Nakaplagan Mo ba ang Tinuod nga Relihiyon?

“Ang dagway sa pagsimba nga hinlo ug wala-mahugawi sa panglantaw sa atong Diyos ug Amahan mao kini.”​—SANTIAGO 1:27.

 1, 2. (a) Sa panghunahuna sa daghang tawo, unsay magtino kon ang ilahang relihiyon mao ang tinuod? (b) Unsay kinahanglang ugdang nga tagdon diha sa paghukom sa relihiyon?

KITA nagkinabuhi sa panahon nga ang daghang tawo kontento nga ang relihiyon hatagan ug gamayng bahin sa ilang mga kinabuhi. Sila tingali motambong sa pipila ka relihiyosong serbisyo, apan diyutay ra ang regular nga nagtambong. Ang kadaghanang tawo wala magtuo nga ang tanang ubang relihiyon maoy sayop ug ang ilang relihiyon maoy tinuod. Sa yano gibati nila nga ang ilang relihiyon maoy tinuod alang kanila.

² Tungod niini, ang suknang, Nakaplagan mo ba ang tinuod nga relihiyon? sa yano nagpasabot, Nakaplagan mo ba ang usa ka relihiyon nga imong maangayan? Unsa ang magtino kon unsay imong maangayan? Ang imong pamilya? Ang imong mga kauban? Ang imong kaugalingong mga pagbati? Unsa ka ugdang nga napalandong nimo ang panghunahuna sa Diyos bahin sa maong butang?

Sa Unsang Paagi Hisayran Nato ang Panglantaw sa Diyos?

 3. (a) Aron mahibaloan nato ang punto de vista sa Diyos, unsay kinahanglang atong mabatonan? (b) Unsang mga pangutanaha ang angay natong isukna mahitungod sa kon nganong kita personal nga nagtuo nga ang Bibliya maoy gikan sa Diyos?

³ Aron hisayran nato kon unsay panghunahuna sa Diyos mismo, nan kinahanglang adunay pagpadayag gikan kaniya. Ang Bibliya mao ang labing karaang basahon nga nag-angkong inspirado sa Diyos. (2 Timoteo 3:16, 17) Apan sa kamatinud-anon ikaingon ba nga kining basahona, nga lahi sa tanang uban, nasudlan sa mensahe sa Diyos alang sa tanang tawo? Unsaon nimo pagtubag kanang suknaa, ug ngano? Tungod ba kay kana ang pagtuo sa imong mga ginikanan? Tungod ba sa tinamdan sa imong mga kauban? Nakasusi ka ba sa ebidensiya sa imong kaugalingon? Nganong dili kana buhaton karon, nga gamiton ang mosunod nga upat ka han-ay sa ebidensiya?

 4. Bahin sa pagkaanaa aron magamit, unsay nagpaila nga ang Bibliya, inay ang laing basahon, maoy gikan sa Diyos?

⁴ Pagkaanaa: Ang usa ka mensahe nga tinuod naggikan sa Diyos ug alang sa tibuok tawhanong pamilya angay nga anaa aron ilang magamit. Tinuod ba kana sa Bibliya? Tagda kini: Ang Bibliya, ang tibuok o ang pila ka bahin, gipatik karon diha sa kapig 2,000 ka pinulongan. Sumala sa American Bible Society, duolag napulo ka tuig nga miagi ang mga pinulongan nga niana ang Bibliya nahipatik nagpahinabo nga magamit kana sa mga 98 porsiento sa populasyon sa kalibotan. Sumala sa gipunting sa Guinness Book of World Records, ang Bibliya sa walay sipyat mao “ang labing kaylap napanagtag nga basahon sa kalibotan.” Kini ang pagadahomon nato sa usa ka mensaheng gikan sa Diyos nga gituyo alang sa katawhan sa tanang rasa ug nasod ug pinulongan. (Itandi ang Pinadayag 14:6.) Walay laing basahon sa kalibotan ang adunay samang rekord.

