Pangitaa Ninyo si Jehova sa Dili pa Moabot ang Adlaw sa Iyang Kasuko
“Pangitaa ninyo si Jehova . . . Pangitaa ang pagkamatarong, pangitaa ang pagkamaaghop. Tingali kamo pagatagoan sa adlaw sa kasuko ni Jehova.”—SOFONIAS 2:3.
1. Unsay espirituwal nga kahimtang sa Juda sa dihang gisugdan ni Sofonias ang iyang buluhaton sa pagpanagna?
SI Sofonias nagsugod sa iyang buluhaton sa pagpanagna sa malisod kaayong panahon sa kasaysayan sa Juda. Dili maayo ang espirituwal nga kahimtang sa nasod. Imbes mosalig sila kang Jehova, ang mga tawo midangop sa paganong mga saserdote ug mga astrologo alang sa pagtultol. Ang pagsimba kang Baal, duyog sa mga rituwal niini sa pertilidad, kaylap sa yuta. Ang mga pangulo sa katilingban—ang mga prinsipe, mga halangdon, ug ang mga maghuhukom—nanglupig sa mismong mga tawo nga angay unta nilang panalipdan. (Sofonias 1:9; 3:3) Dili ikahibulong nga mihukom si Jehova sa ‘pagtuy-od sa iyang kamot’ batok sa Juda ug Jerusalem aron laglagon sila!—Sofonias 1:4.
2. Unsay paglaom sa matinumanong mga alagad sa Diyos diha sa Juda?
2 Apan, bisan pag daotan ang kahimtang, dihay bidlisiw sa paglaom. Ang anak ni Amon nga si Josias mao na karoy naglingkod sa trono. Bisan tuod ug gamay lamang siya nga bata, tim-os nga gihigugma ni Josias si Jehova. Kon ipasig-uli sa bag-ong hari ang putli nga pagsimba sa Juda, kana makapadasig gayod alang sa pipila nga matinumanong nag-alagad sa Diyos! Ang uban tingali napukaw sa pagduyog kanila ug nakalabang buhi usab sa adlaw sa kasuko ni Jehova.
Mga Kinahanglanon Aron Maluwas
3, 4. Unsang tulo ka kinahanglanon ang angayng kab-oton aron ang tawo pagaluwason sa “adlaw sa kasuko ni Jehova”?
3 Aduna ba gayoy mga tawo nga pagaluwason sa adlaw sa kasuko ni Jehova? Oo, basta kab-oton nila ang tulo ka kondisyon nga gilatid diha sa Sofonias 2:2, 3. Samtang atong basahon kining mga bersikuloha, atong hatagan ug linain nga pagtagad kining mga kinahanglanona. Si Sofonias nagsulat: “Sa dili pa ang lagda magpatunghag bisan unsa, sa dili pa molabay ang adlaw sama sa tahop, sa dili pa modangat kaninyo ang nagasilaob nga kasuko ni Jehova, sa dili pa modangat kaninyo ang adlaw sa kasuko ni Jehova, pangitaa ninyo si Jehova, kamong tanang maaghop sa yuta, nga nagbuhat sa Iyang hudisyal nga hukom. Pangitaa ang pagkamatarong, pangitaa ang pagkamaaghop. Tingali kamo pagatagoan sa adlaw sa kasuko ni Jehova.”
4 Nan, aron maluwas, ang tawo angayng (1) mangita kang Jehova, (2) mangita sa pagkamatarong, ug (3) mangita sa pagkamaaghop. Kining mga kinahanglanona angayng makapaikag kanato karong panahona. Ngano? Tungod kay maingon nga ang Juda ug Jerusalem nag-atubang ug adlaw sa panudya sa ikapitong siglo W.K.P., ang mga nasod sa Kakristiyanohan—sa pagkatinuod, ang tanang daotan—nagpaingon sa kataposang husay uban kang Jehova nga Diyos diha sa umaabot nga “dakong kasakitan.” (Mateo 24:21) Ang bisan kinsa nga buot nga pagatagoan nianang panahona kinahanglang molihok na karon. Sa unsang paagi? Pinaagi sa pagpangita kang Jehova, pagpangita sa pagkamatarong, ug sa pagpangita sa pagkamaaghop sa dili pa ulahi ang tanan!
