Nagkinabuhi na ba Gayod Kita sa “Kataposang mga Adlaw”?

DUNAY duha ka kausaban nga motabang kanato sa pagsabot sa gitawag sa Bibliya nga kataposang mga adlaw. Ang Kasulatan nagtagnag mga hitabo panahon sa “kataposan sa sistema sa mga butang.” (Mateo 24:3) Gihisgotan usab sa Bibliya ang kausaban sa mga tinamdan ug panglihok sa mga tawong nagkinabuhi sa “kataposang mga adlaw.”—2 Timoteo 3:1.

Ang mga hitabo sa kalibotan ug ang pamatasan sa mga tawo nagpamatuod nga kita nagkinabuhi na sa kataposang mga adlaw ug nga ang Gingharian sa Diyos sa dili madugay magdalag walay-kataposang mga panalangin niadtong nahigugma sa Diyos. Sugdan nato kini pinaagi sa pagsusi sa tulo ka bahin nga matod ni Jesus maoy magtimaan sa kataposang mga adlaw.

“Sinugdanan sa mga Kaul-ol sa Kasakit”

“Ang nasod motindog batok sa nasod ug ang gingharian batok sa gingharian,” si Jesus miingon, “ug aduna unyay mga kanihit sa pagkaon ug mga linog sa nagkalainlaing mga dapit.” Siya midugang: “Kining tanan maoy sinugdanan sa mga kaul-ol sa kasakit.” (Mateo 24:7, 8) Tagsatagsaon nato pagsusi “kining tanan.”

Hilabihan ka daghang tawo ang gipamatay sa mga gubat ug mga away sa mga rasa sa miaging siglo. “Tulo ka pilo nga mas daghan ang nangamatay sa gubat sa [ika-20ng] siglo kay sa tanang gubat gikan sa unang siglo AD ngadto sa 1899,” nag-ingon ang usa ka akademikong taho sa Worldwatch Institute. Sa iyang basahong Humanity—A Moral History of the Twentieth Century, si Jonathan Glover misulat: “Gibanabana nga gikan sa 1900 hangtod sa 1989 ang gubat nakapatay ug 86 milyones ka tawo. . . . Lisod hisabtan kon nganong hilabihan ka daghan ang nangamatay sa gubat sa ikabayenteng siglo. Kon kuhaon ang aberids sa gidaghanon sa nangamatay, kini dili motakdo sa tinuod nga gidaghanon, kay mga dos-tersiya (58 milyones) ang nangamatay sa duha ka gubat sa kalibotan. Apan kon kining gidaghanona nagpadayon pa nga wala mausab sa bug-os nga ikabayenteng siglo, ang gubat mipatay untag mga 2,500 ka tawo kada adlaw, kana maoy kapin sa 100 ka tawo kada oras nga walay hunong, sulod sa nubenta ka tuig. Mahanduraw ba nimo ang kaguol ug kasakit nga gipahinabo niini ngadto sa milyonmilyong kaparyentehan ug mga higala sa mga nangamatay?

Bisan pag ang kalibotan nagpatunghag dagayang pagkaon, ang mga ilhanan nga nagpaila sa kataposang mga adlaw naglakip sa kakulang sa pagkaon. Ang mga tigdukiduki nag-ingon nga sa miaging 30 ka tuig, ang produksiyon sa pagkaon mas kusog kay sa pagdaghan sa mga tawo. Bisan pa niana, ang kakulang sa pagkaon nagkaylap sa dagkong mga dapit sa kalibotan kay daghang tawo walay bastanteng yutang katamnan o igong salapi sa pagpalit ug pagkaon. Sa kabos nga mga nasod, mga 1.2 bilyones ka tawo ang nagmantinil na lamang sa kinitaan nga usa ka dolyar (U.S.) sa usa ka adlaw o ubos pa niana. Niining mga tawhana, mga 780 milyones ang nagping-it kanunay sa kagutom. Sumala pa sa World Health Organization, kada tuig ang malnutrisyon maoy pangunang hinungdan sa kamatayon sa kapin sa lima ka milyong kabataan.

