Ikaw ba Nagasunod Kang Jehova sa Bug-os?
“ANG matarong maisog sama sa nating liyon.” (Proverbio 28:1) Sila nagapakitag pagtuo, masaligong nagadepende sa Pulong sa Diyos, ug nagapadayon sa pag-alagad kang Jehova nga maisogon atubangan sa bisan unsang kapeligrohan.
Samtang didto pa sa Sinai ang mga Israelinhon human nga sila giluwas sa Diyos gikan sa pagkaulipon sa Ehipto sa ika-16 nga siglo W.K.P., duha ka lalaki ilabinang nagpakita nga sila sama ka isog sa mga liyon. Nagpakita usab sila ug pagkamatinumanon kang Jehova ubos sa dili maayong mga kahimtang. Ang usa niining mga lalakiha mao si Josue nga taga-Ephraim, nga katabang ni Moises ug sa ulahi gitudlo ingong iyang sumusunod. (Exodo 33:11; Numeros 13:8, 16; Deuteronomio 34:9; Josue 1:1, 2) Ang lain mao si Caleb, ang anak nga lalaki ni Jephone sa tribo ni Juda.—Numeros 13:6; 32:12.
Maunongon ug masibotong gituman ni Caleb ang kabubut-on ni Jehova. Tungod sa iyang hataas nga kinabuhi sa matinumanong pag-alagad sa Diyos siya nakasulti nga iyang ‘gisunod si Jehova sa bug-os.’ (Josue 14:8) “Ako bug-os nga maunongon sa GINOO, nga akong Diyos,” nag-ingon ang The New American Bible. Si Caleb “matinumanong misunod,” o “maunongong mituman sa katuyoan,” ni Jehova nga Diyos. (Today’s English Version; The New English Bible) Sa laing pagkasulti, si Caleb miingon: “Akong . . . gisunod ang GINOO nga akong Diyos sa kinasingkasing gayod.” (New International Version) Ikaw komosta? Bug-os ba nimong gisunod si Jehova?
Gipanid-an ang Yuta
Handurawa ang imong kaugalingon nga kauban sa mga Israelinhon human gilayon nga gipagawas sila ni Jehova gikan sa pagkaulipon sa mga Ehiptohanon. Tan-awa kon sa unsang paagi matinumanong gisunod ni manalagnang Moises ang hinatag-sa-Diyos nga mga instruksiyon. Oo, ug matikdi ang pagtuo ni Caleb nga nagauban si Jehova sa Iyang katawhan.
Ikaduhang tuig kadto human sa Paggula gikan sa Ehipto, ug ang mga Israelinhon nagkampo sa Kadesh-barnea sa kamingawan sa Paran. Sila nanukad sa utlanan sa Yutang Saad. Sa sugo sa Diyos, hapit na nga ipadala ni Moises ang 12 ka espiya ngadto sa Canaan. Siya miingon: “Tumungas kamo dinhi ngadto sa Negeb, ug tumungas kamo ngadto sa kabukiran. Ug susiha ninyo ang yuta kon unsa kana ug ang mga tawo nga nanimuyo niana, kun mga kusgan ba o mahuyang, kun sila diyutay ba o daghan; ug unsang matanga sa yuta ang ilang gipuy-an, kun kini ba maayo o dili, ug unsang matanga sa mga siyudad ang ilang gipuy-an, kun mga kampo ba o kinutaan; ug unsa ang yuta, tabunok ba o umaw, kun aduna bay kahoy o wala. Ug kinahanglang magpakita kamo nga maisogon ug magdala kamo ug mga bunga sa yuta.”—Numeros 13:17-20.
Gisugdan sa 12 ka lalaki ang ilang peligrosong panaw. Ang ilang biyahe mikabat ug 40 ka adlaw. Sa Hebron nakakita sila ug dagko kaayong mga tawo. Sa walog sa Escol, ilang nakita ang kamabungahon sa yuta ug mihukom nga magdalag-balik ug pipila ka bunga niini. Bug-at kaayo ang usa ka pungpong sa parras nga nagkinahanglag duha ka tawo sa pagyayong niini!—Numeros 13:21-25.
