisang ang paghunahuna sa pagkadaghang mga payunir, ministeryal nga mga alagad, mga ansiano, ug nagapanawng mga magtatan-aw nga gikinahanglan aron sa pag-atiman sa pag-uswag ug pagpalapad, ingon man ang gidaghanon sa boluntaryong mga trabahante nga gikinahanglan sa mga sangang-buhatan ug mga Balayng Bethel sa tibuok nga kalibotan sa pagsuportar nianang buluhatona. Asa man unya magagikan kining daghan nga katawhan? Walay duhaduha nga ang alanihon dako. Apan kinsa karong adlawa ang makaarang sa pag-atiman sa tanang mangangani nga gikinahanglan aron sa pag-ani sa maong alanihon?​—Mateo 9:37, 38.

 5. Unsang mga kahimtang nagalungtad sa pila ka dapit tungod sa kusog nga pagtubo?

⁵ Pananglitan, gitahong sa pila ka bahin sa kalibotan, adunay mga kongregasyon nga abot ug usa ka gatos ang mga magmamantala sa Gingharian nga gialagaran sa usa ra ka ansiano uban sa usa o duha ka ministeryal nga alagad. Usahay ang usa ka ansiano kinahanglang moalagad sa duha ka kongregasyon. Sa pila ka dapit dako kaayo ang panginahanglan sa kuwalipikado Kristohanong mga ministro aron sa pagdumala sa mga pagtuon sa Bibliya sa balay nga ang mga bag-ohan kinahanglang ibutang sa mga listahan sa mga naghulat. Sa uban pang mga dapit, ginaporma ang bag-ong mga kongregasyon sa katulinon nga tulo, upat, o lima pa ka kongregasyon nga magagamit sa usa ka Kingdom Hall. Tingali nakakita ka ug pag-uswag nga sama niini diha sa inyong dapit mismo.

 6. Nganong ang pagsusi-sa-kaugalingon maoy tukma sa panahon sa atong bahin?

⁶ Unsay ginasugilon kanato sa nahaunang impormasyon? Nga tungod sa kapanahonan, kinahanglan nga kitang tanan magsusi sa atong mga kahimtang sa pagtan-aw kon gipahimuslan ba nato sa labing maayo ang atong panahon ug kahinguhaan aron sa pagsanong sa panginahanglan. (Efeso 5:15-17) Si apostol Pablo misulat ngadto sa Hebreohanong mga Kristohanon sa unang siglo: “Kay, sa pagkamatuod, bisan pag kamo angay nang mahimong mga magtutudlo tungod sa panahon, nanginahanglan na usab kamo nga may magatudlo kaninyo gikan sa sinugdanan sa mga paninugdang butang sa balaang mga pahayag sa Diyos; ug kamo nangahimong sama sa nanginahanglan ug gatas, dili sa magahing pagkaon.” (Hebreohanon 5:12) Sumala sa gipaila nianang mga pulonga, ang tinagsa ka mga Kristohanon kinahanglan usab nga motubo. Ug adunay dakong kapeligrohan nga ang usa magpabiling bata sa espirituwal inay mouswag ngadto sa Kristohanong pagkahamtong. Nahiuyon niini, si Pablo nagaawhag kanato: “Magpadayon kamo sa pagsusi kon kamo anaa sa pagtuo, magpadayon kamo sa pagpamatuod kon unsa kamo.” (2 Corinto 13:5) Nakasusi ka ba sa imong kaugalingon sa pagtan-aw kon ikaw ba nagatubo sa espirituwal nga paagi sukad sa panahon sa imong bawtismo? O ikaw ba walay pag-uswag? Ugaling, sa unsang paagi mailhan kana?

“Mga Kinaiyang Binata”

 7. Aron madayag ang espirituwal nga pag-uswag, unsay kinahanglang atong buhaton?

⁷ “Sa bata pa ako, nagsulti ako nga ingon ug bata, naghunahuna ako nga ingon ug bata, nangatarongan ako nga ingon ug bata; apan karon nga nahamtong na ako, gihiklin ko na ang mga kinaiyang binata,” matud ni apostol Pablo. (1 Corinto 13:11) Sa espirituwal nga pagtubo, sa usa ka panahon kitang tanan ingon ug mga bata sa atong mga panghunahuna ug mga linihokan. Ugaling, aron madayag ang pag-uswag, kinahanglang ihiklin nato “ang mga kinaiyang binata,” sumala pa ni Pablo. Unsay pipila sa maong mga kinaiya?