 5. Nganong hinungdanon ang makasaysayanhong pasikaranan sa Bibliya?

⁵ Pagkamakasaysayanhon: Ang mainampingong pagsusi sa mga asoy sa Bibliya magpadayag sa laing paagi nga niana ang Bibliya maoy lahi sa ubang mga basahon nga nag-angkong balaan. Ang Bibliya naundan ug makasaysayanhong mga panghitabo, dili sa mga kasugiran nga dili kapamatud-an. Si Irwin Linton, kinsa isip abogado naanad sa pag-analisar kon unsay gikinahanglan isip pruyba sa usa ka korte, misulat: “Samtang ang mga sugilambong, mga kasugiran ug bakak nga pagsaksi mag-amping sa pagbutang sa mga panghitabo nga giasoy diha sa layo kaayong dapit ug sa panahong dili tino, . . . ang mga asoy sa Bibliya naghatag kanato sa petsa ug dapit sa mga butang nga giasoy uban sa labihang katukma.” (Alang sa mga pananglitan, tan-awa ang 1 Hari 14:25; Isaias 36:1; Lucas 3:1, 2.) Alang sa mga tawo nga modangop sa relihiyon nga dili sa pag-ikyas sa kamatuoran kondili alang sa kamatuoran, kini hinungdanon nga pagatagdon.

 6. (a) Sa unsang paagi ang Bibliya motabang gayod sa usa ka tawo maylabot sa mga suliran sa kinabuhi? (b) Sa unsang tulo ka paagi ang Bibliya motabang sa usa ka tawo sa pagsagubang sa mapait nga mga kamatuoran?

⁶ Pagkapraktikal: Kadtong ugdang nga nagsusi sa Bibliya daling makaamgo nga ang mga sugo ug mga prinsipyo niini wala larawa aron nga pahimuslan sila. Hinunoa, kini sila naglaraw sa paagi sa kinabuhi nga magdalag kaayohan niadtong nagsunod gayod niini. (Isaias 48:17, 18) Ang kahupayan nga gitanyag niini alang sa mga anaa sa kagul-anan maoy dili haw-ang, nga gipasukad sa way-kapuslanang mga pilosopiya. Hinunoa, kini motabang sa mga tawo sa pagsagubang sa mapait nga mga kamatuoran sa kinabuhi. Sa unsang paagi? Sa tulo ka paagi: (1) pinaagi sa paghatag ug maayong tambag kon sa unsang paagi masagubang ang mga kalisdanan, (2) pinaagi sa pagpatin-aw kon sa unsang paagi madawat ang mahigugmaong pagpaluyo nga gihatag sa Diyos sa iyang mga alagad karon, ug (3) pinaagi sa pagpadayag sa kahibulongang kaugmaon nga gitagana sa Diyos alang niadtong nagaalagad kaniya, nagahatag kanilag maayong mga katarongan sa pagsalig sa iyang mga saad.

 7. (a) Pinaagi sa paggamit sa mga kasulatang gihisgotan sa potnot, isaysay ang tubag sa Bibliya sa usa sa dagkong mga isyung may kalabotan sa mga tawo karong adlawa. (b) Ipakita kon sa unsang paagi ang tambag sa Bibliya manalipod o motabang kanato sa pagsagubang sa usa ka makapaugtas nga kahimtang.

⁷ Bisan pag ang tambag sa Bibliya sagad dili popular taliwala niadtong nagsalikway sa awtoridad ug nagsubay sa kinabuhing mapatuyangon sa kaugalingon, daghan ang nakaamgo nga ang maong pagkinabuhi wala maghatag kanila ug tinuod nga kalipay. (Galacia 6:7, 8) Ang Bibliya naghatag ug prangkang mga tubag sa mga pangutana mahitungod sa aborsiyon, diborsiyo, ug homoseksuwalidad. Ang tambag niini maoy panalipod batok sa pag-abusar sa droga ug sa alkoholikong ilimnon ug batok sa pagkahitakboyan sa AIDS pinaagi sa natakdang dugo o sa kamahilayon. Kini magpakita kanato kon unsaon pagbaton ug malipayong mga pamilya. Kini motaganag mga tubag nga makapasarang sa usa ka tawo pagsagubang sa labing makapaugtas nga mga kahimtang sa kinabuhi, lakip sa pagkawala-maangayi sa suod nga mga membro sa pamilya, grabeng sakit, ug sa pagkamatay sa usa ka minahal. Kini motabang kanato sa pag-ila sa mga butang nga angay natong unahon aron ang atong mga kinabuhi mapuno sa kahulogan inay sa pagbasol.a

 8, 9. (a) Unsang tagnaa personal nga makapahingangha kanimo ingong pamatuod sa pagkainspirado sa Bibliya? (b) Unsay gipamatud-an sa mga tagna sa Bibliya kon bahin sa gigikanan niini?

