Ang Pagtuo Makapabag-o sa Imong Kinabuhi

“POSIBLE gayod kaayo nga maghupot ug maayong mga prinsipyo nga walay Diyos.” Mao kini ang pangangkon sa usa ka agnostiko. Matod niya nagmatuto siya sa iyang mga anak pinaagi sa tag-as nga moral nga mga prinsipyo, ug sila, sa baylo, nagpadako sa ilang mga anak pinaagi sa susamang tag-as nga mga sukdanan​—ang tanan wala magtuo sa Diyos.

Nagpasabot ba kini nga dili-kinahanglanon ang pagtuo sa Diyos? Dayag, mao kiniy gihunahuna niining babayhana. Ug tinuod nga ang tanan nga wala magtuo sa Diyos dili awtomatikong daotan. Si apostol Pablo naghisgot bahin sa “katawhan sa kanasoran” nga wala makaila sa Diyos apan “nagabuhat sa kinaiyanhon sa mga butang sa balaod.” (Roma 2:14) Ang tanan​—lakip ang mga agnostiko​—natawo nga dunay tanlag. Daghan ang misulay sa pagsunod sa mga diktar sa ilang tanlag bisan pag wala sila magtuo sa Diyos nga naghatag kanila nianang kinaiyanhong pag-ila sa husto ug sa sayop.

Bisan pa niana, ang lig-ong pagtuo sa Diyos​—kanang gipasukad sa Bibliya​—labi pa ka gamhanan nga panukmod sa pagbuhat ug maayo kay sa walay-abag nga paggiya sa tanlag. Ang pagtuo nga gipasukad sa Pulong sa Diyos, ang Bibliya, magpahibalo sa tanlag, maghimo nianang mas maidlot sa pag-ila sa husto ug sa sayop. (Hebreohanon 5:14) Dugang pa, ang pagtuo magpalig-on sa mga tawo sa paghupot ug tag-as nga mga sukdanan atubangan sa dakong pagpit-os. Pananglitan, sa ika-20ng siglo, daghang nasod ang nailalom sa gahom sa dunot nga politikanhong mga rehimen, nga nagpugos sa daw desenteng mga tawo sa paghimog ngilngig nga mga kabangisan. Apan, kadtong dunay matuod nga pagtuo sa Diyos wala mokompromiso sa ilang mga prinsipyo, bisag nameligro ang ilang kinabuhi. Dugang pa, ang pinasukad-sa-Bibliya nga pagtuo makapabag-o sa mga tawo. Makaluwas kinig kinabuhi nga daw nahanaw ug motabang sa mga tawo nga malikayan ang seryosong mga sayop. Tagda ang pipila ka pananglitan.

Ang Pagtuo Makapabag-o sa Pamilyahanong Kinabuhi

“Pinaagi sa imong pagtuo nakab-ot nimo ang imposible.” Maoy giingon sa Ingles nga huwes sa dihang gipakanaog niya ang iyang desisyon bahin sa katungod sa pag-atiman sa mga anak ni John ug Tania. Sa dihang nailhan sa mga awtoridad si John ug Tania, dili sila kasado ug terible ang ilang pamilyahanong kinabuhi. Si John, nga dunay suliran maylabot sa droga ug sugarol, midangop sa krimen aron masuportahan ang iyang mga bisyo. Gipasagdan niya ang iyang mga anak ug ang ilang inahan. Busa, unsang “milagro” ang nahitabo?

Usa ka adlaw, nadunggan ni John ang iyang batang pag-umangkon nga lalaki nga naghisgot bahin sa Paraiso. Naikag, gipangutana niya ang mga ginikanan sa bata. Ang mga ginikanan maoy mga Saksi ni Jehova, ug gitabangan nila si John nga makakat-on bahin niana gikan sa Bibliya. Sa hinayhinay, si John ug Tania nakaugmad ug pinasukad-sa-Bibliya nga pagtuo nga nagbag-o sa ilang kinabuhi. Gipalegal nila ang ilang kaminyoon ug gibuntog ang ilang mga bisyo. Ang mga awtoridad nga nagsusi sa ilang panimalay nakakaplag ug usa ka butang nga daw imposibleng mahitabo sa mubong panahon kaniadto​—usa ka malipayong pamilya diha sa hinlo nga panimalay, usa ka maayong dapit nga niana matutuon ang mga anak. Ang huwes husto sa pag-ingon nga ang “milagro” maoy gumikan sa bag-ong relihiyon ni John ug Tania.

Linibo ka milya gikan sa Inglaterra, usa ka batan-ong asawa sa Near East hapit nang mahimong bahin sa usa ka makapasubong estadistika. Nagplano siyang moduyog sa minilyon kada tuig kansang mga kaminyoon natapos sa diborsiyo. May anak siya, apan ang iyang bana mas tigulang kaayo kay kaniya. Tungod niini, ang iyang mga paryente nag-awhag kaniya sa pagpakigdiborsiyo, ug nagsugod na gayod siya sa paghikay niana. Apan, nagtuon siya sa Bibliya uban sa usa sa mga Saksi ni Jehova. Sa dihang ang Saksi nahibalo sa kahimtang, iyang gisaysay kon unsay giingon sa Bibliya bahin sa kaminyoon​—pananglitan, nga ang kaminyoon maoy gasa gikan sa Diyos ug dili angayng isalikway na lang nga walay hinungdan. (Mateo 19:​4-6, 9) Ang babaye naghunahuna, ‘Talagsaon nga kining bayhana, usa ka estranyo, misulay pagpreserbar sa among pamilya samtang kadtong suod nako gustong mobungkag niini.’ Ang iyang bag-ong nahuptan nga pagtuo mitabang kaniya sa pagpreserbar sa iyang kaminyoon.

