Ang Kamatuoran Nagabag-o sa mga Kinabuhi

MAKASUBO apan tinuod nga ang mga kinabuhi sa daghan kaayong tawo karong adlawa malisod, mapit-os pa. Posible bang makakaplag ug kalipay kining mga tawhana? Ang uban maoy mga kriminal ug nagapamiktima sa ilang mga silingan. Sila mahimo pa ba kahang matinuorong mga sakop sa katilingban? Ang tubag niining duha ka pangutana maoy oo. Ang mga tawo makabag-o. Ang mga kinabuhi mahimong mausab. Gipakita ni apostol Pablo kon unsaon sa dihang siya nagsulat: “Mag-usab pinaagi sa pagbag-o sa inyong kaisipan, aron inyong ikapamatuod sa inyong kaugalingon ang maayo ug dalawaton ug hingpit nga kabubut-on sa Diyos.”​—Roma 12:2.

Ang paghisgot bahin sa “hingpit nga kabubut-on sa Diyos” magpahinumdom sa giingon ni Jesus sa iyang mga tinun-an kapin sa 20 ka tuig una pa gisulat ni Pablo ang mga pulong sa ibabaw. Si Jesus nag-ingon: “Inyong mahibaloan ang kamatuoran, ug ang kamatuoran magpagawas kaninyo.” (Juan 8:32) Pinaagi sa “kamatuoran,” ang gipasabot ni Jesus mao ang dinasig sa Diyos nga impormasyon​—ilabina ang impormasyon bahin sa kabubut-on sa Diyos​—nga gipreserbar alang kanato diha sa Bibliya. (Juan 17:17) Ang Bibliya tinuod ba gayod nga magpahigawas sa mga tawo? Ang pagkinabuhi ba nga nahiuyon sa kabubut-on sa Diyos tinuod nga makabag-o sa mga kinabuhi? Tinuod gayod. Tagda ang pipila ka pananglitan.

Usa ka Katuyoan sa Kinabuhi

Dili pa dugay, si Moisés, sa Gibraltar, dili gayod malipayon nga tawo. Siya miingon: “Palahubog ako ug sa karsada matulog. Nawad-an ako ug paglaom. Matag gabii mohangyo ako sa Diyos nga kaluy-an ako ug dili na ako paantoson ug laing adlaw. Naghilak ako sa dihang nangutana ako sa Diyos kon nganong nabuhi pa ako niining kalibotana kon ako walay pulos, walay trabaho, walay pamilya, ug walay usa nga motabang kanako. Nganong magpadayon pa ako sa pagkinabuhi?” Dayon, usa ka butang ang nahitabo.

Si Moisés nagpadayon: “Ako nahibalo nga gidungog sa Diyos ang akong pag-ampo sa dihang nahibalag ko si Roberto, usa sa mga Saksi ni Jehova. Gihatagan ako ni Roberto ug Bibliya ug usa ka tabang sa pagtuon sa Bibliya nga Unsay Gikinahanglan sa Diyos Kanato?a Adlaw-adlaw dungan kaming magtuon sa Bibliya diha sa bangko nga akong katulogan magabii. Human sa usa ka bulan gidala ako ni Roberto sa usa ka tigom sa lokal nga Kingdom Hall sa mga Saksi ni Jehova. Ngadtongadto, bug-os nga nabag-o sa kamatuoran sa Bibliya ang akong panglantaw. Wala na ako magkatulogan diha sa gawas; ni moinom o manabako ako. Ang akong kinabuhi nabag-o, ug ako malipayon. Naglaom ako nga mabawtismohan dili madugay ug mag-alagad kang Jehova ingong usa sa iyang mga Saksi.”