5. Unsay nalangkit sa ‘pagpangita kang Jehova’ karong panahona?
5 Tingali moingon ka: ‘Ako dedikado, bawtismadong alagad sa Diyos, usa sa mga Saksi ni Jehova. Dili ba naabot ko na man kanang kinahanglanona?’ Sa pagkatinuod, labaw pa ang nalangkit kay sa pagdedikar sa atong kaugalingon ngadto kang Jehova. Ang Israel maoy usa ka dedikado nga nasod, apan sa panahon ni Sofonias ang mga tawo sa Juda wala magkinabuhi sumala niana nga dedikasyon. Tungod niini, ang nasod sa ulahi gisalikway. Ang ‘pagpangita kang Jehova’ karong panahona naglangkit sa pag-ugmad ug pagbaton ug mainit personal nga relasyon uban kaniya nga makig-uban sa iyang yutan-ong organisasyon. Kini nagpasabot sa pagkuha ug kahibalo kon unsay panghunahuna sa Diyos sa mga butang ug pagtagad sa iyang mga pagbati. Kita nangita kang Jehova kon kita magtuon pag-ayo sa iyang Pulong, mamalandong niini, ug ipadapat ang tambag niini diha sa kinabuhi. Samtang mangita usab kita sa pagtultol ni Jehova diha sa kinasingkasing nga pag-ampo ug mosunod sa pagtultol sa iyang balaang espiritu, ang atong relasyon kaniya mas molalom pa ug kita matukmod sa pag-alagad kaniya ‘uban sa bug-os natong kasingkasing, kalag, ug sa bug-os nga kusog.’—Deuteronomio 6:5; Galacia 5:22-25; Filipos 4:6, 7; Pinadayag 4:11.
6. Sa unsang paagi atong ‘pangitaon ang pagkamatarong,’ ug nganong posible kini bisan niining kalibotana?
6 Ang ikaduhang kinahanglanon nga gihisgotan sa Sofonias 2:3 mao ang ‘pagpangita sa pagkamatarong.’ Ang kadaghanan kanato naghimog dagkong mga kausaban aron makab-ot nato ang kinahanglanon alang sa Kristohanong bawtismo, apan kinahanglang magpadayon kita pagtuman sa matarong nga mga sukdanan sa Diyos sa tibuok natong kinabuhi. Ang uban nga maayog pagsugod niining bahina nagtugot sa ilang kaugalingon nga mabulingan sa kalibotan. Dili sayon ang pagpangita sa pagkamatarong, kay kita gilibotan sa mga tawo nga naglantaw sa seksuwal nga imoralidad, pagpamakak, ug ubang mga sala ingong normal. Bisan pa, ang dako nga tinguha sa pagpahimuot kang Jehova makadaog sa bisan unsang kiling sa pagpangita sa pag-uyon sa kalibotan pinaagi sa pagpahiangay niana. Ang Juda nawad-an sa pabor sa Diyos tungod kay gisundog niya ang iyang daotan nga silingang mga nasod. Nan, imbes sundogon ang kalibotan, himoon nato ang atong kaugalingon nga “mga tigsundog sa Diyos,” nga ugmaron ang “bag-ong pagkatawo nga gilalang sumala sa kabubut-on sa Diyos diha sa matuod nga pagkamatarong ug pagkamaunongon.”—Efeso 4:24; 5:1.
7. Sa unsang paagi atong ‘pangitaon ang pagkamaaghop’?
7 Ang ikatulong punto nga gipakita sa Sofonias 2:3 mao nga kon buot kita nga matagoan sa adlaw sa kasuko ni Jehova, kinahanglang atong ‘pangitaon ang pagkamaaghop.’ Sa matag adlaw, makauban nato ang mga lalaki, mga babaye, ug mga batan-on nga dili maaghop. Alang kanila, ang pagkahimong maaghop maoy usa ka depekto. Ang pagkamapinasakopon giisip nga usa ka dako nga kahuyangan. Sila mapugsanon, hakog, ug hiktin ug hunahuna, nga nagtuo nga ang ilang personal nga “mga katungod” ug mga kagustohan kinahanglang ihatag bisag unsa pay mahitabo. Pagkamakapasubo kon ang uban niini nga mga tinamdan motakod kanato! Kini ang panahon sa ‘pagpangita sa pagkamaaghop.’ Sa unsang paagi? Pinaagi sa pagpasakop ngadto sa Diyos, nga mapainubsanong dawaton ang iyang disiplina ug tumanon ang iyang kabubut-on.