Unsay ikaingon bahin sa gitagnang mga linog? Sumala pa sa U.S. Geological Survey, ang gidaghanon sa mga linog nga makaguba ug mga bilding nag-aberids ug 17 kada tuig sukad sa 1990 lamang. Sa aberids, ang mga linog nga halos bug-os nga makapahugno ug mga bilding nahitabo kas-a matag tuig. “Ginatos ka libong kinabuhi ang napatay sa mga linog sa miaging 100 ka tuig,” nag-ingon ang laing tinubdan. Ang usa ka hinungdan niini mao nga sukad sa 1914 ang mga lugar nga daghan kaayog tawo natukod sa mga dapit nga kanunay agian ug linog.

Laing Mahinungdanong mga Kausaban

‘Aduna unyay mga kamatay sa nagkalainlaing mga dapit,’ matod ni Jesus. (Lucas 21:11) Mas moderno karon ang medikal nga siyensiya kay sukad masukad. Sa gihapon, ang bag-o ug daang mga sakit nagpadayon sa pagsakit sa katawhan. Ang usa ka taho sa U.S. National Intelligence Council nag-ingon: “Bayente ka iladong mga sakit—nga naglakip sa tesis (TB), malarya, ug kolera—mitungha pag-usab o mikaylap sa daghang lugar sukad sa 1973, nga sagad mas grabe na ug di na madutlan ug tambal. Labing menos 30 ka sakit nga wala mailhi kaniadto ang nailhan sukad sa 1973, lakip na ang HIV, Ebola, hepatitis C, ug Nipah virus, nga karon wala pay tambal.” Sumala sa taho sa Red Cross niadtong Hunyo 28, 2000, sa miaging tuig, ang gidaghanon sa mga tawong nangamatay tungod sa makatakod nga mga sakit maoy halos 160 ka pilo nga mas daghan kay sa nangamatay sa natural nga mga katalagman.

Ang “pag-uswag sa kalapasan” maoy laing dayag nga ilhanan sa kataposang mga adlaw. (Mateo 24:12) Sa kadaghanang bahin sa kalibotan karon, ang mga tawo dili mobiya sa ilang mga pinuy-anan nga dili makandadohan ni mobating luwas diha sa dalan sa magabii. Ug komosta na man ang hugaw nga hangin, tubig ug yuta nga atong nakitang nagakahitabo, nga sagad tungod sa ilegal nga mga buhat? Katumanan usab kini sa gitagna sa Bibliya. Ang basahon sa Pinadayag naghisgot bahin sa tinudlong panahon sa Diyos sa “paglaglag sa mga nagalaglag sa yuta.”—Pinadayag 11:18.

Kon Unsay Kinaiya sa mga Tawo sa Kataposang mga Adlaw

Palihog paklia ang imong Bibliya sa 2 Timoteo 3:1-5 ug basaha. Si apostol Pablo misulat: “Sa kataposang mga adlaw moabot ang makuyaw nga mga panahong lisod sagubangon.” Dayon iyang gilista ang 20 ka kinaiya nga magpaila sa dili-diyosnong mga tawo. Nakita ba nimo kining mga kinaiyaha sa mga tawong nagpuyo sa inyong lugar? Matikdi ang gisulti dili pa dugay bahin sa mga tawo karon.

‘Mahigugmaon sa ilang kaugalingon.’ (2 Timoteo 3:2) [Ang mga tawo] karon magtuman sa ilang gusto. [Sila] nahimong mga diyos, ug nagdahom nga tagdon sila sa ingon.”—Financial Times, mantalaan, Inglaterra.

‘Mahigugmaon sa salapi.’ (2 Timoteo 3:2) “Ang kahakog sa materyalismo di pa dugay milabaw sa pagkamakasaranganon. Kon sa tan-aw sa mga tawo ikaw dili dato, ang imong kinabuhi walay pulos.”—Jakarta Post, mantalaan, Indonesia.

“Dili-masinugtanon sa mga ginikanan.” (2 Timoteo 3:2) “Ang mga ginikanan nalibog sa pagkakita nga gimandoan sila sa ilang 4-anyos nga anak nga mora bag siya si Louis XIV [Hari sa Pransiya] o sa ilang 8-anyos nga anak nga misinghag kanila, ‘Lagot ko ninyo!’”—American Educator, magasin, Tinipong Bansa.

“Dili-maunongon.” (2 Timoteo 3:2) “Ang kusog kaayong pagdaghan sa mga lalaking andam nga mobiya sa ilang mga kapikas ug mga anak lagmit mao ang kinadak-ang kausaban sa moralidad sa [miaging 40 ka tuig].”—Wilson Quarterly, magasin, Tinipong Bansa.

