Si Jehova, Usa ka Diyos nga “Andam sa Pagpasaylo”

“Ikaw, Oh Jehova, maayo ug andam sa pagpasaylo.”​—SALMO 86:5.

 1. Unsang mabug-at nga palas-anon ang gipas-an ni Haring David, ug sa unsang paagi nakakaplag siyag kahupayan sa iyang naguol nga kasingkasing?

SI Haring David sa karaang Israel nahibalo kon unsa gayod ka bug-at ang palas-anon sa usa ka sad-ang konsensiya. Siya nagsulat: “Ang akong mga kasaypanan milapaw na sa akong ulo; sama sa usa ka mabug-at nga lulan kini sila mabug-at ra kaayo alang kanako. Ako naminhod ug nagun-ob sa hilabihan; nag-agulo ako tungod sa panghupaw sa akong kasingkasing.” (Salmo 38:​4, 8) Si David, hinunoa, nakakaplag ug kahupayan sa iyang naguol nga kasingkasing. Siya nahibalo nga samtang si Jehova nagadumot sa sala, siya dili magdumot sa makasasala​—kon kana siya tinuod nga nagahinulsol ug nagabiya sa iyang makasasalang dalan. (Salmo 32:​5; 103:3) May bug-os nga pagtuo sa pagkaandam ni Jehova sa pagpasaylo sa mga naghinulsol, si David miingon: “Ikaw, Oh Jehova, maayo ug andam sa pagpasaylo.”​—Salmo 86:5.

2, 3. (a) Kon kita makasala, unsang palas-anon ang mahimong atong pagadad-on ingong resulta, ug nganong kini maayo? (b) Unsay kapeligrohan sa pagkahimong “lamyon” sa pagbating sad-an? (c) Unsang pasalig ang gihatag sa Bibliya kanato bahin sa pagkaandam ni Jehova sa pagpasaylo?

² Kon kita makasala, tingali pagadad-on usab nato ang makahugnong palas-anon sa nagtulisok nga konsensiya ingong resulta. Normal kining pagbatia sa pagbasol, gani makaayo pa. Kini magpalihok kanato sa paghimog positibong mga lakang sa pagtul-id sa atong mga kasaypanan. Apan, ang ubang mga Kristohanon nahupngan sa pagbating sad-an. Ang ilang nagahukom-sa-kaugalingong kasingkasing tingali moinsistir pa nga sila dili gayod pasayloon sa Diyos sa bug-os, bisan unsa pa sila ka mahinulsolon. “Makalilisang kaayo nga pagbati kon ikaw maghunahuna nga si Jehova tingali wala na mahigugma kanimo,” miingon ang usa ka igsoong babaye, nga namalandong sa sayop nga iyang nahimo. Bisan human sa iyang paghinulsol ug pagdawat sa makatabang nga tambag sa mga ansiyano sa kongregasyon, siya nagpadayon sa pagbati nga dili-takos sa pagpasaylo sa Diyos. Matod pa niya: “Walay adlawng moagi nga dili ako mangayo kang Jehova sa iyang pasaylo.” Kon kita “lamyon” sa pagbating sad-an, si Satanas basig maningkamot aron kita moangka, sa pagpabati nga kita dili takos sa pag-alagad kang Jehova.​—2 Corinto 2:​5-7, 11.

³ Apan dayag nga dili ingon niana ang paglantaw ni Jehova sa maong mga butang! Ang iyang Pulong nagpasalig kanato nga kon kita magpakitag tinuod kinasingkasing nga paghinulsol, si Jehova andam, oo andam, sa pagpasaylo. (Proverbio 28:13) Busa kon ang pagpasaylo sa Diyos daw dili nimo maabot, tingali ang gikinahanglan mao ang maayong pagsabot kon ngano ug kon sa unsang paagi siya nagapasaylo.

Nganong si Jehova “Andam sa Pagpasaylo”?

 4. Unsay hinumdoman ni Jehova bahin sa atong kinaiyahan, ug sa unsang paagi apektado niini ang paagi sa iyang pagtagad kanato?