Mibalik sa kampo sa mga Israelinhon, nagtaho ang mga espiya: “Nakaabot kami sa yuta nga imong gipaadtoan kanamo, ug kini tinuod gayod nga nagaagay sa gatas ug dugos, ug kini mao ang bunga niini. Bisan pa, ang mga tawo nga nagpuyo sa maong yuta kusgan, ug dagko kaayo ang ilang kinutaang mga siyudad; ug, gawas pa niini, nakita namo didto ang mga anak ni Anak. Ang mga Amalekanhon nagpuyo sa yuta sa Negeb, ug ang mga Hitihanon ug ang mga Jebusihanon ug ang mga Amorihanon ang nagpuyo sa kabukiran, ug ang mga Canaanhon nagpuyo sa duol sa dagat ug sa daplin sa Jordan.” (Numeros 13:26-29) Ang napulo ka espiya dili pa andam sa pagdawat sa mga sugo sa Diyos ug sa pagmartsa ngadto sa Yutang Saad.
“Si Jehova Nagauban Kanato”
Hinunoa, may pagtuo kang Jehova nga Diyos, ang maisog nga espiyang si Caleb miagda: “Manungas kita dayon, ug seguradong atong mapanag-iya kana, kay kita makahimo kaayo sa pagdaog niana.” Apan ang napulo ka espiya misupak, nga miingon nga ang mga molupyo sa Canaan mas kusgan kay sa mga Israelinhon. Ang nalisang ug kulag pagtuo nga mga espiya naglantaw sa ilang kaugalingon nga samag mga dulon lamang.—Numeros 13:30-33.
“Si Jehova nagauban kanato. Ayaw sila kahadloki,” miingon si Caleb ug Josue. Ang ilang mga pulong milapos sa pikas dalunggan. Sa dihang namulong ang katawhan nga ilang batoon sila, nangilabot ang Diyos ug mipakanaog ug sentensiya sa mga bagulbolan: “Dili kamo makasulod ngadto sa yuta nga akong gipanumpa nga inyong pagapuy-an, gawas kang Caleb ang anak nga lalaki ni Jephone ug kang Josue ang anak nga lalaki ni Nun. Ug ang inyong gagmayng mga anak . . . akong pasudlon, ug sila makapahimulos sa yuta nga inyong gisalikway. . . . Ug ang inyong mga anak mahimong mga magbalantay diha sa kamingawan sa kap-atan ka tuig, . . . hangtod ang inyong mga patayng lawas mangaut-ot diha sa kamingawan. Sumala sa gidugayon sa adlaw nga inyong gipanid-an ang yuta, kap-atan ka adlaw, usa ka tuig alang sa matag usa ka adlaw, usa ka tuig alang sa matag usa ka adlaw, manubag kamo sa inyong mga kasaypanan sa kap-atan ka tuig.”—Numeros 14:9, 30-34.
Matinumanon Gihapon sa Milabay ang mga Katuigan
Ang 40 ka tuig nga silot natapos, ug nangamatay ang tibuok nga kaliwatan sa mga bagulbolan. Apan si Caleb ug Josue matinumanon gihapon sa Diyos. Diha sa kapatagan sa Moab, giihap ni Moises ug ang Hataas nga Saserdoteng si Eleazar ang mga lalaki nga mahimo nang mosulod sa pagkasundalo nga nag-edad ug 20 pataas. Ginganlan sa Diyos ang usa ka tawo gikan sa matag tribo sa Israel nga saligan sa pagbahinbahin sa Yutang Saad. Lakip kanila si Caleb, Josue, ug Eleazar. (Numeros 34:17-29) Bisag niining panahona 79 anyos na, si Caleb kusgan gihapon, maunongon, ug maisogon.
Sa dihang giihap ni Moises ug Aaron ang katawhan diha sa Sinai una pa sila sa mahadlokon midumili sa pagsulod sa yuta sa Canaan, ang manggugubat nga mga lalaki sa Israel may gidaghanong 603,550. Human sa upat ka dekada diha sa kamingawan, ang mga sundalo mikunhod sa gidaghanong 601,730. (Numeros 1:44-46; 26:51) Bisan pa, uban kang Josue nga ilang pangulo ug sa matinumanong Caleb nga uban kanila, ang mga Israelinhon misulod sa Yutang Saad ug naangkon ang daghang kadaogan. Sama sa gilaoman ni Josue ug Caleb kanunay, si Jehova maoy nagpadaog sa mga gubat alang sa iyang katawhan.
