Usa ka Kalibotan nga Walay mga Kabos Haduol Na

ANG mga hulagway sa Paraiso, sama nianang naa sa hapin niini nga magasin, makapadani sa mga tawo nga nagkinabuhi sa kakabos. Ang usa ka paraiso maoy tinuod alang sa unang tawhanong magtiayon, si Adan ug Eva. Ang ilang pinuy-anan mao ang tanaman sa Eden. (Genesis 2:7-23) Bisan pag nawala ang maong Paraiso, ang pagtuo nga adunay umaabot nga paraiso—sa usa ka bag-ong kalibotan nga walay mga kabos—dili lang handurawan. Kini lig-ong gipasukad sa mga saad nga natala sa Bibliya.

Tagda ang gisaad ni Jesu-Kristo sa iyang kataposang adlaw sa pagkinabuhi sa yuta. Usa sa mga mamumuhat ug daotan nga namatay tapad ni Jesus nagpadayag ug pagtuo sa katakos sa Diyos sa pagsulbad sa mga suliran sa tawo. Matod niya: “Jesus, hinumdomi ako sa dihang moabot ka na sa imong gingharian.” Kining mga pulonga nagpakita nga ang mamumuhat ug daotan nagtuo nga si Jesus magmando ingong Hari ug ang mga patay mabuhi pag-usab. Si Jesus mitubag: “Sa pagkatinuod ako magaingon kanimo karong adlawa, Ikaw makauban kanako sa Paraiso.”—Lucas 23:42, 43.

Sa paghisgot bahin sa mga magpuyo sa Paraiso, ang Bibliya nag-ingon: “Sila gayod magtukod ug mga balay ug magpuyo niini; ug sila gayod magtanom ug kaparasan ug magkaon sa ilang mga bunga.” (Isaias 65:21) Oo, “sila manglingkod, ang tagsatagsa ilalom sa iyang paras ug ilalom sa iyang kahoyng igos, ug walay usa nga magpakurog kanila; kay ang baba ni Jehova sa mga panon nagsulti niini.”—Miqueas 4:4.

Nan, nganong ang kakabos gitugotang maglungtad karon? Unsang tabang ang gihatag sa Diyos sa mga kabos? Kanus-a ba gayod mahanaw ang kakabos?

Nganong Gitugotan ang Kakabos?

Ang Paraiso nga gipuy-an ni Adan ug Eva nawala tungod sa pagrebelde nga gisugdan sa usa ka daotang manulonda, si Satanas nga Yawa. Si Satanas, nga migamit sa usa ka halas ingong iyang tigpamaba, nagbuyo kang Eva aron lapason niya ang balaod sa Diyos batok sa pagkaon sa bunga sa usa ka kahoy. Iyang gilimbongan si Eva mao nga siya nagtuo nga ang pagkaindependente gikan sa Diyos makahatag kaniya ug mas maayong kinabuhi. Sa gitanyagan ni Eva si Adan sa gidili nga bunga, siya usab mikaon, nga gitalikdan ang Diyos aron modapig sa iyang asawa.—Genesis 3:1-6; 1 Timoteo 2:14.

Ang rebelyosong magtiayon gipapahawa sa Paraiso ug angay gayod kadto. Sukad niadto sila kinahanglang magbudlay aron mabuhi. Hangtod niining adlawa, gitugotan ni Jehova si Satanas sa pagmando ibabaw sa makasasalang katawhan, nga niana napadayag ang mga sangpotanan sa pagkadili-masinugtanon ngadto sa Diyos. Ang kasaysayan sa tawo nagpamatuod nga ang tawhanong mga kagamhanan dili makapatunghag Paraiso sa yuta. (Jeremias 10:23) Sa kapulihay, ang pagkaindependente gikan sa Diyos misangpot sa grabeng mga suliran, lakip ang kakabos.—Ecclesiastes 8:9.

Hinuon, ang mga kabos dili kay gipasagdang dili katabangan niining napunog-suliran nga kalibotan. Ang inspiradong Pulong sa Diyos, ang Bibliya, adunay maayong giya alang kanila.

