Pasko Kristohanon ba Gayod Kini?

SUMALA sa The World Book Encyclopedia, “ang Pasko maoy adlaw sa pagsaulog sa mga Kristohanon sa adlawng-natawhan ni Jesu-Kristo.” Bisan pa niana, mipahayag usab ang ensiklopedia: “Ang unang mga Kristohanon wala magsaulog sa pagkatawo [ni Jesus] tungod kay sila nagtuo nga ang pagsaulog sa pagkatawo ni bisan kinsa maoy usa ka paganong kustombre.”

Ang The Making of the Modern Christmas, nga sinulat ni Golby ug ni Purdue, miuyon niana: “Ang unang mga Kristohanon wala magsaulog sa pagkatawo ni Kristo. Ang mga adlawng-natawhan mismo nalangkit sa paganong mga batasan; ang mga Ebanghelyo wala maghisgot sa aktuwal nga petsa sa pagkatawo ni Kristo.”

Kon ang mga pagsaulog sa adlawng-natawhan walay Kristohanong kagikan, sa unsang paagi nahimong iladong “Kristohanong” piyesta ang adlawng-natawhan ni Kristo?

Ang Paganong Sinugdanan sa “Pasko”

“Ang tanan nangaon ug nagkalipay, ang trabaho ug negosyo gihunong sa bug-os sa usa ka panahon, ang mga balay gidayandayanan sa lawrel ug pino, ang mga managhigala miduaw ug mihatag ug mga gasa sa usag-usa, ug ang mga kliyente mihatag ug mga gasa sa ilang mga suki. Ang tibuok yugto puno sa kalipay ug maayong kabubut-on, ug ang mga tawo nagpatuyang sa tanang matang sa kalingawan.”​—Paganism in Christian Festivals, ni J. M. Wheeler.

Kini bang kahubitan haom sa mga pagsaulog sa Pasko nga imong nahibal-an? Makapakurat nga dili kana Pasko! Hinunoa, kana maoy kahubitan sa Saturnalia​—ang tibuok-semanang paganong piyesta sa Romano nga nalangkit sa winter solstice (gilarawan sa atbang nga panid). Ang adlawng-natawhan sa dili-malupig nga adlaw gisaulog sa Disyembre 25, ang pangunang adlaw sa piyesta sa Romanong relihiyon nga nagsimba kang Mithra.

Sumala sa The New Encyclopædia Britannica, “ang Disyembre 25, maoy adlawng-natawhan ni Mithra, ang diyos sa kahayag sa mga Iranian ug . . . ang adlaw nga gipasidungog sa dili-malupig nga adlaw, ingon man ang adlaw human sa Saturnalia, gisagop sa simbahan ingong Pasko, ang adlaw sa pagkatawo ni Kristo, aron masumpo ang mga epekto niining maong mga piyesta.” Busa ang paganong selebrasyon sa adlawng-natawhan nagpadayon uban sa usa ka yanong pag-ilis sa mga ngalan, gikan kang Mithra ngadto kang Kristo!

Apan, hayan imong bation nga ang pagkatawo sa Anak sa Diyos, si Jesus, maoy usa ka butang nga linain, nga takos hinumdoman. Ang pagsusi sa asoy sa Bibliya bahin niini makahatag gayod ug kalamdagan.

Usa ka Malipayong Panghitabo

Ang ika-2ng kapitulo sa Ebanghelyo ni Lucas naghatag ug pasikaranang impormasyon. Gitug-anan kita ni Lucas kon unsay reaksiyon sa langitnong mga manulonda, mapaubsanong mga magbalantay sa hayop, sinserong mga alagad sa Diyos, ug ni Maria mismo bahin niining maong talagsaong panghitabo.

