“Ginoo, Nganong Nagpakahilom Ka ra Man?”
KINI ang giingon ni Papa Benedicto XVI, kinsa mibisita sa kanhing kampo konsentrasyon sa Auschwitz, Polandia, niadtong Mayo 28, 2006. Sa dapit diin ginatos ka libong mga Hudiyo ug uban pa ang gipamatay sa mga Nazi, siya midugang: “Pagkadaghang pangutana ang motungha niining dapita! Ang kasagarang ipangutana mao: Hain man ang Diyos niadtong mga panahona? Nganong nagpakahilom ra man siya? Nganong iya mang gitugotan kining daghan kaayong pagpamatay, kining kadaogan sa pagkadaotan? . . . Kinahanglang dili kita mohunong sa pagtuaw ngadto sa Diyos sa mapainubsanon apan mapinadayonon nga paagi: Lihok Oh Diyos! Ayawg kalimti ang katawhan nga imong gilalang!”
Daghan ang wala makauyon sa pakigpulong sa papa. Nakamatikod ang uban nga dunay hinungdanong mga punto nga wala mahisgoti, sama sa wala niya paghisgot sa pagpihig batok sa mga Hudiyo nga nalangkit sa mangilngig nga mga buhat didto sa Auschwitz. Gisabot sa uban ang iyang giingon nga gisulayan lang niya sa pagpagaan ang gihangyo ni Papa Juan Paulo II bahin sa pagpasaylo sa mga sala nga nahimo sa simbahan. Usa ka Katolikong magsusulat nga si Filippo Gentiloni, miingon: “Makataronganon gayod ang daghang komentarista nga sa dihang gisukna sa lisod nga pangutana kon hain ang Diyos—usa ka pangutanang walay tubag—nangayo hinuon ug tubag sa mas sayon nga pangutana nga: Hain man si Pio XII?” Ang mga komentarista nagtumong sa pagpakahilom ni Papa Pio XII panahon sa Holocaust.
Ang Holocaust ug ang tanang uban pang pagpamatay nga nahimo sa tibuok kasaysayan sa tawo nagpamatuod nga “ang tawo nagmando sa tawo alang sa iyang kadaotan.” (Ecclesiastes 8:9) Gawas pa, ang Maglalalang sa tawo wala magpakahilom maylabot sa makalilisang kaayo nga panghitabo. Sa Bibliya, iyang gibutyag ang iyang mga katarongan sa pagtugot sa pagkadaotan. Apan ang Diyos nagpasalig usab nga wala siya malimot sa katawhan. Gani, ang yugto sa panahon diin gitugotan sa Diyos ang tawo nga magmando sa iyang kaugalingon hapit nang matapos. (Jeremias 10:23) Gusto ka bang mahibalo ug dugang pa bahin sa katuyoan sa Diyos alang kanato? Ang mga Saksi ni Jehova malipay sa pagtabang kanimo sa pagsusi sa tubag sa Bibliya sa mga pangutana nga nakapalibog kang Papa Benedicto XVI.
[Picture Credit Line sa panid 32]
Oświęcim Museum