“Ayaw Gayod Pagkabalaka”

Sa dihang namulong ngadto sa daghang mamiminaw nga naglakip ug daghang kabos, si Jesus miingon: “Panid-i pag-ayo ang mga langgam sa langit, tungod kay sila wala magapugas ug binhi o magaani o magatigom sa mga balay-tipiganan; sa gihapon ginapakaon sila sa ilang langitnong Amahan. Dili ba kamo labaw pa ug bili kay kanila? . . . Busa ayaw gayod pagkabalaka ug moingon, ‘Unsa may among kan-on?’ o, ‘Unsa may among imnon?’ o, ‘Unsa may among isul-ob?’ Kay kining tanan mao ang mga butang nga maikagong ginapangagpas sa mga nasod. Kay ang inyong langitnong Amahan nahibalo nga gikinahanglan ninyo kining tanang butanga. Nan, magpadayon sa pagpangita pag-una sa gingharian ug sa iyang pagkamatarong, ug kining tanang ubang mga butang igadugang ra kaninyo.”—Mateo 6:26-33.

Ang kabos nga tawo dili kinahanglang mangawat. (Proverbio 6:30, 31) Siya matagan-an kon unahon niya ang Diyos sa iyang kinabuhi. Tagda ang kahimtang ni Tukiso, usa ka lalaking taga-Lesotho, habagatang Aprika. Niadtong 1998, ang langyawng mga sundalo misulod sa Lesotho aron pukgoon ang rebelyon batok sa gobyerno. Ingong sangpotanan niadtong gubata, gipangawatan ang mga tindahan, nawad-an ug trabaho ang mga tawo, ug may grabeng kanihit sa pagkaon.

Si Tukiso nagpuyo sa labing kabos nga bahin sa kaulohan. Daghan sa iyang mga silingan nanglungkab sa mga tindahan aron mabuhi. Sa dihang si Tukiso mibalik sa iyang usa-ka-kuwartong puy-anan, iyang nakita nga si Maseiso, ang babaye nga iyang gipuyopuyo, may daghang kinawat nga pagkaon. “Ipagawas kining mga butanga,” matod ni Tukiso, nga mipatin-aw nga ang pagpangawat supak sa balaod sa Diyos. Misunod si Maseiso. Giyagayagaan sila sa mga silingan ug ilang gipanguha ang kinawat nga pagkaon.

Gibuhat kadto ni Tukiso tungod sa iyang nakat-onan sa iyang pagtuon sa Bibliya uban sa mga Saksi ni Jehova. Ang pagsunod ba niya sa balaod sa Diyos misangpot sa pagkagutom? Wala. Sa ulahi, ang mga ansiyano sa kongregasyon sa mga Saksi ni Jehova nga iyang gitambongan nakigkontak kang Tukiso ug gidad-an siyag pagkaon. Sa pagkatinuod, ang mga Saksi ni Jehova sa kasikbit nga Habagatang Aprika nagpadala ug kapin sa duha ka tonelada nga hinabang alang sa ilang Kristohanong kaigsoonan sa Lesotho. Si Maseiso nakadayeg sa pagkamasinugtanon ni Tukiso sa Diyos ug sa mahigugmaong tabang sa kongregasyon. Siya usab misugod sa pagtuon sa Bibliya. Ngadtongadto, silang duha legal nga nagpakasal ug busa nahimong kuwalipikado nga bawtismohan ingon nga mga Saksi ni Jehova. Sila matinumanon gihapong nagaalagad sa Diyos.

Si Jehova nga Diyos may kahangawa sa mga kabos. (Tan-awa ang kahon nga nag-ulohang “Unsay Pag-isip sa Diyos sa mga Kabos?”) Siya naghimo ug mahigugmaong mga kahikayan sa pagtabang sa uban nga sama kang Tukiso ug Maseiso sa pagkat-on ug dugang bahin kaniya. Ug diha sa iyang Pulong, siya naghatag ug praktikal nga tambag alang sa adlaw-adlaw nga pagkinabuhi.

Usa ka Mapuslanong Tagana

Ang mga Saksi ni Jehova kanunayng naningkamot sa pagpabanaag sa kabalaka sa Diyos alang sa mga kabos. (Galacia 2:10) Kasagaran, sa dihang mohugpa ang katalagman sa usa ka nasod ug maapektohan ang matuod nga mga Kristohanon, ginahimo ang mga kahikayan aron makahatag sa gikinahanglang tabang. Mas hinungdanon, ang mga Saksi nagpakitag kabalaka sa espirituwal nga mga panginahanglan sa tanan, apil sa mga kabos. (Mateo 9:36-38) Sulod sa miaging 60 ka tuig, ang libolibo ka nabansayng mga ministro miboluntaryo sa pag-alagad ingong mga misyonaryo sa langyawng mga nasod. Pananglitan, pinaagi sa pagkakat-on sa Sesotho nga pinulongan, usa ka misyonaryong magtiayon nga taga-Pinlandia nakahimo sa pagtudlo kang Tukiso ug Maseiso aron mahimong mga tinun-an ni Jesus. (Mateo 28:19, 20) Ang maong misyonaryong buluhaton kasagarang naglangkit sa pagbiya sa hamugawayng pagkinabuhi sa usa ka datong nasod ug pagbalhin ngadto sa usa ka kabos nga nasod.