Nganong “Tingali” Pagatagoan?
8. Unsay gipaila sa paggamit sa pulong nga “tingali” diha sa Sofonias 2:3?
8 Matikdi nga ang Sofonias 2:3 nag-ingon: “Tingali kamo pagatagoan sa adlaw sa kasuko ni Jehova.” Nganong ang pulong “tingali” gigamit sa dihang naghisgot sa “mga maaghop sa yuta”? Buweno, kadtong maong mga maaghop mihimog positibong mga lakang, apan dili sila angayng mosalig sa kaugalingon. Sila wala pa makadangat sa kataposan sa ilang dalan sa kinabuhi diha sa pagkamatinumanon. Posible nga ang uban kanila mahimong mahulog sa sala. Tinuod usab kini kon bahin kanato. Si Jesus miingon: “Siya nga nakalahutay hangtod sa kataposan mao ang maluwas.” (Mateo 24:13) Oo, ang pagkaluwas sa adlaw sa kasuko ni Jehova nagadepende sa atong pagpadayon sa pagbuhat sa matarong diha sa iyang mga mata. Mao ba kanay imong hugot nga tinguha?
9. Unsang hustong mga lakang ang gihimo sa batan-ong Haring Josias?
9 Tingali agig pagsanong sa mga pulong ni Sofonias, si Haring Josias napalihok sa ‘pagpangita kang Jehova.’ Ang Kasulatan nag-ingon: “Sa ikawalong tuig sa iyang paghari, samtang [si Josias] bata pa [mga 16 anyos], siya misugod sa pagpangita sa Diyos ni David nga iyang katigulangan.” (2 Cronicas 34:3) Si Josias usab nagpadayon sa ‘pagpangita sa pagkamatarong,’ kay atong mabasa: “Sa ikanapulog-duha ka tuig [sa dihang si Josias mga 20 anyos] iyang gisugdan paghinlo ang Juda ug ang Jerusalem gikan sa hatag-as nga mga dapit ug sagradong mga poste ug linilok nga mga larawan ug inumol nga mga estatwa. Dugang pa, ilang gigun-ob sa atubangan kaniya ang mga halaran sa mga Baal.” (2 Cronicas 34:3, 4) Si Josias usab ‘nangita sa pagkamaaghop,’ nga mapainubsanong milihok aron si Jehova mapahimut-an pinaagi sa paghinlo sa yuta gikan sa idolatriya ug ubang bakak nga relihiyosong mga buhat. Pagkamalipayon sa mga maaghop niadtong mga hitaboa!
10. Unsay nahitabo sa Juda sa 607 W.K.P., apan kinsa ang naluwas?
10 Daghang Hudiyo namalik kang Jehova panahon sa paghari ni Josias. Apan, human nga namatay ang hari, ang kadaghanan mibalik sa ilang daang mga dalan—sa mga buhat nga dili gayod dalawaton sa Diyos. Ingon sa gihukom ni Jehova, gipukan sa mga Babilonyanhon ang Juda ug gilaglag ang iyang kaulohang siyudad, ang Jerusalem, sa 607 W.K.P. Apan, may paglaom pa ang kahimtang. Ang manalagnang Jeremias, ang Etiopianhong Ebed-melech, ang mga kaliwat ni Jonadab, ug ang ubang mga matinumanon sa Diyos gitagoan nianang maong adlaw sa kasuko ni Jehova.—Jeremias 35:18, 19; 39:11, 12, 15-18.
Mga Kaaway sa Diyos—Pagbantay!
11. Nganong usa ka hagit ang pagpabiling matinumanon sa Diyos karong panahona, apan unsay maayong palandongon sa mga kaaway sa katawhan ni Jehova?