⁴ Atong mabasa: “Ingon ka layo sa silangan gikan sa kasadpan, sa ingong gilay-on nga iyang gipahilayo kanato ang atong mga kalapasan. Sama sa usa ka amahan nga nagpakitag kaluoy sa iyang mga anak, si Jehova nagpakitag kaluoy niadtong may kahadlok kaniya.” Nganong si Jehova kiling sa pagpakitag kaluoy? Ang sunod nga bersikulo nagtubag: “Kay siya nahibalo pag-ayo sa pagkagama kanato, nahinumdom nga kita mga abog.” (Salmo 103:​12-14) Oo, si Jehova dili malimot nga kita maoy mga linalang nga hinimo sa abog, nga adunay mga kaluyahon, o mga kahuyangan, ingong resulta sa pagkadili-hingpit. Ang ekspresyon nga siya nahibalo “sa pagkagama kanato” nagpahinumdom kanato nga gipanig-ingon sa Bibliya si Jehova sa usa ka magkukulon ug kita ingong mga sudlanang iyang gihulma.a (Jeremias 18:​2-6) Kuptang malig-on sa magkukulon ang iyang mga sudlanang yutang kulonon apan sa mabinantayong paagi, kanunayng mahunahunaon sa kinaiyahan niini. Sa ingon, usab, gipaangay-angay ni Jehova, ang Dakong Magkukulon, ang iyang mga pagpakiglabot kanato sumala sa kahuyang sa atong makasasalang kinaiyahan.​—Itandi ang 2 Corinto 4:7.

 5. Sa unsang paagi gibatbat sa basahon sa Roma ang kusganon kaayong puwersa sa paggahom sa sala sa atong makasasalang unod?

⁵ Si Jehova nakasabot kon unsa ka gamhanan ang sala. Ang Kasulatan nagbatbat sa sala ingong kusganon kaayong puwersa nga makamatayng gigamhan niini ang tawo. Unsa gayod ka lig-on ang paggahom sa sala? Diha sa basahon sa Roma, ang dinasig nga apostol Pablo nagsaysay niini sa matin-aw kaayong mga pulong: Kita ‘ilalom sa sala,’ sama sa mga sundalo nga ilalom sa ilang komander (Roma 3:9); kini “nagmando” ibabaw sa katawhan ingong hari (Roma 5:21); kini “nagapuyo” sulod kanato (Roma 7:​17, 20); ang “balaod” niini padayong nagalihok diha kanato, nga sa ingon nagapaningkamot sa pagkontrolar sa atong dalan. (Roma 7:​23, 25) Pagkalisod sa atong pagpakiggubat sa pagsukol sa gamhanang paghawid sa sala sa atong makasasalang unod!​—Roma 7:​21, 24.

 6. Unsay paglantaw ni Jehova niadtong nangayo sa iyang kaluoy nga may mahinulsolong kasingkasing?

⁶ Busa, ang atong maluluy-ong Diyos nahibalo nga ang hingpit nga pagsunod imposible alang kanato, bisan unsaon pag paningkamot sa atong mga kasingkasing sa paghatag unta niini ngadto kaniya. (1 Hari 8:46) Siya mahigugmaong nagpasalig kanato nga kon kita mangita sa iyang amahanong kaluoy nga may mahinulsolong kasingkasing, siya magpaabot sa iyang pasaylo. Ang salmistang David nag-ingon: “Ang mga halad sa Diyos mao ang dugmok nga espiritu; ang kasingkasing nga nadugmok ug nagun-ob, Oh Diyos, dili mo pagatamayon.” (Salmo 51:17) Dili gayod isalikway, o talikdan, ni Jehova ang usa ka kasingkasing nga nadugmok ug nagun-ob sa palas-anon sa pagbating sad-an. Pagkatahom sa pagkabatbat niana sa pagkaandam ni Jehova sa pagpasaylo!

 7. Nganong dili nato angay pakasayonon ang kaluoy sa Diyos?

⁷ Apan, kana ba nagpasabot nga atong pakasayonon lang ang kaluoy sa Diyos, gamiton ang atong makasasalang kinaiyahan agig pangatarongan sa sala? Dili gayod! Si Jehova wala giyahi sa pagbati lamang. Ang iyang kaluoy adunay mga limite. Dili gayod niya pasayloon kadtong si kinsa sa pagkagahig-kasingkasing nagabatasan sa daotan, tinuyo nga sala nga walay paghinulsol. (Hebreohanon 10:​26-31) Sa laing bahin, kon siya makakita ug usa ka kasingkasing nga “nadugmok ug nagun-ob,” siya “andam sa pagpasaylo.” (Proverbio 17:​3) Atong tagdon ang pipila ka makahuloganon kaayong pinulongan nga gigamit sa Bibliya sa pagbatbat sa pagkabug-os sa pagpasaylo sa Diyos.