 8. Sumala sa mga pulong ni Pablo sa Hebreohanon 5:13, 14, unsa ang usa ka kinaiya sa espirituwal nga bata?

⁸ Nahauna, matikdi ang mga pulong ni Pablo sa Hebreohanon 5:13, 14: “Ang tanan nga nagainom ug gatas wala masinati sa pulong sa pagkamatarong, tungod kay siya usa ka masuso. Apan ang magahing pagkaon maoy alang sa mga tawong hamtong, alang kanila nga pinaagi sa paggamit ang ilang mga gahom sa salabotan nabatid sa pag-ila sa matarong ug daotan.” Ikaw ba ‘nasinati sa pulong sa pagkamatarong’? Ikaw ba may igo nga kahibalo sa Pulong sa Diyos, ang Bibliya, mao nga may katakos sa paggamit niini sa “pag-ila sa matarong ug daotan”? Si Pablo miingon nga ang mga tawong hamtong makaarang sa paghimo niana kay sila sa regular nagakaon ug “magahing pagkaon.” Busa, ang tinguha o gana sa usa alang sa gahing espirituwal nga pagkaon maoy maayong timailhan kon kaha ang usa nakatubo sa espirituwal o nagapabilin pang bata sa espirituwal.

 9. Sa unsang paagi ang gana sa espirituwal sa usa maoy timailhan sa iyang espirituwal nga pag-uswag?

⁹ Nan, komosta man ang imong espirituwal nga gana? Unsay imong pag-isip sa dagayang abiyo sa espirituwal nga pagkaon nga gitagana ni Jehova sa regular pinaagi sa mga basahon nga binase sa Bibliya ug sa Kristohanong mga tigom ug mga asembliya? (Isaias 65:13) Sa walay duhaduha ikaw malipay pag-ayo inigluwat sa bag-ong mga basahon sa panahon sa tinuig nga distritong mga kombensiyon. Apan unsay imong ginahimo kanila inig-abot mo sa balay? Unsay imong ginahimo inig-abot sa bag-ong gula sa Bantayanang Torre o Pagmata! nga mga magasin? Mogahin ka bag panahon sa pagbasa niining mga basahona, o imo lang kanang paklion sa pagtan-aw sa mga pangunang punto ug dayon idugang sila sa ubang anaa sa imong estante? Ang susamang mga pangutana ikasukna mahitungod sa Kristohanong mga tigom. Regular ka bang nagatambong sa tanang tigom? Nangandam ug nakigbahin ka ba kanila? Lagmit ang uban nabiktima sa dili maayong batasan sa pagkaon sa espirituwal, ang pagbasang hapawhapaw ug pagkaon nga dinalidali, ingnon ta. Pagkalahi sa salmista, kinsa miingon: “Gihigugma ko pag-ayo ang imong kasugoan! Sa tibuok nga adlaw kini ang akong gihunahuna.” Dugang pa, si Haring David miingon: “Pagadayegon ko ikaw diha sa dakong kongregasyon; taliwala sa daghan nga katawhan pagadayegon ko ikaw.” (Salmo 35:18; 119:97) Tin-aw, ang sukod sa atong pagpabili sa espirituwal nga mga pagkaon maoy timailhan sa atong espirituwal nga pagtubo.

10. Unsang kinaiya sa espirituwal nga bata ang gipaila sa Efeso 4:14?

¹⁰ Gipunting ni Pablo ang laing kinaiya sa usa ka espirituwal nga bata sa mipasidaan siya: “Angay kita dili na mga bata, nga gikusokuso sa mga balod ug gituyatuya sa matag hangin sa pagtulon-an pinaagi sa panglansis sa mga tawo, pinaagi sa pagkamalalangon sa gimugnang kasaypanan.” (Efeso 4:14) Sumala sa nasayran pag-ayo sa mga ginikanan, ang mga bata mausisaon sa tanang butang. Sa usa ka paagi kini positibo nga kinaiya kay makapaarang kini nila sa pagsusi ug sa pagkat-on ug sa inanay motubo ngadto sa hamtong nga mga tawo. Hinuon, ang kapeligrohan anaa sa ilang pagkadali nga malinga sa sunodsunod nga butang. Daotan pa, tungod sa kawalay kasinatian, ang maong kamausisaon sagad mohatod kanila ngadto sa grabeng suliran, nga magpameligro pa sa ilang kaugalingon ug sa uban. Tinuod usab kini sa espirituwal nga mga bata.

