“Mga Magmamantala sa Gingharian” Mitadlas sa Katubigan sa Guyana

GUYANA.a Kining Amerindian nga pulong nagkahulogan ug “yuta sa daghang tubig.” Pagkahaom nga kahubitan sa nawong sa yuta niining nag-inusarang nasod sa Amerika del Sur nga Iningles ang pinulongan. Ang yuta giekis-ekisan sa daghang suba ug ilang tinubdan nga mga sapa, nga nag-ekis-ekis padulhog gikan sa Guiana Highlands latas sa tropikonhong lasang ngadto sa Dagat Atlantiko. Kining mga subaa nahimong linya sa transportasyon alang sa daghang balangay ug umahan nga nagkatag ubay sa ilang mga pangpang.

Ang mga Saksi ni Jehova sa Guyana nakasabot nga sa dihang si Jesus nagtagna nga “kining maayong balita sa gingharian igawali ngadto sa tanang kanasoran,” kana mag-apil sa pagwali sa maayong balita ngadto sa mga tawo nga nagpuyo didto sa mga teritoryo sa pangpang sa suba. (Mateo 24:14) Mao nga, sa katuigan, mga grupo sa mga Saksi, kadaghanan kanila mga payunir, migamit ug mga sakayan, dagko ug gagmay, sa pagtadlas sa katubigan sa Guyana aron dalhon ang maayong balita sa katawhan.

Aron makatabang sa buluhaton, ang Watch Tower Society sa Guyana nagagamit, hangtod karon, ug lima ka gamag-kahoy nga mga sakayan nga gitawag ug Kingdom Proclaimer I hangtod Kingdom Proclaimer V. Kana maoy 7-metros, walay-atop, pormang-​V-ang-luwang, gamag-kahoy nga mga sakayan nga gitawag ug balahoo, nga gigama ug gimentinar sa usa ka pamilyang Saksi. Mahigugmaong gitawag sa lokal nga mga Saksi ingong mga Proclaimer, ang unang duha ka sakayan gibaradero na tapos gamita sa mga dekada. Ang mga numero III, IV, ug V, hinuon, sa gihapon aktibo pa sa pag-alagad sa mga suba sa Pomeroon, Mahaica, ug Demerara.

Sa Demerara

Sa Britanya ug mga bahin sa Uropa, ang pulong “demerara” mahimong mopasantop sa hunahuna sa usa ka bulawanon-brawon, asukal-sa-tubo, nga ilado gikan sa mga plantasyon ubay niining lapokon ug punog-binanlas nga suba. Sa kasadpang pangpang, ang kalsada gikan sa baybay mosangko sa kinutoban sa katubhan. Saylo niana, ang mga Saksi nagdepende sa mga sakayang Kingdom Proclaimer aron dad-on ang matam-is nga mensahe sa Gingharian ni Jehova ngadto sa mga molupyo sa pangpang sa suba​—mga Hindu, Muslim, ug nominal nga mga Kristiyano.

Ang mga kampanya sa pagsangyaw sa Demerara mahimong abtag usa ka adlaw nga panakayan o mahimong dangtag pipila ka semana, sa pagdunggodunggo, gikan sa buntag hangtod sa sawumsom. Sa mga panakayan nga abtag gabii, ang mga payunir dili lang magluto ug mangaon diha sa sakayan apan mangatulog usab dinha. Inigkagabii, ang Proclaimer ihikot sa kahoyng bakhaw o ipundo ubay sa dunggoanan kon aduna. Ang duha ka 2.5 metros nga tukon patindogon sa dulong ug sa ulin. Usa ka pisi ang inaton ibabaw niining nagtindog nga mga tukon, ug usa ka dakong trapal ang isablay ibabaw niana aron maporma ang usa ka atop, o tabon. Mga plangka nga kahoy maoy mosilbing mga katre, ug usa ka habol ug sapin ang magsilbing kutson. Walay sapayan, dali rang makatulog tapos sa usa ka hago nga adlaw.