Unsa ka Bug-os Nagapasaylo si Jehova?

 8. Unsay gihimo ni Jehova, sa ingon, sa dihang iyang pasayloon ang atong mga sala, ug unsay epekto niini kanato?

⁸ Ang naghinulsol nga Haring David nag-ingon: “Gisugid ko sa kataposan ang akong sala nganha kanimo, ug wala ko tagoi ang akong kasaypanan. Miingon ako: ‘Isugid ko kang Jehova ang akong mga kalapasan.’ Ug gipasaylo mo ang pagkadaotan sa akong mga sala.” (Salmo 32:5) Ang ekspresyong “gipasaylo” naghubad sa Hebreohanong pulong nga sa paninugdan nagpasabot ug “baswaton,” “alsahon, dad-on.” Ang paggamit niini dinhi nagkahulogang ‘pagdala sa kasal-anan, kasaypanan, kalapasan.’ Sa ingon gibaswat ni Jehova ang mga sala ni David ug gidala kini sa layo, pagaingnon pa. (Itandi ang Levitico 16:​20-22.) Kini sa walay duhaduha nakahupay sa mga pagbating sad-an nga gidala ni David. (Itandi ang Salmo 32:3.) Kita usab bug-os makasalig diha sa Diyos nga nagapasaylo sa mga sala niadtong nagapangayo sa iyang pasaylo pinasukad sa ilang pagtuo sa halad lukat ni Jesu-Kristo. (Mateo 20:​28; itandi ang Isaias 53:12.) Mao nga kadtong kansang mga sala gibaswat ug gidala ni Jehova sa layo dili na kinahanglang magpadayon sa pagdala sa kabug-at sa mga pagbating sad-an tungod sa nangaging mga sala.

 9. Unsay kahulogan sa pulong ni Jesus: “Pasayloa kami sa among mga utang”?

⁹ Gigamit ni Jesus ang relasyon sa mga tigpautang ug mga utangan sa pag-ilustrar kon sa unsang paagi si Jehova nagapasaylo. Pananglitan, si Jesus nag-awhag kanato sa pag-ampo: “Pasayloa kami sa among mga utang.” (Mateo 6:12) Sa ingon gipanig-ingon ni Jesus ang “mga sala” sa “mga utang.” (Lucas 11:4) Sa dihang kita makasala, kita nangahimong “mga utangan” kang Jehova. Ang Gregong berbo nga gihubad “pasaylo” mahimong magkahulogang “wad-on sa buut, buhian, ang utang, pinaagi sa dili pagpaningil niana.” Sa usa ka diwa, sa dihang mopasaylo si Jehova, iyang kanselahon ang utang nga angay untang isingil kanato. Sa ingon ang naghinulsol nga mga makasasala makabaton ug kahupayan. Si Jehova dili gayod maningil sa utang nga iya nang gikanselar!​—Salmo 32:​1, 2; itandi ang Mateo 18:​23-35.

10, 11. (a) Unsang ideya ang gipadayag sa mga pulong “mapapas,” nga makita diha sa Buhat 3:19? (b) Sa unsang paagi ang pagkabug-os sa pagpasaylo ni Jehova giilustrar?

¹⁰ Diha sa Buhat 3:​19, ang Bibliya migamit ug laing tin-awng matang sa pagpahayag sa pagbatbat sa pagpasaylo sa Diyos: “Busa, paghinulsol kamo, ug talikod aron mapapas ang inyong mga sala.” Ang mga pulong “mapapas” naghubad sa usa ka Gregong berbo nga, kon gamiton agig pasumbingay, mahimong magkahulogang “pagpanas, pagpala, pagkanselar o paglaglag.” Sumala sa ubang mga eskolar, ang ideya nga gipadayag mao kanang pagpapas sa sinulat sa kamot. Sa unsang paagi kini mahimo? Ang tinta nga kasagarang gigamit sa karaang panahon maoy hinimo sa usa ka mikskla nga sinambogag karbon, tagok, ug tubig. Unya inigkahuman ug sulat ginamit ang maong tinta, ang tawo mahimong mokuhag basang espongha ug papason ang sinulat.

