Ang Pamilya ni Jehova Nakapahimulos ug Bililhong Panaghiusa

“Tan-awa! Pagkamaayo ug pagkamalipayon gayod sa mga magsoon nga magtipon pagpuyo diha sa panaghiusa!”​—SALMO 133:1.

 1. Unsay kahimtang sa daghang pamilya karon?

ANG pamilya anaa sa krisis karong adlawa. Diha sa kadaghanang pamilya, ang mga bugkos sa kaminyoon kabungkagon na. Ang diborsiyo dugang nga nahimong komon, ug ginaantos sa daghang kabataan sa nagdiborsiyong mga magtiayon ang grabeng kaguol. Minilyong mga pamilya dili-malipayon ug nagkabahinbahin. Bisan pa, adunay usa ka pamilya nga nahibalo sa tinuod nga kalipay ug tiunay nga panaghiusa. Kini mao ang unibersohanong pamilya ni Jehova nga Diyos. Diha niana, gihimo sa panonpanong dili-makitang mga manulonda ang gitudlo kanila nga buluhaton sumala sa kabubut-on sa Diyos. (Salmo 103:20, 21) Apan aduna bay pamilya sa yuta nga nakapahimulos ug ingon niana nga panaghiusa?

2, 3. (a) Kinsa karon ang bahin na sa unibersohanong pamilya sa Diyos, ug sa unsa ikapaamgid nato ang tanang mga Saksi ni Jehova karon? (b) Unsang mga pangutana ang atong hisgotan?

² Si apostol Pablo misulat: “Akong ginapiko ang akong mga tuhod ngadto sa Amahan, kang kinsa utang sa tanang kabanayan sa langit ug sa yuta ang ngalan niini.” (Efeso 3:14, 15) Ang matag kaliwat sa pamilya sa yuta nakautang sa ngalan niini sa Diyos tungod kay siya mao ang Maglalalang. Bisan tuod walay tawhanong mga pamilya sa langit, sa mahulagwayong pagkasulti ang Diyos minyo sa iyang langitnong organisasyon, ug si Jesus adunay espirituwal nga pangasaw-onon nga nahiusa kaniya sa kalangitan. (Isaias 54:5; Lucas 20:34, 35; 1 Corinto 15:50; 2 Corinto 11:2) Ang matinumanong mga dinihogan sa yuta maoy bahin na karon sa unibersohanong pamilya sa Diyos, ug ang “ubang mga karnero” ni Jesus, nga adunay yutan-ong mga palaaboton, mao ang umaabot nga mga sakop niini. (Juan 10:16; Roma 8:14-17; Ang Bantayanang Torre, Enero 15, 1996, panid 31) Apan, ang tanang mga Saksi ni Jehova karon mahimong ikapaamgid sa usa ka nahiusang tibuok-kalibotang pamilya.

³ Ikaw ba bahin sa kahibulongang internasyonal nga pamilya sa mga alagad sa Diyos? Kon mao, imong mapahimuslan ang usa sa labing dagkong mga panalangin nga maangkon ni bisan kinsa. Minilyon ang makapamatuod nga ang globonhong pamilya ni Jehova​—ang iyang makitang organisasyon​—maoy usa ka tabunok nga lugar sa kalinaw ug panaghiusa diha sa kalibotanong disyerto sa panagbangi ug panagkabahinbahin. Sa unsang paagi ikahubit ang panaghiusa sa tibuok-kalibotang pamilya ni Jehova? Ug unsang mga butang ang nagapalambo sa maong panaghiusa?

Pagkamaayo ug Pagkamalipayon!

 4. Sa imong kaugalingong mga pulong, unsaon nimo pagpahayag kon unsay gisulti sa Salmo 133 bahin sa inigsoong panaghiusa?

⁴ Gipabilhan gayod pag-ayo ni salmistang David ang inigsoong panaghiusa. Siya nadasig pa gani sa pag-awit bahin niini! Handurawa siya nga nagtugtog sa iyang alpa samtang siya miawit: “Tan-awa! Pagkamaayo ug pagkamalipayon gayod sa mga magsoon nga magtipon pagpuyo diha sa panaghiusa! Sama kini sa bililhon nga lana nga anaa sa ulo, nga nagadaligdig sa bungot, sa bungot ni Aaron, nga nagadaligdig sa liab sa iyang mga besti. Sama kini sa yamog sa Hermon nga nangatagak gikan sa kabukiran sa Sion. Kay didto gisugo ni Jehova ang panalangin, bisan sa kinabuhi nga walay kataposan.”​—Salmo 133:1-3.

