Ang Ngalan nga Motultol sa Tinuod nga Pagtuo

“KAMO dili motuo kang Jesus ug sa iyang dugo nga nagalukat,” miingon ang babaye ngadto sa usa sa mga Saksi ni Jehova. Usa ka lalaki miingon: “Inyong gitawag ang inyong kaugalingon nga mga Saksi ni Jehova, apan ako maoy usa ka saksi ni Jesus.”

Kasagaran kaayo ang hunahuna nga ang mga Saksi ni Jehova dili motuo kang Jesus o nga sila wala maghatag kaniya ug igong pag-ila. Apan, unsa man gayod ang mga kamatuoran?

Tinuod nga kusganon kaayo ang pagbati sa mga Saksi ni Jehova may kalabotan sa ngalan sa Diyos, si Jehova.a Si Itamar, usa ka Saksi sa Brazil, nahinumdom: “Nahitabo ang dakong kausaban sa akong kinabuhi sa dihang nahibaloan ko ang ngalan sa Diyos. Sa nabasa ko kini sa unang higayon, maora kadtog nakamata ako gikan sa hinanok nga pagkatulog. Ang ngalang Jehova nakapukaw kanako ug nakapalihok kanako; kini nakatandog sa kinailadmang bahin sa akong kalag.” Bisan pa niana, siya midugang: “Ang akong kasingkasing nag-awas usab sa gugma alang kang Jesus.”

Oo, giila sa mga Saksi ni Jehova nga aron makabaton ug kinabuhing dayon, sila kinahanglang motuo “sa ngalan sa Anak sa Diyos,” si Jesus. (1 Juan 5:13) Apan unsay kahulogan sa ekspresyong ‘sa ngalan ni Jesus’?

Kon Unsay Gihawasan sa Ngalan ni Jesus

“Sa ngalan ni Jesus” ug ang samang mga ekspresyon makita diha sa tibuok Kristohanon Gregong Kasulatan, o “Bag-ong Testamento.” Sa pagkatinuod, ang pulong “ngalan” nga gigamit may kalabotan sa papel ni Jesus makita kapin sa 80 ka higayon, duolan sa 30 ka higayon sa basahon sa Buhat lamang. Ang unang-siglong mga Kristohanon nabawtismohan pinaagi sa ngalan ni Jesus, naayo pinaagi sa iyang ngalan, nanudlo pinaagi sa iyang ngalan, nagtawag sa iyang ngalan, nag-antos alang sa iyang ngalan, ug nagpasidungog sa iyang ngalan.​—Buhat 2:​38; 3:​16; 5:​28; 9:​14, 16; 19:17.

Sumala sa usa ka diksiyonaryo sa Bibliya, ang Gregong pulong alang sa “ngalan” kasagarang gigamit diha sa Bibliya “alang sa tanan nga nalangkit sa ngalan, sa awtoridad, kinaiya, ranggo, kahalangdon, gahom, kahamili, ubp., sa tanang butang nga nalangkit sa ngalan.” Busa, ang ngalan ni Jesus naghawas sa kahalangdon ug dakong ehekutibong awtoridad nga gipiyal ni Jehova nga Diyos kaniya. Si Jesus mismo nag-ingon: “Ang tanang awtoridad gikahatag na kanako sa langit ug sa yuta.” (Mateo 28:18) Human nga giayo ni Pedro ug Juan ang usa ka tawong bakol, ang Hudiyohanong mga lider sa relihiyon nangutana: “Pinaagi sa unsa nga gahom ug sa kang kansang ngalan inyong gibuhat kini?” Dayon maisogong gipahayag ni Pedro ang iyang pagtuo sa awtoridad ug gahom nga gihawasan sa ngalan ni Jesus sa dihang iyang gipadayag nga kini maoy “sa ngalan ni Jesu-Kristo nga Nasaretnon, . . . pinaagi kaniya kining tawhana nagabarog dinhi nga maayo atubangan kaninyo.”​—Buhat 3:​1-10; 4:​5-10.

Pagtuo Diha Kang Jesus o Kang Cesar?

Apan, ang pagpangangkon nga may pagtuo sa ngalan ni Jesus dili masayon. Ingon sa gitagna ni Jesus, ang iyang mga tinun-an mahimong ‘mga dulumtanan sa tanang kanasoran gumikan sa iyang ngalan.’ (Mateo 24:9) Ngano? Tungod kay ang ngalan ni Jesus naghawas sa iyang posisyon ingong tinudlo sa Diyos nga Magmamando, ang Hari sa mga hari, nga kaniya ang tanang kanasoran angay moyukbo agig pagpasakop, usa ka butang nga sila dili andam o malipay sa pagbuhat.​—Salmo 2:​1-7.

