Makataronganon ba nga Motuo sa Usa ka Paraisong Yuta?

DIYUTAY rang mga tawo ang motuo nga may panahon rang ang yuta maparaiso. Ang daghang tawo naghunahuna nga kini dili magpadayon sa paglungtad. Sumala sa librong The Sacred Earth, nga gisulat ni Brian Leigh Molyneaux, kining yutaa naglungtad pinaagi sa ‘usa ka dakong kosmikong pagbuto’ milyonmilyong katuigan kanhi. Ug kon ang tawo mismo dili maoy maglaglag sa yuta, daghang tawo ang nagtuo nga kini ug ang tibuok uniberso tingali sa kadugayan “kalit mokuyos balik ngadto sa nagkalayo nga bola.”

Ang Ingles nga magbabalak sa ika-17ng siglo nga si John Milton walay ingong dili-malaomon nga mga hunahuna. Diha sa iyang may-sugilanong balak nga Paradise Lost, siya nagsulat nga ang Diyos naglalang sa yuta aron mahimong paraisong puy-anan alang sa tawhanong pamilya. Kadtong orihinal nga Paraiso nawala. Bisan pa niana, si Milton nagtuo nga kana ipasig-uli—nga may adlaw nga ang usa ka manunubos nga mao si Jesu-Kristo “magaganti sa iyang matinumanong mga alagad, ug magdawat kanila ngadto sa kahimayaan . . . sa Langit kaha o sa Yuta.” Si Milton masaligong mipahayag: “Nianang panahona ang tibuok nga Yuta mahimong Paraiso.”

Paraiso—Sa Langit o sa Yuta?

Daghang relihiyosong mga tawo nagtuo sama kang Milton nga sila sa kataposan makadawat ug usa ka matang sa ganti tungod sa mga kangil-aran ug kasakitan nga ilang giantos dinhi sa yuta. Apan asa nila matagamtam ang maong ganti? “Sa Langit kaha o sa Yuta”? Alang sa pipila, ang yuta wala mosantop sa ilang hunahuna. Nag-ingon sila nga ang mga tawo makatagamtam ug “kahimayaan” sa ilang pagbiya sa yuta ug sa pagpuyo na sa espiritung dominyo sa langit.

Sa librong Heaven—A History, ang mga awtor nga si C. McDannell ug B. Lang nag-ingon nga ang teologo sa ikaduhang siglo nga si Irenaeus nagtuo nga ang kinabuhi diha sa napasig-uling paraiso “dili mahitabo sa layong dominyo sa langit, kondili diha sa yuta.” Sumala nianang libroha, bisan pag ang relihiyosong mga pangulo sama kang John Calvin ug Martin Luther naglaom nga moadto sa langit, sila nagtuo usab nga “bag-ohon sa Diyos ang yuta.” Ang mga membro sa ubang mga relihiyon may susamang mga pagtuo. Si McDannell ug Lang nag-ingon usab nga ang pipila ka Hudiyo nagtuo nga sa gitakdang panahon sa Diyos, ang tanang kalisdanan sa tawo “mapapas gayod ug ang tugob nga kinabuhi matagamtam sa yuta.” Sumala sa tinuohan sa karaang Persia, “ipasig-uli ang unang kahimtang sa yuta ug ang katawhan magkinabuhi na usab sa kalinaw,” nag-ingon ang The Encyclopaedia of Middle Eastern Mythology and Religion.

Unsay nahitabo sa paglaom bahin sa paraisong yuta? Ang atong pagkinabuhi sa yuta gituyo ba nga temporaryo lang? Sumala sa pagtuo sa Hudiyong pilosopo sa unang siglo nga si Philo, kini mao ba lamay “kadiyot, sagad masakit nga kasinatian” sa pagpanaw ngadto sa dominyo sa mga espiritu? O may laing butang nga diha sa hunahuna sa Diyos sa iyang gilalang ang yuta ug gibutang ang mga tawo niana diha sa paraisong mga kahimtang? Ang tawo makakaplag bag tinuod nga espirituwal nga katagbawan ug kahimayaan dinhi mismo sa yuta? Nganong dili susihon kon unsay giingon sa Bibliya bahin niining ulohana? Mahimong makahinapos ka, sama sa gihinapos na sa milyonmilyon, nga ang paglaom bahin sa napasig-uling paraiso sa yuta makataronganon gayod.

[Hulagway sa panid 3]

Ang magbabalak nga si John Milton nagtuo nga mabatonan pag-usab ang Paraiso

[Picture Credit Line sa panid 2]

COVER: Earth: U.S. Fish & Wildlife Service, Washington, D.C./NASA

[Picture Credit Lines sa panid 3]

Earth: U.S. Fish & Wildlife Service, Washington, D.C./NASA; John Milton: Leslie’s