Tan-awa! Pagkaanindot sa Kahayag!

KON nakasulay ka na nga magsukarap sa kangitngit, nasayod ka kon unsa ka lisod kini. Pagkadako sa imong pasalamat sa dihang nakakita ka ug kahayag! Tingali nakasinati ka na usab ug kahimtang diin morag anaa ka sa kangitngit. Tingali nahitabo kini sa dihang wala kay makitang solusyon sa imong problema. Dayon, sa ngadtongadto nakakita ka ug kahayag—nakakita ka ug solusyon. Nindot kaayo ang paminaw nga samag nakagawas gikan sa kangitngit ngadto sa kahayag.

Niadtong unang siglo, kadaghanan sa mga tawo nagsukarap sa espirituwal nga kangitngit. Si apostol Pedro misulat ngadto sa mga tawong mibiya sa ilang tinuohan kanhi ug misagop sa Kristiyanidad: “[Ang Diyos] nagtawag kaninyo gikan sa kangitngit ngadto sa iyang katingalahang kahayag.” (1 Pedro 2:9) Sila daw nagsukarap sa tumang kangitngit ug dayon nakagawas ngadto sa masanag nga kahayag. Ikatandi usab kini sa usa ka tawong nag-inusara nga walay paglaom ug dayon nahimong membro sa usa ka pamilya nga may seguradong kaugmaon.—Efeso 2:1, 12.

“Imong Gibiyaan ang Gugma nga Imong Nabatonan sa Sinugdan”

Nakaplagan sa unang mga Kristohanon ang “kamatuoran”—ang matuod nga Kristohanong pagtuo. (Juan 18:37) Ilang nakita ang nindot kaayo nga kahayag sa kamatuoran ug sila mihimog aksiyon, ilang gibiyaan ang espirituwal nga kangitngit ug midangop sa kahayag. Apan paglabay sa panahon, ang kadasig ug kasibot nga gibati sa ubang mga Kristohanon sa sinugdan mibugnaw. Pananglitan, sa hinapos nga bahin sa unang siglo, dihay bug-at nga problemang mitungha sa kongregasyon sa Efeso. Gipadayag sa gibanhawng Jesu-Kristo ang problema, nga nag-ingon: “Ako adunay ikasulti batok kanimo, nga imong gibiyaan ang gugma nga imong nabatonan sa sinugdan. Busa hinumdomi kon gikan sa unsa ka nahulog, ug paghinulsol ug buhata ang mga buhat kaniadto.” (Pinadayag 2:4, 5) Kinahanglang halingon pag-usab sa mga Kristohanon sa Efeso ang ilang gugma alang sa Diyos ug sa kamatuoran.

Komosta man sa atong bahin? Nalipay usab kita sa dihang atong nakita ang kahayag, sa dihang atong nakat-onan ang maanindot kaayong kamatuoran sa Pulong sa Diyos. Atong gihigugma ang kamatuoran. Apan kining gugmaha mahimong mobugnaw tungod sa mga kalisdanan nga kasagarang ginaantos sa mga tawo. Nakapasamot pa tingali niini ang mga problema nga nalangkit sa “kataposang mga adlaw.” Nagkinabuhi kita sa “makuyaw nga mga panahong lisod sagubangon”—sa usa ka kalibotan nga gipuy-an sa mga tawong ‘mahigugmaon sa ilang kaugalingon, mahigugmaon sa salapi, mapagawalon, mapahitas-on, mapasipalahon, dili-masinugtanon sa mga ginikanan, dili-mapasalamaton, dili-maunongon.’ (2 Timoteo 3:1, 2) Ang ilang impluwensiya makapaluya sa atong pag-alagad ug mahimong hinungdan sa pagkabugnaw sa atong gugma kang Jehova.

Kon ang gugma nga atong nabatonan sa sinugdan nawala na, kinahanglang atong ‘hinumdoman kon gikan sa unsa kita nahulog, ug maghinulsol.’ Kinahanglang atong ipasig-uli ang atong espirituwal nga kahimtang kanhi. Dugang pa, kinahanglang magbantay kita nga ang atong apresasyon sa kamatuoran dili moawop. Pagkahinungdanon nga atong huptan ang positibo ug malipayong panglantaw ug huptang buhi ang atong gugma sa Diyos ug sa iyang kamatuoran!

‘Ang Kamatuoran nga Magpagawas Kanato’

Ang kahayag sa kamatuoran sa Kasulatan nindot kaayo tungod kay ang Bibliya nagtubag sa hinungdanong mga pangutana nga nakapalibog sa mga tawo sa libolibo nang katuigan. Kini ang pipila sa maong mga pangutana: Nganong ania kita dinhi? Unsa ang katuyoan sa kinabuhi? Nganong aduna may daotan? Aduna bay kinabuhi human sa kamatayon? Si Jehova naghatag kanato ug kalamdagan pinaagi sa nindot kaayong mga doktrina sa kamatuoran. Dili ba angay gayod kitang magpasalamat? Hinaot nga dili gayod nato ibalewala ang atong nakat-onan!