Ang usa ka makapaguol nga estadistika nga nag-apektar sa pamilyahanong kinabuhi adunay kalabotan sa aborsiyon. Usa ka taho sa Hiniusang Kanasoran nagbanabana nga kada tuig labing menos 45 ka milyong wala-matawong mga bata ang tinuyong gitaktak. Ang matag usa niana maoy trahedya. Ang kahibalo sa Bibliya nakatabang sa usa ka babaye sa Pilipinas nga makalikay nga makadugang sa maong estadistika.

Ang babaye nakaestorya sa mga Saksi ni Jehova, midawat ug brosyur nga gamiton sa pagtuon sa Bibliya nga nag-ulohang Unsay Gikinahanglan sa Diyos Kanato?,a ug nagsugod pagtuon sa Bibliya. Pipila ka bulan sa ulahi, siya misaysay kon ngano. Ang babaye nagsabak sa dihang unang miduaw kaniya ang mga Saksi, apan siya ug ang iyang bana nakahukom sa pagpataktak sa bata. Apan, ang hulagway sa wala-matawong bata diha sa panid 24 sa brosyur nakatandog sa kasingkasing sa babaye. Ang kaubang gipasukad-sa-Bibliyang saysay nga ang kinabuhi sagrado tungod kay ‘ang Diyos mao ang tuboran sa kinabuhi’ nakapakombinsir kaniya nga dili ipataktak ang bata. (Salmo 36:9) Karon siya usa ka inahan sa matahom, himsog nga bata.

Ang Pagtuo Motabang Niadtong Gitamay

Sa Etiopia, duha ka nagkagidlay nga mga lalaki ang nanambong sa tigom alang sa pagsimba nga gihimo sa mga Saksi ni Jehova. Pagkahuman sa tigom, usa ka Saksi ang nagpailaila sa iyang kaugalingon kanila sa mahigalaong paagi. Ang mga lalaki nangayog limos. Dili salapi ang gihatag sa Saksi kanila, kondili usa ka butang nga mas maayo pa. Gidasig niya sila sa pagbaton ug pagtuo sa Diyos, nga “mas dako pa kaayo ug bili kay sa bulawan.” (1 Pedro 1:7) Usa kanila misanong ug nagsugod pagtuon sa Bibliya. Nagbag-o kini sa iyang kinabuhi. Samtang nag-uswag ang iyang pagtuo, gihunong niya ang pagtabako, pagpatuyang pag-inom, imoralidad, ug ang paggamit ug khat (makapagiyan nga pangpalagsik). Nakakat-on siya sa pagsuportar sa iyang kaugalingon inay kay magpakilimos ug karon nagkinabuhi ug mahinlo, mabungahong kinabuhi.

Sa Italya usa ka 47-anyos nga lalaki ang gihukman nga mabilanggo sulod sa napulo ka tuig ug gipriso diha sa hudisyal nga sikyatrik nga ospital. Usa sa mga Saksi ni Jehova nga awtorisadong mosulod sa mga institusyon sa prisohan aron mohatag kanilag espirituwal nga giya nagtuon sa Bibliya uban kaniya. Ang tawo dali rang miuswag. Ang pagtuo nagbag-o pag-ayo sa iyang kinabuhi nga ang ubang mga binilanggo karon magpatambag kaniya kon unsaon pagsagubang sa ilang mga suliran. Tungod sa iyang gipasukad-sa-Bibliya nga pagtuo naangkon niya ang pagtahod, pagtamod, ug pagsalig sa mga awtoridad sa prisohan.

Sa di pa dugayng katuigan ang mga mantalaan nagtaho bahin sa sibil nga mga gubat sa Aprika. Ilabinang makalilisang ang mga asoy bahin sa mga batang lalaki nga gibansay ingong mga sundalo. Kining mga bataa gipainom ug droga, gidagmalan, ug gipugos pag-apil sa di-makitawhanong mga panggawi batok sa ilang mga paryente aron maseguro nga ang ilang pagkamaunongon maoy ngadto lamang sa pundok nga dapig niana sila nagapakiggubat. Ang gipasukad-sa-Bibliya nga pagtuo may igo bang puwersa sa pagbag-o sa kinabuhi sa maong mga batan-on? Oo, sa labing menos duha ka kaso.