 5. Pinasukad sa Salmo 133:1, 2, sa unsang paagi ikatandi ang mga Israelinhon ug ang presenteng-adlawng mga alagad sa Diyos?

⁵ Kadtong mga pulonga ikapadapat sa inigsoong panaghiusa nga gipahimuslan sa karaang mga tawo sa Diyos, ang mga Israelinhon. Samtang didto sa Jerusalem alang sa ilang tulo ka tinuig nga mga piyesta, sila tinuod nga nagtipon pagpuyo diha sa panaghiusa. Bisan tuod gikan sila sa nagkalainlaing mga tribo, sila usa ka pamilya. Ang panag-ubanay may maayong epekto kanila, nga sama sa makapapreskong lana sa pagdihog nga mahumot. Sa dihang gibubo ang ingon niini nga lana diha sa ulo ni Aaron, kini mitulo ngadto sa iyang bungot ug midaligdig sa liab sa iyang besti. Alang sa mga Israelinhon, ang panag-ubanay may maayong impluwensiya nga nanuhopsuhop diha sa nagkatigom nga mga tawo sa katibuk-an. Ang mga di-pagsinabtanay nahusay, ug napalambo ang panaghiusa. Ang samang panaghiusa naglungtad sa tibuok-kalibotang pamilya ni Jehova karong adlawa. Ang regular nga pagpakig-uban adunay maayong espirituwal nga epekto sa mga sakop niini. Ang bisan unsang mga di-pagsinabtanay o mga problema mawala sa dihang ang tambag sa Pulong sa Diyos ipadapat. (Mateo 5:23, 24; 18:15-17) Ang katawhan ni Jehova nagapabili gayod sa pagdinasigay sa usag usa nga maoy resulta sa ilang inigsoong panaghiusa.

6, 7. Sa unsang paagi ang panaghiusa sa Israel kaamgid sa yamog sa Bukid sa Hermon, ug asa makita ang panalangin sa Diyos karon?

⁶ Sa unsang paagi ang pag-ipon ug puyo sa Israel nga may panaghiusa kaamgid usab sa yamog sa Bukid sa Hermon? Aw, sanglit kining taluktok sa bukid maoy kapin sa 2,800 metros ibabaw sa lebel sa dagat, kini punog-yelo halos sa tibuok tuig. Ang nagyelo nga taluktok sa Hermon mopanibug-ok sa alisngaw sa kagabhion ug busa naghatag ug daghang yamog nga nagpabuhi sa katanoman sa panahon sa taas nga hulaw. Ang bugnawng hoyuhoy sa hangin gikan sa bukid sa Hermon makapadpad sa maong alisngaw paingon sa habagatan sa dapit sa Jerusalem, diin kini manibug-ok ingong yamog. Busa tukmang naghisgot ang salmista bahin sa ‘yamog sa Hermon nga nangatagak gikan sa Bukid sa Sion.’ Pagkamaayong pahinumdom sa makapapreskong impluwensiya nga nagapalambo sa panaghiusa sa pamilya sa mga magsisimba ni Jehova!

⁷ Sa wala pa matukod ang Kristohanong kongregasyon, ang Sion, o Jerusalem, mao ang sentro sa matuod nga pagsimba. Busa, didto gisugo sa Diyos nga moabot ang panalangin. Sanglit ang Tuboran sa tanang panalangin nagpuyo nga mahulagwayon sa sangtuwaryo sa Jerusalem, ang mga panalangin magagikan didto. Sanglit ang matuod nga pagsimba dili na limitado sa usa ka lugar, busa, ang panalangin, gugma, ug panaghiusa sa mga alagad sa Diyos makita sa tibuok kalibotan karong adlawa. (Juan 13:34, 35) Unsa ang pipila ka butang nga nagpalambo niini nga panaghiusa?

