Nagpaluya ba Kanimo ang mga Restriksiyon?
MGA restriksiyon! Wala gayoy gusto niana; apan kitang tanan kinahanglang moantos niana sa pipila ka sukod. Bisan pa, naluya ba usahay ang imong buot tungod kay ang imong kinabuhi daw limitado ra kaayo? Tingali moarang-arang ang imong gibati kon usbon nimo ang imong punto de bista. Inay magbagulbol bahin sa dili nimo mahimo, nganong dili pahimuslan pag-ayo ang bisan unsang kagawasan nga imong gipahimuslan?
Pananglitan, daghang kabos ang nangandoy nga sila maadunahan. Apan, bisan tuod ang kakabos naglimite kon unsay atong mahimo niining sistemaha sa mga butang, ang hinungdanong mga butang sa kinabuhi mabatonan sa tanan. Ang mga kabos maingon man ang mga adunahan mahigugma, maminyo, magmatuto ug mga anak, magpahimulos sa maayong mga panaghigala, ug uban pa. Labi pang hinungdanon, ang mga kabos maingon man ang mga adunahan makaila kang Jehova ug makadahom sa gisaad nga bag-ong kalibotan. Ang mga kabos maingon man ang mga adunahan mouswag sa Kristohanong kaalam ug kahibalo, nga mas maayo pa kay sa mga bahandi. (Proverbio 2:1-9; Ecclesiastes 7:12) Ang tanan—adunahan ug kabos—makahimog maayo kaayong ngalan alang sa ilang kaugalingon uban kang Jehova. (Ecclesiastes 7:1) Sa adlaw ni Pablo ang Kristohanong kongregasyon kadaghanan gilangkoban sa mga tawo nga ubos ug kahimtang sa kinabuhi—ang pipila kanila mga ulipon—kinsa maalamong migamit sa bisan unsang kagawasan nga itugot sa ilang mga kahimtang.—1 Corinto 1:26-29.
Kasulatanhong Pagkaulo
Sa Kristohanong kaminyoon, ang asawa magpasakop sa iyang bana—usa ka kahikayan nga gidesinyo aron makabenepisyo ang tibuok pamilya. (Efeso 5:22-24) Ang asawa mobati bang ubos kaayo tungod niini? Dili gayod. Ang bana ug asawa maoy usa ka tem. Ang pagkaulo sa lalaki, sa dihang gidumala nga sama sa paagi ni Kristo, magbutang ug diyutay rang restriksiyon diha sa iyang asawa ug maghatag kaniyag daghang kahigayonan sa pag-ila sa iyang mga potensiyal. (Efeso 5:25, 31) Ang “takos nga asawa” sa Proverbio kapitulo 31 maoy puliki sa daghang makapainteres nga mga buluhaton nga nagkinahanglag kahanas ug determinasyon. Tin-aw, ang pagpasakop sa iyang bana dili makapahigawad kaniya.—Proverbio 31:10-29.
Sa susama, walay tagana alang sa babaye nga manguna ibabaw sa may-katakos nga mga lalaki sa Kristohanong kongregasyon. (1 Corinto 14:34; 1 Timoteo 2:11, 12) Ang Kristohanong mga babaye mobati ba ug pagkadili-tagbaw ilalom sa maong restriksiyon? Dili. Ang kadaghanan mapasalamaton sa pagkakita nianang maong bahin sa Kristohanong pag-alagad nga giatiman diha sa teokratikanhong paagi. Sila malipay sa pagbaton ug kaayohan gikan sa pagbantay nga buluhaton ug pagpanudlo sa tinudlong mga ansiano ug sa paghimo sa ilang kaugalingon nga puliki sa hinungdanong buluhaton sa pagsangyaw ug paghimog mga tinun-an. (Mateo 24:14; 28:19, 20) Ang Kristohanong mga babaye dakog malampos niining maong natad, ug kini magpasidungog kanila sa panglantaw ni Jehova nga Diyos.—Salmo 68:11; Proverbio 3:35.