Pagkadako nga kausaban! Kon ang mga tawo walay paglaom, ang katarongan kasagaran maoy tungod sa kakulag kahibalo. Sila walay alamag bahin sa Diyos o sa iyang katingalahang mga katuyoan. Sa kahimtang ni Moisés, sa dihang iyang nabatonan kana nga kahibalo, kana naghatag kaniyag kusog ug kaisog sa pagbag-o sa iyang kinabuhi. Ang pag-ampo sa salmista ngadto sa Diyos gitubag sama sa kahimtang ni Moisés: “Ipadan-ag ang imong kahayag ug ang imong kamatuoran. Hinaot nga kini mismo magtultol kanako. Hinaot nga dad-on ako niini ngadto sa imong balaang bukid ug ngadto sa imong dakong tabernakulo.”​—Salmo 43:3.

Sa Belize, si Daniel adunay samang kaagi. Si Daniel dili tigkatulogan sa mga karsada​—siya adunay maayong trabaho. Apan sulod sa 20 ka tuig siya nakigbisog sa pagkagiyan sa droga ug alkohol ug imoral ang kinabuhi. Bisag gimatuto nga usa ka Katoliko, si Daniel wala makakita nga adunay kahulogan ang kinabuhi, ug siya nagduhaduha sa paglungtad sa Diyos. Siya miadto sa nagkalainlaing mga simbahan nga nangitag tabang apan nakakaplag nga daghan sa iyang mga higalang tigsimba ug bisan gani ang pipila sa iyang higalang mga klero nagaabuso sa mga droga o alkohol. Kasamtangan, ang iyang asawa hapit nang makigdiborsiyo kaniya.

Sa kawalay-paglaom si Daniel misulod sa usa ka sentro sa rehabilitasyon. Apan, siya nahibalo nga iniggawas niya, makabalik ra siya sa dili madugay sa mga droga kon siya dili makadawat ug tabang. Apan unsang matanga sa tabang? Sa Mayo 1996, duha ka adlaw nga nakagawas sa rehabilitasyon, giduol ni Daniel ang usa sa mga Saksi ni Jehova ug gipakuratan siya uban sa hangyo, “Palihog tun-i ako sa Bibliya.” Ang Saksi mihikay ug pagtuon sa Bibliya makaduha sa usa ka semana uban kang Daniel, ug si Daniel sa ulahi nagsugod sa pagpahiuyon sa iyang kinabuhi sa kabubut-on sa Diyos ug giilisan ang iyang daang mga higala ug Kristohanong mga higala kinsa wala magaabuso sa mga droga o alkohol ug kinsa nagalikay sa imoralidad. Sa ingon si Daniel nakakaplag nga tinuod ang giingon sa Bibliya: “Siya nga nagalakaw uban sa mga tawong manggialamon mahimong manggialamon, apan siya nga makig-uban sa mga buangbuang mosangpot sa kadaotan.” (Proverbio 13:20) Wala magdugay, siya miingon: “Mao kini ang unang higayon sa akong kinabuhi nga akong nasinati kon unsa ang pagkabaton ug usa ka mahinlong konsensiya.” Ang kinabuhi usab ni Daniel nabag-o.

Sa Puerto Rico, laing tawo nakasinati ug dakong kausaban. Siya anaa sa prisohan ug gilantaw nga makuyaw kaayo, sanglit siya nakapatay ug ubay-ubayng tawo. Ang kamatuoran ba sa Bibliya makausab kaniya? Oo. Usa sa mga Saksi ni Jehova nakahatag kaniya ug pipila ka kopya sa mga magasing Bantayanang Torre ug Pagmata!, ug siya mihangyo gilayon ug dugang pa. Gisugdan siya sa pagtuon sa Bibliya, ug sa dihang ang kamatuoran sa Bibliya misugod sa pag-abot sa iyang kasingkasing, ang kausaban nga iyang gihimo nakita sa tanan. Ang usa sa unang mga pamatuod sa iyang pagbag-o mao nga iyang gipatupihan ang iyang taas nga buhok ug gibalbasan ang iyang nagkalkag nga bungot.