Mga Butang nga Nagpalambo sa Panaghiusa

 8. Unsay atong makat-onan bahin sa panaghiusa diha sa Juan 17:20, 21?

⁸ Ang panaghiusa sa mga magsisimba ni Jehova gipasukad sa pagsugot sa tukmang pagsabot sa Pulong sa Diyos, lakip sa mga pagtulon-an ni Jesu-Kristo. Pinaagi sa pagpadala ni Jehova sa iyang Anak dinhi sa kalibotan aron sa pagpamatuod sa kamatuoran ug mamatay sa haladnong kamatayon, ang dalan nabuksan sa pagkaporma sa nahiusang Kristohanong kongregasyon. (Juan 3:16; 18:37) Nga adunay tinuod nga panaghiusa sa mga sakop niini nadayag sa dihang si Jesus miampo: “Ako nagahangyo, dili mahitungod kanila lamang, apan usab mahitungod niadtong nagabutang ug pagtuo kanako pinaagi sa ilang pulong; aron nga silang tanan mahimong usa, maingon nga ikaw, Amahan, nahiusa kanako ug ako nahiusa kanimo, nga sila usab mahiusa kanato, aron nga ang kalibotan motuo nga ikaw nagpadala kanako.” (Juan 17:20, 21) Nakab-ot gayod sa mga sumusunod ni Jesus ang panaghiusa nga sama nianang naglungtad tali sa Diyos ug sa iyang Anak. Kini nahitabo tungod kay ilang gisunod ang Pulong sa Diyos ug ang mga pagtulon-an ni Jesus. Ang samang tinamdan maoy usa ka dakong butang sa panaghiusa sa tibuok-kalibotan nga pamilya ni Jehova karon.

 9. Unsang papel ang gidula sa balaang espiritu sa panaghiusa sa katawhan ni Jehova?

⁹ Ang laing butang nga nagpahiusa sa katawhan ni Jehova mao nga atong nabatonan ang balaang espiritu, o aktibong gahom, sa Diyos. Kini nagpaarang kanato sa pagsabot sa gibutyag nga kamatuoran sa Pulong ni Jehova ug busa makaalagad kaniya diha sa panaghiusa. (Juan 16:12, 13) Ginatabangan kita sa espiritu sa paglikay sa makapabungkag-sa-panaghiusang mga buhat sa unod sama sa panag-away, kasina, pagsilaob sa kasuko, ug mga bingkilbingkil. Hinunoa, ang espiritu sa Diyos magpaugmad diha kanato ug makapahiusang bunga nga gugma, kalipay, kalinaw, hataas-nga-pailob, kalulot, kaayo, pagtuo, kalumo, ug pagpugong-sa-kaugalingon.​—Galacia 5:19-23.

10. (a) Sa unsang paagi ikatandi ang gugma nga naglungtad sa nahiusang tawhanong pamilya ug ang gugma nga makita taliwala niadtong nagpahinungod kang Jehova? (b) Sa unsang paagi gipadayag sa usa ka sakop sa Nagamandong Lawas ang iyang mga pagbati bahin sa pagpakigtigom uban sa iyang espirituwal nga mga igsoon?

¹⁰ Ang mga sakop sa nahiusang pamilya naghigugmaay sa usag usa ug malipayon nga nagakaipon. Sa susama, kadtong sakop sa nahiusang pamilya sa mga magsisimba ni Jehova nahigugma kaniya, sa iyang Anak, ug sa isigkamagtutuo. (Marcos 12:30; Juan 21:15-17; 1 Juan 4:21) Sama sa usa ka mahigugmaong natural nga pamilya nga malipayng magdungan sa pagpangaon, kadtong nagapahinungod sa Diyos malipay nga mahimong presente diha sa Kristohanong mga tigom, mga asembliya, ug mga kombensiyon aron makapahimulos sa maayong pag-ubanay ug sa lamian kaayong espirituwal nga pagkaon. (Mateo 24:45-47; Hebreohanon 10:24, 25) Usa ka sakop sa Nagamandong Lawas sa mga Saksi ni Jehova kas-a miingon labot niini: “Alang kanako, ang pakigtigom uban sa mga igsoon maoy usa sa labing dagkong kalipay sa kinabuhi ug tuboran sa pagdasig. Gusto kaayo ako nga mahimong usa sa unang moabot sa Kingdom Hall, ug ang kataposang mogikan, kon mahimo. Bation ko gayod ang kalipay sa dihang makig-estorya sa katawhan sa Diyos. Morag anaa ako sa akong kaugalingong balay kon kauban ko sila.” Ingon ba usab niana ang imong gibati?​—Salmo 27:4.

11. Unsang buluhaton ang gikalipayan pag-ayo sa mga Saksi ni Jehova, ug unsay mosangpot sa paghimo sa pag-alagad sa Diyos nga maoy sentro sa atong mga kinabuhi?