Mga Restriksiyon Diha sa mga Batan-on
Usahay ang mga batan-on moreklamo usab nga ang ilang kinabuhi piniotan ra kaayo, kasagaran tungod kay nailalom sila sa awtoridad sa ilang mga ginikanan. Apan kini usab Kasulatanhon. (Efeso 6:1) Inay mapikal sa mga restriksiyon nga ipahamtang sa ilang mga ginikanan kanila, ang maalamong batan-ong mga Kristohanon magtunong sa pagtagad diha sa pagpahimulos sa kagawasan nga ilang nabatonan—nga kasagarang naglakip sa kagawasan gikan sa bug-at nga mga responsabilidad. Busa sila makapahimulos sa ilang batan-ong kusog ug mga kahimtang sa pag-andam sa ilang kaugalingon alang sa hamtong nga kinabuhi.
Usa ka kanhing magtatan-aw sa sirkito sa Brazil nahinumdom pag-ayo sa usa ka 12-anyos nga batang lalaki diha sa usa ka diyutay nahilit nga pundok sa mga magmamantala kinsa gilimitihan sa iyang mahimo. Ang nagdumala sa mga rekord puliki sa sekular nga trabaho ug dili makahatag ug dakong pagtagad sa pundok, apan gihikay niya kining batan-ona nga motabang kaniya. Nasayod siya kon asa gibutang ang tanang porma sa kongregasyon ug kanunayng anaa aron motabang. Ang iyang interes makapadasig, ug siya maoy matinumanong kauban diha sa pagsangyaw sa kanataran. Kanang batan-ona usa na karon ka tinudlong ansiano.
Adunay daghang kahimtang nga mahimong maglimite sa kagawasan sa usa ka tawo. Ang pipila gikutohan sa sakit. Ang pipila nagpuyo sa nabahin nga mga panimalay ug nalimitehan ang ilang mga kagawasan sa mga panginahanglan sa usa ka dili-magtutuong kapikas. Bisan tuod kadtong nagpuyo nga may mga restriksiyon tingali mangandoy nga unta lahi ang mga kahimtang, sila makakinabuhi gihapon nga matagbawon. Kining magasina naundan sa daghang asoy sa maong mga tawo kinsa nakapadasig kaayo sa uban tungod kay sila nagsalig kang Jehova ug nagpahimulos sa labing maayo sa ilang mga kahimtang.
Sa paghisgot bahin sa usa ka kasagarang kahimtang sa iyang adlaw, si apostol Pablo miingon: “Ikaw ba gitawag sa dihang usa ka ulipon? Ayaw tugoti nga kini magpabalaka kanimo; apan kon ikaw usab makahimo nga magawasnon, mas maayong sakmiton mo ang kahigayonan.” (1 Corinto 7:21) Pagkatimbang nga panglantaw! Ang pipila ka kahimtang mausab. Ang mga batan-on mohamtong. Ang masinupakong mga kapikas usahay modawat sa kamatuoran. Ang ekonomikanhong mga kahimtang nahibaloang mouswag. Ang mga masakiton tingali moarang-arang. Sa ubang mga kaso, ang mga butang tingali dili mausab hangtod moabot ang bag-ong kalibotan ni Jehova. Bisan pa niana, unsay maangkon gikan sa pagbagulbol tungod kay ang usa dili makahimo sa mahimo sa uban?
Nakapaniid ka na ba sukad sa mga langgam nga nanaglupad sa langit ug nagdayeg sa katahom ug kagawasan sa ilang mga paglihok? Tingali nangandoy ka nga makalupad ka nga sama niana. Aw, dili ka makahimo ug dili ka gayod makalupad sama sa mga langgam! Apan lagmit dili ka moreklamo. Hinunoa, ikaw nagmaya diha sa mga abilidad nga gihatag sa Diyos kanimo. Ikaw nagkinabuhing malamposon bisan pag naglakaw lamang sa nawong sa yuta. Sa susama, bisan unsa ang atong kahimtang sa kinabuhi, kon kita motunong sa pagtagad diha sa kon unsay atong maarangan sa pagbuhat inay magbagulbol bahin sa atong dili maarangan sa pagbuhat, ang kinabuhi mahimong makapatagbaw, ug kita makakaplag ug kalipay diha sa pag-alagad kang Jehova.—Salmo 126:5, 6.
[Hulagway sa panid 28]
Gibati ba nimong gipiotan ka sa imong mga ginikanan?