Mangayaong mga “Magbubuhat sa Pulong”

“Dawata nga may kalumo ang pagtisok sa pulong nga arang makaluwas sa inyong mga kalag. Hinuon, magmahimo kamong magbubuhat sa pulong, ug dili tigpaminaw lamang.”​—SANTIAGO 1:21, 22.

 1. Sa unsang paagi pagatamdon ang atong teksto sa tuig alang sa 1996?

“MAGMAHIMO KAMONG MAGBUBUHAT SA PULONG.” Kining yanong mga pulong nagdala ug gamhanang mensahe. Kini gikuha gikan sa “Ang Sulat ni Santiago” diha sa Bibliya, ug kini igapasundayag diha sa mga Kingdom Hall ingong teksto sa tuig sa mga Saksi ni Jehova sa tibuok 1996.

2, 3. Nganong tukma nga si Santiago ang angayng mosulat sa sulat nga nagdala sa iyang ngalan?

² Si Santiago, nga igsoon sa inahan ni Ginoong Jesus, ilado sa unang Kristohanong kongregasyon. Sa usa ka okasyon human sa pagkabanhaw ni Jesus, ang atong Ginoo personal nga nagpakita kang Santiago ug unya sa tanang apostoles. (1 Corinto 15:7) Sa ulahi, sa dihang si apostol Pedro milagrosong gipagawas sa prisohan, iyang gisultihan ang nagtipon nga Kristohanong pundok: “Itaho kining mga butanga kang Santiago ug sa mga igsoon.” (Buhat 12:17) Mopatim-aw nga si Santiago, bisag dili siya usa ka apostol, nagdumala sa tigom sa nagamandong lawas sa Jerusalem sa dihang ang mga apostoles ug ang mga ansiano mihukom nga ang mga kinabig nga mga Hentil dili na kinahanglang tulion. Gilatid ni Santiago ang mga butang, ug ang desisyon nga gilig-on sa balaang espiritu gipadala ngadto sa tanang kongregasyon.​—Buhat 15:1-29.

³ Dayag, ang hamtong nga pangatarongan ni Santiago dako kaayog gibug-aton. Apan, siya mapainubsanong midawat nga siya mismo maoy yanong “ulipon sa Diyos ug sa Ginoong Jesu-Kristo.” (Santiago 1:1) Ang iyang dinasig nga sulat nasudlan ug bahandi sa makataronganong tambag ug pagdasig alang sa mga Kristohanon karon. Kadto natapos sa mga upat ka tuig una pa sa unang pag-atake sa mga Romano sa Jerusalem pinaagi ni Heneral Cestius Gallus, human nga ang maayong balita sa kakaylap gikawali na “diha sa tibuok kalalangan ilalom sa langit.” (Colosas 1:23) Kadto maoy malisod nga panahon, ug ang mga alagad ni Jehova nasayod gayod nga ang Iyang paghukom hapit nang ipahamtang diha sa Hudiyohanong nasod.

 4. Unsay nagpaila nga ang unang mga Kristohanon may dakong pagsalig sa Pulong sa Diyos?

⁴ Nabatonan na niadtong maong mga Kristohanon ang tibuok nga Hebreohanong Kasulatan ug ang dakong bahin sa Gregong Kasulatan. Sumala sa gipakita sa ilang daghang pagkutlo sa unang mga sinulat, ang Kristohanong mga magsusulat sa Bibliya dayag may dakong pagsalig sa Pulong sa Diyos. Sa susama, kita karon kinahanglang magtuon sa Pulong sa Diyos sa kinasingkasing ug ipadapat kini diha sa atong mga kinabuhi. Aron makalahutay, gikinahanglan nato ang espirituwal nga kalig-on ug kaisog nga gitagana sa Balaang Kasulatan.​—Salmo 119:97; 1 Timoteo 4:13.