¹¹ Ang usa ka nahiusang pamilya malipay sa pagbuhat sa mga butang nga magkauban. Sa susama, kadtong sakop sa pamilya sa mga magsisimba ni Jehova malipayon sa hiusang pagtuman sa ilang buluhaton sa pagsangyaw sa Gingharian ug sa paghimog tinun-an. (Mateo 24:14; 28:19, 20) Ang regular nga pagpakigbahin niana mas nagpasuod pa kanato sa ubang mga Saksi ni Jehova. Ang paghimo sa pag-alagad sa Diyos nga mao ang sentro sa atong mga kinabuhi ug pagsuportar sa tanang kalihokan sa iyang katawhan nagapalambo usab sa espiritu sa pamilya sa atong taliwala.

Hinungdanon ang Teokratikanhong Kahikayan

12. Unsay mga kinaiyahan sa usa ka malipayon ug nahiusang pamilya, ug unsang kahikayan ang nagpalambo sa panaghiusa sa unang-siglong Kristohanong mga kongregasyon?

¹² Ang usa ka pamilya nga adunay malig-on apan mahigugmaong pagpanguna ug nga mahusay lagmit nga nagkahiusa ug malipayon. (Efeso 5:22, 33; 6:1) Si Jehova maoy usa ka Diyos nga may malinawong kahikayan, ug ang tanang sakop sa iyang pamilya naglantaw kaniya ingong ang “Usa nga Supremo.” (Daniel 7:18, 22, 25, 27; 1 Corinto 14:33) Ilang giila usab nga iyang gitudlo ang iyang Anak, si Jesu-Kristo, nga mao ang manununod sa tanang butang ug gitugyan ngadto kaniya ang tanang awtoridad sa langit ug sa yuta. (Mateo 28:18; Hebreohanon 11, 2) Uban kang Kristo nga mao ang Ulo niini, ang Kristohanong kongregasyon maoy usa ka mahusay, nahiusang organisasyon. (Efeso 5:23) Aron madumala ang mga kalihokan sa unang-siglong mga kongregasyon, dihay usa ka nagamandong lawas nga gilangkoban sa mga apostoles ug ubang hamtong sa espirituwal nga “mga ansiyano.” Ang tagsatagsa ka kongregasyon may gitudlo nga mga magtatan-aw, o mga ansiyano, ug ministeryal nga mga alagad. (Buhat 15:6; Filipos 1:1) Ang pagsugot niadtong nagapanguna nagpalambo sa panaghiusa.​—Hebreohanon 13:17.

13. Sa unsang paagi ginadani ni Jehova ang katawhan, ug unsay miresulta niini?

¹³ Apan kini bang tanang kahikayan nagsugyot nga ang panaghiusa sa mga magsisimba ni Jehova ikapasidungog sa episyente, walay-pagbating pagpanguna? Dili gayod! Walay butang nga dili-mahigugmaon labot sa Diyos o sa iyang organisasyon. Ginadani ni Jehova ang mga tawo pinaagi sa pagpakitag gugma, ug matag tuig ginatos ka linibo ang kinabubut-on ug malipayong nahimong bahin sa organisasyon ni Jehova pinaagi sa pagpabawtismo agig simbolo sa ilang bug-os-kasingkasing nga pagpahinungod sa Diyos. Ang ilang espiritu sama niana kang Josue, kinsa nag-awhag sa kaubang mga Israelinhon: “Magpili kamo karong adlawa kon kinsay inyong alagaron . . . Apan alang kanako ug sa akong panimalay, kami mag-alagad kang Jehova.”​—Josue 24:15.

14. Nganong makaingon kita nga teokratikanhon ang organisasyon ni Jehova?

¹⁴ Ingong bahin sa pamilya ni Jehova, dili lamang kita malipayon kondili may kasegurohan usab. Tungod kini kay teokratikanhon ang iyang organisasyon. Ang Gingharian sa Diyos maoy usa ka teokrasya (gikan sa Gregong the·osʹ, diyos, ug kraʹtos, usa ka pagmando). Kini maoy usa ka pagmando sa Diyos, nga siya maoy nag-ordinar ug nagtukod. Ang dinihogang “balaan nga nasod” ni Jehova nagpasakop sa iyang pagmando ug busa teokratikanhon usab. (1 Pedro 2:9) Uban sa Dakong Teokrata, si Jehova, ingong atong Maghuhukom, Maghahatag-Balaod, ug Hari, kita adunay katarongan gayod nga mobating may kasegurohan. (Isaias 33:22) Bisan pa, komosta kon may motunghang kabingkilan nga magdaot sa atong kalipay, kasegurohan, ug panaghiusa?

