Determinado sa Pagsunod sa Iya sa Diyos nga Dalan sa Kinabuhi
Ang “Iya sa Diyos nga Dalan sa Kinabuhi” nga mga Kombensiyon adunay daghang ikatanyag niadtong buot moalagad sa Diyos! Usa ka delegado naghubit sa kombensiyon ingong “usa ka talagsaong yugto sa instruksiyon, pagdasig, ug kalamdagan.”
ANG lain pang delegado miingon nga “dihay daghan nga mahimong tagamtamon, pamalandongon, ug batonan.” Karon atong tagdon ang programa mismo.
Si Jesu-Kristo—Ang Dalan, ang Kamatuoran, ug ang Kinabuhi
Mao kini ang tema sa unang adlaw sa kombensiyon. (Juan 14:6) Ang unang pakigpulong naghubit sa katuyoan sa atong tingob nga panagkatigom diha sa kombensiyon: aron dugang matudloan bahin sa labing maayong posible nga dalan sa kinabuhi, ang iya sa Diyos nga dalan sa kinabuhi. Nagtudlo si Jehova sa iyang katawhan kon unsaon paglakaw diha sa iyang mga dalan. Gihimo niya kini pinaagi sa Bibliya, sa “kasaligan ug mabuot nga ulipon,” ug sa balaang espiritu. (Mateo 24:45-47; Lucas 4:1; 2 Timoteo 3:16) Pagkadakong pribilehiyo nga matudloan sa Soberano sa uniberso!
Sa pagsunod sa tema sa adlaw, ang keynote address maoy “Halad Lukat ni Kristo—Dalan sa Diyos sa Kaluwasan.” Sa pagpahiuyon sa iya sa Diyos nga dalan sa kinabuhi, hinungdanon ang pag-ila sa papel ni Jesu-Kristo diha sa katuyoan ni Jehova. Ang mamumulong miingon: “Kon wala ang halad lukat ni Jesu-Kristo, walay tawo, way sapayan sa iyang mga tinuohan o mga buhat, ang makadawat ug walay kataposang kinabuhi gikan sa Diyos.” Dayon iyang gikutlo ang Juan 3:16, nga nag-ingon: “Gihigugma pag-ayo sa Diyos ang kalibotan mao nga iyang gihatag ang iyang bugtong-gianak nga Anak, aron nga ang tanan nga magapasundayag ug pagtuo kaniya dili malaglag kundili makabaton ug kinabuhing walay-kataposan.” Ang pagtuo sa halad lukat ni Kristo nagkinahanglan nga kita makabaton sa tukmang kahibalo sa kamatuoran. Naglakip usab kini sa pagdedikar sa atong mga kinabuhi ngadto kang Jehova, pagpasimbolo niini diha sa bawtismo sa tubig, ug pagkinabuhi sumala sa panig-ingnan nga gitagana ni Jesu-Kristo.—1 Pedro 2:21.
Ang sesyon sa hapon gisugdan sa pakigpulong nga nag-ulohang “Ang Dalan sa Gugma Dili Gayod Mapakyas.” Naglakip kini sa bersikulo por bersikulo nga panaghisgot sa makapadasig nga paghubit ni Pablo sa gugma, nga narekord sa 1 Corinto 13:4-8. Ang mamiminaw gipahinumdoman nga ang nagasakripisyong gugma maoy ilhanang bahin sa Kristiyanidad ug nga ang gugma sa Diyos ug sa silingan maoy hinungdanong mga bahin sa pagsimba nga giuyonan ni Jehova.
Sunod mao ang tulo ka bahin nga simposyum nga nag-ulohang “Mga Ginikanan—Itisok ang Dalan sa Diyos Diha sa Inyong mga Anak.” Ang mga ginikanan makatabang sa ilang mga anak sa pag-alagad sa Diyos pinaagi sa pagpahilunag maayong panig-ingnan sa pagbasa ug pagtuon sa iyang Pulong. Ikapatisok nila ang kamatuoran diha sa ilang mga anak pinaagi sa regular nga pagtuon sa pamilya, nga nagapasibo niana sumala sa mga panginahanglan sa pamilya. Hinungdanon usab ang pagtabang sa mga anak nga malangkit sa mga kalihokan sa kongregasyon ug sa ministeryo sa kanataran. Bisan tuod ang pagmatuto ug mahadlokon-sa-Diyos nga mga anak niining daotang kalibotan maoy usa ka hagit, ang pagbuhat sa ingon magdalag dagkong mga ganti.