Tagda una ang ‘mga magbalantay sa hayop nga nag-estar sa gawas’ nga “nanagbantay sa ilang mga panon sa hayop sa kagabhion,” butang nga dili gayod nila himoon sa tungatunga sa tingtugnaw. Sa dihang mipakita ang “anghel ni Jehova” ug ang himaya sa Diyos midan-ag sa ilang palibot, ang mga magbalantay sa hayop sa sinugdan gikuyawan. Napalig-on sila sa dihang ang manulonda misaysay: “Ayaw kahadlok, kay, tan-awa! ako nagapahayag kaninyo ug maayong balita sa dakong kasaya nga mabatonan sa tanang tawo, tungod kay may natawo kaninyo karong adlawa nga usa ka Manluluwas, kinsa maoy Kristo nga Ginoo.” Sa dihang “ang dakong pundok sa langitnong panon” sa mga manulonda kalit nga mipakita, ang mga magbalantay sa hayop nahibalo nga kining maong pagkatawo lahi gikan sa tanang ubang pagkatawo. Makaiikag, ang mga manulonda walay gidalang mga gasa alang sa bag-ong nahimugso nga masuso. Hinunoa, ang mga manulonda midayeg kang Jehova, nga nagaingon: “Himaya ngadto sa Diyos sa kahitas-an, ug nganha sa yuta pakigdait taliwala sa mga tawong maayog kabubut-on.”​—Lucas 2:8-14.

Natural lamang, gustong makita sa mga magbalantay sa hayop kining bataa, tungod kay si Jehova ang nagpahibalo niining malipayong panghitabo. Sa ilang pagkakita sa masuso nga naghigda sa pasungan, ilang giingnan ang mga ginikanan kon unsay gisulti sa mga manulonda. Dayon ang mga magbalantay sa hayop migikan, nga “naghimaya ug nagdayeg sa Diyos,” dili sa masuso.​—Lucas 2:15-18, 20.

Si Maria, ang inahan ni Jesus, sa walay duhaduha nalipay tungod sa malamposong pagkahimugso sa iyang panganay. Apan siya usab naghimog “mga panghinapos diha sa iyang kasingkasing.” Dayon, inubanan sa iyang bana, si Jose, miadto siya sa Jerusalem aron sa pagtuman sa Balaod ni Moises. Dili kini pagsaulog sa adlawng-natawhan. Hinunoa, mao kini ang panahon aron ipresentar ang masuso ngadto sa Diyos, “ingon sa nasulat sa balaod ni Jehova: ‘Ang matag lalaki nga nagabukas ug tagoangkan pagatawgong balaan ngadto kang Jehova.’”​—Lucas 2:19, 22-24.

Sa templo sa Jerusalem, nahibalag ni Maria ug ni Jose si Simeon, kinsa gihubit ni Lucas ingong “matarong ug masimbahon, nga nagahulat sa paghupay sa Israel.” Pinaagi sa balaang espiritu, gipadayag kaniya nga dili siya mamatay sa dili pa niya makita “ang Kristo ni Jehova.” Ang nahitabo sunod maoy “ubos usab sa gahom sa espiritu [sa Diyos].” Gikugos ni Simeon ang masuso, dili, dili aron hatagan ug gasa, kondili, hinuon, aron himayaon ang Diyos, nga nagaingon: “Karon, Soberanong Ginoo, ikaw nagapalakawng gawasnon sa imong ulipon diha sa kalinaw sumala sa imong pahayag; tungod kay nakita na sa akong mga mata ang imong galamiton sa pagluwas nga imong giandam diha sa panan-aw sa tanang katawhan.”​—Lucas 2:25-32.

Sunod, ang edarang propetisa nga si Ana miduol. Siya usab “misugod paghatag ug mga pasalamat sa Diyos ug nagasulti bahin sa bata ngadto kanilang tanan nga nagahulat sa kapahigawasan sa Jerusalem.”​—Lucas 2:36-38.

Si Maria, si Simeon, si Ana, ang mga magbalantay sa hayop, ingon man ang langitnong mga manulonda, nangalipay tanan sa pagkahimugso ni Jesus. Hinunoa, timan-i palihog nga sila wala magpatuyang sa paghudyaka sa adlaw sa pagkatawo, ni sila naghatagay ug gasa. Sa kasukwahi, ilang gihimaya si Jehova, ang langitnong Magtatagana ug paagi sa ilang kaluwasan.

Sa gihapon, hayan mangatarongan ang pipila, ‘Dayag nga dili sayop ang mohatag ug gasa sa Pasko, kay dili ba ang “tulo ka mago” nagpasidungog kang Jesus pinaagi sa mga gasa?’