“Walay kinaiyanhong pagbati.” (2 Timoteo 3:3) “Ang kapintasan diha sa panimalay maoy naggahom sa adlaw-adlawng kinabuhi sa mga komunidad sa tibuok kalibotan.”—Journal of the American Medical Association, magasin, Tinipong Bansa.

“Walay pagpugong-sa-kaugalingon.” (2 Timoteo 3:3) “Daghang balita diha sa headline sa mantalaan kada buntag ang nagpakita sa panghunahuna sa pagkawalay pagpugong sa kaugalingon, paghupot sa moralidad ug kaluoy ngadto sa ilang isigkatawo ug bisan sa ilang kaugalingon. . . . Kon ang atong katilingban magpadayon sa pag-uyon sa kapintasan sama karon, kini sa dili madugay bug-os nga mawad-an ug moralidad.”—Bangkok Post, mantalaan, Thailand.

“Mabangis.” (2 Timoteo 3:3) “Ang dili-makataronganong kasuko ug dili-mapugngang kapungot makita diha sa mga drayber sa dalan, sa pag-abuso diha sa mga panimalay, . . . ug sa dayag nga dili-makataronganon ug wala-kinahanglanang kapintas nga sagad malangkit sa krimen. Ang kapintasan mahitabo nga walay basehanan ug dili matag-an ug ang mga tawo mobating sinalikway ug walay dag-anan.”—Business Day, mantalaan, Habagatang Aprika.

“Mahigugmaon sa kalipayan inay nga mga mahigugmaon sa Diyos.” (2 Timoteo 3:4) “Ang seksuwal nga kagawasan nahimong krusada batok sa moral, diin ang Kristohanong moralidad mao ang kaaway.”—Boundless, magasin bahin sa Internet.

“Nagbaton sa dagway sa diyosnong pagkamahinalaron apan nagpanghimakak sa gahom niini.” (2 Timoteo 3:5) “[Usa ka pampam kanhi sa Netherlands] miingon nga ang pagsupak nga himoong legal [ang pagpamampam] sagad naggikan sa relihiyosong mga grupo. Siya mihunong makadiyot, dayon misulting mapahiyomon nga sa pampam pa siya, daghang [relihiyosong] ministro ang iyang regular nga mga kustomer. ‘Ang mga pampam kanunayng moingon nga ang ilang labing maayong mga kustomer naggikan sa relihiyosong mga grupo,’ dayon niyag katawa.”—National Catholic Reporter, mantalaan, Tinipong Bansa.

Unsay Anaa sa Unahan?

Ang kalibotan karon napuno sa kasamok, sama sa gitagna sa Bibliya. Apan, ang tagna bahin sa “ilhanan sa presensiya [ni Kristo] ug sa kataposan sa sistema sa mga butang” adunay positibong bahin. “Kining maayong balita sa gingharian igawali sa tibuok gipuy-ang yuta ingon nga pagpamatuod ngadto sa tanang kanasoran,” matod ni Jesus. (Mateo 24:3, 14) Ang maayong balita sa Gingharian sa Diyos ginawali na sa kapin sa 230 ka nasod. Kapin sa unom ka milyong tawo nga gikan sa “tanang kanasoran ug mga tribo ug katawhan ug mga pinulongan” ang aktibong nagwali sa Gingharian. (Pinadayag 7:9) Unsay nalampos sa ilang masibotong kalihokan? Kini: Ang mensahe kon unsa ang Gingharian, kon unsay himoon niini, ug kon sa unsang paagi madawat ang mga panalangin niini mabatonan na sa halos tanang tawo sa yuta. Sa pagkatinuod, ‘ang matuod nga kahibalo modagaya sa panahon sa kataposan.’—Daniel 12:4.

Angay gayod nga mabatonan nimo kining kahibaloa. Matikdi kon unsay mahitabo human nga masangyaw ang maayong balita sa sukod nga tagbaw na si Jehova. Si Jesus miingon: “Unya moabot ang kataposan.” (Mateo 24:14) Mao na kanay panahon nga ang Diyos maghanaw sa tanang pagkadaotan sa yuta. Ang Proverbio 2:22 nag-ingon: “Kon mahitungod sa mga daotan, sila pagaputlon gikan sa yuta; ug kon bahin sa mga maluibon, sila pagalukahon gikan niini.” Unsay buhaton kang Satanas ug sa iyang mga demonyo? Sila itambog sa bung-aw, ug dili na sila makapahisalaag sa mga nasod. (Pinadayag 20:1-3) Dayon “ang mga matul-id . . . ug ang walay-ikasaway mao ang magpabilin” sa yuta. Ug ilang tagamtamon ang kahibulongang mga panalangin sa Gingharian.—Proverbio 2:21; Pinadayag 21:3-5.