¹¹ Diha niana makita ang matahom kaayong hulagway sa pagkabug-os sa pagpasaylo ni Jehova. Sa dihang pasayloon niya ang atong mga sala, samag nagkuha siya ug espongha ug gipapas kini. Kita dili angay mahadlok nga iyang gamiton kining mga salaa batok kanato sa umaabot, kay ang Bibliya nagpadayag nga adunay laing butang bahin sa kaluoy ni Jehova nga tinuod gayod nga talagsaon: Sa dihang siya mopasaylo, siya malimot!

“Dili na Nako Hinumdoman pa ang Ilang Sala”

12. Sa dihang ang Bibliya miingon nga malimot si Jehova sa atong mga sala, nagpasabot ba kini nga siya dili na makahinumdom niini, ug nganong mao kanay imong tubag?

¹² Pinaagi ni manalagnang Jeremias, si Jehova nagsaad labot niadtong nailalom sa bag-ong pakigtugon: “Pasayloon ko ang ilang kasaypanan, ug dili na nako hinumdoman pa ang ilang sala.” (Jeremias 31:34) Nagpasabot ba kini nga kon si Jehova mopasaylo dili na siya makahinumdom sa mga sala? Dili mahitabo nga maingon niana. Ang Bibliya nagpadayag kanato bahin sa mga sala sa daghang tawo nga gipasaylo ni Jehova, lakip kang David. (2 Samuel 11:​1-17; 12:​1-13) Si Jehova nahibalo gayod gihapon sa mga sala nga ilang nahimo, ug angay nga mahibalo usab kita. Ang rekord sa ilang mga sala, maingon man sa ilang paghinulsol ug pagpasaylo sa Diyos, gipreserbar alang sa atong kaayohan. (Roma 15:4) Nan, unsa ang gipasabot sa Bibliya sa dihang kini nag-ingon nga dili ‘mahinumdom’ si Jehova sa mga sala niadtong iyang gipasaylo?

13. (a) Unsay nalakip sa kahulogan sa Hebreohanong berbo nga gihubad ‘hinumdoman nako’? (b) Sa dihang si Jehova miingon, “Dili na nako hinumdoman pa ang ilang sala,” unsay iyang gipasalig kanato?

¹³ Ang Hebreohanong berbo nga gihubad nga ‘hinumdoman nako’ nagpasabot ug labaw pa kay sa paghinumdom lang sa nangagi. Sumala sa Theological Wordbook of the Old Testament, kini naglakip “sa dugang ideya sa paghimog angay nga aksiyon.” Busa niini nga diwa, ang ‘paghinumdom’ sa sala naglakip sa paghimog aksiyon batok sa mga makasasala. Sa dihang miingon ang manalagnang Oseas mahitungod sa badlongong mga Israelinhon, “Pagahinumdoman niya [Jehova] ang ilang kasaypanan,” ang gipasabot sa manalagna nga mohimog aksiyon si Jehova batok kanila tungod sa ilang pagkawalay-paghinulsol. Busa, ang nahibilin sa bersikulo nagdugang: “Iyang pagatagdon ang ilang mga sala.” (Oseas 9:9) Sa laing bahin, sa dihang si Jehova miingon, “Dili na nako hinumdoman pa ang ilang sala,” siya nagpasalig kanato nga sa dihang pasayloon niya ang usa ka naghinulsol nga makasasala, siya dili mohimog aksiyon batok kaniya alang sa maong mga sala sa umaabot nga panahon. (Ezequiel 18:​21, 22) Sa ingon siya malimot sa pagkaagi nga dili na niya ibalikbalik ug pahinumdom kanato ang atong mga sala aron kita balikbalik nga akusahon o silotan. Sa ingon si Jehova naghatag ug maayo kaayong panig-ingnan alang kanato nga pagasundon sa atong mga pagpakiglabot sa uban. Kon may motunghang dili-pagsinabtanay, labing maayong dili na ugkaton pa ang nangaging kalapasan nga imong gipasaylo sa miagi.