 5. Nganong nagkinahanglan kita ug linain nga pagtultol karon, ug asa man nato kini makita?

⁵ Karon ang katawhan nagbarog sa ngilit sa “dakong kasakitan ingon nianang wala pa mahitabo sukad sa sinugdan sa kalibotan hangtod karon, dili, ni mahitabo pa pag-usab.” (Mateo 24:21) Ang atong kaluwasan nagadepende sa pagbaton sa diyosnong pagtultol. Sa unsang paagi atong makaplagan kini? Pinaagi sa pagbukas sa atong mga kasingkasing sa mga pagtulon-an sa dinasig-sa-espiritu nga Pulong sa Diyos. Kini motultol kanato nga ‘mahimong mga magbubuhat sa pulong,’ sama sa maunongong mga alagad ni Jehova sa unang mga panahon. Kinahanglang makugihon natong basahon ug tun-an ang Pulong sa Diyos ug gamiton kana sa kadayegan ni Jehova.​—2 Timoteo 2:15; 3:16, 17.

Paglahutay nga Mangayaon

 6. Nganong angay kitang makakaplag ug kalipay sa pagsagubang sa mga pagsulay?

⁶ Sa pagbukas sa iyang sulat, gihisgotan ni Santiago ang kangaya, ang ikaduhang bunga sa espiritu sa Diyos. Siya misulat: “Isipa ingong bug-os kangaya, akong mga igsoon, dihang makahibalag kamo ug nagkadaiyang mga pagsulay, kay kamo nahibalo man nga kining sinulayang kalidad sa inyong pagtuo nagapatunghag pag-agwanta. Apan ipabug-os sa pag-agwanta ang buluhaton niini, aron kamo mabug-os ug mahimsog sa tanang bahin, nga dili makulangan sa bisan unsa.” (Santiago 1:2-4; Galacia 5:22, 23) Nganong ikaingon nga “bug-os kangaya” ang pag-atubang sa daghang pagsulay? Aw, bisan si Jesus miingon diha sa iyang Wali sa Bukid: “Malipayon kamo sa dihang ang mga tawo magpakaulaw kaninyo ug maglutos kaninyo ug sa binakak magsulti sa tanang matang sa tumankadaotang butang batok kaninyo tungod ug alang kanako. Pagmaya ug lukso sa kangaya, sanglit dako ang inyong ganti sa mga langit.” (Mateo 5:11, 12) Adunay mangayaong katagbawan sa pagkakita sa panalangin ni Jehova diha sa atong mga paningkamot samtang magpadayon kita paingon sa tumong nga kinabuhing dayon.​—Juan 17:3; 2 Timoteo 4:7, 8; Hebreohanon 11:8-10, 26, 35.

 7. (a) Sa unsang paagi matabangan kita nga makalahutay? (b) Sama kang Job, sa unsang paagi kita pagagantihan?

⁷ Si Jesus mismo milahutay “tungod sa kangaya nga gibutang atubangan kaniya.” (Hebreohanon 12:1, 2) Nagtutok sa maisogong panig-ingnan ni Jesus, kita usab makalahutay! Ingon sa gihisgotan ni Santiago sa hinapos sa iyang sulat, tugob nga gigantihan ni Jehova ang mga maghuhupot sa integridad. “Tan-awa! Among ginapahayag nga malipayon kadtong mga nakalahutay,” miingon si Santiago. “Kamo nakadungog sa pag-agwanta ni Job ug nakakita sa sangpotanan nga gihatag ni Jehova, nga si Jehova malumo kaayo sa pagmahal ug maluluy-on.” (Santiago 5:11) Hinumdomi kon sa unsang paagi gigantihan ang pagkamaunongon ni Job sa dihang gipasig-uli kaniya ang maayong panglawas ug ngadto sa kalipayan sa usa ka bug-os, malipayong kinabuhi uban sa mga minahal. Ang maunongong paglahutay mohatag kanimo ug samang pagmaya diha sa gisaad nga Paraiso sa bag-ong kalibotan sa Diyos, ingong kinatayuktokan sa kangaya sa pag-alagad ni Jehova karon mismo.