Unsay Angay Nimong Himoon?

Kini dili kaduhaduhaan. Ang kataposan sa sistema ni Satanas haduol na. Kadtong dili magtagad sa ebidensiya nga kita nagkinabuhi na sa kataposang mga adlaw makurat na lang inig-abot sa kataposan. (Mateo 24:37-39; 1 Tesalonica 5:2) Busa, giingnan ni Jesus ang iyang mga mamiminaw: “Bantayi ang inyong kaugalingon nga ang inyong mga kasingkasing dili mabug-atan sa pagpalabig kaon ug sa pagpalabig inom ug sa mga kabalaka sa kinabuhi, ug sa kalit kanang adlawa dihadiha modangat kaninyo ingon nga usa ka lit-ag. Kay moabot kini sa tanang nagapuyo ibabaw sa tibuok nawong sa yuta. Nan, magpadayon sa pagtukaw, nga sa tanang panahon magapangamuyo aron molampos kamo sa pag-ikyas niining tanang butanga nga gitakdang mahitabo, ug sa pagbarog atubangan sa Anak sa tawo.”—Lucas 21:34-36.

Kadto lamang adunay inuyonang kahimtang atubangan sa Anak sa tawo, si Jesus, ang makalabang buhi sa kataposan niining sistemaha sa mga butang. Hinungdanon gayod nga atong gamiton ang nahibiling panahon nga mabatonan ang pag-uyon ni Jehova nga Diyos ug ni Jesu-Kristo! Sa iyang pag-ampo sa Diyos, si Jesus miingon: “Kini nagkahulogan ug kinabuhing walay kataposan, ang ilang pagkuha ug kahibalo bahin kanimo, ang bugtong matuod nga Diyos, ug sa usa nga imong gipadala, si Jesu-Kristo.” (Juan 17:3) Busa sa imong bahin, maoy dalan sa kaalam ang pagkat-on ug dugang bahin kang Jehova nga Diyos ug sa iyang mga kinahanglanon. Ang mga Saksi ni Jehova sa inyong lugar malipay sa pagtabang kanimo sa pagsabot sa kon unsay gitudlo sa Bibliya. Kami mainitong nagdapit kanimo sa pagpakigkita kanila o sa pagsulat ngadto sa mga magpapatik niining magasina.

[Kahon/Mga hulagway sa panid 7]

MGA ILHANAN SA KATAPOSANG MGA ADLAW

DAGKONG MGA HITABO:

▪ Mga gubat.—Mateo 24: 6, 7.

▪ Mga kanihit sa pagkaon.—Mateo 24:7.

▪ Mga linog.—Mateo 24:7.

▪ Mga Kamatay.—Lucas 21:11.

▪ Pag-uswag sa kalapasan.—Mateo 24:12.

▪ Paglaglag sa yuta.—Pinadayag 11:18.

MGA TAWO:

▪ Mga mahigugmaon sa ilang kaugalingon.—2 Timoteo 3:2.

▪ Mga mahigugmaon sa salapi.—2 Timoteo 3:2.

▪ Mapahitas-on.—2 Timoteo 3:2.

▪ Dili masinugtanon sa mga ginikanan.—2 Timoteo 3:2.

▪ Dili mapasalamaton.—2 Timoteo 3:2.

▪ Dili maunongon.—2 Timoteo 3:2.

▪ Walay kinaiyanhong pagbati.—2 Timoteo 3:3.

▪ Walay pagpugong sa kaugalingon.—2 Timoteo 3:3.

▪ Mabangis.—2 Timoteo 3:3.

▪ Mahigugmaon sa kalipayan.—2 Timoteo 3:4.

▪ Relihiyosong mga salingkapaw.—2 Timoteo 3:5.

MATUOD NGA MGA MAGSISIMBA:

▪ Dunay dagayang kahibalo.—Daniel 12:4.

▪ Nagwali sa maayong balita sa tibuok kalibotan.—Mateo 24:14.

[Credit Line]

UNITED NATIONS/Photo by F. GRIFFING