Sunod niining simposyum mao ang pakigpulong nga “Tugoting Umolon Ka ni Jehova Alang sa Dungganong Kagamitan.” Sama nga ang magkukulon maghulma sa sudlanang kulonon, ang Diyos usab maghulma niadtong buot moalagad kaniya. (Roma 9:20, 21) Gihimo niya kini pinaagi sa pagtaganag tambag diha sa iyang Pulong ug pinaagi sa iyang organisasyon. Tabangan kita ni Jehova sa paggamit sa atong mga katakos sa bug-os kon andam kitang motanyag sa atong kaugalingon alang sa buluhaton, mosanong sa mga kahigayonan, ug kinabubut-ong magpatultol kaniya sa atong mga tikang.
Dayon gisundan kini sa makapahinam nga bahin sa programa—“Pag-alagad Diha sa Misyonaryong Kanataran.” Sa pagkakaron nag-alagad sa tibuok kalibotan sa 148 ka nasod mao ang 2,390 ka Kristohanong mga ministro nga anaa sa misyonaryong kahimtang. Nagpahiluna silag talagsaong panig-ingnan sa pagkamaunongon ug kasibot ug tim-os nga mapasalamaton sa ilang pribilehiyo sa pag-alagad diha sa langyawng kanataran. Panahon niining bahina sa programa sa internasyonal nga mga kombensiyon, ang mga misyonaryo nagsugilon sa mga hagit ug mga kangaya sa misyonaryong kinabuhi.
Ang paniklop nga pakigpulong sa unang adlaw nag-ulohag “Aduna bay Kinabuhi Luyo sa Kamatayon?” Kining pangutanaha nakapalibog sa katawhan sa daghang milenyo. Ang mga tawo sa tanang katilingban naningkamot pagtubag sa maong ulohan. Puwerteng daghana ang gikaingong mga tubag. Ingon kini ka daghan sa mga kostumbre ug mga relihiyon niadtong nagatanyag niini. Apan, ang mga tawo kinahanglang makakat-on sa kamatuoran.
Busa, ang mamumulong mipahibalo sa pagluwat sa buloknon bag-ong 32-panid nga brosyur nga Unsay Mahitabo Kanato sa Dihang Mamatay Kita? Kini nga brosyur nagsaysay sa tinubdan sa pagtulon-an sa imortalidad sa kalag ug nagpakita kon sa unsang paagi ang ideya nahimong pangunang bahin sa halos tanang relihiyon sa kalibotan karon. Diha sa tin-aw ug makapadaning paagi, gisusi niini kon unsay giingon sa Bibliya bahin sa kalag, kon nganong kita mamatay, ug kon unsay mahitabo kanato diha sa kamatayon. Nagsaysay usab ang brosyur kon unsay mabatonang paglaom sa mga patay ug sa mga buhi. Pagkadakong panalangin niining publikasyona alang niadtong mga nangita sa kamatuoran bisan diin!
Pagbantay Pag-ayo Kon sa Unsang Paagi Ka Naglakaw
Pagkahaom niini nga tema sa ikaduhang adlaw sa kombensiyon! (Efeso 5:15) Ang programa sa buntag nagpunting sa pagsangyaw ug paghimog tinun-an nga buluhaton. Human sa panaghisgot sa inadlaw nga teksto, ang programa nagpadayon uban ang pakigpulong nga “Pagtabang sa mga Tawo nga Makasubay sa Dalan sa Kinabuhi.” Sa pagtuman niining dinaliang buluhaton, hinungdanon ang pagbaton ug positibong tinamdan, nagaila nga ang pagpaambit sa kamatuoran ngadto sa uban maoy usa ka pribilehiyo ug katungdanan. Sa unang siglo K.P., ang kadaghanang tawo nagsalikway sa Pulong sa Diyos. Apan, bisan pa sa pagsupak, diha kadtong ‘sa husto nahimutang alang sa kinabuhing walay-kataposan ug nahimong mga magtutuo.’ (Buhat 13:48, 50; 14:1-5) Ang kahimtang susama karon. Bisag daghan ang nagsalikway sa kamatuoran sa Bibliya, padayon kitang mangita niadtong mosanong nga mauyonon.—Mateo 10:11-13.