Pagpangitag Kaalam

 8. Sa unsang paagi makaplagan nato ang matuod, praktikal nga kaalam, ug unsay bahin sa pag-ampo niini?

⁸ Ang atong kuging pagtuon sa Pulong sa Diyos, uban sa praktikal nga pagpadapat niini, mosangpot ug diyosnong kaalam, nga magpalahutay kanato sa mga pagsulay taliwala sa dunot nga hilimatyong sistema ni Satanas. Sa unsang paagi kita mapasaligan nga makaplagan ang maong kaalam? Si Santiago nag-ingon kanato: “Kon kinsa man kaninyo ang nakulangan sa kaalam, papadayona siya sa pagpangayo sa Diyos, kay siya nagahatag nga madagayaon ngadto sa tanan ug sa walay pagpamuyboy; ug ihatag kini kaniya. Apan papadayona siya sa pagpangayo diha sa pagtuo, sa wala gayoy pagduhaduha, kay siya nga nagaduhaduha maoy samag balod sa dagat nga ginahandos sa hangin ug ginapadpad-padpad.” (Santiago 1:5, 6) Kita kinahanglang mag-ampo nga kinasingkasing, nga may malig-ong pagsalig nga patalinghogan ni Jehova ang atong mga pangaliyupo ug nga iyang tubagon kini sa iyang hustong panahon ug paagi.

 9. Giunsa pagbatbat ni Santiago ang diyosnong kaalam ug ang kapadapatan niini?

⁹ Ang diyosnong kaalam maoy gasa gikan kang Jehova. Nagbatbat sa maong mga gasa, si Santiago nag-ingon: “Ang matag maayong gasa ug matag hingpit nga hatag maoy gikan sa itaas, kay nagakunsad kini gikan sa Amahan sa langitnong mga kahayag, ug kaniya walay pagkausab sa pag-irog sa landong.” Sa ulahi diha sa iyang sulat, gipatin-aw ni Santiago ang resulta sa pagkabaton sa matuod nga kaalam sa dihang siya miingon: “Kinsa ang maalamon ug masinaboton taliwala kaninyo? Ipakita niya gikan sa iyang maayong panggawi ang iyang mga buhat uban ang kalumo nga iya sa kaalam. . . . Ang kaalam gikan sa itaas maoy una sa tanan putli, unya makigdaiton, makataronganon, andam mosunod, puno sa kaluoy ug maayong mga bunga, dili mohimo ug pagpihigpihig, dili salingkapaw.”​—Santiago 1:17; 3:13-17.

10. Unsay kalainan sa bakak nga relihiyon uban sa matuod?

¹⁰ Diha sa empiryo sa kalibotan sa bakak nga relihiyon, kon sa Kakristiyanohan man o sa ubang kayutaan, kustombre na sa mga magsisimba ang pag-awit ug mga alawiton sa simbahan, pagpamati sa balikbalik nga mga pag-ampo, ug tingali mamatig usa ka pakigpulong. Walay pagdasig ang ihatag bahin sa pagwali sa mensahe sa paglaom, kay ang kadaghanang relihiyon walay nakitang masanag nga palaaboton sa umaabot. Ang mahimayaong paglaom sa Mesiyanikong Gingharian sa Diyos mahimong wala gayod hisgoti o kaha wala gayod hisabti. Si Jehova miingon nga matagnaon bahin sa mga dumadapig sa Kakristiyanohan: “Adunay duha ka daotang butang nga gihimo sa akong katawhan: Bisan ako ilang gibiyaan, ang tuboran sa buhi nga tubig, aron sila maghimog mga biawan, buslot nga mga biawan, nga dili kasudlan ug tubig.” (Jeremias 2:13) Sila walay mga tubig sa kamatuoran. Ang langitnong kaalam kulang.

11, 12. (a) Sa unsang paagi mapalihok kita sa diyosnong kaalam? (b) Mahitungod sa unsa nga kita gipasidan-an sa diyosnong kaalam?

