Diyosnong mga Tigmo ug Katuyoan sa Diyos

KON ang usa wala mahibalo sa tubag, nan makaiikag kini; apan kon ang usa nahibalo sa tubag, nan dili kini makaiikag. Unsa man kini? Usa ka tigmo.

Sa karong praktikal kaayong katilingban, ang mga tawo may tendensiya sa paglantaw sa tigmo ingong dula sa bata, apan sa karaang panahon ang tigmo “maoy usa ka pagsulay sa kaalam,” nag-ingon ang The Interpreter’s Dictionary of the Bible.​—Itandi ang Proverbio 1:5, 6.

Imbes isulti sa yano ang iyang kabubut-on o katuyoan, may mga panahon nga tinuyong palubogon ni Jehova ang iyang matagnaong mga panultihon, nga naggamit ug mga kokaamgid, misteryosong “lisod tugkarong mga panultihon,” o mga tigmo nga makapalibog. (Salmo 78:2, King James Version; Numeros 12:8, The Emphasized Bible) Sa pagkatinuod, samtang ang Hebreohanong pulong alang sa tigmo gigamit lamang sa 17 ka higayon sa Bibliya, ang Kasulatan sa literal maoy puno sa mga tigmo ug mga panultihon.

Daghag Tigmo ang Bibliya

Si Haring Solomon gikataho nga nakatubag bisan sa kinalisorang mga pangutana, o mga tigmo, nga iatubang kaniya. (1 Hari 10:1, potnot) Dayag nga resulta kini sa hinatag-sa-Diyos nga kaalam. Kon tinuod man ugaling ang mga taho sa karaang mga historyano nga napildi niadto si Solomon sa tigmotigmo batok ni Haring Hiram sa Tiro, tingali nahitabo kadto human nga nawad-an siya sa espiritu ni Jehova tungod sa iyang apostasya. Si Maghuhukom Samson gusto usab ug mga tigmotigmo. Sa usa ka okasyon, kay gigamhan sa balaang espiritu, usa ka tigmo nakahatag kaniyag higayon sa pagbutang ug kahadlok diha sa mga kasingkasing sa mga kaaway sa Diyos.​—Maghuhukom 14:12-19.

Apan, daghang tigmo sa Bibliya direktang nalangkit sa mga katuyoan ni Jehova. Tagda, pananglitan, ang Genesis 3:15. Kining tagnaa, nga nahimong basehanan sa tema sa Bibliya, maoy usa na ka tanghaga mismo, usa ka “sagradong tinago.” (Roma 16:25, 26) Gawas nga gihatagan ug labaw-tawhanong mga panan-awon ug mga kapadayagan, si apostol Pablo usab nakakitag pipila ka bahin sa katuyoan sa Diyos diha sa “hanap nga dagway,” o sa literal, “lisod sabtong mga pulong.” (1 Corinto 13:12; 2 Corinto 12:1-4) Ug komosta ang bahin sa walay kataposang pagpamanabana nga naglibot sa misteryosong numero sa mapintas nga mananap​—“unom ka gatos ug kan-umag-unom”—​nga kalit nga gipadayag ug wala ipatin-aw diha sa Pinadayag 13:18? Kinsa lang ang makatag-an niining mga tigmoa sa Diyos, ug unsay katuyoan niini?

Pagbadbad sa Sagradong mga Tinago

Alang sa kadaghanan kanato, ang panan-aw mao ang labing bililhon sa atong lima ka igbalati. Apan kon walay kahayag, ang panan-aw sa tawo halos wala gayoy kapuslanan. Kita mahimong halos buta. Maingon man, usab, ang tawhanong hunahuna. Kini adunay katingalahang katakos sa pagpatakdo sa mga porma, pagpadapat sa katarongan, ug sa ingon makasulbad ug mga kalibganan. Ugaling, labaw pa ang gikinahanglan aron mabadbad ang sagradong mga tinago. Samtang ang uban tingali motanyag ug mga tubag sa mga tigmo nga gipatugbaw sa Bibliya, ang Awtor lamang niini, si Jehova nga Diyos, ang Diyos sa kahayag, ang makabutyag sa kahulogan gayod niini.​—1 Juan 1:5.

Sa pagkaalaot, ang mga tawo sagad sobra ka mapahitas-on ug independente sa paghulat kang Jehova alang sa tubag. Kay naintriga sa misteryo, may mga tawo kinsa, sa pagpangitag pagpaukyab sa kinaadman apan dili kinahanglang kamatuoran, nangitag mga solusyon sa gawas sa Pulong sa Diyos. Pananglitan, ang Hudiyohanong mistisismo ingon sa gipadayag diha sa Cabala nagpalandong sa madyikanhong kahulogan sa mga numero ug mga letra sa Hebreohanong alpabeto. Sa laing bahin, ang mga Gnostiko sa ikaduhang siglo migamit sa Hebreohanon ug Gregong Kasulatan sa pagsulay nga makakuhag tagong mga kahulogan gikan niini.