Gisultihan ni Jesus ang iyang mga tinun-an: “Kamo mahibalo sa kamatuoran, ug ang kamatuoran magpagawas kaninyo.” (Juan 8:32) Ang halad lukat ni Jesus nagpaposible nga mahigawas kita sa sala ug kamatayon. Apan kining bililhong mga kamatuoran nakapahigawas usab kanato gikan sa pagkawalay-alamag ug pagkawalay-kasegurohan sa kalibotan nga nalukop sa kangitngit. Ang mapasalamatong pagpalandong bahin sa atong nakat-onan makatabang kanato sa pagpalig-on sa atong gugma kang Jehova ug sa iyang Pulong.

Sa mga Kristohanon sa Tesalonica, si apostol Pablo misulat: “Dihang nadawat ninyo ang pulong sa Diyos, nga inyong nadungog gikan kanamo, inyong gidawat kini, dili ingong pulong sa mga tawo, kondili, ingon sa kon unsa kini sa pagkatinuod, ingong pulong sa Diyos, nga naglihok usab diha kaninyo nga mga magtutuo.” (1 Tesalonica 2:13) Ang mga taga-Tesalonica nakadungog ug ‘midawat sa pulong sa Diyos nga may kalipay.’ Sila wala na “sa kangitngit.” Hinunoa, sila nahimo nang “mga anak sa kahayag.” (1 Tesalonica 1:4-7; 5:4, 5) Nakat-onan sa maong mga Kristohanon nga si Jehova mao ang Maglalalang ug nga siya labing gamhanan, maalamon, mahigugmaon, ug maluluy-on. Sama sa ubang mga sumusunod ni Kristo, ilang nakat-onan nga si Jehova naghimog paagi sa pagpala sa ilang mga sala pinaagi sa halad lukat sa iyang Anak nga si Jesu-Kristo.—Buhat 3:19-21.

Bisan tuod kulang pa ang kahibalo sa mga taga-Tesalonica bahin sa kamatuoran, sila nasayod kon asa sila mangitag kahibalo. Ang inspiradong Kasulatan makatabang sa tawo sa Diyos nga mahimong “takos gayod, bug-os nga masinangkapan alang sa tanang maayong buhat.” (2 Timoteo 3:16, 17) Mahimong gipadayon sa mga Kristohanon sa Tesalonica ang ilang pagtuon sa kamatuoran, ug ilang napamatud-an sa daghang higayon nga nindot gayod kaayo ang kahayag gikan sa Diyos. Sila may katarongan nga magmalipayon kanunay. (1 Tesalonica 5:16) Ug kita usab angayng mobatig ingon niana.

Kahayag sa Atong Alagianan

Naghisgot sa hinungdan kon nganong maayo kaayo ang kahayag, ang salmista miawit: “Ang imong pulong maoy lampara sa akong tiil, ug kahayag sa akong alagianan.” (Salmo 119:105) Ang giya gikan sa Pulong sa Diyos makatabang kanato nga dili mahisalaag ug makatabang usab kanato sa pagtagamtam ug makahuloganong kinabuhi. Dili kinahanglang mahisama kita sa usa ka sakayan nga gianod-anod. Ang pagkahibalo ug pagpadapat sa kamatuoran manalipod kanato aron dili kita ‘matuyatuya sa mga balod ug madala ngadto-nganhi sa matag hangin sa pagtulon-an.’—Efeso 4:14.

“Ayaw ibutang ang inyong pagsalig sa mga hamili, ni sa anak sa yutan-ong tawo, nga kaniya walay kaluwasan,” nag-ingon ang Bibliya. Kini miingon usab: “Malipayon siya nga ang Diyos ni Jacob maoy iyang panabang, kansang paglaom anaa kang Jehova nga iyang Diyos.” (Salmo 146:3, 5) Dugang pa, ang pagsalig kang Jehova motabang kanato sa pagbuntog sa kahadlok ug kabalaka. Si apostol Pablo misulat: “Ayaw kabalaka sa bisan unsang butang, apan sa tanang butang pinaagi sa pag-ampo ug pangamuyo uban ang pagpasalamat ipahibalo ang inyong mga pangaliya sa Diyos; ug ang kalinaw sa Diyos nga labaw sa tanang panghunahuna magbantay sa inyong mga kasingkasing ug sa inyong mga gahom sa pangisip pinaagi kang Kristo Jesus.” (Filipos 4:6, 7) Makabaton gayod kitag kaayohan tungod kay kita gilamdagan sa Pulong sa Diyos.