Komosta ang mga Sangpotanan?

14. Nganong ang pagpasaylo wala magpasabot nga makalingkawas na ang usa ka naghinulsol nga makasasala gikan sa tanang sangpotanan sa iyang daotang dalan?

¹⁴ Ang pagkaandam ba ni Jehova sa pagpasaylo nagpasabot nga makalingkawas na ang usa ka naghinulsol nga makasasala gikan sa tanang sangpotanan sa iyang daotang dalan? Dili gayod. Kita dili makasala nga dili masilotan. Si Pablo nagsulat: “Bisan unsay ginapugas sa usa ka tawo, kini usab iyang anihon.” (Galacia 6:7) Tingali atubangon nato ang mga sangpotanan sa atong aksiyon o mga problema, apan human makahatag ug pasaylo, dili si Jehova ang magpahinabo sa mga kadaot nga modangat kanato. Sa dihang motungha ang mga suliran, dili angay maghunahuna ang Kristohanon, ‘Tingali gisilotan ako ni Jehova sa akong nangaging mga sala.’ (Itandi ang Santiago 1:13.) Sa laing bahin, dili kita ilikay ni Jehova gikan sa tanang epekto sa atong sayop nga mga buhat. Ang diborsiyo, wala kinahanglanang pagsabak, sakit nga napasa sa sekso, pagkawala sa pagsalig o pagtahod​—kining tanan mahimong mao ang makasubong mga sangpotanan sa sala, ug dili kita panalipdan ni Jehova batok niining tanan. Hinumdomi nga bisan pag iyang gipasaylo si David sa iyang mga sala labot kang Bath-sheba ug Uria, wala panalipdi ni Jehova si David gikan sa malaglagong mga sangpotanan nga misunod.​—2 Samuel 12:​9-14.

15, 16. Sa unsang paagi ang kasugoan nga gitala sa Levitico 6:​1-7 makahatag ug kaayohan sa biktima ug sa nakasala?

¹⁵ Ang atong mga sala mahimong adunay ubang mga sangpotanan usab. Tagda, pananglitan, ang asoy sa Levitico kapitulo 6. Gihisgotan dinhi sa Moisesnong Kasugoan ang kahimtang diin ang usa ka tawo nakahimog seryosong sala tungod sa pagkuha sa kabtangan sa isigka-Israelinhon pinaagi sa pagpangawat, panghukhok, o panikas. Unya ang makasasala wala modawat nga siya sad-an, nangahas pa sa pagpanumpa sa bakak. Pulong kini sa usa ka tawo batok sa lain. Apan, sa kataposan gitugaw sa konsensiya ang nakasala ug mitug-an sa iyang sala. Aron mapasaylo sa Diyos, kinahanglang himoon niya ang dugang tulo ka butang: iuli ang iyang nakuha, bayran ang biktima sa multa nga 20 porsiyento, ug magtanyag ug laking karnero ingong halad sa sala. Unya, ang kasugoan nag-ingon: “Ang saserdote magabuhat ug pagtabon-sa-sala alang kaniya atubangan kang Jehova, ug busa pagapasayloon siya.”​—Levitico 6:​1-7; itandi ang Mateo 5:​23, 24.

¹⁶ Kini nga kasugoan maoy usa ka maluluy-ong tagana gikan sa Diyos. Makahatag kinig kaayohan sa biktima, kansang kabtangan giuli ug seguradong mibatig dakong kahupayan sa dihang ang nakasala sa kataposan midawat sa iyang sala. Sa samang higayon, ang kasugoan nakahatag ug kaayohan sa usa kansang konsensiya sa kataposan nagpalihok kaniya sa pag-angkon sa iyang pagkasad-an ug sa pagtul-id sa iyang nahimong sayop. Sa pagkamatuod, kon kini wala niya himoa, siya wala gayoy mapaabot nga pasaylo gikan sa Diyos.