Mitabok sa Subang Jordan uban sa mga manggugubat nga mga lalaki sa Israel, ang tigulang nang si Josue ug Caleb maoy nangabaga sa ilang mga palas-anon sa sunodsunod nga mga gubat. Human sa unom ka tuig sa pagpakiggubat, hinunoa, dako pa ang yuta nga kinahanglang okupahon. Si Jehova magpapahawa sa mga molupyo apan karon nagsugo nga ang yuta bahinbahinon pinaagig ripa taliwala sa mga tribo sa Israel.—Josue 13:1-7.
Iyang Gisunod si Jehova sa Bug-os
Ingon nga beterano sa daghang gubat, si Caleb mibarog atubangan kang Josue ug miingon: “Kap-atan ka tuig ang akong panuigon sa dihang gipadala ako ni Moises nga alagad ni Jehova ngadto sa Kadesh-barnea aron sa pagpaniid sa yuta, ug nagdala ako kaniya ug taho sumala sa gibati sa akong kasingkasing. Ugaling gipatunaw sa kahadlok sa akong mga igsoon nga mitungas uban kanako ang katawhan; apan alang kanako, gisunod ko si Jehova nga akong Diyos sa bug-os.” (Josue 14:6-8) Oo, gisunod ni Caleb si Jehova sa bug-os, maunongong mituman sa kabubut-on sa Diyos.
“Busa,” midugang si Caleb, “si Moises nanumpa niadtong adlawa, nga nagaingon, ‘Ang yuta nga gilaktan sa imong mga tiil imong mapanag-iya ug sa imong mga anak’ ingong panulondon sa walay kataposan, tungod kay gisunod mo si Jehova nga akong Diyos sa bug-os.’ Ug karon ania si Jehova nagtipig kanako nga buhi, sama sa iyang gisaad, kining kap-atan ug lima ka tuig sukad nga gisaad kini ni Jehova kang Moises sa dihang ang mga Israelinhon naglakaw pa sa kamingawan, ug ania ako karon kawaloan na ug lima ka tuig ang panuigon. Apan lig-on gihapon ako karon sama sa mga adlaw sa dihang gipadala ako ni Moises. Sumala sa akong kusog kaniadto, mao usab ang akong kusog karon alang sa gubat, sa paggula ug sa pagsulod. Ug karon ihatag kanako kining kabukiran nga gisaad ni Jehova niadtong adlawa, kay ikaw mismo nakadungog niadtong adlawa nga didto ang mga Anakim ug dagko ang mga siyudad nga kinutaan. Tingali si Jehova magauban kanako, ug abogon ko gayod sila, sama sa gisaad ni Jehova.” Gikuha karon ni Caleb ang Hebron ingon nga iyang panulondon.—Josue 14:9-15.
Nadawat sa tigulang nga Caleb ang labing malisod nga asaynment—usa ka dapit nga puno sa mga tawong dagko kaayo. Apan dili kaayo kini malisod alang sa 85-anyos nga manggugubat. Sa ulahi ang mga daogdaogang mga tawo nga nagpuyo sa Hebron nangahanaw. Nailog ni Othniel, ang anak nga lalaki sa manghod nga igsoon ni Caleb ug usa ka maghuhukom sa Israel, ang Debir. Ang duha ka siyudad sa ulahi giokupar sa mga Levihanon, ug ang Hebron nahimong usa ka siyudad nga dalangpanan alang sa dili-tinuyong mamumuno.—Josue 15:13-19; 21:3, 11-16; Maghuhukom 1:9-15, 20.