Milihok ang Nagamandong Lawas

15, 16. Unsang panaglalis ang mitungha sa unang siglo, ug ngano?

¹⁵ Aron mapatunhay ang panaghiusa sa pamilya, usahay may panaglalis nga tingali kinahanglang husayon. Nan, ingnon ta nga usa ka espirituwal nga problema ang kinahanglang sulbaron aron mapatunhay ang panaghiusa sa pamilya sa mga magsisimba sa Diyos sa unang siglo K.P. Nan unsay angay himoon? Milihok ang nagamandong lawas, nga mihimog mga desisyon labot sa espirituwal nga mga butang. Kita adunay Kasulatanhong rekord sa maong aksiyon.

¹⁶ Sa mga 49 K.P., ang nagamandong lawas nagtigom sa Jerusalem aron husayon ang dako nga problema ug busa mapatunhay ang panaghiusa sa “panimalay sa Diyos.” (Efeso 2:19) Sa mga 13 ka tuig una pa niana, nasangyawan na ni apostol Pedro si Cornelio, ug ang unang mga Hentil, o mga tawo sa kanasoran, nangahimong bawtismadong mga magtutuo. (Buhat, kapitulo 10) Sa panahon sa unang misyonaryong panaw ni Pablo, daghang Hentil ang midawat sa Kristiyanidad. (Buhat 13:1–14:28) Sa pagkamatuod, natukod ang usa ka kongregasyon sa mga Kristohanong Hentil sa Antioquia, Siria. Ang ubang Kristohanong mga Hudiyo nagtuo nga ang mga kinabig nga Hentil kinahanglang magpatuli ug magbantay sa Moisesnong Kasugoan, apan ang uban misupak. (Buhat 15:1-5) Kini nga panaglalis misangpot unta sa bug-os nga pagkawalay panaghiusa, nga basin makapaporma pag bulag nga mga kongregasyong Hudiyohanon ug Hentil. Busa milihok dayon ang nagamandong lawas sa pagpatunhay sa Kristohanong panaghiusa.

17. Unsang mahiusahong teokratikanhong paagi ang gibatbat sa Buhat kapitulo 15?

¹⁷ Sumala sa Buhat 15:6-22, “ang mga apostol ug ang mga ansiyano nagtigom aron tan-awon kining butanga.” Presente usab didto ang uban, lakip sa usa ka delegasyon gikan sa Antioquia. Gisaysay una ni Pedro nga ‘pinaagi sa iyang baba ang katawhan sa kanasoran nagpakadungog sa pulong sa maayong balita ug mituo.’ Unya “ang tibuok panon” namati samtang giasoy ni Bernabe ug Pablo ang “daghang ilhanan ug mga tilimad-on nga gihimo sa Diyos pinaagi kanila taliwala sa kanasoran,” o mga Hentil. Si Santiago sunod misugyot kon unsaon pagsulbad sa isyu. Human nakahimo ang nagamandong lawas ug desisyon, kita gisultihan: “Ang mga apostol ug ang mga ansiyano uban sa tibuok nga kongregasyon mipabor sa pagpadalag piniling mga lalaki gikan sa taliwala kanila ngadto sa Antioquia uban nila ni Pablo ug Bernabe.” Kadtong “piniling mga lalaki”​—si Judas ug si Silas​—nagdalag makapadasig nga sulat ngadto sa mga isigkamagtutuo.

18. Unsang desisyon ang gihimo sa nagamandong lawas labot sa Moisesnong Kasugoan, ug sa unsang paagi naapektohan niini ang mga Kristohanong Hudiyohanon ug Hentil?

¹⁸ Ang sulat nga nagpahibalo sa desisyon sa nagamandong lawas gisugdan niining mga pulonga: “Ang mga apostol ug ang mga ansiyano, mga igsoon, ngadto sa mga igsoon sa Antioquia ug Siria ug Cilicia nga mga gikan sa kanasoran: Mga pangumosta!” Ang uban mitambong niining makasaysayanhong tigom, apan dayag nga ang nagamandong lawas gilangkoban sa “mga apostol ug mga ansiyano.” Ang espiritu sa Diyos maoy migiya kanila, kay ang sulat nag-ingon: “Ang balaang espiritu ug kami mismo mipabor nga dili magpuno ug dugang pang kabug-at diha kaninyo, gawas niining mga kinahanglanong butang, nga padayong magaayad sa mga butang nga gihalad ngadto sa mga idolo ug gikan sa dugo ug gikan sa mga butang nga naluok ug gikan sa pakighilawas.” (Buhat 15:23-29) Ang mga Kristohanon wala pugsa nga magpatuli ug magbantay sa Moisesnong Kasugoan. Kining desisyona nakatabang sa mga Kristohanong Hudiyohanon ug Hentil sa paglihok ug sa pagsulti nga may panaghiusa. Ang mga kongregasyon nalipay, ug ang bililhong panaghiusa nagpadayon, sama sa tibuok-kalibotang pamilya sa Diyos karon ilalom sa espirituwal nga paggiya sa Nagamandong Lawas sa mga Saksi ni Jehova.​—Buhat 15:30-35.