¹¹ Pagkalahi kini taliwala sa mga Saksi ni Jehova karon! Uban sa hinatag-sa-Diyos nga dinamikong kusog, ilang gipabahaan ang yuta ug maayong balita bahin sa Iyang umaabot nga Gingharian. Ang kaalam nga ilang gipahayag malig-ong gipasukad sa Pulong sa Diyos. (Itandi ang Proverbio 1:20; Isaias 40:29-31.) Sa pagkamatuod, ilang praktikal nga gigamit ang matuod nga kahibalo ug pagsabot sa pagwali sa dagkong mga katuyoan sa atong Diyos ug Maglalalang. Angay nga maoy atong tinguha nga ang tanan diha sa kongregasyon “mapuno sa tukmang kahibalo sa kabubut-on [sa Diyos] diha sa tanang kaalam ug espirituwal nga panabot.” (Colosas 1:9) Kay nakabaton niining pundasyona, ang batan-on ug tigulang matukmod kanunay nga ‘mahimong mga magbubuhat sa pulong.’

¹² “Ang kaalam gikan sa itaas” nagpasidaan kanato bahin sa mga sala nga mahimong mosangpot ug pagkawala sa pag-uyon sa Diyos. “Hibaloi kini, hinigugmang mga igsoon,” miingon si Santiago. “Ang matag usa kinahanglan nga magmaabtik sa pagpaminaw, magmahinay sa pagsulti, magmahinay sa kapungot; kay ang kapungot sa tawo dili magpahinabo ug pagkamatarong nga iya sa Diyos.” Oo, kita kinahanglang abtik, maikagon, sa pagpamati sa diyosnong tambag ug sa pagpadapat niana. Apan, kita kinahanglang magbantay batok sa dili maayong paggamit nianang “gamayng sangkap,” ang dila. Pinaagi sa pagpanghambog, dili-maalamong paglibak, o pagpamugos sa kaugalingong opinyon, ang dila sa mahulagwayon makasugod sa pagpasilaob ug ‘dako kaayong kakahoyan.’ Busa kinahanglang ugmaron nato ang pagkamaayohon ug pagpugong sa kaugalingon diha sa tanan natong mga pag-ubanay.​—Santiago 1:19, 20; 3:5.

13. Nganong hinungdanon nga atong dawaton “ang pagtisok sa pulong”?

¹³ “Busa,” misulat si Santiago, “isalikway ang tanang kahugawan ug kanang butang nga hingapin, ang pagkadaotan, ug dawata nga may kalumo ang pagtisok sa pulong nga arang makaluwas sa inyong mga kalag.” (Santiago 1:21) Kining hakog nga kalibotan, uban sa magarbohong pagpasundayag, materyalistiko, ako-una nga paagi sa kinabuhi ug dunot nga mga moral niini, hapit nang molabay. “Apan siya nga nagabuhat sa kabubut-on sa Diyos magapabilin hangtod sa hangtod.” (1 Juan 2:15-17) Nan, pagkahinungdanon nga atong dawaton “ang pagtisok sa pulong”! Ang kaalam nga gitagana sa Pulong sa Diyos nagbarog nga lahi kaayo sa pagkadaotan niining hilimatyong kalibotan. Kita wala magtinguha niana nga pagkadaotan. (1 Pedro 2:1, 2) Kita kinahanglang adunay gugma sa kamatuoran ug malig-ong pagtuo nga natisok diha sa atong mga kasingkasing, aron kita mahimong determinado nga dili gayod motipas gikan sa matarong nga mga dalan ni Jehova. Apan igo na ba ang pagpamati sa Pulong sa Diyos?