Kanunayng Sunda si Jehova sa Bug-os
Si Caleb ug Josue maoy mga tawong dili-hingpit. Bisan pa, matinumanon nilang gituman ang kabubut-on ni Jehova. Ang ilang pagtuo wala gayod mapalong sa panahon sa 40 ka tuig nga kalisod sa kamingawan nga maoy misangpot tungod sa kapakyasan sa Israel sa pagsugot sa Diyos. Sa susama, ang modernong mga alagad ni Jehova wala gayod magpababag sa bisan unsa sa ilang pag-alagad sa kadayeganan sa Diyos. Sanglit nahibalo nga adunay padayong pagpakig-away tali sa organisasyon sa Diyos ug kang Satanas nga Yawa, sila malig-on, padayong naningkamot sa pagpahimuot sa ilang langitnong Amahan diha sa tanang mga butang.
Pananglitan, gipangarisgar sa daghang katawhan ni Jehova ang mapintas nga pagtratar ug bisan kamatayon sa pagsaulog sa Panihapon sa Ginoo, o sa Memoryal sa kamatayon ni Jesu-Kristo. (1 Corinto 11:23-26) Niining bahina usa ka Kristohanong babaye nga nabilanggo sa kampong konsentrasyon sa Nazi sa Gubat sa Kalibotan II mitaho:
“Ang tanan gisultihan sa pag-adto sa labhanan sa alas 11 s. g. Untop sa alas 11 s. g. kami nagtigom, 105 ang gidaghanon. Dug-ol kaayo kaming nagbarog nga nag-alirong, nga sa tunga [niini dihay] tumbanan nga may puting panapton nga gibutangag mga emblema. Naiwagan sa usa ka kandila ang lawak, kay madayag unya kami sa suga nga dekoryente. Gibati namo nga sama kami sa karaang mga Kristohanon diha sa dagkong langob nga sementeryo sa ilalom sa yuta. Kadto maoy solemneng pagsaulog. Gipahayag namo pag-usab ang among mainitong mga panumpa ngadto sa atong Amahan sa paggamit sa tanan namong kusog sa pagbayaw sa Iyang balaang ngalan, sa pagbarog nga matinumanon alang sa Ang Teokrasiya.”
Bisan pa sa atong mga pagsulay ingong linutos nga mga alagad ni Jehova, kita makasalig sa hinatag-sa-Diyos nga kusog sa pag-alagad kaniya nga maisogon ug sa paghimaya sa iyang balaang ngalan. (Filipos 4:13) Samtang kita maningkamot nga mapahimut-an si Jehova, makahatag kanatog kaayohan ang paghinumdom kang Caleb. Ang iyang panig-ingnan sa pagsunod kang Jehova sa bug-os nakadasig sa usa ka bayong nga misulod sa bug-os panahong pagsangyaw nga buluhaton balik pa sa 1921. Siya misulat:
“Bisag ang pagkahimong payunir nagkahulogang pagbiya sa akong maayong trabaho diha sa modernong imprintahan sa Coventry [Inglaterra], wala ako magbasol. Nahusay sa akong dedikasyon ang mga butang; ang akong kinabuhi gipahinungod na ngadto sa Diyos. Nahinumdom ako kang Caleb, nga misulod sa Yutang Saad uban kang Josue ug nga bahin kaniya kini giingon, ‘Iyang gisunod si Jehova sa bug-os.’ (Jos. 14:8) Kana alang kanako daw mao ang maayong tinamdan. Ako nahibalo nga ang pag-alagad sa Diyos ‘sa bug-os’ mopahimo sa akong dedikadong kinabuhi nga mas hinungdanon; kini mohatag kanako ug mas dakong higayon sa pagpatungha sa mga bunga nga magtimaan sa usa ka Kristohanon.”
Si Caleb gipanalanginan gayod sa pagsunod kang Jehova sa bug-os, nga nagatinguha kanunay sa pagtuman sa kabubut-on sa Diyos. Sama kaniya, ang uban nakabatog dakong kalipay ug dagayang mga panalangin diha sa pag-alagad sa Diyos. Hinaot nga mao kanay imong kasinatian ingong usa ka tawo nga padayong nagasunod kanunay kang Jehova sa bug-os.
[Hulagway sa panid 26]
Si Caleb ug Josue matinumanon kang Jehova ubos sa pagsulay. Ikaw matinumanon ba?