Mga Gasa sa Pasko

Sa makausa pa susihon nato ang asoy sa Bibliya. Makita nimo kini nga natala sa Ebanghelyo ni Mateo, kapitulo 2. Walay gihisgotan bahin sa pagsaulog sa adlawng-natawhan, ni adunay bisan unsang espisipikong panahon, bisan kadto dayag nga maoy sa usa ka panahon human sa pagkatawo ni Jesus. Sa bersikulo 1, gitawag ni Mateo ang mga bisita ingong “mga astrologo [Grego, maʹgoi] gikan sa sidlakang bahin,” busa mga pagano nga walay kahibalo bahin kang Jehova nga Diyos. Ang bituon nga gisundan niining mga lalakiha migiya kanila, dili direkta ngadto sa dapit nga natawhan ni Jesus sa Betlehem, kondili sa Jerusalem, diin si Haring Herodes nagmando.

Sa pagkadungog niining daotang magmamando nga sila nangita sa “usa nga natawong hari sa mga Hudiyo,” iyang gipangita ang mga saserdote aron mahibal-an sa eksakto “kon asa ipakatawo ang Kristo” aron mahimo niyang ipapatay ang bata. Ang mga saserdote mitubag pinaagi sa pagkutlo sa tagna ni Miqueas nga naghisgot sa natawhang dapit sa Mesiyas sa Betlehem. (Miqueas 5:2) Sa pagkasalingkapaw gihatagag instruksiyon ni Herodes ang iyang mga bisita: “Lakaw himoa ang maampingong pagpangita sa bata, ug sa makaplagan na ninyo kini taho balik kanako, aron ako usab moadto ug moyukbo niini.” Ang mga astrologo mipadayon, ug ang bituon “miuna kanila, hangtod nga mihunong kini sa ibabaw diin didto ang bata.” Timan-i nga siya gihubit ingong usa ka “bata,” dili ingong usa ka bag-ong nahimugso nga masuso.​—Mateo 2:1-10.

Ingong nahiangay alang sa mga taga-Sidlakang mga dato nga nagaduaw sa usa ka magmamando, ang paganong mga astrologo mihapa ug “mihalad [sa bata] ug mga gasa, bulawan ug prangkinsenso ug mira.” Si Mateo midugang: “Apan, tungod kay gihatagan man sila ug pasidaang iya-sa-Diyos diha sa usa ka damgo nga dili mobalik kang Herodes, sila namiya paingon sa ilang dapit pinaagig laing agianan.”​—Mateo 2:11, 12.

Gikan niining mubo Kasulatanhong asoy, ang pila ka tawo mahimong mosulay sa pagpangitag suportar sa ilang paghatagay ug gasa panahon sa Pasko. Bisan pa, ang Discovering Christmas Customs and Folklore nagpatin-aw nga ang sinugdanan sa kustombre karon sa paghatagay ug mga gasa masubay sa Saturnalia diin ang mga Romano mohatag ug gasa ngadto sa ilang kabos nga mga silingan. “Ang unang simbahan . . . sa tusong paagi nagbalhin sa importansiya niini ngadto sa usa ka rituwal nga pagsaulog sa mga gasa sa Mago.” Pagkasukwahi niini sa matuod nga mga magsisimba​—sama sa mapaubsanong mga magbalantay sa hayop—​nga midayeg lamang sa Diyos sa pagkahimugso ni Jesus!

Pasidunggi si Kristo Ingong Hari!

Karon si Jesus dili na masuso. Siya usa ka gamhanang Magmamando, Hari sa langitnong Gingharian sa Diyos, ug angay siyang pasidunggan nga ingon.​—1 Timoteo 6:15, 16.

