Mga Pangutana Gikan sa mga Magbabasa
“Ang Bantayanang Torre” sa Nobyembre 1, 1995, naghatag ug bug-os nga pagtagad sa giingon ni Jesus bahin sa “kining kaliwatana,” ingon sa atong mabasa sa Mateo 24:34. Nagkahulogan ba kini nga adunay pagduhaduha kon kaha ang Gingharian sa Diyos natukod sa langit niadtong 1914?
Ang maong panaghisgot sa Ang Bantayanang Torre wala maghisgot ug kausaban sa atong paninugdang pagtulon-an bahin sa 1914. Si Jesus nagpahayag sa ilhanan nga magtimaan sa iyang presensiya uban ang Gingharianong gahom. Kita adunay igong ebidensiya nga kining ilhanana nagakatuman na sukad sa 1914. Ang mga kamatuoran bahin sa mga gubat, mga kagutmanan, mga hampak, mga linog, ug ubang mga ebidensiya nagpamatuod nga sukad sa 1914, si Jesus aktibo na ingong Hari sa Gingharian sa Diyos. Kini nagpaila nga sukad niadto kita ania na sa katiklopan sa sistema sa mga butang.
Nan, unsay gitin-aw sa Ang Bantayanang Torre? Aw, ang pasukaranan mao ang kahulogan sa paggamit ni Jesus sa pulong ‘kaliwatan’ diha sa Mateo 24:34. Ang maong kasulatan mabasa: “Sa pagkamatuod ako magaingon kaninyo nga kining kaliwatana dili gayod motaliwan hangtod nga mahitabo kining tanang butanga.” Unsay gipasabot ni Jesus sa ‘kaliwatan,’ sa iyang adlaw ug sa atoa?
Daghang kasulatan nagpamatuod nga si Jesus wala magagamit sa ‘kaliwatan’ nga maylabot sa usa ka gamay o linaing pundok, nga nagkahulogan sa Hudiyong mga pangulo lamang o sa iyang maunongong mga tinun-an lamang. Hinunoa, iyang gigamit ang ‘kaliwatan’ sa pagsaway sa panonpanon sa mga Hudiyo nga nagsalikway kaniya. Hinuon, ikalipay, ang mga indibiduwal makabuhat kon unsay giawhag ni apostol Pedro sa adlaw sa Pentekostes, maghinulsol ug “maluwas gikan niining baliko nga kaliwatan.”—Buhat 2:40.
Sa maong mga pulong, si Pedro tin-aw nga wala magtino sa bisan unsang pihong yugto o gitas-on sa panahon, ni siya naglangkit sa ‘kaliwatan’ uban sa bisan unsang tinong petsa. Wala siya moingon nga ang katawhan angay nga maluwas gikan sa kaliwatan nga natawo sa samang tuig sa pagkatawo ni Jesus o sa kaliwatan nga natawo sa 29 K.P. Si Pedro naghisgot bahin sa dili-magtutuo nga mga Hudiyo sa maong yugto—nga ang pipila tingali batabata pa, ang uban mas gulang—nga nasinati sa pagpanudlo ni Jesus, nakakita o nakadungog bahin sa iyang mga milagro, ug wala motuo kaniya ingong Mesiyas.
Kana lagmit mao ang pagsabot ni Pedro sa paggamit ni Jesus sa ‘kaliwatan’ sa dihang siya ug ang tulo pa ka laing apostol nakauban ni Jesus sa Bukid sa mga Olibo. Sumala sa matagnaong mga pulong ni Jesus, ang mga Hudiyo niadtong yugtoa—sa panguna, mga katalirongan ni Jesus—makasinati o makabati bahin sa mga gubat, mga linog, mga kagutmanan, ug ubang mga ebidensiya nga duol na ang kataposan sa Hudiyonhong sistema. Sa pagkamatuod, kadtong kaliwatana wala mahanaw sa wala pa moabot ang kataposan sa 70 K.P.—Mateo 24:3-14, 34.
Pagaangkonon nga wala namo sabta sa kanunay ang mga pulong ni Jesus sa maong kahulogan. Adunay kiling sa di-hingpit nga mga tawo nga buot mag-espesipiko bahin sa petsa kon kanus-a moabot ang kataposan. Hinumdomi nga bisan ang mga apostoles nagtinguhag dugang espesipikong mga butang, nga nangutana: “Ginoo, ginapasig-uli mo ba ang gingharian sa Israel niining panahona?”—Buhat 1:6.
Uban ang susamang sinserong mga tuyo, ang mga alagad sa Diyos sa modernong kapanahonan nagtinguha sa pagbaton gikan sa gipamulong ni Jesus bahin sa ‘kaliwatan’ sa pipila ka tin-awng elemento sa panahon nga gikalkulo sukad sa 1914. Pananglitan, usa ka pangatarongan mao nga ang usa ka kaliwatan mamahimong 70 o 80 ka tuig, nga nalangkoban sa mga tawong may igong pangedaron aron makasabot sa kahulogan sa unang gubat sa kalibotan ug sa ubang mga panghitabo; sa ingon kita makakalkulo kapin kun kulang kon unsa na ka duol ang kataposan.
Bisan pag binase sa maayong tuyo ang maong panghunahuna, nahiuyon ba kana sa tambag nga gihatag ni Jesus human niadto? Si Jesus miingon: “Mahitungod niana nga adlaw ug takna walay nahibalo, ni ang mga anghel sa kalangitan ni ang Anak, gawas sa Amahan lamang. . . . Busa, padayong magbantay tungod kay wala kamo mahibalo kon sa unsang adlawa moabot ang inyong Ginoo.”—Mateo 24:36-42.
Busa ang bag-ong impormasyon sa Ang Bantayanang Torre bahin sa “kining kaliwatana” wala mag-usob sa atong pagsabot sa kon unsay nahitabo sa 1914. Apan kana naghatag kanatog mas tin-aw nga pagsabot sa paggamit ni Jesus sa terminong ‘kaliwatan,’ nga magatabang kanato sa pagsabot nga ang iyang paggamit dili basehanan sa pagkalkulo—pag-ihap gikan sa 1914—kon unsa na ta ka duol sa kataposan.