Pagkahimong mga “Magbubuhat sa Pulong”

14. Sa unsang paagi kita mahimong mga “tigpaminaw” ug mga “magbubuhat” sa Pulong?

¹⁴ Diha sa Santiago 1:22, atong mabasa: “Magmahimo kamong magbubuhat sa pulong, ug dili tigpaminaw lamang, nga nagalimbong sa inyong kaugalingon pinaagi sa dili-mao nga pangatarongan.” “Magmahimo kamong magbubuhat sa pulong”! Kini nga tema dayag nga gipasiugda diha sa sulat ni Santiago. Kita kinahanglang mamati, unya mobuhat “sa ingon gayod”! (Genesis 6:22) Daghang tawo karon ang nangangkon nga igo na ang pagpamatig sermon o ang pagpakigbahin sa pila ka pormalistikong pagsimba panagsa, apan kutob ra sila dinha. Tingali nagtuo sila nga basta nagkinabuhi sila ug ‘maayong kinabuhi’ sumala sa ilang mga sukdanan, kana igo na. Bisan pa si Jesu-Kristo miingon: “Kon si bisan kinsa buot mosunod kanako, padumilia siya pag-angkon sa iyang kaugalingon ug paalsaha sa iyang sakitanang estaka ug sa mapinadayonon mosunod kanako.” (Mateo 16:24) Ang pagsakripisyo-sa-kaugalingon nga buhat ug paglahutay sa pagsunod sa sumbanan ni Jesus sa pagtuman sa kabubut-on sa Diyos dayag nga gikinahanglan sa matuod nga mga Kristohanon. Alang kanila, ang kabubut-on sa Diyos karon sama ra niadtong unang siglo sa dihang ang gibanhawng Jesus misugo: “Panglakaw kamo ug paghimog mga tinun-an sa katawhan sa tanang kanasoran.” (Mateo 28:19) Komosta ikaw nianang bahina?

15. (a) Unsang ilustrasyon ang gihatag ni Santiago, nga nagpakita kon sa unsang paagi kita mahimong malipayon ingong mga “magbubuhat sa pulong”? (b) Nganong ang pormal nga pagsimba lamang dili igo?

¹⁵ Kon kita magpadayon sa pagsud-ong sa Pulong sa Diyos, mahisama kini sa usa ka salamin nga magpabanaag diha kanato kon unsa kitang matanga sa tawo. Si Santiago nag-ingon: “Siya nga nagasud-ong pag-ayo sa hingpit nga balaod nga iya sa kagawasan ug kinsa nagapadayon diha niana, kini nga tawo, tungod kay siya nahimong, dili usa ka malimtanong tigpaminaw, kondili usa ka magbubuhat sa buluhaton, magmalipayon sa iyang pagbuhat niini.” (Santiago 1:23-25) Oo, siya mahimong usa ka malipayong “magbubuhat sa pulong.” Dugang pa, hinungdanong mahimong usa ka “magbubuhat” sa matag detalye sa atong Kristohanong mga kinabuhi. Dili gayod nato limbongan ang atong kaugalingon sa paghunahuna nga ang yanong pormal nga pagsimba igo na. Gitambagan kita ni Santiago sa pagbantay sa pipila ka bahin sa matuod nga pagsimba nga basin mapasagdan bisan sa masibotong mga Kristohanon. Siya nagsulat: “Ang dagway sa pagsimba nga hinlo ug wala-mahugawi sa panglantaw sa atong Diyos ug Amahan mao kini: ang pag-atiman sa mga ilo ug sa mga babayeng balo diha sa ilang kasakitan, ug ang pag-amping sa kaugalingon nga dili mabulingan sa kalibotan.”​—Santiago 1:27.

