Nganong Gamay na Kaayo ang Panahon?

PANAHON. Tingali malisdan kita sa paghubit sa tukma sa maong pulong, apan tino nga kita nahibalo nga daw kulang gayod ang atong panahon. Nahibalo usab kita nga kini dali ra kaayong molabay. Sa pagkatinuod, kita sagad nga manghupaw, “Kadali ra sa panahon.”

Bisan pa niana, dayag nga ang Ingles nga magbabalak nga si Austin Dobson mas tukma sa dihang siya nag-ingon niadtong 1877: “Moingon ka nga molabay ang panahon? Ah dili! Ikasubo, magpabilin ang Panahon, kita ang motaliwan.” Sukad sa iyang kamatayon sa 1921, si Dobson mitaliwan sulod na sa halos 80 ka tuig; ang panahon nagpadayon.

Daghang Panahon

Mahitungod sa Maglalalang sa katawhan, ang Bibliya nagsulti kanato: “Sa wala pa motungha ang kabukiran, o gipatungha nimo ang yuta ug ang mabungahong yuta, bisan sa panahong walay tino hangtod sa panahong walay tino ikaw mao ang Diyos.” (Salmo 90:2) O sumala sa pagkahubad niini sa The New Jerusalem Bible, “gikan sa kahangtoran ngadto sa kahangtoran ikaw mao ang Diyos.” Busa ang panahon magalungtad samtang ang Diyos mismo nagalungtad​—sa walay kataposan!

Sukwahi kaayo sa Diyos, nga nagbatog walay kataposang panahon ug makagamit niini sumala sa iyang pagbuot, atong mabasa ang bahin sa mga tawo: “Kay ang tanan namong mga adlaw mikunhod tungod sa imong mabangis nga kasuko; gitapos namo ang among katuigan sama sa usa ka hagawhaw. Ang mga adlaw sa among katuigan maoy kapitoan ka tuig; ug kon tungod sa linaing kabaskog kini maoy kawaloan ka tuig, apan ang pagpadayon pa niini maoy diha sa kasamok ug sa makadaot nga mga butang; kay kini sa madali molabay, ug kami managpanlupad.”​—Salmo 90:9, 10.

Nganong ang kinabuhi karon mubo kaayo, sanglit ang Bibliya tin-awng nagtudlo nga katuyoan sa Diyos nga ang tawo mabuhi sa walay kataposan? (Genesis 1:27, 28; Salmo 37:29) Imbes sa walay-kinutobang gitas-on sa kinabuhi nga gituyo sa Diyos, nganong ang mga tawo sa aberids aduna lamay, ilalom sa labing paborableng mga kahimtang, menos sa 30,000 ka adlaw? Nganong gamay ra kaayo ang panahon sa mga tawo? Kinsa o unsa ang hinungdan niining makapasubong kahimtang? Ang Bibliya naghatag ug tin-aw ug makapatagbawng mga tubag.a

Nagakakunhod nga Panahon

Makapamatuod ang mga tigulang nga mipaspas ang paso sa pagkinabuhi sa di pa dugayng katuigan. Ang usa ka magsusulat, si Dr. Sybille Fritsch, nagpunting nga sa miaging 200 ka tuig, ang semana sa pagtrabaho mius-os gikan sa 80 ngadto sa 38 ka oras, “apan wala kini magpahunong sa atong pagreklamo.” Siya mipatin-aw: “Kulang ang panahon; ang panahon bililhon; hilabihang panginahanglan sa panahon samang naghangos sa pagginhawa; usa ka puliki kaayong kinabuhi.”

Ang bag-ong mga imbensiyon nagbukas ug mga kahigayonan ug mga posibilidad nga wala kanhi mahunahuna sa unang mga kaliwatan. Apan kon mas dako ang posibilidad nga makahimog daghan kaayong kalihokan, mas dako ang kahigawad tungod kay kulang kaayo ang panahon sa paghimo niini. Karong mga adlawa, sa daghang bahin sa kalibotan, ang mga tawo dunay estriktong eskedyul, nga nagdalidaling matapos ang daghang buluhaton sa gitagal nga panahon. Si Papa kinahanglang mogikan ug alas 7:00 s.b. aron motrabaho, kinahanglang mapagikan ni Mama ang mga bata pagka-alas 8:30 s.b. sa eskuylahan, si Lolo makigkita sa doktor sa alas 9:40 s.b., ug kaming tanan kinahanglang mangandam alang sa usa ka hinungdanong miting sa alas 7:30 s.g. Sa pagdalidali sa paggukod nga matapos ang daghang buluhaton sa gitagal nga panahon, halos wala nay panahong nabilin alang sa bisan unsang paglingawlingaw. Ug kita moreklamo bahin sa makalaay nga buluhaton sa adlaw-adlaw, bahin sa makakapoy nga dinalidaling kalihokan.