Sidlak Ingong mga Magbabanwag sa Kalibotan

Ang lain pang hinungdan kon nganong nindot kaayo ang kahayag gikan sa Pulong sa Diyos mao nga kini nagbukas sa kahigayonan nga mahimo sa mga tawo ang labing dungganong buluhaton. Gisugo ni Jesus ang iyang mga sumusunod: “Panglakaw kamo ug paghimog mga tinun-an sa katawhan sa tanang kanasoran, nga magabawtismo kanila sa ngalan sa Amahan ug sa Anak ug sa balaang espiritu, nga magatudlo kanila sa pagtuman sa tanang butang nga akong gisugo kaninyo. Ug, tan-awa! ako magauban kaninyo sa tanang adlaw hangtod sa kataposan sa sistema sa mga butang.” Una pa niya gisulti ang maong sugo, siya miingon: “Ang tanang awtoridad gihatag na kanako sa langit ug sa yuta.”—Mateo 28:18-20.

Matikdi kon kinsay nagatabang sa matuod nga mga Kristohanon diha sa pagsangyaw sa maayong balita ug sa pagtudlo sa mga kamatuoran sa Bibliya ngadto sa mga tawo sa tanang kanasoran. Gisaaran ni Jesus ang iyang mga sumusunod nga siya magauban kanila. Sa pagkatinuod siya nagatabang ug nagapaluyo kanila samtang sila ‘nagpalamdag sa ilang kahayag’ pinaagi sa ilang ministeryo ug pinaagi sa uban pang “maayong mga buhat.” (Mateo 5:14-16) Apil usab ang mga manulonda niining buluhaton sa pagwali. (Pinadayag 14:6) Apil ba usab si Jehova nga Diyos? Si apostol Pablo misulat: “Ako ang nagtanom, si Apolos ang nagbisibis, apan ang Diyos ang nagpadayon sa pagpatubo niini.” Pagkadakong pribilehiyo nga mahimong usa sa “mga isigkamagbubuhat sa Diyos”!—1 Corinto 3:6, 9.

Hunahunaa usab kon sa unsang paagi gipanalanginan ang atong mga paningkamot sa paghimo niining hinatag-sa-Diyos nga buluhaton. Walay ikatandi sa atong hinatag-sa-Diyos nga pribilehiyo sa ‘pagsidlak ingong mga magbabanwag sa kalibotan.’ Pinaagi sa pagpadayag sa kahayag sa Pulong sa Diyos diha sa atong sinultihan ug panggawi, kita makatabang gayod sa mga tawong matinud-anon ug kasingkasing. (Filipos 2:15) Ug mahimo kitang magmalipayon samtang makugihong nagsangyaw ug nagtudlo, ‘kay ang Diyos dili kay dili-matarong nga kalimtan ang atong buhat ug ang gugma nga atong gipakita alang sa iyang ngalan.’—Hebreohanon 6:10.

‘Palit ug Banyos-sa-Mata nga Ihidhid sa Imong mga Mata’

Diha sa iyang mensahe sa unang-siglong kongregasyon sa Laodicea, si Jesus miingon: ‘Palit gikan kanako ug banyos-sa-mata nga ihidhid sa imong mga mata aron ikaw makakita. Ang tanan nga akong gimahal akong ginabadlong ug ginadisiplina.’ (Pinadayag 3:18, 19) Ang epektibong tambal alang sa espirituwal nga pagkabuta mao ang “banyos-sa-mata”—ang mga pagtulon-an ug pagdisiplina ni Jesus. Aron atong mahuptan ang usa ka maayong espirituwal nga panglantaw, kita kinahanglang modawat ug magpadapat sa iyang tambag ug mosunod sa pagtultol nga makita diha sa tibuok Bibliya. Kinahanglang batonan usab nato ang tinamdan nga sama sa iya ni Kristo ug sundogon ang iyang panig-ingnan. (Filipos 2:5; 1 Pedro 2:21) Ang banyos-sa-mata dili libre. Si Jesus miingon: ‘Palita kini gikan kanako.’ Kini mokostar sa atong panahon ug paningkamot.

Kon kita gikan sa ngitngit ug mosulod sa hayag nga lawak, dangtan unag pipila ka gutlo ayha pa makapahiangay ang atong panan-aw. Sa samang paagi, nagkinahanglan ug panahon ang pagtuon sa Pulong sa Diyos aron makita ang kahayag sa kamatuoran. Nagkinahanglan ug panahon ang pagpamalandong kon unsay atong nakat-onan ug kon unsa ka bililhon ang kamatuoran. Bisan pa niana, dili ra kaayo dako ang maong pagsakripisyo. Ngano? Tungod kay nindot kaayo ang kahayag!

[Hulagway sa panid 14]

‘Palit gikan kanako ug banyos-sa-mata nga ihidhid sa imong mga mata aron ikaw makakita’