“Mangaligo ba kamo sa lubog nga tubig?” ang mga payunir gipangutana.

“Dili gawas lang kon dili kana kalikayan!” maoy tubag. “Sa matag higayon nga makaagi kamig sapa nga may preskong tubig, among pun-on ang among mga panudlanan sa tubig alang sa pagluto, ilimnon, ug pangkaligo.”

Ang ilang paglahutay gigantihan sa daghang maayong mga eksperyensiya. Sa usa ka higayon, usa ka lalaki ang miduol sa dunggoanan, nagtindog nga gibikang ang mga tiil, ug nanighawak, ug may dulot nga interes nga nagtan-aw kanamo. “Kingdom Proclaimer V”! Gibasa niyag kusog ang ngalan sa dulong sa sakayan. “Mga Saksi ni Jehova kamo. Kamo lang ang mga tawong nagagamit sa pulong ‘gingharian’ nianang paagiha. Kamo may Kingdom Hall ug karon may Kingdom Proclaimer.”

Gikan sa Gilead Ngadto sa Pomeroon

Ang buluhaton ubay sa Subang Pomeroon may pagkalahig kinaiya, sumala sa nahinumdoman ni Frederick McAlman. Usa ka tuig tapos sa iyang graduwasyon gikan sa Watchtower Bible School of Gilead niadtong 1970, miadto siya sa Charity, usa ka banikanhong balangay sa pangpang sa suba nga 34 kilometros pailaya sa sidlakang pangpang sa Pomeroon, diin may grupo sa lima ka magmamantala sa Gingharian.

“Sulod sa lima ka tuig, kami ‘nalingaw’ sa pagbugsay sa Proclaimer II pailaya ug pailawod sa Pomeroon sa wala pa kami makabaton sa segunda-mano, unom-kabalyos nga outboard nga makina,” hinumdom ni Brader McAlman. “Sa pagbugsay pauyon sa balod, kami mosangyaw pailawod sa sidlakang pangpang hangtod makaabot kami sa Hackney, nga 11 kilometros gikan sa bukana. Didto, komportable ang among pagkatulog sa balay ni Sister DeCambra, ang komadrona nga nag-alagad sa dapit niadtong panahona. Sayo sa sunod buntag, mopadayon kami pailawod sa bukana sa suba una pa motabok sa kasadpang pangpang. Unya motrabaho kami pailaya balik ug 34 kilometros hangtod sa Charity.”

Ang unom-kabalyos nga makina nakasilbi kanilag maayo sulod sa napulo ka tuig. Unya, niadtong 1986, kadto giilisan ug bag-o, 15-kabalyos nga modelo. Tapos sa pag-alagad nga matinumanon sa Pomeroon sa kapig 21 ka tuig, si Brader McAlman makatan-aw uban ang pagbati sa kalamposan sa bag-ong natukod nga Kingdom Hall sa Charity, nga karon gigamit sa kongregasyon nga may 43 ka magmamantala, nga mangabot gikan sa ilaya o ilawod sa suba. Ang aberids nga tumatambong mosobrag 60, ug sa 1992 nga Memoryal sa kamatayon ni Jesu-Kristo, sila may tumatambong nga 190!

Nangita sa “Tawo sa Watchtower”

Lunes mao ang tabo sa Charity. Busa kana usa ka maayong higayon sa pagmantala sa maayong balita, ug ang mga Saksi atua didto dala ang mga magasing Bantayanang Torre ug Pagmata! Usa ka adlaw sa sinugdan sa mga katuigang 1970, si Monica Fitzallen gikan sa Warimuri sa Moruka mianha sa taboanan ug midawat ug duha ka magasin gikan kang Brader McAlman. Apan sa iyang pag-abot sa balay, iyang gibutang ang mga magasin sa kinahiladman sa iyang baol.