Ang matuod nga mga Kristohanon dili mahimong mangawat aron lang mabuhi. Hinunoa, nagtuo sila sa katakos ni Jehova nga Diyos sa pagtaganag pangabuhian. (Hebreohanon 13:5, 6) Ang usa ka paagi sa pagtagana ni Jehova sa iyang katawhan maoy pinaagi sa tibuok-kalibotan nga organisasyon sa iyang mga magsisimba, nga may kahangawa sa usag usa.

Ang laing paagi sa pagtabang ni Jehova sa mga kabos mao ang paghatag kanilag praktikal nga tambag bahin sa adlaw-adlaw nga pagkinabuhi. Pananglitan, ang Bibliya nagsugo: “Ang kawatan kinahanglan nga dili na mangawat, hinuon maghago siya, nga magbuhat pinaagi sa iyang mga kamot sa maayong buluhaton, aron siya adunay ikahatag sa nanginahanglan.” (Efeso 4:28) Ang daghang walay trabaho nakamugna ug mga trabaho alang sa ilang kaugalingon, pinaagi sa pagbuhat ug hago nga trabaho, sama sa pagtanom ug mga utanon ug pag-atiman niana. Gitabangan usab sa Bibliya ang mga kabos sa pagtigom ug kuwarta pinaagi sa pagtudlo kanila sa paglikay sa daotang mga bisyo, sama sa pag-abuso sa alkoholikong ilimnon.—Efeso 5:18.

Usa ka Kalibotan nga Walay mga Kabos—Kanus-a?

Gipaila sa Bibliya nga kita nagkinabuhi na sa “kataposang mga adlaw” sa pagmando ni Satanas. (2 Timoteo 3:1) Sa dili madugay, si Jehova nga Diyos magpadala kang Jesu-Kristo aron sa paghukom sa katawhan. Unsay mahitabo nianang panahona? Gitubag kana ni Jesus diha sa usa sa iyang mga ilustrasyon. Siya miingon: “Inig-abot sa Anak sa tawo diha sa iyang himaya, ug ang tanang manulonda uban kaniya, nan siya molingkod sa iyang mahimayaong trono. Ug ang tanang kanasoran pagatigomon sa iyang atubangan, ug iyang pagalainon ang katawhan gikan sa usag usa, ingon sa usa ka magbalantay nga magalain sa mga karnero gikan sa mga kanding.”—Mateo 25:31-33.

Ang mga karnero sa maong ilustrasyon mao kadtong magpasakop sa pagkahari ni Jesus. Gipanig-ingon sila ni Jesus sa mga karnero tungod kay sila nagsunod kaniya ingon nga ilang Magbalantay. (Juan 10:16) Ang maong mga tawong karnerohon makabaton ug kinabuhi ubos sa hingpit nga pagmando ni Jesus. Kini maoy malipayon unya nga kinabuhi diha sa usa ka bag-ong kalibotan nga walay mga kabos. Ang mga tawong samag kanding, kinsa nagsalikway sa pagmando ni Jesus, malaglag hangtod sa hangtod.—Mateo 25:46.

Ang Gingharian sa Diyos maoy magtapos sa pagkadaotan. Unya ang kakabos mahanaw na. Sa kapulihay, ang yuta puy-an ug mga tawo nga nahigugma ug may kahangawa sa usag usa. Nga posible ang maong bag-ong kalibotan makita diha sa naghigugmaay ug internasyonal nga pag-igsoonay sa mga Saksi ni Jehova, kay si Jesus miingon: “Pinaagi niini ang tanan makaila nga kamo akong mga tinun-an, kon kamo adunay gugma sa inyong taliwala.”—Juan 13:35.

[Kahon/Mga hulagway sa panid 6, 7]

UNSAY PAG-ISIP SA DIYOS SA MGA KABOS?