Ang Bibliya nag-ingon nga ang Diyos magapasaylo sa mga makasasala nga tinuod nga maghinulsol ug magbag-o sa ilang mga estilo-sa-kinabuhi. Si Pablo nagsulat: “Wala ba kamo mahibalo nga ang mga tawong dili-matarong dili makapanunod sa gingharian sa Diyos? . . . Ug gani ingon niana ang pipila kaninyo kaniadto. Apan kamo hinlo nang nahugasan.” (1 Corinto 6:​9, 11) Tino, kining mga pulonga nakahatag ug kahupayan niining tawhana, sama sa kahupayan nga nahatag sa mga pulong sa Buhat 24:​15: “Aduna unyay pagkabanhaw sa mga matarong ug sa mga dili-matarong.” Siya miingon: “Buot kong maatua unya didto sa dihang mahitabo ang pagkabanhaw sa mga patay aron makapangayo ako ug pasaylo sa mga kinabuhing akong gikuha.”

Usa ka Bag-ong Pamilya

Usa ka adlaw si Luis, usa ka bug-os panahong ebanghelisador sa mga Saksi ni Jehova sa Argentina, gipailaila sa usa ka batan-ong lalaki nga adunay makasubong kaagi. Giabandonar sa iyang ginikanan sa pagkahimugso, siya gipadako sa nagkalainlaing mga institusyon. Sa dihang hapit na siyang mag-20 anyos, iyang nahibaloan kon hain nagpuyo ang iyang inahan ug midesidir sa pagpuyo duol kaniya. Siya nagtrabahog maayo, nagtigom ug daghang kuwarta, ug miadto sa siyudad nga gipuy-an sa iyang inahan. Gipasaka siya sa iyang inahan hangtod nga nahurot ang iyang kuwarta ug unya iyang gipapahawa siya. Kini nga pag-ayad nagpahunahuna kaniya sa paghikog.

Apan, napaambit ni Luis ang kamatuoran sa Bibliya uban niining batan-ong lalaki. Lakip niana nga kamatuoran ang pasalig: “Kon ako pagabiyaan sa akong kaugalingong amahan ug sa akong kaugalingong inahan, si Jehova mismo ang magadawat kanako.” (Salmo 27:10) Nakita sa batan-ong lalaki nga siya adunay usa ka langitnong Amahan nga dili gayod mobiya kaniya. Siya karon malipayon nga nahimong bahin sa usa ka bag-ong pamilya, pamilya ni Jehova.

Laing tawo sa mao gihapong nasod miingon sa usa sa mga Saksi ni Jehova nga siya nakaangay sa magasing Bantayanang Torre. Ngano? Tungod kay kini nakaluwas sa iyang kaminyoon. Ang nahitabo mao nga usa ka adlaw kining tawhana, samtang mipauli siya gikan sa trabaho, nakakita diha sa basurahan ug usa ka magasing Bantayanang Torre nga may ulohang “Diborsiyo” sa dagkong mga letra. Sanglit nagkaproblema ang iyang kaminyoon ug siya ug ang iyang asawa nagsugod sa paghikay alang sa legal nga pagbulag, iyang gikuha ang magasin ug gisugdan kana pagbasa. Iyang gidala kini sa balay ug gibasa kini uban sa iyang asawa. Gisulayan sa magtiayon ang pagpadapat sa pinasukad-sa-Bibliya nga tambag diha sa magasin. (Efeso 5:​21​–6:4) Wala magdugay, ang ilang relasyon miuswag. Ilang gihunong ang mga palakaw sa pagbulag ug karon nagtuon sa Bibliya ingong nagkahiusang magtiayon.