“Kana nagpabilin didto sa duha ka tuig nga wala nako mabasa,” hinumdom ni Monica. “Unya nagkasakit ako ug naghigda akog dugay. Sa naulian ako, gisugdan kog susi ang matag butang nga mabasa diha sa balay aron ako mapuliki. Sa ulahi, akong nahinumdoman ang duha ka magasin sa baol ug gisugdan kanag susi.” Iyang nasabtan nga kana kamatuoran dihadiha dayon.

Sa dihang naayo na si Monica, iyang gihangyo ang iyang bana, si Eugene, nga mangitag trabaho ubay sa Pomeroon aron nga basin mahibalag niya ang lalaki nga naghatag kaniya sa mga magasin. Si Eugene misugot apan nakaarang lamang sa pagtrabaho sa usa ka uma sa dapit sa Pomeroon alang sa usa ka semana, gikan sa Lunes hangtod udto sa Sabado.

Nianang Sabadoha, si Monica wala pa gihapon makakita sa lalaki nga naghatag kaniya sa mga magasin. Sa mga udto na, iyang gipangutana ang iyang bana kon ang balod motugot kanila sa pagbugsay ngadto sa Charity aron pangitaon ang “tawo sa Watchtower.” Igo lang gayod siyang nakatapos sa pagsulti, nakadungog silag mga tikang sa latayan ug nakita ang mapahiyomong nawong sa usa ka sister nga nagsingabot sa pagtanyag sa kinaulahiang mga kopya sa magasin. “Usa ka ba sa mga tawo sa Watchtower?” sukna ni Monica. Daghan kaayong mga pangutana ang mingsunod nga ang sister kinahanglang mobalik sa sakayan aron mokuhag tabang. Kinsa ang miuban? Kinsa pa kondili si Brader McAlman!

Usa ka pagtuon sa Bibliya pinaagig sulat ang gihikay. Sa wala madugay sa ulahi, si Monica mipadalag sulat sa pagluwat sa Anglikanong Simbahan. Ingong tubag nakadawat siyag sulat gikan sa pari: “Ayawg paminaw sa mga JW. Mabaw sila sa ilang pagsabot sa Bibliya. Moanha ako sa paghisgot sa butang uban kanimo.” Hangtod karon, ang pari wala magpakita. Kasamtangan, si Monica nabawtismohan niadtong 1975. Usa ka tuig sa ulahi, ang iyang bana, nga karon mahigugmaong gitawag ug Tiyo Eugene sa mga igsoon, nabawtismohan usab tapos sa iyang maampingong pagsusi sa Kasulatan. (Buhat 17:10, 11) Bisan pag sila nagpuyo sa dapit nga sakyon pag bangka sa 12 ka oras gikan sa kinaduolang kongregasyon sa Charity, sila nagpabiling aktibong mga magmamantala sa Gingharian hangtod karong adlawa.

Misyonaryong mga Panaw Painteryor

Ning ulahing mga tuig ang Watch Tower Society nagpadalag regular nga misyonaryong mga panaw ngadto sa pinakainteryor. Pinaagi sa mga sakayang nasangkapan sa outboard nga mga makina, ang andam nga mga boluntaryo nakatagamtam sa kalipay sa pagdala sa maayong balita ngadto sa mga tawo nga nagpuyo sa Amerindian nga mga reserbasyon ug sa hilit nga logging ug agrikultural nga mga komunidad ubay sa pila ka suba sa interyor. Nga mga payunir sa tinuod nga kahulogan sa pulong, sila may pribilehiyo sa pagdala sa nagaluwas-sa-kinabuhing “ngalan ni Jehova” ngadto nianang halayong mga dapit sa unang higayon sukad. (Roma 10:13-15) Ang mga igsoon kinahanglang moantos sa daghang kalisod, usahay mobiyahe sa mga suba kutob sa tulo ka bug-os nga adlaw aron maabot ang pila nianang mga dapit. Apan ang mga ganti takos niana.