Kita Wala Mag-inusara sa Pagkakulang ug Panahon

Ang Kaaway sa Diyos, si Satanas nga Yawa, ang usa kansang panglingla mitultol sa napamubo nga kinabuhi sa mga tawo, nahimo na karong biktima sa iyang kaugalingong pagkadaotan. (Itandi ang Galacia 6:7, 8.) Sa paghisgot bahin sa pagkahimugso sa Mesiyanikong Gingharian didto sa langit, ang Pinadayag 12:12 naghatag kanatog hinungdan sa paglaom sa dihang kini nag-ingon: “Gumikan niini panagsaya, kamong mga langit ug kamong mga nagapuyo niini! Alaot alang sa yuta ug sa dagat, tungod kay ang Yawa nanaog kaninyo, nga may dakong kasuko, kay nahibalo nga siya may mubo nga yugto sa panahon.”

Sumala sa kasaligang kronolohiya sa Bibliya ug sa katumanan sa tagna sa Bibliya, kita nagkinabuhi na karon sa kataposang bahin nianang “mubo nga yugto sa panahon.” Pagkadakong kalipay sa pagkahibalo nga ang panahon nga gawasnon ni Satanas hapit nang matapos sa bug-os! Sa dihang matambog na siya sa kahiladman, ang masinugtanong mga tawo igapasig-uli sa kahingpitan, ug sila makakab-ot sa walay-kataposang kinabuhi nga gituyo ni Jehova alang kanila sa sinugdanan. (Pinadayag 21:1-4) Ang kakulang sa panahon dili na unya problema.

Imo bang mahanduraw kon unsa na unyay kahulogan sa pagbaton ug walay-kataposang kinabuhi​—nga mabuhi hangtod sa hangtod? Dili ka na gayod mabalaka pa tungod sa mga butang nga dili nimo matiwas sa paghimo. Kon nagkinahanglan kag dugang panahon, adunay ugma, o sunod semana, o sunod tuig​—sa pagkamatuod, usa ka taas walay-kataposang panahon sa imong atubangan!

Maalamong Paggamit sa Panahong Atong Nabatonan Karon

Kay nakaamgo nga limitado na ang iyang panahon sa pag-impluwensiya sa mga tawo, si Satanas naningkamot sa paghimo sa mga tawo nga puliki kaayo nga wala silay panahong maminaw sa maayong balita sa natukod nga Gingharian sa Diyos. Busa, maayo nga atong sundon ang diyosnong tambag: “Padayong magbantay pag-ayo nga ang inyong paglakaw dili ingon sa dili-maalamon kundili ingon sa maalamon nga mga tawo, nga magapalit sa nahiangayng panahon alang sa inyong kaugalingon, tungod kay ang mga adlaw tuman-kadaotan. Tungod niini hunong na sa pagkadili-makatarunganon, apan padayong sabta kon unsa ang kabubut-on ni Jehova.”​—Efeso 5:15-17.

Pagkahinungdanon nga atong gamiton ang atong panahon sa maalamong paagi alang sa mga butang nga labing hinungdanon imbes nga usikan kini sa walay-kapuslanang mga pangagpas nga walay malungtarong kaayohan! Angay natong ugmaron ang tinamdan nga sama kang Moises sa dihang siya nangaliya kang Jehova niining kinasingkasing nga mga pulong: “Ipakita kanamo kon unsaon pag-ihap ang among mga adlaw sa paagi nga kami makabaton ug kasingkasing nga maalamon.”​—Salmo 90:12.

Tinuod, sa kalibotan karon ang tanan puliki. Bisan pa niana, ang mga Saksi ni Jehova kusganong nag-awhag kanimo sa paggugol sa uban nimong bililhong panahon sa pagkat-on bahin sa mga kinahanglanon sa Diyos aron makabaton ug walay-kataposang kinabuhi ilalom sa pagmando sa iyang Gingharian. Ang usa ka oras kada semana nga igugol sa sistematikong pagtuon sa Bibliya, nga ‘padayong sabton kon unsa ang kabubut-on ni Jehova,’ mahimong magpaposible nga imong masinati mismo ang katumanan niining mga pulonga: “Pahilayo sa kon unsay daotan ug buhata ang maayo, ug magpuyo ka hangtod sa panahong walay tino. Ang mga matarong magapanag-iya sa yuta, ug sila magapuyo sa ibabaw niini sa walay kataposan.”​—Salmo 37:27, 29.

[Footnote]