11 Samtang naghulat kita sa adlaw sa kasuko ni Jehova nga modangat diha niining daotang sistema, kita ‘makasagubang ug nagkadaiyang mga pagsulay.’ (Santiago 1:2) Diha sa ubay-ubayng nasod nga nag-angkong nagpabili sa kagawasan sa pagsimba, gigamit sa maayong-momaniobrang mga klerigo ang ilang impluwensiya sa sekular nga mga awtoridad aron mapahamtangan ug mapintas nga paglutos ang katawhan sa Diyos. Butang-butangan sa mga tawong walay konsensiya ang mga Saksi ni Jehova, nga nagtawag kanila ingong “usa ka peligrosong kulto.” Ang Diyos nahibalo sa ilang mga buhat—ug kini sila pagasilotan gayod. Angayng palandongon sa iyang mga kaaway ang nahitabo sa karaang mga kaaway sa iyang katawhan sama sa mga Pilistihanon. Ang tagna nag-ingon: “Kon mahitungod sa Gaza, siya mahimong biniyaan nga siyudad; ug ang Askelon mahimong awaaw. Kon mahitungod sa Asdod, sa udtong tutok ilang pagaabogon siya; ug kon mahitungod sa Ekron, siya pagalukahon.” Ang Pilistihanong mga siyudad sa Gaza, Askelon, Asdod, ug Ekron gilaglag.—Sofonias 2:4-7.
12. Unsay nahitabo sa Pilistia, Moab, ug Ammon?
12 Ang tagna nagpadayon: “Nadungog ko ang pakaulaw sa Moab ug ang mapasipalahong mga pulong sa mga anak ni Ammon, nga pinaagi niini sila nagpakaulaw sa akong katawhan ug nagpasibantog batok sa ilang teritoryo.” (Sofonias 2:8) Sa pagkatinuod, ang Ehipto ug Etiopia nag-antos sa mga kamot sa manunulong nga mga Babilonyanhon. Apan unsay paghukom sa Diyos batok sa Moab ug Ammon, mga nasod nga kagikan sa pag-umangkon ni Abraham nga si Lot? Si Jehova nagtagna: “Ang Moab mahimong sama sa Sodoma, ug ang mga anak ni Ammon sama sa Gomora.” Dili sama sa ilang mga katigulangan nga babaye—ang duha ka anak nga babaye ni Lot, kinsa naluwas sa kalaglagan sa Sodoma ug Gomora—ang mapahitas-ong Moab ug Ammon dili pagatagoan gikan sa mga paghukom sa Diyos. (Sofonias 2:9-12; Genesis 19:16, 23-26, 36-38) Karong panahona, hain na ang Pilistia ug hain ang mga siyudad niini? Komosta ang kanhi mapahitas-ong Moab ug Ammon? Bisan pag mangita ka niini, dili nimo kini makit-an.
13. Unsay nadiskobrehan sa arkeolohiya diha sa Nineve?
13 Sa panahon ni Sofonias, anaa pa sa kinatayuktokan sa gahom ang Imperyo sa Asirya. Nagbatbat sa usa ka seksiyon sa palasyo sa hari nga iyang nakalotan diha sa Nineve nga kaulohan sa Asirya, ang arkeologong si Austen Layard nagsulat: “Ang mga kisame . . . gikuwadro-kuwadro, nga gidibuhoan ug mga bulak, o mga dagway sa mga hayop. Ang uban gihal-opan ug garing, ang matag kuwadro-kuwadro gilibotan ug maanindot nga mga ribeti ug mga liston. Ang mga sagbayan, maingon man ang mga kilid sa mga lawak, lagmit gihal-opan, o gidorar pa gani sa bulawan ug plata; ug kinamahalan nga mga kahoy ang gigamit diha sa mga bahin sa sulod sa palasyo nga gama sa kahoy, diin ang kahoy nga sedro mao dayon ang makita.” Apan, sumala sa gitagna sa Sofonias, ang Asirya mapukan ug ang kaulohang siyudad niini, ang Nineve, mahimong “awaaw.”—Sofonias 2:13.