11. (a) Unsay diha sa hunahuna ni Pablo sa paggamit sa pamulong “matag hangin sa pagtulon-an”? (b) Unsang ‘mga hangin’ ang atong giatubang karong adlawa?

¹¹ Apan, unsay diha sa hunahuna ni Pablo sa miingon siya nga ang espirituwal nga mga bata gikusokuso “sa matag hangin sa pagtulon-an”? Dinhi, ang “hangin” gihubad gikan sa Gregong pulong aʹne·mos, nga mahitungod niana ang International Critical Commentary miingon nga morag kini “gipili ingong angay sa ideya sa pagkamabalhinon.” Kini giilustrar pag-ayo sa sunod nga mga pulong ni Pablo, “pinaagi sa panglansis sa mga tawo.” Ang pulong “panglansis” sa orihinal nga pinulongan nagkahulogang “dais” o “pagdulag-dais,” nga mao, usa ka sugal. Ang punto mao nga kanunay natong giatubang ang bag-ong mga ideya ug mga pangagpas nga tingali morag dili makadaot, madanihon, mapuslanon pa. Ang mga pulong ni Pablo mapadapat ilabina sa mga butang maylabot sa atong pagtuo​—mga kalihokang ekumenikal, mga sosyal ug politikanhong mga kawsa, ug ang susama. (Itandi ang 1 Juan 4:1.) Apan ang prinsipyo matuod gihapon kon bahin sa kanunay-mausob nga mga uso ug mga urog sa kalibotan​—mga estilo, kalingawan, mga pagkaon, mga paagi sa maayong panglawas o ehersisyo, ug uban pa. Tungod sa kakulang sa kasinatian ug maayong panghukom, ang espirituwal nga bata tingali malinga sa tuman nianang mga butanga ug niana mapugngan sa paghimog espirituwal nga pag-uswag ug pagtuman sa iyang labi pang hinungdanong Kristohanong mga obligasyon.​—Mateo 6:22-25.

12. Sa unsang paagi ang mga bata lahi sa mga hamtong kon bahin sa responsabilidad?

¹² Ang laing kinaiya sa mga bata mao ang ilang kanunay nga panginahanglan sa tabang ug pagtagad. Sila wala makaamgo ni mabalak-on sa mga responsabilidad; ang pagkabata mao ang panahon sa kinabuhi sa dihang halos tanan mao lamay kalingawan ug mga dula. Sumala sa pagpahayag niini ni Pablo, sila ‘nagsulti ingon ug bata, naghunahuna ingon ug bata, nangatarongan ingon ug bata.’ Pakasayonon lang nila nga atimanon sila sa uban. Ang sama ikasulti sa espirituwal nga bata. Sa dihang ang usa ka bag-ohan mohatag sa iyang unang pakigpulong sa Bibliya o mosugod sa pagsangyaw sa kanataran, ang espirituwal nga ginikanan malipay sa pagbuhat sa tanan aron sa pagtabang. Unsay mahitabo kon ang bag-ohan mopadayon sa pagsalig sa maong tabang ug mapamatud-ang dili makaarang sa pagdawat sa responsabilidad aron sa pag-atiman sa iyang kaugalingon? Tin-aw nga kana maoy timailhan sa kakulang sa pagpaningkamot sa kaugalingon.