Ang Bibliya nagbatbat sa Maglalalang sa tawo ingong “ang Usa nga nagahatag ug tinapay sa mga gigutom.” (Salmo 146:7) Kini adunay kapin sa usa ka gatos ka bersikulo nga nagpasiugda sa kabalaka sa Diyos sa mga kabos.

Pananglitan, sa dihang gihatag ni Jehova ang iyang Balaod ngadto sa karaang nasod sa Israel, iyang gisugo ang Israelinhong mga mag-uuma nga dili hutdon pag-ani ang kadaplinan sa ilang mga uma. Dili nila angayng pupoon ang mga nabiling bunga pinaagi sa pagsusi sa ikaduhang higayon sa kahoyng olibo o paras. Ang maong mga balaod maoy mahigugmaong tagana alang sa mga langyaw, mga ilo, mga babayeng balo, ug sa ubang mga timawa.—Levitico 19:9, 10; Deuteronomio 24:19-21.

Dugang pa, ang Diyos nagsugo sa mga Israelinhon: “Dili ninyo sakiton ang bisan kinsang babayeng balo o batang ilo-sa-amahan. Kon ikaw magsakit kaniya, nan kon siya motuaw kanako, sa walay pakyas akong dunggon ang iyang pagtuaw; ug ang akong kasuko mosilaob gayod, ug pagapatyon ko kamo pinaagi sa espada, ug ang inyong mga asawa mahimong mga balo ug ang inyong mga anak nga lalaki mahimong mga ilo-sa-amahan.” (Exodo 22:22-24) Ikasubo, daghang datong mga Israelinhon wala magtagad nianang mga pulonga. Tungod niini ug sa ubang buhat nga daotan, si Jehova nga Diyos mihatag sa mga Israelinhon ug nagkalainlaing mga pasidaan pinaagi sa iyang mga manalagna. (Isaias 10:1, 2; Jeremias 5:28; Amos 4:1-3) Sa kadugayan, gipahinabo sa Diyos nga ang mga Asiryano ug sa ulahi ang mga Babilonyanhon magsakop sa teritoryo sa Israel. Daghang Israelinhon ang napatay, ug ang mga nakalabang-buhi gidala nga binihag ngadto sa langyawng kanasoran.

Ang minahal nga Anak sa Diyos, si Jesu-Kristo, nagpabanaag sa mahigugmaong kabalaka sa iyang Amahan alang sa mga kabos. Sa pagsaysay sa katuyoan sa iyang ministeryo, si Jesus miingon: “Ang espiritu ni Jehova ania kanako, tungod kay siya nagdihog kanako aron sa pagpahayag sa maayong balita ngadto sa mga kabos.” (Lucas 4:18) Wala kini magpasabot nga si Jesus nagsangyaw lamang sa mga kabos. Mahigugmaon usab niyang gitabangan ang mga dato. Hinuon, sa iyang pagtabang sa mga dato, si Jesus kanunayng nagpahayag sa iyang kabalaka alang sa mga kabos. Pananglitan, iyang gihatag kining tambaga ngadto sa usa ka datong magmamando: “Ibaligya ang tanang butang nga imong nabatonan ug iapod-apod ngadto sa mga tawong kabos, ug makabaton ka ug bahandi sa mga langit; ug umari ka mahimong akong sumusunod.”—Lucas 14:1, 12-14; 18:18, 22; 19:1-10.

Si Jehova nga Diyos ug ang iyang Anak may dakong kahangawa sa mga kabos. (Marcos 12:41-44; Santiago 2:1-6) Sa pagpadayag sa iyang kabalaka alang sa mga kabos, si Jehova nagbutang diha sa iyang panumdoman sa milyonmilyong kabos nga mga tawo nga nangamatay. Silang tanan pagabanhawon ngadto sa bag-ong kalibotan nga walay mga kabos.—Buhat 24:15.

[Mga hulagway]

Ang internasyonal nga panag-igsoonay sa mga Saksi ni Jehova nagpakita nga posible ang bag-ong kalibotan

[Hulagway sa panid 5]

Si Tukiso ug Maseiso uban sa misyonaryo nga nagtuon sa Bibliya uban kang Tukiso

[Hulagway sa panid 5]

Si Maseiso diha sa pultahan sa iyang balay ug ang misyonarya nga maoy nagtuon sa Bibliya uban niya