Kon ikaw hamtong na karon, nakasinati ka na ba sukad nga mibatig kaulaw sa dihang, sa imong atubangan, ipakita sa mga tawo ang imong mga letrato niadtong bata ka pa? Tinuod, ang maong mga letrato magpahinumdom sa imong mga ginikanan sa ilang kalipay sa imong pagkatawo. Apan karon nga duna ka nay kaugalingong pagkatawo, dili ba kasagarang gusto nimo nga makita ka sa uban kon unsa ka karon? Sa susamang paagi, hunahunaa lang kon unsa ka walay pagtahod kang Kristo Jesus sa dihang matag tuig kadtong nangangkong mga sumusunod niya malinga kaayo sa paganong mga tradisyon sa Pasko ug sa pagpasidungog sa usa ka masuso nga tungod niana napakyas sila sa pagpasidungog kaniya ingong Hari. Aw, bisan niadtong unang siglo, nangatarongan ang Kristohanong apostol nga si Pablo sa pagkahaom nga hunahunaon si Kristo sumala sa kon unsa siya karon​—usa ka Hari sa langit. Si Pablo nagsulat: “Bisan kon among nailhan si Kristo sumala sa unod, sa tino kami wala na karon magaila kaniya sa ingon”!​—2 Corinto 5:16.

Si Kristo, ingong Hari sa Gingharian sa Diyos, sa dili madugay magatuman sa matagnaong saad sa pagwagtang sa kasakit, pag-antos, sakit, ug kamatayon. Siya mao ang Usa nga magatino nga dunay igong puloy-anan ug magantihong buluhaton alang sa tanan ubos sa mga kahimtang sa Paraiso dinhi sa yuta. (Isaias 65:21-23; Lucas 23:43; 2 Corinto 1:20; Pinadayag 21:3, 4) Sa walay duhaduha, igo na kini nga mga katarongan aron likayan ang pagpasipala kang Jesus!

Sa pagsunod sa kaugalingong panig-ingnan ni Kristo, ang tinuod nga mga Kristohanon maningkamot sa paghatag sa ilang mga silingan ug kinamaayohang gasa nga mahimong ikahatag ni bisan kinsa​—ang pagsabot sa katuyoan sa Diyos, nga mahimong motultol ngadto sa kinabuhing walay kataposan. (Juan 17:3) Kining matanga sa gasa magahatag kanila ug dakong kalipay, gani ingon sa gisulti ni Jesus: “Adunay labaw nga kalipay sa paghatag kay sa pagdawat.”​—Buhat 20:35; Lucas 11:27, 28.

Ang mga Kristohanon nga dunay tinuod nga interes sa usag usa dili malisdan sa dihadiha nga pagpahayag sa ilang gugma sa tanang panahon sa tuig. (Filipos 2:3, 4) Ingong yanong pananglitan, pagkadakong kalipay ang makadawat ug usa ka drowing gikan sa usa ka Kristohanong batan-on kinsa, human makadungog sa usa ka pakigpulong nga pinasukad sa Bibliya, nagdrowing niana ingong pasalamat! Makadasig usab ang wala-damhang gasa gikan sa usa ka paryente ingong pasundayag sa iyang gugma. Sa susama, ang Kristohanong mga ginikanan makabaton ug dakong kalipay sa dihang mopili sila ug haom nga mga okasyon sa tibuok tuig aron mohatag ug gasa sa ilang mga anak. Kining matanga sa Kristohanong kamanggihatagon wala mamansahi sa hinandurawng obligasyon sa paghatag ug mga gasa sa mga adlaw sa selebrasyon o sa paganong tradisyon.

Ingong resulta, karong adlawa kapin sa upat ug tunga ka milyong Kristohanon gikan sa tanang kanasoran wala magsaulog ug Pasko. Kini sila mga Saksi ni Jehova, kinsa puliki kanunay sa pagpamatuod sa ilang mga silingan bahin sa maayong balita sa Gingharian sa Diyos. (Mateo 24:14) Hayan mahibalag nimo sila sa dihang moduaw sila sa imong balay, tingali sa dili madugay. Hinaot nga ang imong mainitong pagdawat sa ilang gidala kanimong mensahe motultol sa imong pamilya ngadto sa dakong kalipay, samtang ikaw makakat-on sa pagdayeg kang Jehova nga Diyos matag adlaw sa tuig.​—Salmo 145:1, 2.

[Hulagway sa panid 7]

Ang mga Kristohanon nagahatag sa ilang mga silingan ug usa sa labing maayong mga gasa​—ang pagsabot sa katuyoan sa Diyos nga motultol sa kinabuhing walay kataposan

[Picture Credit Line sa panid 4]

Culver Pictures