Pag-alagad Diha sa Teokratikanhong Panaghiusa

19. Nganong nagalambo ang panaghiusa sa pamilya sa mga magsisimba ni Jehova?

¹⁹ Ang panaghiusa molambo kon ang mga sakop sa pamilya magtinabangay sa usag usa. Tinuod usab kini diha sa pamilya sa mga magsisimba ni Jehova. Sanglit teokratikanhon, ang mga ansiyano ug ang uban sa unang-siglong kongregasyon nag-alagad sa Diyos nga bug-os nga nakigkooperar sa nagamandong lawas ug midawat sa mga desisyon niini. Pinaagi sa tabang sa nagamandong lawas, ang mga ansiyano ‘miwali sa pulong’ ug ang mga sakop sa kongregasyon sa katibuk-an ‘nagapamulong nga may pag-uyon.’ (2 Timoteo 4:1, 2; 1 Corinto 1:10) Busa ang mao gihapong mga kamatuoran sa Kasulatan ang gipresentar diha sa ministeryo ug sa Kristohanong mga tigom, sa Jerusalem man, sa Antioquia, Roma, Corinto, o bisan asa. Ang maong teokratikanhong panaghiusa naglungtad karon.

20. Aron mapatunhay ang atong Kristohanong panaghiusa, unsay angay natong himoon?

²⁰ Aron mapatunhay ang atong panaghiusa, kitang tanan nga bahin sa tibuok-kalibotang pamilya ni Jehova maningkamot sa pagpasundayag sa teokratikanhong gugma. (1 Juan 4:16) Kinahanglang magpasakop kita sa kabubut-on sa Diyos ug magpakitag lalom nga pagtahod sa ‘kasaligang ulipon’ ug sa Nagamandong Lawas. Sama sa atong pagpahinungod sa Diyos, ang atong pagkamasinugtanon maoy, sa pagkamatuod, kinabubut-on ug malipayon. (1 Juan 5:3) Pagkatukma nga gilangkit sa salmista ang kalipay ug pagkamasinugtanon! Siya miawit: “Dayega si Jah, kamo nga katawhan! Malipayon ang tawo nga may kahadlok kang Jehova, nga diha sa iyang mga sugo siya nagakalipay sa hilabihan gayod.”​—Salmo 112:1.

21. Sa unsang paagi kita makapamatuod sa atong kaugalingon nga teokratikanhon?

²¹ Si Jesus, ang Ulo sa kongregasyon, maoy bug-os teokratikanhon ug nagtuman kanunay sa kabubut-on sa iyang Amahan. (Juan 5:30) Busa, atong sundon ang atong Panig-ingnan pinaagi sa teokratikanhon ug hiusang pagbuhat sa kabubut-on ni Jehova nga bug-os mokooperar sa Iyang organisasyon. Dayon uban ang kinasingkasing nga kalipay ug pasalamat, atong mapalanog ang awit sa salmista: “Tan-awa! Pagkamaayo ug pagkamalipayon gayod sa mga magsoon nga magtipon pagpuyo diha sa panaghiusa!”

Unsay Imong Tubag?

◻ Sa unsang paagi may kalabotan ang atong Kristohanong panaghiusa sa Salmo 133?

◻ Unsa ang pipila ka butang nga nagapalambo sa panaghiusa?

◻ Nganong ang teokratikanhong kahikayan kinahanglan sa panaghiusa sa katawhan sa Diyos?

◻ Sa unsang paagi ang unang-siglong nagamandong lawas milihok sa pagpatunhay sa panaghiusa?

◻ Unsay kahulogan alang kanimo sa pag-alagad diha sa teokratikanhong panaghiusa?

[Hulagway sa panid 13]

Ang nagamandong lawas milihok sa pagpatunhay sa panaghiusa