13. Nganong ang matag usa magtuon sa pagpas-an sa iyang kaugalingong lulan?

¹³ Niining bahina hinumdomi ang tambag ni apostol Pablo nga bisan pag kita angay “magpadayon sa pagpas-an sa mga palas-anon sa usag usa,” sa gihapon “ang matag usa magpas-an sa iyang kaugalingong lulan.” (Galacia 6:2, 5) Hinuon, ang usa nanginahanglag panahon ug paningkamot sa pagkat-on sa pagpas-an sa Kristohanong mga responsabilidad, ug basin kinahanglan pa tingali ang paghimog mga sakripisyo sa pila ka natad. Bisan pa niana, grabeng sayop nga siya malangkit pag-ayo sa kalingawan ug sa mga dula sa kinabuhi, kon kaha sila lulinghayaw, mga biyahe, mga kasangkapan, o bisan dili-kinahanglang pangagpas sa sekular nga trabaho, nga ang usa basta lang maniid, ingnon ta, nga walay tinguha nga pauswagon ang bahin niya sa buluhatong paghimog disipulo o pagkab-ot sa espirituwal nga pag-uswag ug responsabilidad. “Mahimong mga magtutuman sa pulong, ug dili lamang mga tigpatalinghog, nga magalimbong sa inyong kaugalingon sa bakak nga pangatarongan,” miagda ang disipulong si Santiago.​—Santiago 1:22; 1 Corinto 16:13.

14. Nganong angay nga kita dili magmatagbawon sa pagpadayag sa mga kinaiya sa espirituwal nga bata?

¹⁴ Oo, adunay daghan dali mailhang mga kinaiya nga magpalahi sa bata gikan sa hamtong. Ugaling, ang hinungdanong butang, sumala pa ni Pablo, mao nga sa inanay ihiklin nato ang mga kinaiya sa bata ug mohamtong. (1 Corinto 13:11; 14:20) Kay kon dili, kita mahimong makulkol sa espirituwal nga diwa. Apan sa unsang paagi ang usa mouswag? Unsay nalangkit sa pagtubo sa espirituwal ngadto sa pagkahamtong?

Kon sa Unsang Paagi Madayag ang Pag-uswag

15. Unsa ang paninugdang mga lakang sa proseso sa pagtubo?

¹⁵ Buweno, sa unsang paagi mahitabo ang pagtubo diha sa kinaiyahan? “Matag indibiduwal magsugod sa kinabuhi ingong usa lang ka selula,” nagpatin-aw ang The World Book Encyclopedia. “Ang selula magpasulod sa materyales ug magbalhin niana kanila ngadto sa mga blokeng igtutukod nga gikinahanglan niini sa pagtubo. Sa ingon, ang usa ka selula motubo gikan sa sulod. Ang maong selula mahimong modaghan ug magbahin aron maporma ang ubang mga selula. Ang proseso sa pagtukod, pagdaghan, ug pagbahin maoy pagtubo.” Ang talagsaong punto dinhi mao nga ang pagtubo mahitabo gikan sa sulod. Sa dihang ang hustong sustansiya ipasulod, ipasuhop, ug gamiton, ang pagtubo mosangpot. Kini sa tin-aw makita sa kahimtang sa usa ka batang bag-ong nahimugso. Sumala sa atong nahibaloan, ang usa ka bag-ong nahimugso mokaon sa mapinadayonong suplay sa pagkaong espesyal nga pagkahikay, sa gatas, nga tugob sa tambok ug protena, ang materyales nga kinahanglanon sa pagtubo. Ang sangpotanan? Ang gidak-on sa pagtubo kon bahin sa timbang ug gitas-on nga mabatonan sa bata sa unang tuig dili gayod hitumbasan sa bisan unsang laing tuig sa naandang pagtubo sa nahibilin niining kinabuhi.

16. Unsang matang sa pagtubo ang makita sa kadaghanang bag-ong mga estudyante sa Bibliya, ug sa unsang paagi kana nahimo?

¹⁶ Daghan ang atong makat-onan gikan niining kinaiyanhong proseso sa pagtubo nga ikapadapat nato sa atong espirituwal nga pag-uswag gikan sa paninugdang mga bahin ngadto sa pagkahamtong. Una sa tanan, gikinahanglan ang makanunayong programa sa pagkaon. Hinumdomi ang panahon nga misugod ka sa pagtuon sa Bibliya. Kon sama ka sa kadaghanan nga uban, lagmit ikaw walay nasayran sa Pulong sa Diyos. Apan sa sunodsunod nga semana ikaw nag-andam sa imong mga leksiyon ug nagbaton sa imong pagtuon sa Bibliya, ug sa mubong panahon lamang, nasabtan nimo ang tanang paninugdang mga pagtulon-an sa Kasulatan. Kana, angkonon mo gayod, maoy katingalahang pagtubo, ug ang tanan sangpotanan sa regular nga pagtuon sa Pulong sa Diyos!