⁸ Tagna: Ang Bibliya maoy talagsaon isip usa ka basahon sa tagna, usa ka basahon nga motug-an kon unsay mahitabo sa umaabot, ug nagbuhat kini niana nga detalyado. Kini mitagna sa pagkalaglag sa karaang Tiro, pagkapukan sa Babilonya, pagtukod pag-usab sa Jerusalem, pagtungha ug pagkapukan sa mga hari sa Medo-Persia ug Gresya, ug sa daghang panghitabo sa kinabuhi ni Jesu-Kristo. Sa detalyado gitagna usab niini ang mga kahimtang sa kalibotan nga nahitabo niining sigloha, ug gipatin-aw niini ang ilang kahulogan. Kini nagpadayag kon sa unsang paagi pagasulbaron ang mga sulirang nagpabug-at sa tawhanong mga magmamando, ug kini nagpaila sa Magmamando nga magpatungha sa malungtarong pakigdait ug matuod nga kasegurohan alang sa katawhan.b​—Isaias 9:6, 7; 11:1-5, 9; 53:4-6.

⁹ Makahuloganon, ang Bibliya nagpadayag sa katakos sa pagtagna nga tukma sa umaabot isip usa ka pagsulay sa pagka-Diyos. (Isaias 41:1–46:13) Ang Usa nga makabuhat niini o makadasig sa uban sa pagbuhat niini dili lamang usa ka way-kinabuhing idolo. Siya dili lamang usa ka tawong debotado. Siya mao ang matuod nga Diyos, ug ang basahon nga nasudlan sa maong tagna mao ang iyang Pulong.​—1 Tesalonica 2:13.

Ang Tanang Naggamit sa Bibliya Tinuod Ba?

10, 11. Sumala sa gipakita ni Jesus, bisan pag ang usa ka klerigo tingali mogamit sa Bibliya, unsay makapahimo sa relihiyon nga iyang gipaluyohan nga walay pulos?

¹⁰ Nan, makataronganon ba​—mas importante, Kasulatanhon ba​—ang paghinapos nga ang tanang relihiyosong pundok nga nag-angkong naggamit sa Bibliya nagtudlo sa tinuod nga relihiyon? Ang tanang nagbitbit o nagkutlo sa Bibliya nagatuman ba sa tinuod nga relihiyon?

¹¹ Daghan sa klero, bisan pag sila adunay Bibliya, naggamit sa relihiyon ingong usa ka paagi sa paghimaya sa ilang kaugalingon. Gisambogan nila sa mga tradisyon ug tawhanong mga pilosopiya ang putling mga kamatuoran. Ang ilang pagsimba madawat ba sa Diyos? Ngadto sa relihiyosong mga pangulo sa unang-siglong Jerusalem nga nagbuhat gayod niana, si Jesu-Kristo haom nga nagpadapat sa pahayag sa Diyos pinaagi sa propetang si Isaias, nga nag-ingon: “Kini nga katawhan nagapasidungog kanako pinaagi sa ilang mga ngabil, apan ang ilang kasingkasing layo nga nahimulag kanako. Kawang nga sila nagsigig simba kanako, tungod kay nagatudlo sila ug mga sugo sa tawo ingong mga doktrina.” (Mateo 15:8, 9; 23:5-10) Tin-aw, ang ingong matang sa relihiyon dili mao ang tinuod nga relihiyon.