Sa Uruguay, laing tawo nga ginganlag Luis dili gayod malipayon. Ang pagkagiyan sa droga, espiritismo, pagsimbag diyosdiyos, pag-abuso sa alkohol​—kini maoy pipila sa mga butang nga naghimo sa iyang kinabuhi nga magubot. Sa kataposan, si Luis, nga bug-os nga nawad-ag paglaom, nahimong ateyista. Gihatagan siya sa usa ka higala ug librong Life​—How Did It Get Here? By Evolution or by Creation?b Kini misangpot ug daklit nga pagkakontak sa mga Saksi ni Jehova, apan si Luis sa ngadtongadto mibalik sa alkohol ug mga droga. Unya, sa yugto sa dakong kaguol, iyang nakita ang iyang kaugalingon nga naglingkod sa lungag nga punog basura, siya nag-ampo, nga nagtanyag sa iyang pag-ampo ngadto “sa amahan ni Jesu-Kristo,” sanglit siya wala makatino sa ngalan sa Diyos.

Iyang gihangyo ang Diyos sa pagpakita kaniya kon aduna bay katarongan sa iyang pagkahimong ania sa kalibotan. “Sa pagkasunod gayod nga adlaw,” nagtaho si Luis, “gihatagan ako sa usa ka kaila ug libro nga wala na niya kinahanglana. Ang ulohan niini? Pinadayag​—Hingpit nga Sangkoanan Niini Haduol Na!”c Ang libro nakatabang kaniya sa pagtubag sa iyang pangutana. Si Luis miampo pag-usab ug tabang sa pagkaplag sa relihiyon nga magpakita kaniya kon unsaon pag-alagad sa Diyos. Pagkadako nga kakurat! Mibagting ang dorbel, ug nagbarog sa gawas mao ang duha ka Saksi ni Jehova. Misugod dayon si Luis sa pagtuon sa Bibliya uban kanila. Siya kusog nga miuswag ug karon mibati nga bulahan nga nahimong usa ka bawtismadong Saksi. Siya nagkinabuhi sa usa ka mahinlong kinabuhi ug nagtabang sa uban usab nga makakaplag ug katuyoan sa ilang mga kinabuhi. Alang kaniya, ang mga pulong sa Salmo 65:​2 nahimong tinuod: “Oh Tigpatalinghog sa pag-ampo, nganha kanimo moduol ang tanang unod.”

Sa Pilipinas, si Allan maoy usa ka estudyanteng aktibista kanhi. Membro siya sa usa ka organisasyon kansang katuyoan mao ang “pagpukan sa kagamhanan aron ang umaabot nga mga kaliwatan makatagamtam ug panagkasama.” Apan, usa ka adlaw siya nakontak sa mga Saksi ni Jehova ug nakakat-on gikan sa Bibliya sa katuyoan sa Diyos alang sa katawhan. Lakip niana nga katuyoan mao ang dinasig nga saad: “Sa dili madugay, ug ang daotang usa mawala . . . Apan ang mga maaghop mismo magapanunod sa yuta, ug sila makakaplag gayod sa ilang tugob nga kalipay sa kadagaya sa pakigdait.” (Salmo 37:​10, 11) Si Allan miingon: “Akong nahibaloan sa ulahi nga ang gipakig-awayan sa among kalihokan dugay na kaayong gisaad sa Bibliya. Ang tanang butang nga among gipaningkamotan pag-ayo nga mabatonan ihatag ilalom sa Gingharian sa Diyos.” Si Allan karon nagpaluyo sa Gingharian sa Diyos ug nagtabang sa uban nga makabaton ug pagtuo sa kamatuoran sa Bibliya.

Oo, ang mga kinabuhi mabag-o kon ang mga tawo mamati sa kamatuoran sa Pulong sa Diyos, ang Bibliya. Sa pagkamatuod, ang panahon haduol na sa dihang ang tanang tawo nga makalabang-buhi nakapahiuyon na sa ilang mga kinabuhi sa kabubut-on sa Diyos. Pagkadako unya kana nga kausaban! Dayon, ang tagna matuman: “Dili nila pagadaoton o pagagub-on ang tibuok ko nga bukid nga balaan; tungod kay ang yuta mapuno gayod sa kahibalo ni Jehova sama sa mga tubig nga nagatabon sa dagat.”​—Isaias 11:9.

[Mga footnote]