17. Nganong ang regular nga programa sa espirituwal nga pagkaon bililhon kaayo?

¹⁷ Apan, komosta na man karon? Ginasunod ba nimo gihapon ang regular nga programa sa pagkaon? Dili gayod angay isipon sa usa nga tungod lang kay siya nabawtismohan na, dili na kinahanglanon ang regular ug sistematikong pagtuon aron sa pagkaon ug sustansiyadong espirituwal nga pagkaon. Bisan pag si Timoteo usa ka hamtong Kristohanong magtatan-aw, si Pablo nag-awhag kaniya: “Palandonga kining mga butanga; ibug-os nimo ang imong pagtagad kanila, aron ang imong pag-uswag madayag sa tanang tawo.” (1 Timoteo 4:15) Unsa pa ka labaw nga matag usa kanato kinahanglang mohimo niana! Kon interesado ka nga madayag ang imong espirituwal nga pag-uswag, ang maong mga paningkamot bililhon kaayo.

18. Sa unsang paagi madayag ang espirituwal nga pag-uswag sa usa?

¹⁸ Ang pagpadayag sa pag-uswag sa usa wala magpasabot sa paghimog espesyal nga paningkamot nga ipagawal kon unsay nahibaloan sa usa o maninguha sa pagpadayeg sa uban. Si Jesus miingon: “Kamo mao ang kahayag sa kalibotan. Ang usa ka siyudad nga mahimutang sa usa ka bukid dili mahisalipdan” ug, “gikan sa kadagaya sa kasingkasing ang baba magasulti.” (Mateo 5:14; 12:34) Sa diha nga ang atong mga kasingkasing ug mga hunahuna mapuno sa maayong mga butang sa Pulong sa Diyos, ato gayong ikapadayag kini diha sa atong ginabuhat ug ginasulti.

19. Unsay ihukom nato nga buhaton mahitungod sa atong espirituwal nga pag-uswag, ug unsang sangpotanan ang mapanan-aw?

¹⁹ Busa, ang pangutana mao: Ikaw ba sa regular nagatuon sa Bibliya ug nagatambong sa Kristohanong mga tigom aron sa pagkaon ug sustansiyadong materyal nga makapakusog sa imong sulodnon, espirituwal nga pagtubo? Ayaw pagkatagbaw sa pagkahimong pasibong maniniid kon bahin sa espirituwal nga pagtubo. Kuhaa ang positibong mga lakang sa pagpaneguro nga ikaw nagapahimulos sa bug-os sa dagayang espirituwal nga pagkaon nga gitagana ni Jehova. Kon ikaw usa ka tawo kansang ‘kalipay anaa sa kasugoan ni Jehova, ug sa iyang kasugoan ikaw nagabasa diha sa ubos nga tingog sa adlaw ug gabii,’ nan ikaingon usab kini kanimo: “Siya mahisama gayod sa usa ka kahoy nga nahitanom sa daplin sa kasapaan sa tubig, nga magahatag sa iyang bunga sa iyang panahon ug ang kadahonan dili malaya, ug ang tanan nga iyang pagabuhaton molampos.” (Salmo 1:2, 3) Ugaling, unsay mahimo sa pagtino nga mopadayon ka sa paghimog espirituwal nga pag-uswag? Kini atong pagahisgotan sa sunod artikulo.

Makatubag Ka Ba?

◻ Nganong tukma sa panahon ang pagsusi sa atong espirituwal nga pag-uswag?

◻ Sa unsang paagi ang espirituwal nga pagtubo nalangkit sa espirituwal nga gana?

◻ Unsay gipasabot sa “matag hangin sa pagtulon-an”?

◻ Nganong ang matag usa kinahanglang magpas-an sa iyang kaugalingong lulan?

◻ Sa unsang paagi makab-ot ang espirituwal nga pag-uswag?

[Hulagway sa panid 10]

Nagagahin ka bag panahon sa pagbasag binase-sa-Bibliya nga mga basahon?