Usa ka batan-ong lalaki, nga usa ka Pentecostal nga nagpuyo duol sa logging nga komunidad sa Kwebanna sa Subang Waini, ang nakontak sa unang misyonaryong biyahe nianang dapita niadtong Hulyo 1991. Sa sunod nga duaw sa Oktubre, usa ka pagtuon sa Bibliya ang gisugdan. Sa unang higayon, iyang nakita gikan sa iyang kaugalingong Bibliya nga ang ngalan sa Diyos mao si Jehova, nga si Jesus dili ang Labing Gamhanan, ug nga ang doktrina sa Trinidad dili Kasulatanhon. (Salmo 83:18; 1 Corinto 11:3) Siya nadasig kaayo nga, tapos molakaw ang mga igsoon, iyang gitigom ang pila ka isigka-Pentecostal ug gisugdan sa pagpakita gikan sa ilang kaugalingong mga Bibliya ang kamatuoran mahitungod kang Jehova nga Diyos ug kang Jesu-Kristo. Sa dihang ang kadaghanan dili modawat sa kamatuoran, siya nakahukom nga kadto mao na ang panahon sa pagluwat ug pagpahawa gikan sa “Babilonyang Bantogan.” (Pinadayag 18:2, 4) Sa dihang ang mga igsoon mingbalik sa pagpakigkita kaniya niadtong Pebrero 1992, siya misugilon kanila kon unsay nahitabo ug midugang: “Gusto kong makig-uban kaninyo. Gusto kong mahimong usa sa mga Saksi ni Jehova. Gusto kong tudloan ang mga tawo sa kamatuoran!”

Ang mga kasinatiang sama niana motabang sa mga igsoon sa pagpadayon sa pagbuhat niining mahagitong buluhaton. Kadtong nagpadayon sa misyonaryong mga biyahe kinahanglang mosakripisyo sa kaharuhay sa balay, nga maladlad sa mga sakit sama sa malaria, ug agwantahon ang kapeligrohan sa kinabuhing banikanhon. Apan kadtong nahibilin nagsakripisyo usab. Ang mga pamilya mingawon sa mga hinigugma, usahay mga semana sa usa ka higayon. Ang mga kongregasyon kinahanglang molihok nga wala ang ilang mga ansiano ug ubang batan-ong mga lalaki kay, sa pila ka kaso, usa lamang ka brader ang nabilin aron moatiman sa panginahanglan sa kongregasyon. Bisan pa niana, pagkadako sa kalipay ug pagdasig ang mabatonan sa dihang ang kongregasyon makadungog sa ilang makapalihok nga mga kasinatian sa ilang pagpamauli! Ang mga sakripisyo gamay ra kon itandi sa kalipay.

Ang mga magmamantala sa Gingharian nga nagtadlas sa daghang mga tubig sa Guyana dala ang maayong balita nagtagamtam sa usa ka tinuod tagsaong kasinatian. Uban sa ilang isigka-magbubuhat sa tibuok kalibotan, sila maisogon ug andam nga “motanyag sa Diyos ug usa ka halad sa pagdayeg, nga mao, ang bunga sa mga ngabil nga nagapahayag nga katilingbanon sa iyang ngalan.”​—Hebreohanon 13:15.

[Footnote]

[Mapa sa panid 24]

(Alang sa aktuwal nga pagkahan-ay, tan-awa ang publikasyon)

HONDURAS

NICARAGUA

COSTA RICA

PANAMA

VENEZUELA

COLOMBIA

GUYANA

SURINAME

FRENCH GUIANA

BRAZIL

BOLIVIA

ATLANTIC OCEAN

[Mga hulagway sa panid 26, 27]

Wala: Nagsangyaw sa adlaw sa tabo

Ibabaw: Naghisgot sa maayong balita sa Subang Demerara

Ibabaw sa tuo: Ang grupo sa misyonaryo nga nagbugsayg balik sa kampo