16. Sa unsang paagi si Abraham nahimong “higala ni Jehova,” ug sa unsang paagi maangkon nato ang Iyang pakighigala?

¹⁶ Dili igo ang pag-ingon lamang, ‘Nagtuo ako ug Diyos,’ ug kutob ra dinha. Sama sa giingon sa Santiago 2:19: “Ikaw nagtuo nga adunay usa ka Diyos, dili ba? Maayo ang imong ginabuhat. Ug gani ang mga demonyo nagtuo man ug nagapangurog.” Gipasiugda ni Santiago nga “ang pagtuo, kon kini walay mga buhat, patay sa kaugalingon niini,” ug naghisgot kang Abraham, nga nag-ingon: “Ang iyang pagtuo milihok duyog sa iyang mga buhat ug pinaagi sa iyang mga buhat ang iyang pagtuo nahingpit.” (Santiago 2:17, 20-22) Ang mga buhat ni Abraham naglakip sa pagtaganag kahupayan sa iyang kaparyentehan, pagpakitag pagkamaabiabihon, pagpangandam sa paghalad kang Isaac, ug sa ‘pagpahayag sa dayag’ sa dili-matarog nga pagtuo diha sa saad sa Diyos nga “siyudad nga adunay tinuod nga mga patukoranan,” ang umaabot Mesiyanikong Gingharian. (Genesis 14:16; 18:1-5; 22:1-18; Hebreohanon 11:8-10, 13, 14; 13:2) Sa tukma, si Abraham “gitawag nga ‘higala ni Jehova.’” (Santiago 2:23) Kita usab maisip ingong ‘mga higala ni Jehova’ samtang aktibo natong ginamantala ang atong pagtuo ug paglaom sa iyang umaabot nga Gingharian sa pagkamatarong.

17. (a) Nganong si Rahab ‘gipahayag nga matarong,’ ug sa unsang paagi siya gigantihan? (b) Unsang taas nga listahan ang gihatag sa Bibliya bahin niadtong ‘nangahimong mga magbubuhat sa pulong’? (c) Sa unsang paagi si Job gigantihan, ug ngano?

¹⁷ Kadtong kinsa ‘mahimong mga magbubuhat sa pulong’ sa pagkamatuod “igapahayag nga matarong pinaagi sa mga buhat, ug dili pinaagi sa pagtuo lamang.” (Santiago 2:24) Si Rahab maoy usa kinsa nagdugang ug mga buhat sa iyang pagtuo diha sa “pulong” nga iyang nadungog bahin sa gamhanang mga buhat ni Jehova. Iyang gitagoan ang Israelinhong mga espiya ug gitabangan sila nga makaikyas, ug unya iyang gitipon ang panimalay sa iyang amahan aron maluwas. Diha sa pagkabanhaw, pagkadako sa iyang kalipay nga masayod nga ang iyang pagtuo, nga gipaluyohan sa mga buhat, misangpot sa iyang pagkahimong usa ka kagikan sa Mesiyas! (Josue 2:11; 6:25; Mateo 1:5) Ang Hebreohanon kapitulo 11 nagtaganag taas nga listahan sa uban nga ‘nahimong mga magbubuhat’ sa pagpasundayag sa ilang pagtuo, ug sila tugob nga pagagantihan. Ni atong kalimtan si Job, kinsa ilalom sa grabeng pagsulay miingon: “Pasagdi nga padayong mabulahan ang ngalan ni Jehova.” Ingon sa nakita na nato, ang iyang pagtuo ug mga buhat misangpot ug dakong ganti. (Job 1:21; 31:6; 42:10; Santiago 5:11) Sa susama, ang atong paglahutay karon ingong mga “magbubuhat sa pulong” mosangpot ug pahiyom sa pag-uyon ni Jehova.

18, 19. Sa unsang paagi ang dugay nang gidaogdaog nga mga igsoon ‘nahimong mga magbubuhat sa pulong,’ ug unsang panalangin ang misangpot sa ilang kalihokan?