Ang sunod nga pakigpulong naghisgot sa hagit nga ipaabot sa uban ang mensahe sa kinabuhi. Sanglit mas lisod karon ang pagkaplag sa mga tawo diha sa balay, kinahanglan kitang magmabug-os ug mapaagihon kon buot natong maabot sa mensahe sa Gingharian ang mas daghan kutob sa maarangan. Sa daghang kayutaan, ang mga magmamantala sa maayong balita nakakab-ot ug maayong mga resulta pinaagig pagsangyaw ginamit ang telepono ug pinaagig pagsangyaw diha sa teritoryo sa negosyo, busa nakakaplag niadtong daw lisod kontakon.
Ang pakigpulong nga nag-ulohang “Pagtudlo sa mga Tinun-an sa Tanang Gisugo ni Kristo” nagtumong sa kahinungdanon sa pagkahanas diha sa atong ministeryo. Ang atong katakos sa pagpanudlo mapahait samtang kita mokat-on gikan sa uban ug mopadapat sa ekselenteng pagbansay nga madawat diha sa mga tigom sa kongregasyon. Samtang kita mahanas sa atong pagpanudlo, labi pa kitang malipay ug matagbaw sa atong buluhaton sa pagtabang sa mga tawo nga makakat-on sa kamatuoran sa Bibliya.
Ang sesyon sa buntag natapos uban ang pakigpulong bahin sa kahulogan sa dedikasyon ug bawtismo. Usa sa mga puntos nga gihimo sa mamumulong mao nga kon kita mosalig sa Diyos sa bug-os ug kita sa masibotong paagi maningkamot sa pagbuhat sa iyang kabubut-on, siya magpanalangin ug magpalig-on kanato. Ang maalamong tawo misulat: “Sa tanan nimong mga dalan ilha [ang Diyos], ug siya mismo magatul-id sa imong alagianan.” (Proverbio 3:6) Ang malipayong bawtismo mismo maoy usa ka dugokan sa kombensiyon nga nagpakitang daghan ang nagsugod sa pagpahiuyon ngadto sa iya sa Diyos nga dalan sa kinabuhi.
Human sa paniudto, ang sesyon sa hapon gisugdan sa pakigpulong nga “Pag-alagad nga Nagalantaw sa Kinabuhing Walay Kataposan.” Ang katuyoan sa Diyos nga mag-alagad kaniya ang masinundanong mga tawo sa walay kataposan sa yuta mamatuman. Nan, pagkahaom nga atong isentro ang atong panghunahuna, mga plano, ug mga paglaom sa pag-alagad kang Jehova nga nagalantaw sa walay kataposan! Samtang atong huptan “ang adlaw ni Jehova” nga duol sa hunahuna, maayong hinumdoman nga ang atong tumong mao ang pag-alagad kaniya sa walay kataposan. (2 Pedro 3:12) Kay walay kasayoran sa eksaktong panahon kon kanus-a ipakanaog ni Jesus ang panimalos sa Diyos maghimo kanatong mabinantayon ug maghatag kanatog mga kahigayonan sa matag adlaw sa pagpamatuod nga kita nagaalagad kang Jehova nga walay mahakogong mga motibo.
Ang duha ka pakigpulong nga misunod nagsusi sa ikaupat nga kapitulo sa sulat ni Pablo ngadto sa mga taga-Efeso. Lakip sa mga butang nga gitagad mao ang panalangin nga atong maangkon diha sa “mga gasa sa mga lalaki,” kuwalipikado sa espirituwal nga mga lalaki nga gitudlo pinaagi sa balaang espiritu. Kining mga ansiyanoha nagtaganag tambag ug pagtultol alang sa atong espirituwal nga kaayohan. Ang dinasig nga sulat ni Pablo nag-awhag usab sa mga Kristohanon sa pagsul-ob sa “bag-ong pagkatawo.” (Efeso 4:8, 24) Ang diyosnong personalidad naglakip sa maong mga hiyas sama sa pagkamabination, kalulot, pagkamapaubsanon, kalumo, pagkamainantoson, ug gugma.—Colosas 3:12-14.
Ang pagbantay pag-ayo kon unsaon nato paglakaw naglakip sa atong pagpabiling walay lama gikan sa kalibotan—ang ulohan sa sunod nga pakigpulong. Gikinahanglan ang pagkatimbang sa pagpili ug kalingawan, sosyal nga mga kalihokan, ug materyal nga mga pangagpas. Pinaagi sa pagpadapat sa tambag sa Santiago 1:27 sa pagpabiling walay lama gikan sa kalibotan, atong matagamtam ang mahinlong pagbarog uban sa Diyos ug usa ka maayong tanlag. Mahimong magkinabuhi usab kitag may-katuyoang kinabuhi ug mapanalanginan ug kalinaw, espirituwal nga kauswagan, ug maayong mga kauban.