12, 13. (a) Sa unsang paagi ang panggawi sa mga membro sa simbahan makatabang sa usa ka tawo sa pagtino kon kaha ang ilang relihiyon mao ang tinuod? (b) Sa unsang paagi isipon sa Diyos ang atong pagsimba kon pilion nato nga mga kauban kadtong iyang gisalikway? (2 Cronicas 19:2)

¹² Unsa na man kon ang mga bunga nga gibunga sa mga pagtulon-an sa pila ka relihiyon, sumala sa gipadayag diha sa mga kinabuhi sa ilang mga membro nga may maayong baroganan, maoy dunot? Sa iyang Wali sa Bukid, si Jesus nagpasidaan: “Pagbantay sa bakak nga mga propeta . . . Pinaagi sa ilang mga bunga mailhan ninyo sila. . . . Ang matag maayong kahoy nagapatunghag maayong bunga, apan ang matag daot nga kahoy nagapatunghag walay-pulos nga bunga.” (Mateo 7:15-17) Tinuod nga ang mga indibiduwal tingali masayop ug kinahanglang pagatul-iron. Apan lahi ang kahimtang sa dihang ang mga membro sa iglesya, bisan ang klero, ang magbuhat sa pakighilawas ug pagpanapaw, pakig-away, paghuboghubog, pagkadalo, pagbakak, espiritismo, pagsimba sa mga idolo​—bisan hain niana o tanan niining mga butanga​—apan walay ipadapat nga disiplina, ug kadtong nagpadayon sa maong mga binuhatan dili pagawson gikan sa kongregasyon. Ang Bibliya tin-awng nag-ingon nga kadtong nagbuhat nianang mga butanga angay ipalagpot gikan sa kongregasyon; sila walay dapit sa Gingharian sa Diyos. (Galacia 5:19-21) Ang ilang pagsimba dili makapahimuot sa Diyos, ni ang atong pagsimba makapahimuot sa Diyos kon atong pilion ingong mga kauban kadtong iyang gisalikway.​—1 Corinto 5:11-13; 6:9, 10; Pinadayag 21:8.

¹³ Tin-aw nga dili tanang pundok nga nag-angkong naggamit sa Bibliya nagatuman sa tinuod nga relihiyon nga gibatbat niini. Nan, unsay gipadayag sa Bibliya ingong mga ilhanan sa tinuod nga relihiyon?

Mga Ilhanan sa Tinuod nga Relihiyon

14. (a) Gipasukad sa unsa ang tanang pagtulon-an sa matuod nga relihiyon? (b) Unsa ka malamposon nga nakapasar sa maong pagsulay ang mga pagtulon-an sa Kakristiyanohan bahin sa Diyos ug sa kalag?

¹⁴ Ang mga pagtulon-an niini gipasukad nga lig-on sa dinasig nga Kasulatan. “Ang tibuok Kasulatan inspirado sa Diyos ug mapuslanon sa pagpanudlo, sa pagpamadlong, sa pagtul-id sa mga butang.” (2 Timoteo 3:16) Apan hain ba ang Balaang Bibliya naghisgot sa Trinidad sa Kakristiyanohan? Ug hain ba ang Bibliya nagtudlo, ingon sa gitudlo sa klero, nga ang mga tawo adunay kalag nga magpabiling buhi sa pagkamatay sa pisikal nga lawas? Nakahangyo ka ba sukad sa usa ka klerigo nga ipakita kanimo ang maong mga pagtulon-an diha sa imong Bibliya? Ang The New Encyclopædia Britannica nag-ingon: “Ang pulong Trinidad o ang dayag nga doktrina dili makita diha sa Bag-ong Testamento.” (1992, Micropædia, Tomo 11, panid 928) Ug ang New Catholic Encyclopedia miangkon: “Taliwala sa Apostolikong mga Amahan, walay bisan unsa nga duol nianang panghunahunaa o panglantawa.” (1967, Tomo XIV, panid 299) Mahitungod sa ideya sa Kakristiyanohan sa usa ka kalag nga mobulag sa lawas sa pagkamatay, ang mga eskolar sa Bibliya nagdawat nga gihulaman nila ang ideya gikan sa Gregong pilosopiya. Apan, ang tinuod nga relihiyon dili maghiklin sa kamatuoran sa Bibliya tungod sa tawhanong pilosopiya.​—Genesis 2:7; Deuteronomio 6:4; Ezekiel 18:4; Juan 14:28.

15. (a) Giunsa pagpaila sa Bibliya ang Usa nga mao lamang ang pagasimbahon? (b) Unsay pagbati sa matuod nga mga magsisimba bahin sa pagpakigsuod kang Jehova?