14. Sa unsang paagi ang tagna ni Sofonias natuman diha sa Nineve?
14 Human sa 15 ka tuig lamang sukad nga gisulti ni Sofonias kanang tagnaa, ang gamhanang Nineve napukan, ang harianong palasyo niini nalumpag. Oo, kanang mapasigarbohong siyudad bug-os nga naguba. Ang gidak-on sa kalaglagan dayag kaayong gitagna niining mga pulonga: “Ang pelikano ug ang porcupino magpalabay sa kagabhion diha sa iyang mga ulo-ulo sa [nahugnong] haligi. Usa ka tingog magpadayon sa pag-awit diha sa bentana. Aduna unyay paggun-ob diha sa pultahan.” (Sofonias 2:14, 15) Ang dagkong mga tinukod sa Nineve angay na lamang pagapuy-an sa mga porcupino ug mga pelikano. Wala nay madungog diha sa kadalanan sa siyudad nga mga tingog sa mga negosyante, mga singgit sa mga manggugubat, mga pagyamyam sa mga saserdote. Niadtong kanhi naghuot nga mga dalan, ang madungog na lamang mao ang tingog nga mamingawong nag-awit diha sa bentana, tingali masulub-ong awit sa usa ka langgam o pagdaguhong sa hangin. Sa samang paagi, mahimong ingon niini ang dangatan sa tanang kaaway sa Diyos!
15. Unsay makat-onan gikan sa nahitabo sa Pilistia, Moab, Ammon, ug Asirya?
15 Unsay atong makat-onan gikan sa nahitabo sa Pilistia, Moab, Ammon, ug Asirya? Kini: Ingong mga alagad ni Jehova, kita walay angayng kahadlokan gikan sa atong mga kaaway. Nakita sa Diyos ang gihimo niadtong nagbatok sa iyang katawhan. Si Jehova milihok batok sa iyang mga kaaway sa miagi, ug ang iyang mga paghukom iyang ipahamtang sa tibuok ginapuy-ang yuta karong panahona. Bisan pa niana, adunay maluwas—‘usa ka dakong panon gikan sa tanang kanasoran.’ (Pinadayag 7:9) Mahimong malakip ka uban kanila—basta magpadayon ka lang nga mangita kang Jehova, mangita sa pagkamatarong, ug mangita sa pagkamaaghop.
Alaot ang Mapangahasong mga Malapason!
16. Unsay giingon sa tagna ni Sofonias mahitungod sa mga prinsipe ug relihiyosong mga pangulo sa Juda, ug nganong kining mga pulonga mohaom sa Kakristiyanohan?
16 Ang tagna ni Sofonias nagpunting na usab sa Juda ug Jerusalem. Nag-ingon ang Sofonias 3:1, 2: “Alaot siya nga nagasukol ug nagahugaw sa iyang kaugalingon, ang malupigong siyudad! Siya wala mamati sa tingog; siya wala magadawat sa disiplina. Siya wala mosalig kang Jehova. Siya wala moduol sa iyang Diyos.” Pagkamakapasubo nga ang mga paningkamot ni Jehova sa pagdisiplina sa iyang katawhan wala panumbalinga! Pagkatalamayon sa kabangis sa mga prinsipe, mga halangdon, ug sa mga maghuhukom. Gisaway ni Sofonias ang pagkawalay-ulaw sa relihiyosong mga pangulo, nga nag-ingon: “Ang iyang mga manalagna mga mapangahason, mga tawong maluibon. Ang iyang mga saserdote nagpasipala sa kon unsay balaan; ilang gipanamastamasan ang balaod.” (Sofonias 3:3, 4) Pagkahaom gayod niadtong mga pulonga sa kahimtang sa mga manalagna ug mga pari sa Kakristiyanohan karong panahona! Sa pagkamapangahason, ilang gitangtang ang ngalan sa Diyos gikan sa ilang mga hubad sa Bibliya ug nagtudlog mga doktrina nga sayop nga naghawas sa Usa nga ilang giangkong gisimba.
17. Mamati man o dili ang mga tawo, nganong magpadayon kita sa pagmantala sa maayong balita?
17 Mahunahunaong gipasidan-an ni Jehova ang iyang karaang katawhan may kalabotan sa buhat nga iyang gihimo. Iyang gipadala ang iyang mga manalagna—si Sofonias ug Jeremias, lakip sa uban—sa pag-aghat sa mga tawo sa paghinulsol. Oo, “si Jehova . . . dili magbuhat ug pagkadili-matarong. Sa matag buntag siya naghatag sa iyang hudisyal nga hukom. Sa maadlaw kini wala mahanaw.” Unsa ang sanong? “Apan ang dili-matarong wala makailag kaulaw,” miingon si Sofonias. (Sofonias 3:5) Ang samang pasidaan gipalanog karong panahona. Kon usa ikaw ka magmamantala sa maayong balita, ikaw nakigbahin niining buluhaton nga nagahatag ug pasidaan. Padayon sa pagmantala sa maayong balita nga walay hunong-hunong! Mamati man o dili ang mga tawo, ang imong ministeryo malamposon sumala sa baroganan sa Diyos basta ginahimo nimo kini nga matinumanon; dili ka angayng mobati ug kaulaw samtang masiboton nimong ginahimo ang buluhaton sa Diyos.