Apan, kining tanang pagpangita nagdala kanila ngadto mismo sa paganong mga rituwal o mga patuotuo ug halayo gikan sa kamatuoran sa Diyos. ‘Aw, kon ang kalibotan puno sa daotan,’ nangatarongan ang mga Gnostiko, ‘nan ang Maglalalang niini, si Yahweh, dili mahimong usa ka maayong Diyos.’ Mao ba kini ang labing maayong paghinapos nga ilang ikatanyag? Pagkamabaw gayod sa tawhanong pangatarongan! Dili ikahibulong nga si apostol Pablo, nga nakigbisog batok sa apostatang mga ideya nga gipalambo sa ulahi sa Gnostikong mga sekta, kusganong nagpasidaan diha sa iyang mga sulat: “Ayaw pagsaylo sa mga butang nga nahisulat”!​—1 Corinto 4:6.

Pagpadayag sa “Lisod Tugkarong mga Panultihon”

Nan, nganong ang Diyos sa kahayag maghisgot pa man ug “lisod tugkarong mga panultihon”? Ang mismong kinaiyahan sa tigmo nagpukaw sa handurawan ug mga katakos sa pagsabot sa usa ka tawo. Busa, gisabwag diha sa tibuok Kasulatan nga samag lamiang mga dayandayan diha sa kinaham nga pagkaon, kini gigamit usahay aron lamang mapukaw ang interes sa mamiminaw o aron madayag ang mensahe nga mas tin-aw pa. Niining mga higayona, ang mga pagpatin-aw kasagarang ihatag sunod gayod niana.​—Ezequiel 17:1-18; Mateo 18:23-35.

Si Jehova mohatag ug kaalam sa madagayaon apan dili ngadto kang bisan kinsa. (Santiago 1:5-8) Tagda ang basahon sa Proverbio, usa ka dinasig nga koleksiyon sa daghang makalibog nga mga panultihon nga tingali gilantaw sa uban ingong mga tigmo. Ang pagsabot niini nagkinahanglag panahon ug pagpalandong. Apan pila ba ang andam sa paghimo niini? Ang kaalam nga nasulod niini mabatonan lamang niadtong andam mangalot alang niini.​—Proverbio 2:1-5.

Si Jesus migamit usab ug mga ilustrasyon aron madayag ang kasingkasing sa iyang mga mamiminaw. Ang panon sa mga tawo moalirong kaniya. Sila nalingaw sa iyang mga sugilanon. Sila nahigugma sa iyang mga milagro. Bisan pa, pila ba ang andam sa pagbag-o sa ilang paagi sa kinabuhi ug mosunod kaniya? Pagkalahi sa mga tinun-an ni Jesus, kinsa masubsob nga naningkamot sa pagsabot sa mga pagtulon-an ni Jesus ug andam sa pagsalikway sa ilang kaugalingon aron mahimong iyang mga sumusunod!​—Mateo 13:10-23, 34, 35; 16:24; Juan 16:25, 29.

Pagtan-aw sa Kahayag

“Ang pagkaikag sa mga tigmo,” matod pa sa usa ka tuboran, “daw sibo sa mga panahon sa pagkapukaw sa kinaadman.” Karon kita dako kaayog pribilehiyo nga nagkinabuhi sa panahong ang espirituwal nga “kahayag mismo mikidlap” alang sa katawhan sa Diyos. (Salmo 97:11; Daniel 12:4, 9) Kita ba makapailob sa paghulat kang Jehova nga magpadayag sa iyang mga katuyoan sumala sa iyang orasan? Labawng hinungdanon, kita molihok ba dayon sa pagbag-o sa atong mga kinabuhi sa dihang kita makahibalo na kon unsaon sa pagpahiuyon sa mas bug-os pa sa gipadayag nga kabubut-on sa Diyos? (Salmo 1:1-3; Santiago 1:22-25) Kon atong himoon kana, si Jehova magpanalangin sa atong mga paningkamot, kay, maingon nga ang mga antipara makatabang sa hanap-ug-panan-aw nga makakitag maayo, himoon sa balaang espiritu nga bug-os nga mapunting ang hulagway sa katuyoan sa Diyos diha sa atong handurawan, nga magpatin-awg maayo sa atong espirituwal nga panan-aw.​—1 Corinto 2:7, 9, 10.

Sa pagkatinuod, ang mga tigmo sa Kasulatan nagpasidungog kang Jehova ingong “Tigpadayag sa mga tinago.” (Daniel 2:28, 29) Dugang pa, siya usab maoy Tigsusi sa mga kasingkasing. (1 Cronicas 28:9) Kita dili angay mahibulong nga mahibalo nga ang pagpadayag sa kahayag sa kamatuoran sa Diyos nagauswag kanunay. (Proverbio 4:18; Roma 16:25, 26) Imbes mangitag kahibalo sa laglom nga mga butang sa Diyos pinaagi sa mistisismo o mabawng tawhanong kaalam, nga mosangpot lamang sa kakawangan, pasagding masaligong modangop kita kang Jehova nga Diyos nga magpasiga sa kahayag sa kamatuoran sa “lisod tugkarong mga panultihon,” nga nagapahibalo sa iyang katingalahang mga katuyoan ngadto sa matinumanong mga alagad sa iyang tinudlong panahon.—Amos 3:7; Mateo 24:25-27.

[Picture Credit Line sa panid 26]

Biblia Hebraica Stuttgartensia, Deutsche Bibelgesellschaft Stuttgart