¹⁵ Ang tinuod nga relihiyon nagpaluyo sa pagsimba sa usa lamang ka matuod nga Diyos, si Jehova. (Deuteronomio 4:35; Juan 17:3) Sa pagbatbat sa laing paagi sa Deuteronomio 5:9 ug 6:13, si Jesu-Kristo lig-ong mipahayag: “Si Jehova nga imong Diyos ang imong pagasimbahon, ug kaniya lamang ikaw magahatag ug sagradong pag-alagad.” (Mateo 4:10) Nga nahiuyon niana, si Jesus nagpaila sa ngalan sa iyang Amahan ngadto sa iyang mga tinun-an. (Juan 17:26) Ang imong relihiyon ba nagtudlo kanimo sa pagsimba kang Jehova? Nakaila ka ba sa Persona nga gipaila nianang ngalana​—sa iyang mga katuyoan, iyang mga kalihokan, iyang mga hiyas​—mao nga gibati nimong masaligon nga masuod kaniya? Kon ang imong relihiyon mao ang tinuod, ang tubag maoy oo.​—Lucas 10:22; 1 Juan 5:14.

16. Unsay kahulogan sa pagtuo diha kang Kristo alang niadtong nagatuman sa matuod nga relihiyon?

¹⁶ Usa ka hinungdanong bahin sa pagsimba nga makapahimuot sa Diyos mao ang pagtuo sa iyang Anak, si Jesu-Kristo. (Juan 3:36; Buhat 4:12) Kini wala magkahulogan sa pagtuo lamang nga siya nabuhi o nga siya usa ka talagsaong persona. Naglakip kini sa pagpabili kon unsay gitudlo sa Bibliya mahitungod sa bili sa halad sa hingpit nga tawhanong kinabuhi ni Jesus ug pag-ila sa iyang posisyon karong adlawa ingong langitnong Hari. (Salmo 2:6-8; Juan 3:16; Pinadayag 12:10) Kon nakig-uban ka niadtong nagatuman sa tinuod nga relihiyon, nasayod ka nga sa matag-adlaw nga kinabuhi sila masingkamotong nagsugot kang Jesus, nagsunod sa iyang panig-ingnan, ug nakig-ambit sa personal ug madasigon sa buluhaton nga iyang gitudlo nga pagabuhaton sa iyang mga tinun-an. (Mateo 28:19, 20; Juan 15:14; 1 Pedro 2:21) Kon kana dili matuod sa mga kauban nimo sa pagsimba, kinahanglang motan-aw ka sa laing dapit.

17. Nganong ang matuod nga mga magsisimba mainampingon nga magpabiling dili mabulingan sa kalibotan, ug unsay nalakip niana?

¹⁷ Ang matuod nga pagsimba wala mamantsahi sa pag-apil-apil sa politika ug sa kalibotanong mga away. (Santiago 1:27) Nganong wala man? Kay si Jesus miingon mahitungod sa iyang mga sumusunod: “Sila dili bahin sa kalibotan, maingon nga ako dili bahin sa kalibotan.” (Juan 17:16) Si Jesus wala manghilabot sa politika, ug gipugngan niya ang iyang mga sumusunod gikan sa pagbakyaw sa unodnong mga hinagiban. (Mateo 26:52) Kadtong nagbutang sa kasingkasing kon unsay giingon sa Pulong sa Diyos ‘dili na makakat-on pa ug gubat.’ (Isaias 2:2-4) Kon ang relihiyon nga imong gipakig-aniban bisan sa ngalan lamang dili mohaom sa maong kabatbatan, panahon na nga mohunong sa pagpakig-uban niana.​—Santiago 4:4; Pinadayag 18:4, 5.

18. (a) Unsay gipaila sa Juan 13:35 ingong usa ka talagsaong kinaiyahan sa matuod nga relihiyon? (b) Sa unsang paagi makatabang ka sa usa ka tawo sa pagtino kon unsang pundoka ang mohaom sa Juan 13:35?