Dayon misunod ang tulo ka bahin nga simposyum nga nag-ulohang “Mga Batan-on—Subaya ang Dalan sa Diyos.” Kay nasayod nga ang Diyos nahigugma kanila ug nagpabili sa ilang mga paningkamot sa pagtuboy sa putling pagsimba, ang mga batan-on kinahanglang magbansay sa ilang mga gahom sa panabot aron sa pag-alagad kaniya nga matinumanon. Ang usa ka paagi sa pag-ugmad sa gahom sa panabot maoy sa pagbasa sa Pulong sa Diyos adlaw-adlaw ug sa pagpamalandong diha niana. Kon atong buhaton kini, kita masayod sa mga dalan ni Jehova. (Salmo 119:9-11) Maugmad usab ang mga gahom sa panabot pinaagi sa pagdawat ug hamtong nga tambag gikan sa mga ginikanan, mga ansiyano, ug sa mga publikasyon sa Sosyedad. Pinaagi sa paggamit sa ilang mga gahom sa panabot sa hustong paagi, ang mga batan-on makapakigbisog sa sobrang pagkalinga sa materyal nga mga kabtangan, law-ayng sinultihan, ug pagpasobra sa kalingawan nga nagapaila niining kalibotana nga nahilayo gikan sa Diyos. Pinaagi sa pagsunod sa iya sa Diyos nga dalan sa kinabuhi, ang batan-on ug tigulang makapahimulos sa tinuod nga kalamposan.
Ang paniklop nga pakigpulong sa maong adlaw mao “Ang Maglalalang—Iyang Personalidad ug Iyang mga Dalan.” Human hisgoti nga bilyonbilyong tawo ang wala mahibalo sa Maglalalang, ang mamumulong miingon: “Ang tinuod nga kahulogan sa kinabuhi nalangkit sa pagkahibalo sa Maglalalang, ang atong personal nga Diyos; pag-ila sa iyang personalidad; ug pagsubay sa iyang mga dalan. . . . Dunay mga kamatuoran bahin sa atong kalibotan ug bahin kanato nga inyong magamit aron matabangan ang mga tawo sa pagdawat sa Maglalalang ug sa pagkakaplag ug kahulogan bahin kaniya.” Dayon gihisgotan sa mamiminaw ang ebidensiya nga nagpunting sa paglungtad sa usa ka maalamon ug mahigugmaong Maglalalang. Miabot sa tayuktok ang pakigpulong uban ang pagluwat sa bag-ong libro—Is There a Creator Who Cares About You?
“Kini ang Dalan. Lumakaw Diha Niana”
Mao kini ang tema sa ikatulong adlaw sa kombensiyon. (Isaias 30:21) Gisugdan ang programa uban ang kulbahinam nga simposyum sa tulo ka pakigpulong, nga nagtumong sa panan-awon ni Ezequiel sa templo. Kini nga panan-awon dunay dakong kahulogan sa katawhan sa Diyos karon, sanglit kini may kalabotan sa putling pagsimba sa atong panahon. Ang yawi sa pagsabot sa panan-awon mao kini: ang dakong espirituwal nga templo ni Jehova naghawas sa iyang kahikayan sa putling pagsimba. Samtang gihisgotan ang mga bahin sa panan-awon, ang mga mamiminaw namalandong sa ilang kalihokan isip pagpaluyo sa buluhaton nga gihimo sa mahigugmaong mga magtatan-aw sa dinihogang nanghibilin ug sa umaabot nga mga membro sa hepe nga matang.
Sa pagkaudto-udto na, dihay mabulokong drama sa Bibliya nga giapilan sa nagkostyum nga mga sumasalmot. Ang drama nag-ulohan ug “Mga Pamilya—Himoa ang Adlaw-Adlaw nga Pagbasa sa Bibliya nga Paagi sa Inyong Kinabuhi!” Naghulagway kini sa pagtuo ug kaisog sa tulo ka Hebreohanon nga midumili sa pagyukbo sa bulawang larawan nga gipatindog ni Haring Nabucodonosor sa Babilonya. Ang tumong sa drama mao ang pagpakita nga ang Bibliya dili lamang usa ka libro sa karaang kasaysayan kondili ang tambag niini tinuod nga mapuslanon alang sa mga batan-on ug mga hingkod karon.