Ang mga lider sa relihiyon sa mga adlaw ni Jesus dili usab buot moyukbo agig pagpasakop kang Jesus. Sila miingon: “Kami walay hari gawas kang Cesar,” busa nagsalikway sa Anak sa Diyos. (Juan 19:​13-15) Hinunoa, sila nagbutang sa ilang pagtuo sa ngalan​—sa gahom ug awtoridad​—ni Cesar ug sa iyang harianong kagamhanan. Sila mihukom pa gani nga kinahanglang mamatay si Jesus aron mapatunhay nila ang ilang katungdanan ug ranggo.​—Juan 11:​47-53.

Sa kasiglohan human nga namatay si Jesus, daghan niadtong nangangkong mga Kristohanon nakabaton ug tinamdan nga sama niadtong Hudiyohanong mga lider. Kining gitawag-kono nga mga Kristohanon nagbutang sa ilang pagtuo sa gahom ug awtoridad sa Estado ug nalangkit sa mga panag-away niini. Pananglitan, sa ika-11ng siglo, human nga naorganisar sa iglesya ang walay-trabahong mga manggugubat sa militia Christi, o Kristohanong mga kabalyero, “ang tulubagon sa paghimog makataronganong gubat gikuha gikan sa sekular nga mga gahom sa Kakristiyanohan ug gipangabaga, hinunoa, sa iglesya pinaagi sa ahensiya sa Kristohanong mga kabalyero niini.” (The Oxford History of Christianity) Ang asoy nagdugang nga ang pipila ka mga deklarasyon sa papa nag-agak sa kadaghanan sa mga tigkrusada sa pagtuo nga pinaagi sa pagpakigbahin sa mga krusada, “sila nakahimog kasabotan uban sa Diyos ug nagtino sa ilang kaugalingon nga adunay dapit diha sa Paraiso.”

Ang uban tingali mangatarongan nga posibleng mahimong maunongon kang Jesus ug sa samang higayon mag-apil-apil sa mga kalihokan sa politika, maingon man sa mga gubat sa mga nasod. Sila nagtuo nga katungdanan sa Kristohanon ang pagpakig-away sa daotan bisan asa kini makaplagan ug nga kini naglakip sa pagdangop sa gubat kon gikinahanglan. Apan ang una bang mga Kristohanon adunay ingon niini nga panghunahuna?

“Ang unang mga Kristohanon wala mag-alagad sa puwersa militar,” nag-ingon ang usa ka artikulo sa magasing The Christian Century. Giingon niini nga hangtod sa dekada sa 170-180 K.P., wala gayoy ebidensiya nga nag-alagad ang mga Kristohanon sa militar. Ang artikulo dayon midugang: “Hinayhinay lamang nga gitalikdan sa mga Kristohanon ang ilang pagtutol sa pagserbisyo sa militar.”

Unsa ang mga resulta? “Tingali wala nay molabaw pa nga nakadaot sa dungog sa Kristiyanidad kay sa pagbaton niini ug baroganan nga walay kalainan nianang sa mga dili-Kristohanon bahin sa mga buhat sa gubat,” matod pa sa artikulo sa The Christian Century. “Nga ang mga Kristohanon sa usa ka bahin midawat sa pagtuo sa malumo nga Manluluwas samtang sa laing bahin mainitong nagpaluyo sila sa relihiyoso o nasyonalistikong mga gubat nakadaot kaayo sa pagtuo.”

Pagsundog sa Unang mga Kristohanon Karong Adlawa

Posible ba alang sa mga Kristohanon karong adlawa sa pagsundog sa maayo kaayong panig-ingnan sa unang mga Kristohanon? Ang mga Saksi ni Jehova niining sigloha nakapasundayag nga kini posible. Naghisgot mahitungod kanila, ang editor sa Holocaust Educational Digest nag-ingon: “Walay Saksi ni Jehova ang makiggubat. . . . Kon ang tanan pa sa kalibotan nga dakog gahom sama pa kanila ug pagtuo, [ang Gubat sa Kalibotan II] dili gayod unta mahitabo.”