Sa Liberia, si Alex nag-alagad ingong sakristan sa Katolikong Simbahan. Apan sa edad nga 13, mianib siya sa naggubatay nga pundok ug nahimong banggiitang bata nga sundalo. Aron makabaton siyag kaisog sa panggubatan, midangop siya sa espiritismo. Nakita ni Alex nga daghan sa iyang mga kauban ang gipamatay, apan siya nakalabang-buhi. Sa 1997 nahimamat niya ang mga Saksi ni Jehova ug nakakaplag nga wala nila siya tamaya. Hinunoa, gitabangan nila siya sa pagtuon kon unsay giingon sa Bibliya bahin sa kapintasan. Mihunong sa pagsundalo si Alex. Samtang nag-uswag ang iyang pagtuo, gisunod niya ang sugo sa Bibliya: “Pabiyai kaniya ang daotan ug ipabuhat ang maayo; ipapangita kaniya ang pakigdait ug pangagpason kini.”​—1 Pedro 3:11.

Kasamtangan, usa ka kanhing bata nga sundalo nga ginganlag Samson ang miagi sa lungsod nga gipuy-an ni Alex karon. Siya kanhing membro sa koro apan sa 1993 nahimong sundalo ug nalangkit sa pag-abuso sa droga, espiritismo, ug imoralidad. Sa 1997 gipaundang siya sa pagsundalo. Si Samson nagpaingon sa Monrovia aron sa pag-anib sa espesyal nga puwersa sa seguridad sa dihang usa ka higala nagdani kaniya nga magtuon sa Bibliya uban sa mga Saksi ni Jehova, ug ingong resulta, nakaugmad ug gipasukad-sa-Bibliya nga pagtuo. Naghatag kini kaniya ug kaisog sa pagbiya sa iyang makiggubatong mga paagi. Si Alex ug si Samson karon nagkinabuhi ug malipayon ug matarong nga kinabuhi. Duna pa bay lain gawas sa pinasukad-sa-Bibliya nga pagtuo ang makabag-o sa kinabuhi nga dinagmalan kaayo?

Ang Hustong Matang sa Pagtuo

Kini mao lamay pipila sa daghan, daghang pananglitan nga mahimong hisgotan sa pag-ilustrar sa gahom sa tinuod nga pagtuo nga gipasukad sa Bibliya. Siyempre, dili tanan nga nag-angkon lamang nga nagtuo sa Diyos ang nagkinabuhi sumala sa tag-as nga mga sukdanan sa Bibliya. Sa pagkatinuod, ang ubang mga ateyista mahimong nagkinabuhi ug mas maayong kinabuhi kay sa ubang nag-angkong mga Kristohanon. Kana tungod kay ang pinasukad-sa-Bibliya nga pagtuo naglangkit ug labaw pa kay sa pag-angkon lamang nga nagtuo sa Diyos.

Si apostol Pablo naghubit sa pagtuo ingong “may katinoan nga pagdahom sa mga butang nga gilaoman, ang tataw nga pagpanghimatuod sa mga katinuoran bisan tuod wala makita.” (Hebreohanon 11:1) Busa, ang pagtuo naglakip sa lig-ong pagtuo​—nga gipasukad sa dili-malalis nga pamatuod​—sa mga butang nga wala makita. Kini ilabinang naglangkit sa dili gayod pagduhaduha nga naglungtad ang Diyos, nga siya interesado kanato, ug nga siya magpanalangin niadtong magatuman sa iyang kabubut-on. Ang apostol miingon usab: “Siya nga nagaduol sa Diyos kinahanglang motuo nga siya mao ug nga siya maoy tigganti sa mga matinuorong nagapangita kaniya.”​—Hebreohanon 11:6.

Mao kini ang matang sa pagtuo nga nagbag-o sa kinabuhi ni John, Tania, ug sa uban pa nga gihisgotan niining artikuloha. Mitultol kini kanila sa pagsalig sa bug-os sa Pulong sa Diyos, ang Bibliya, ingong giya sa paghimog mga desisyon. Mitabang kini kanila sa paghimog temporaryong mga sakripisyo aron dili makasubay sa kombenyente, apan sayop, nga dalan. Magkalahi man ang matag eksperyensiya, ang tanan nagsugod sa susamang paagi. Usa sa mga Saksi ni Jehova nagtuon sa Bibliya uban niining mga tawhana, ug naeksperyensiyahan nila ang kamatuoran sa giingon sa Bibliya: “Ang pulong sa Diyos buhi ug gamhanang nagalihok.” (Hebreohanon 4:12) Ang gahom sa Pulong sa Diyos nagtabang sa matag tawo sa pagtukod ug lig-on nga pagtuo nga nagbag-o sa iyang kinabuhi aron mahimong mas maayo.

Ang mga Saksi ni Jehova aktibo sa kapin sa 230 ka kayutaan ug mga isla sa dagat. Sila nag-awhag kanimo sa pagtuon sa Bibliya. Ngano man? Tungod kay kombinsido sila nga ang pinasukad-sa-Bibliya nga pagtuo makapauswag usab pag-ayo sa imong kinabuhi.

[Footnote]

[Mga hulagway sa panid 3]

Ang pinasukad-sa-Bibliya nga pagtuo magbag-o sa kinabuhi aron mahimong mas maayo

[Picture Credit Line sa panid 2]

Title card of Biblia nieświeska by Szymon Budny, 1572