¹⁸ Ang tinuod nga relihiyon nagtudlo ug nagpadapat sa dili-mahakogong gugma. (Juan 13:35; 1 Juan 3:10-12) Ang maong gugma dili lamang hisgotan sa mga wali. Kini aktuwal nga maghugpong sa tinuod nga pag-igsoonay sa katawhan sa tanang rasa, tanang hut-ong sa pangabuhi, tanang pinulongan, tanang nasod. (Pinadayag 7:9, 10) Kini nagpalahi sa matuod nga mga Kristohanon gikan sa kalibotan alirong nila. Kon wala ka pa makahimo niana, tambong sa mga tigom sa Kingdom Hall sa mga Saksi ni Jehova, ingon man sa ilang mas dagkong mga kombensiyon. Sud-onga sila samtang sila magkahiusa pagbuhat sa pagtukod sa usa sa ilang mga Kingdom Hall. Panid-i kon unsay ilang pagtagad sa mga tigulang (apil ang mga babayeng balo) ug mga batan-on (apil kadtong adunay usa lamang ka ginikanan o wala gayod). (Santiago 1:27) Itandi ang imong napanid-an sa imong nakita sa ubang relihiyon. Unya suknaa ang imong kaugalingon, ‘Kinsay nagatuman sa tinuod nga relihiyon?’

19. (a) Unsang solusyon sa mga suliran sa katawhan ang gipasiugda sa matuod nga relihiyon? (b) Unsay angay nga ginabuhat sa mga membro sa pundok nga nagasunod sa matuod nga relihiyon?

¹⁹ Ang tinuod nga relihiyon nagpaluyo sa Gingharian sa Diyos ingon nga malungtarong solusyon sa mga suliran sa katawhan. (Daniel 2:44; 7:13, 14; 2 Pedro 3:13; Pinadayag 21:4, 5) Aduna bay bisan hain sa mga simbahan sa Kakristiyanohan nga nagbuhat niana? Kanus-a ang kataposang panahon nga nakadungog ka sa usa ka klerigo nga nagpatin-aw sa Gingharian sa Diyos ug kon unsay gipakita sa Kasulatan nga pagahimoon niini? Ang organisasyon ba nga imong gipasakopan nagdasig kanimo sa pagpakigsulti sa uban mahitungod sa Gingharian sa Diyos, ug kon mao kana, ang mga membro sa katibuk-an nagapakig-ambit ba sa pagbuhat niana? Si Jesus nagbuhat sa maong pagsangyaw; ang iyang unang mga tinun-an nagbuhat niana. Ikaw usab makabaton sa pribilehiyo sa pag-apil sa maong buluhaton. Kini ang labing hinungdanong buluhaton nga ginabuhat sa nawong sa yuta karong adlawa.​—Mateo 24:14.

20. Gawas sa pag-ila sa matuod nga relihiyon, kinahanglang unsay atong buhaton?

²⁰ Bisan pag adunay linibong relihiyon, ang Bibliya daling magwagtang sa kalibog aron ang tinuod mailhan. Apan gikinahanglan nga buhaton nato ang labaw pa kay sa pag-ila niini. Bililhon nga atong gituman kini. Kon unsay nalangkit niini pagahisgotan sa bug-os sa sunod natong artikulo.

[Mga footnote]

Unsaon Nimo Pagtubag?

◻ Sa pag-ila sa tinuod nga relihiyon, kansang punto de vista ang labing hinungdanon?

◻ Unsang upat ka han-ay sa ebidensiya ang mopunting sa Bibliya ingong Pulong sa Diyos?

◻ Nganong dili ang tanang relihiyon nga nagagamit sa Bibliya madawat sa Diyos?

◻ Unsa ang unom ka ilhanan sa bugtong tinuod nga relihiyon?

[Kahon sa panid 10]

Ang mga Saksi ni Jehova . . .

◆ Nagpasukad sa tanan nilang pagtulon-an sa Bibliya.

◆ Nagsimba sa bugtong matuod nga Diyos, si Jehova.

◆ Nagkinabuhi nga kaharmoniya sa ilang pagtuo kang Jesu-Kristo.

◆ Wala malangkit sa politika ug sa kalibotanong mga panag-away.

◆ Nagtinguha sa pagpadayag ug dili-mahakogong gugma diha sa adlaw-adlaw nga kinabuhi.

◆ Nagpasiugda sa Gingharian sa Diyos ingong malungtarong solusyon sa mga suliran sa katawhan.

[Hulagway sa panid 9]

ANG BIBLIYA​—unsay nagpaila nga kini nasudlan sa mensahe sa Diyos alang sa tanang tawo?