17. Kon ang uban nasakitan sa atong mga sala, unsay gidahom ni Jehova nga atong himoon?

¹⁷ Bisag kita dili ilalom sa Moisesnong Kasugoan, kini naghatag kanato ug bililhong pagsabot sa hunahuna ni Jehova, lakip sa iyang kaisipan bahin sa pasaylo. (Colosas 2:​13, 14) Kon ang uban nasakitan o nabiktima sa atong mga sala, si Jehova malipay kon buhaton nato kutob sa atong maarangan ang “pagtul-id sa sayop.” (2 Corinto 7:11) Nalangkit niini ang pagdawat sa atong sala, pag-admitir sa atong pagkasad-an, ug mangayo pa ug pasaylo sa biktima. Dayon kita makapangaliyupo kang Jehova pinasukad sa halad ni Jesus ug matagamtam ang kahupayan sa usa ka mahinlong konsensiya ug ang pasalig nga kita gipasaylo sa Diyos.​—Hebreohanon 10:​21, 22.

18. Unsang disiplina ang nagauban sa pagpasaylo ni Jehova?

¹⁸ Sama sa bisan kinsang mahigugmaong ginikanan, si Jehova mahimong mohatag ug pasaylo uban ang igong disiplina. (Proverbio 3:​11, 12) Ang usa ka naghinulsol nga Kristohanon tingali kinahanglang moundang sa iyang pribilehiyo sa pag-alagad ingong ansiyano, ministeryal nga alagad, o payunir. Tingali masakit alang kaniya nga mawad-an sa usa ka yugto sa panahon ug mga pribilehiyo nga bililhon kaayo kaniya. Ang maong disiplina, hinunoa, wala magpasabot nga nawad-an na siya sa kahimuot ni Jehova o nga si Jehova nagpugong sa pagpasaylo. Dugang pa, kinahanglang atong hinumdoman nga ang disiplina nga gikan kang Jehova maoy pamatuod sa iyang gugma alang kanato. Ang pagdawat ug pagpadapat niini makaayo kanato ug motultol sa kinabuhing dayon.​—Hebreohanon 12:​5-11.

19, 20. (a) Kon nakahimo ka ug mga kasaypanan, nganong dili ka angay mobati nga dili ka na maabot sa kaluoy ni Jehova? (b) Unsay pagahisgotan sa sunod nga artikulo?

¹⁹ Pagkamakapahupay ang pagkahibalo nga kita nag-alagad sa usa ka Diyos nga “andam sa pagpasaylo”! Si Jehova makakita ug labaw pa kay sa atong kasal-anan ug kasaypanan. (Salmo 130:​3, 4) Siya nahibalo kon unsay anaa sa atong mga kasingkasing. Kon mibati ka nga ang imong kasingkasing nadugmok ug nagun-ob tungod sa nangaging mga kalapasan, ayaw paghunahuna nga dili ka maabot sa kaluoy ni Jehova. Bisan unsa pay kalapasan nga imong nahimo, kon ikaw tinuod gayod nga naghinulsol, naghimog mga lakang sa pagtul-id sa sayop, ug kinasingkasing nga nag-ampo sa pasaylo ni Jehova pinasukad sa giulang dugo ni Jesus, ikaw bug-os makasalig nga ang mga pulong sa 1 Juan 1:​9 ikapadapat kanimo: “Kon atong isugid ang atong mga sala, siya kasaligan ug matarong aron sa pagpasaylo kanato sa atong mga sala ug sa paghinlo kanato gikan sa tanang pagkadili-matarong.”

²⁰ Ang Bibliya nagdasig kanato sa pagsundog sa pagpasaylo ni Jehova sa atong pagpakiglabot sa usag usa. Apan, sa unsang sukod nga kita madahom sa pagpasaylo ug pagkalimot kon makasala ang uban kanato? Kini pagahisgotan sa sunod nga artikulo.

[Mga footnote]

Unsay Imong Tubag?

◻ Nganong si Jehova “andam sa pagpasaylo”?

◻ Sa unsang paagi gibatbat sa Bibliya ang pagkabug-os sa pagpasaylo ni Jehova?

◻ Sa dihang mopasaylo si Jehova, sa unsang diwa siya malimot?

◻ Unsay gidahom ni Jehova kanato nga buhaton kon ang uban nasakitan sa atong mga sala?

[Kapsiyon sa panid 12]

Kon ang uban nasakitan sa atong mga sala, si Jehova nagdahom nga kita makig-uli