Ang sesyon sa hapon maoy panahon sa pakigpulong publiko nga “Ang Bugtong Dalan Ngadto sa Kinabuhing Walay Kataposan.” Human masubay ang kasaysayan sa pagkahulog sa tawo ngadto sa sala ug kamatayon, ang mamumulong mihinapos uban niining makapahinuklog nga mga pulong: “Ang tema sa Bibliya niining adlawa sa kombensiyon maoy sa Isaias kapitulo 30, bersikulo 21, nga nag-ingon: ‘Ang imong mga igdulungog makadungog ug pulong sa imong likod nga magaingon: “Kini mao ang dalan. Lumakaw diha niana, kamong katawhan,” kon kamo gayod moliko sa tuo o kon kamo gayod moliko sa wala.’ Unsaon nato pagpaminaw niining tingoga? Pinaagi kini sa pagpatalinghog sa Pulong sa Diyos, ang Balaang Bibliya, ug sa pagsunod sa pagtultol nga gitagana pinaagi niana sa atong Dakong Instruktor, si Jehova nga Diyos, ug pinaagi sa iyang modernong adlaw nga Kristohanong organisasyon. Sa pagkatinuod, ang pagbuhat niini mao ang bugtong dalan ngadto sa kinabuhing walay kataposan.”
Human ang sumaryo sa tun-anang artikulo sa Bantayanang Torre para sa semana mao ang paniklop nga pakigpulong, nga nag-ulohang “Padayon sa Paglakaw Diha sa Dalan ni Jehova.” Sa bahin, girepaso niini ang pangunang mga puntos sa programa. Dayon gipresentar sa mamumulong ang usa ka resolusyon nga nagpahayag ug determinasyon sa pagpadayon sa pagkinabuhi diha sa dalan sa Diyos.
Gitiklopan ang resolusyon uban niining makapadasig nga mga pulong: “Kami sa hugot nagtuo nga ang pagkinabuhi sumala sa Kasulatanhong mga prinsipyo, tambag, ug pagmaymay makatabang sa labing maayong dalan sa kinabuhi karong adlawa ug magpahiluna ug maayong patukoranan alang sa umaabot, aron kami makapangupot nga lig-on sa tinuod nga kinabuhi. Labaw sa tanan, among gihimo kining resolusyona tungod kay among gihigugma si Jehova nga Diyos uban sa bug-os namong kasingkasing, kalag, hunahuna, ug kusog!” Ang tanang nanambong nagpamatuod sa ilang pag-uyon uban ang makusog nga oo!
[Kahon/Hulagway sa panid 8]
Aduna bay Maglalalang nga May Pagtagad Kanimo?
Ang bag-ong libro nga nagdala niining ulohana nagpresentar ug makapakombinsir nga ebidensiya sa paglungtad sa Maglalalang, si Jehova, ug naghisgot sa iyang mga hiyas. Kini ilabinang gidisenyo alang niadtong kinsa naedukar pag-ayo sa sekular nga mga butang apan wala magtuo sa Diyos. Kining 192-panid nga libro magpausbaw usab sa pagtuo sa mga indibiduwal nga nagtuo na sa Diyos, nga magtukod ug apresasyon sa iyang personalidad ug mga paagi.
Ang librong Is There a Creator Who Cares About You? wala magdahom nga ang magbabasa nagtuo sa Diyos. Hinunoa, naghisgot kini kon sa unsang paagi ang bag-ong siyentipikanhong mga kaplag ug mga ideya nagpamatuod sa paglungtad sa Maglalalang. Lakip sa mga kapitulo mao kining nag-ulohang “Unsay Makadugang ug Kahulogan sa Imong Kinabuhi?,” “Sa Unsang Paagi Mitungha ang Atong Uniberso?—Ang Panaglantugi,” ug “Pagkatalagsaon Nimo!” Ang ubang mga kapitulo nagtagad kon nganong kita makaseguro nga ang Bibliya maoy dinasig sa Diyos. Ang bag-ong libro naghatag usab sa katibuk-ang panglantaw sa Bibliya, nga nagbutyag sa personalidad ug mga paagi sa Maglalalang. Ang libro wala lamang naghisgot kon nganong gitugotan sa Diyos ang daghang pag-antos kondili nagpatin-aw usab kon sa unsang paagi iyang taposon kini sa walay kataposan.
[Mga hulagway sa panid 7]
Daghan ang nabawtismohan
[Mga hulagwway sa panid 7]
Ang bag-ong brosyur giluwatan ni A. D. Schroeder, membro sa Nagamandong Lawas sa mga Saksi ni Jehova
[Mga hulagway sa panid 8, 9]
Ang kulbahinam nga drama nagdasig ug adlaw-adlaw nga pagbasa sa Bibliya