¹⁸ Lakip niadtong nakalahutay sa daghang katuigan mao ang atong mga igsoon sa Sidlakang Uropa. Karon nga gikuha na ang daghang pagdili, kini sila tinuod nga ‘mahimong mga magbubuhat sa pulong’ diha sa ilang bag-ong palibot. Ang mga misyonaryo ug mga payunir sa kasikbit nga kayutaan mibalhin aron sa pagtabang sa pagpanudlo ug pag-organisar. Ang sanga sa Finland ug ubang duol nga mga sanga sa Watch Tower Society nagpadalag ekspertong mga magtutukod, ug ang mahinatagong tibuok-kalibotan nga panag-igsoonay mitabang sa panalapi sa pagtukod sa bag-ong sangang mga buhatan ug mga Kingdom Hall.​—Itandi ang 2 Corinto 8:14, 15.

¹⁹ Pagkamadasigon niadtong dugay nang gidaogdaog nga mga igsoon sa pagsanong diha sa kanataran! Sila ‘naghago ug nanlimbasog sa ilang kaugalingon’ aron mabawi, pagaingnon pa, ang mga higayon nga nasayloan sulod sa “masamokong panahon.” (1 Timoteo 4:10; 2 Timoteo 4:2) Pananglitan, niining miaging Abril sa Albania, diin mapintas kaayo ang pagpiit, ang tanang suplay sa Kingdom News nga nag-ulohang “Nganong Puno Kaayog Suliran ang Kinabuhi” gipanagtag sa tulo ka adlaw lamang. Kini maoy maayo kaayong pagsunod sa Memoryal sa kamatayon ni Jesus, nga gitambongan sa 3,491 ka tawo​—mas daghan pa kay sa ilang 538 ka aktibong mga magmamantala.

20. Unsay gipaila sa dili pa dugayng mga tumatambong sa Memoryal, ug sa unsang paagi matabangan ang daghan?

²⁰ Ang ubang nasod usab nakahimog dakong amot sa mga tumatambong sa Memoryal, nga miuswag sa mga tuig nga dili pa dugay ngadto sa kapin sa 10,000,000. Diha sa daghang dapit ang mga bag-ohan, ang ilang pagtuo napalig-on pinaagi sa pagtambong ug pagsaulog sa Memoryal, ‘nangahimong mga magbubuhat sa pulong.’ Madasig ba nato ang daghan pa sa bag-ong mga nakig-uban aron makuwalipikar alang niana nga pribilehiyo?

21. Nahiuyon sa atong teksto sa tuig, unsang dalan ang angay natong pangagpason, ug uban sa unsang tumong?

²¹ Sama niadtong masibotong mga Kristohanon sa unang siglo, ug daghan pa kaayo sukad niadto, magmadeterminado kita sa pagpaningkamot sa ‘pagpangagpas sa tumong’ nga kinabuhing dayon, kon kaha kana maoy sa langitnong Gingharian o sa yutan-ong dominyo niini. (Filipos 3:12-14) Takos gayod sa atong paningkamot ang pagkab-ot nianang tumonga. Dili kini ang panahon sa pagbalik sa pagkahimong mga tigpatalinghog lamang, kondili ang panahon sa tanang panahon nga ‘magmalig-on ug magbuhat.’ (Hageo 2:4; Hebreohanon 6:11, 12) Sanglit ‘midawat sa pagtisok sa pulong,’ hinaot nga kita ‘mahimong malipayong mga magbubuhat sa pulong’ karon ug hangtod sa walay kataposang umaabot.

Unsay Imong Tubag?

◻ Sa unsang paagi kita mangayaong makalahutay?

◻ Unsa ang “kaalam gikan sa itaas,” ug sa unsang paagi atong pangagpason kana?

◻ Nganong kita kinahanglang ‘mahimong mga magbubuhat sa pulong, ug dili mga tigpaminaw lamang’?

◻ Unsang mga taho ang angay makapadasig kanato nga mahimong mga “magbubuhat sa pulong”?

[Hulagway sa panid 17]

Hinaot buksan usab nato ang atong mga kasingkasing sa diyosnong pagtulon-an

[Hulagway sa panid 18]

Ang pagkamaunongon ni Job gigantihan pinaagi sa pagpasig-uli kaniya ngadto sa usa ka bug-os, malipayong kinabuhi uban sa mga minahal