18. Sa unsang paagi matuman ang Sofonias 3:6?
18 Ang pagpahamtang sa paghukom sa Diyos dili lamang pinaagi sa paglaglag sa Kakristiyanohan. Gipaabot ni Jehova ang iyang paghukom ngadto sa tanang kanasoran: “Gilaglag ko ang kanasoran; ang ilang mga torre sa eskina gihimong biniyaan. Gigun-ob ko ang ilang kadalanan, mao nga wala nay nangagi. Ang ilang mga siyudad gihimong biniyaan.” (Sofonias 3:6) Kasaligan gayod kining mga pulonga tungod kay gihisgotan ni Jehova ang kalaglagan nga morag kini nahitabo na. Unsay nahitabo sa mga siyudad sa Pilistia, Moab, ug Ammon? Ug unsay nahitabo sa kaulohan sa Asirya, ang Nineve? Ang pagkalaglag niini nagsilbing usa ka pasidaang panig-ingnan ngadto sa mga nasod karong panahona. Ang Diyos dili mabiaybiay.
Padayon sa Pagpangita Kang Jehova
19. Unsang makatukbil sa hunahunang mga pangutana ang angayng ipangutana nato?
19 Sa panahon ni Sofonias, ang kasuko sa Diyos gibuhian diha niadtong sa dinaotan “naghimo sa tanan nilang binuhatan nga makadaot.” (Sofonias 3:7) Ingon usab niini ang mahitabo sa atong panahon. Nakita ba nimo ang timaan nga haduol na ang adlaw sa kasuko ni Jehova? Ikaw ba nagpadayon sa ‘pagpangita kang Jehova’ pinaagi sa pagbasa sa iyang Pulong sa regular—sa adlaw-adlaw? Ikaw ba ‘nangita sa pagkamatarong’ pinaagi sa pagkinabuhi sa mahinlong kinabuhi nga nahiuyon sa mga sukdanan sa Diyos? Ug ikaw ba ‘nangita sa pagkamaaghop’ pinaagi sa pagpasundayag ug maaghop, mapasinakopon nga tinamdan ngadto sa Diyos ug sa iyang mga kahikayan alang sa kaluwasan?
20. Unsang mga pangutana ang atong hisgotan diha sa kataposang artikulo niining seryal sa tagna ni Sofonias?
20 Kon kita matinumanong magpadayon sa pagpangita kang Jehova, sa pagkamatarong, ug sa pagkamaaghop, kita makadahom nga makatagamtam ug tugob nga mga panalangin karon mismo—oo, bisan niining masulayon-sa-pagtuo nga “kataposang mga adlaw.” (2 Timoteo 3:1-5; Proverbio 10:22) Apan maayong mangutana kita, ‘Sa unsang mga paagi kita ginapanalanginan ingong presenteng-adlawng mga alagad ni Jehova, ug unsang umaabot nga mga panalangin ang gihatag sa tagna ni Sofonias alang niadtong kinsa pagatagoan sa kusog nga nagkaduol nga adlaw sa kasuko ni Jehova?’
Unsaon Nimo Pagtubag?
• Sa unsang paagi ang mga tawo ‘nangita kang Jehova’?
• Unsay nalangkit sa ‘pagpangita sa pagkamatarong’?
• Sa unsang paagi atong ‘pangitaon ang pagkamaaghop’?
• Nganong angay nga magpadayon kita sa pagpangita kang Jehova, sa pagkamatarong, ug sa pagkamaaghop?
[Hulagway sa panid 18]
Ikaw ba nangita kang Jehova pinaagi sa pagtuon sa Bibliya ug sa kinasingkasing nga pag-ampo?
[Hulagway sa panid 21]
Tungod kay nagpadayon sila sa pagpangita kang Jehova, usa ka dakong panon maluwas sa adlaw sa iyang kasuko