Ang sama mahimong ikaingon usab sa mas bag-o pang rehiyonal nga mga panag-away, sama nianang usa nga gisangka sa Amihanang Irlandia. Sa dili pa dugayng katuigang milabay, usa sa mga Saksi ni Jehova nagsangyaw gikan sa balay ug balay sa Protestanteng dapit sa siyudad sa Belfast. Ang usa ka tagbalay, human nahibalo nga ang Saksi maoy usa ka Katoliko kaniadto, nangutana: “Sa Katoliko ka pa, misuportar ka ba sa IRA [Irish Republican Army]?” Ang Saksi nakaamgo nga ang tawo mahimong magmapintas tungod kay siya gipriso human nadakpan nga nagdalag pusil sa iyang pagpaingon sa pagpatayg usa ka Katoliko ug bag-o pang gipagawas. Busa ang Saksi mitubag: “Dili na ako Katoliko karon. Ako maoy usa sa mga Saksi ni Jehova. Ingong tinuod nga Kristohanon, dili gayod ako mopatay kang bisan kinsa alang sa bisan unsang kagamhanan o bisan kinsang tawo.” Niana gilamano sa tagbalay ang iyang kamot ug miingon: “Ang tanang pagpamatay daotan. Maayo ang inyong ginahimo. Padayon niini.”

Kon Unsay Kahulogan sa Pagtuo sa Ngalan ni Jesus

Ang pagtuo sa ngalan ni Jesus, hinunoa, nagkahulogan ug labaw pa kay sa dili pagpakigbahin sa gubat. Kini nagkahulogag pagsunod sa tanang sugo ni Kristo. Sa pagkatinuod, si Jesus nag-ingon: “Kamo akong mga higala kon inyong buhaton ang ginasugo ko kaninyo,” ug ang usa sa iyang mga sugo mao nga kita “maghigugmaay sa usag usa.” (Juan 15:​14, 17) Ang gugma nagtinguha sa paghimog maayo alang sa uban. Kini magwagtang sa tanang rasanhon, relihiyoso, ug sosyal nga pagpihig. Gipasundayag ni Jesus kon unsaon.

Ang mga Hudiyo sa mga adlaw ni Jesus kusganon kaayog pagbati batok sa mga Samaritano. Sa kasukwahi, nakigsulti si Jesus sa usa ka babayeng Samaritana, ug tungod niini, siya ug daghan pang uban mituo sa iyang ngalan. (Juan 4:39) Si Jesus nag-ingon usab nga ang iyang mga tinun-an mahimong mga saksi niya “sa Jerusalem ug sa tibuok Judea ug Samaria ug ngadto sa kinalay-ang dapit sa yuta.” (Buhat 1:8) Ang iyang makahatag-ug-kinabuhi nga mensahe dili iya lamang sa mga Hudiyo. Maingon man, si Pedro gisugo sa pagduaw sa Romanong senturyon nga si Cornelio. Bisan tuod ug supak sa balaod alang sa usa ka Hudiyo sa pagduaw ug usa ka tawo nga lain ug rasa, gipakita sa Diyos kang Pedro nga siya ‘dili angayng magtawag kang bisan kinsang tawo nga mahugaw o dili-hinlo.’​—Buhat 10:28.

Agig pagsundog kang Jesus, ang mga Saksi ni Jehova andam motabang sa tanang tawo​—bisag unsa pay ilang rasanhon, relihiyoso, o ekonomikanhong gigikanan​—sa pagkat-on sa kaluwasan nga modangat pinaagi sa ngalan ni Jesus. Ang pagtuo sa ngalan ni Jesus nagpalihok kanila sa ‘pagpahayag sa dayag nga si Jesus maoy Ginoo.’ (Roma 10:​8, 9) Giawhag ka namo sa pagdawat sa ilang tabang aron ikaw usab makakat-on sa pagtuo sa ngalan ni Jesus.

Ang ngalan ni Jesus angay gayod modasig sa mga pagbati sa paghimaya, pagtahod, ug pagsugot. Si apostol Pablo nag-ingon: “Sa ngalan ni Jesus mangapiko ang tanang tuhod nilang anaa sa langit ug nilang anaa sa yuta ug nilang anaa ilalom sa yuta, ug ang tanang dila magaila sa dayag nga si Jesu-Kristo maoy Ginoo alang sa kahimayaan sa Diyos nga Amahan.” (Filipos 2:​10, 11) Bisan pag ang kadaghanan sa molupyo sa yuta dili andam nga magpasakop sa pagmando ni Jesus, ang Bibliya nagpakita nga ang panahon haduol na sa dihang ang tanang tawo kinahanglang magpasakop o mahanaw. (2 Tesalonica 1:​6-9) Busa, karon na ang panahon sa pagtuo sa ngalan ni Jesus pinaagi sa pagtuman sa tanan niyang mga sugo.

[Mga footnote]

[Hulagway sa panid 6]

Sa ngalan ni Jesus, milyonmilyon ang nakapatay ug nangamatay

[Hulagway sa panid 7]

Si Jesus wala maghambin ug rasanhong pagpihig. Ikaw naghambin ba?